May ebidensya nga ini nga mga pulong nagtutudlok ha espiritu nga mga anak han Dios. Pero ano an ebidensya?

An siyahan hito nga mga bersikulo nasiring: “Ha pagtan-aw han mga anak nga lalaki han Dios nga an mga anak nga babaye han tawo mga maghusay, ira ginkuha hira nga mga asawa ha ngatanan nga ira ginpili.”—Gen. 6:2.

Ha Hebreo nga Kasuratan, an mga pulong nga “mga anak nga kalalakin-an han tinuod nga Dios” ngan “mga anak nga kalalakin-an han Dios” mababasa ha orihinal nga yinaknan ha Genesis 6:2, 4; Job 1:6; 2:1; 38:7; ngan Salmo 89:6. Ano an iginpapasabot hito nga mga teksto mahitungod hini nga “mga anak nga kalalakin-an han Dios”?

An aton mababasa nga “mga anak nga kalalakin-an han Dios” ha Job 1:6 matin-aw nga amo an espiritu nga mga linarang nga nagkatirok ha atubangan han Dios. Usa ha ira amo hi Satanas nga ‘nagsudoy-sudoy ngadto nganhi dida ha tuna.’ (Job 1:7; 2:1, 2) Mababasa liwat naton ha Job 38:4-7 nga “an ngatanan nga anak nga kalalakin-an han Dios naggugliat ha kalipay” han ‘ginpahamutang han Dios an mga patukoranan’ han tuna. Sigurado nga hira an mga anghel, kay hito nga panahon waray pa laranga an mga tawo. “An mga anak nga kalalakin-an han Dios” nga gin-uunabi ha Salmo 89:6, nga iginhubad nga “anak han mga kusganon” ha An Baraan nga Kasuratan, sigurado nga amo an mga linarang ha langit nga kaupod han Dios, diri mga tawo.

Kon sugad, hin-o an “mga anak nga lalaki han Dios” nga gin-uunabi ha asoy han Genesis 6:2, 4? Uyon ha gin-unabi na nga mga kamatuoran ha Biblia, husto la an pagsiring nga ito nga asoy nagtutudlok ha espiritu nga mga anak han Dios nga kinanhi ha tuna.

Diri natoo an iba nga an mga anghel mahimo magkaada interes ha pakighilawas. An mga pulong ni Jesus ha Mateo 22:30 nagpapakita nga waray pag-asawa ngan pakighilawas didto ha langit. Pero, usahay an mga anghel nagpapakatawo, nakaon ngan nainom pa ngani kaupod han mga tawo. (Gen. 18:1-8; 19:1-3) Salit, husto la an pagsiring nga kon nagpapakatawo hira, mahimo hira makighilawas ha mga babaye.

May mga pamatuod ha Biblia nga ginbuhat gud ito han iba nga anghel. Ha Judas 6, 7, an sala han mga tawo ha Sodoma, nga nagbuhat uyon ha diri-natural nga makasasala nga mga hingyap, iginpariho ha sala han “mga anghel nga waray magpabilin ha ira orihinal nga kahimtang, lugod binaya ha urukyan nga angay ha ira.” Ito nga mga anghel ngan an mga taga-Sodoma pariho “nagpadaog . . . ha sobra nga imoralidad ngan nagbuhat uyon ha diri-natural nga makasasala nga mga hingyap.” An puropariho nga asoy ha 1 Pedro 3:19, 20 nag-uunabi han diri-masinugtanon nga mga anghel ha “mga adlaw ni Noe.” (2 Ped. 2:4, 5) Salit, an ginbuhat han diri-masinugtanon nga mga anghel ha panahon ni Noe maipapariho ha sala han Sodoma ngan Gomorra.

Husto ito nga konklusyon kon mauyon kita nga an “mga anak nga lalaki han Dios” nga gin-uunabi ha Genesis 6:2, 4 amo an mga anghel nga nagpakatawo ngan nagbuhat hin imoralidad upod han kababayin-an.

▪ Iginpatin-aw ni apostol Pedro nga ito nga mga espiritu amo adton “nagin diri-masinugtanon hadto ha mga adlaw ni Noe han mapailubon nga naghinulat an Dios.” (1 Ped. 3:20) Klaro nga an ginhisgotan ni Pedro amo an mga anghel nga inupod kan Satanas ha pagrebelde. Hi Judas nag-unabi han mga anghel nga “waray magpabilin ha ira orihinal nga kahimtang, lugod binaya ha urukyan nga angay ha ira,” ngan nagsiring nga an Dios ‘nag-andam ha ira ha pag-abot han daku nga adlaw ha paghukom.’—Jud. 6.

Paonan-o nagin diri-masinugtanon ito nga mga anghel ha panahon ni Noe? Antes han Baha, iton maraot nga mga espiritu nagpakatawo, bisan kon waray hira sugoa han Dios nga buhaton ito. (Gen. 6:2, 4) Dugang pa, ito nga mga anghel nakighilawas ha kababayin-an, bisan kon diri nira ito puydi buhaton. Waray hira himoa han Dios basi makighilawas ha kababayin-an. (Gen. 5:2) Iton maraot ngan diri-masinugtanon nga mga anghel bubungkagon ha itinanda nga panahon han Dios. Samtang yana, sugad han ginsiring ni Judas, aada hira ha “duro nga kasisidman”—ha simboliko nga prisohan.

Kakan-o ngan paonan-o hi Jesus nagsangyaw hito nga “mga espiritu nga priso”? Hi Pedro nagsurat nga nahitabo ito katapos nga ‘ginbanhaw hi Jesus sugad nga espiritu.’ (1 Ped. 3:18, 19) Tigamni liwat nga hi Pedro nagsiring nga hi Jesus “nagsangyaw.” An paggamit ni Pedro hini nga pulong nagpapakita nga an pagsangyaw nahitabo antes niya igsurat an iya siyahan nga surat. Kon sugad, baga hin pipira ka panahon katapos banhawon hi Jesus, iginpasamwak niya ha magraot nga espiritu an matadong nga sirot nga ipapadapat ha ira. Diri ito pagsangyaw nga naghahatag ha ira hin paglaom. Pagsangyaw ito hin paghukom. (Jon. 1:1, 2) Katapos ipakita ni Jesus an iya pagtoo ngan pagkamaunungon tubtob ha kamatayon ngan ginbanhaw hiya, hito nga paagi ginpamatud-an nga an Yawa waray gud mahihimo ha iya, may basihan na hiya ha pagpasamwak hito nga mensahe han paghukom.—Juan 14:30; 16:8-11.

Ha tidaraon, gagapuson ngan ilalabog ni Jesus ha kahiladman hi Satanas ngan ito nga mga anghel. (Luc. 8:30, 31; Pah. 20:1-3) Samtang diri pa naabot ito nga panahon, iton diri-masinugtanon nga mga espiritu aada ha duro nga espirituwal nga kasisidman, ngan an ira ultimo nga kabungkagan sigurado gud.—Pah. 20:7-10.