1, 2. (a) Ano an importante nga buhaton basi magkaada maopay nga relasyon kan Jehova? (b) Ano an kapulsanan ha aton han pag-usisa han mga asoy ha Kasuratan mahitungod han reaksyon han mga tawo ha disiplina han Dios?

“MAOPAY ito ha akon nga pumahirani ako ngadto ha Dios: hi Jehova nga Ginoo ginhimo nakon nga arayopan.” (Sal. 73:28) Iginpahayag dinhi han salmista an iya pagsarig ha Dios. Kay ano nga naipahayag niya ito? Han naobserbaran han salmista nga murayaw an magraot nga tawo, ha siyahan nasubo gud hiya. Hiya nagsiring: “Kawang la an paghugas ko han akon kasingkasing, ngan an paghunaw ko han akon kamot ha pagkaputli.” (Sal. 73:2, 3, 13, 21) Kondi an pagkadto niya ha “kanan Dios lugar nga baraan” nakabulig ha iya nga bag-uhon an iya panhunahuna ngan magpabilin nga duok ha Dios. (Sal. 73:16-18) Ini nga eksperyensya nagtutdo ha salmista hin importante nga leksyon: An pagin kaapi han katawohan han Dios, pagkarawat hin sagdon, ngan pag-aplikar hito importante basi magin duok kan Jehova.—Sal. 73:24.

² Karuyag liwat naton nga magin duok ha tinuod ngan buhi nga Dios. Basi makab-ot ito, importante gud nga magpamolde kita ha iya sagdon o disiplina basi magin uyon ha iya karuyag an aton personalidad! Ha naglabay nga mga panahon, an Dios maloloy-on nga naghatag hin higayon ha mga indibiduwal ngan mga nasud nga sumunod ha iya disiplina. An mga asoy mahitungod han ira reaksyon iginrekord ha Biblia “ha pagtutdo ha aton” ngan “basi pahamangnoan kita nga nabubuhi ha kataposan hini nga sistema.” (Roma 15:4; 1 Cor. 10:11) An pag-usisa hin maopay hini nga mga asoy mabulig ha aton nga magkaada hin hilarom nga pagsabot ha personalidad ni Jehova ngan mahibaroan kon paonan-o kita magpapahimulos ha iya pagmolde.

3. Paonan-o igin-ilustrar an awtoridad ni Jehova ha mga tawo ha Isaias 64:8 ngan Jeremias 18:1-6? (Kitaa an retrato ha tinikangan hini nga artikulo.)

³ Ha pag-ilustrar han awtoridad ni Jehova ha mga indibiduwal ngan mga nasud, an Isaias 64:8 nasiring: “O Jehova,  ikaw an amon Amay; kami an kalot [o lapok], ngan ikaw an amon parahimo hin daba; ngan kami ngatanan buhat han imo kamot.” An parahimo hin daba makakahimo hin bisan ano nga iya karuyag himoon ha lapok. An lapok diri makakagbuot ha parahimo hin daba kon aanhon hiya. Sugad liwat hito an tawo ngan an Dios. Waray kita katungod nga magsiring ha Dios kon paonan-o kita niya mumoldehon, sugad la nga an lapok diri makakagbuot ha parahimo hin daba kon ano nga klase hin daba o surudlan an hihimoon.—Basaha an Jeremias 18:1-6.

4. Ginagamit ba ni Jehova an iya awtoridad basi piriton pagmolde an mga tawo o nasud? Isaysay.

⁴ Ha kadaan nga nasud han Israel, iginpakita ni Jehova an iya abilidad nga pariho han ginbubuhat han parahimo hin daba ha lapok. Pero may daku nga kaibahan. An parahimo hin daba makakahimo hin bisan ano nga surudlan tikang ha lapok. Ginagamit ba ni Jehova an iya awtoridad basi piriton pagmolde an mga tawo o nasud, ginhihimo an iba nga maopay ngan an iba maraot? An baton han Biblia, diri. Hi Jehova naghatag ha katawohan hin birilhon gud nga regalo, an kagawasan ha pagpili. Diri niya ginagamit an iya awtoridad sugad nga magmarando han uniberso ha paagi nga diri na magagamit an iya regalo. An mga tawo kinahanglan magpili kon magpapamolde hira ha Maglalarang, hi Jehova.—Basaha  an Jeremias 18:7-10.

5. Kon an mga tawo nadiri pagpamolde kan Jehova, paonan-o ginagamit ni Jehova an iya awtoridad?

⁵ Ano man kon an mga tawo matig-a ngan nadiri pagpamolde ha Parahimo hin Daba, hi Jehova? Paonan-o niya ginagamit an iya awtoridad sugad nga Dios? Hunahunaa kon ano an nahitatabo ha lapok kon diri na ito angayan para ha katuyoan hito. Aw, puydi ito himoon nga iba nga surudlan o ilabog na la ito han parahimo hin daba! Kondi, kon an lapok diri na magagamitan, kasagaran na nga an parahimo hin daba an may sayop. Pero diri gud ito an kahimtang ha aton Parahimo hin Daba. (Deut. 32:4) Kon an usa nga tawo diri nasunod ha pagmolde ni Jehova, ito nga tawo an may sayop. Ginagamit ni Jehova an iya awtoridad ha mga tawo pariho han parahimo hin daba pinaagi ha pagbag-o han iya pagtratar ha ira depende han ira reaksyon ha iya pagmolde. An mga nasunod ha iya pagmolde nagigin mapulsanon ha iya. Pananglitan, an dinihogan nga mga Kristiano “mga surudlan nga angay kumarawat han kalooy” nga ginmolde basi magin ‘mga surudlan para ha dungganon nga paggamit.’ Ha luyo nga bahin, an mga matig-a nga nakontra ha Dios nagigin “mga surudlan nga angay kumarawat han kangalas ngan kabungkagan.”—Roma 9:19-23.

6, 7. Ano an kaibahan nira Hadi David ngan Hadi Saul ha ira reaksyon ha sagdon ni Jehova?

 ⁶ An usa nga paagi nga ginmumolde ni Jehova an mga tawo amo an paghatag ha ira hin sagdon o disiplina. Hibabaroan naton kon paonan-o niya ginagamit an iya awtoridad ha iya mga ginmumolde pinaagi ha paghisgot han siyahan nga duha nga hadi han Israel, hira Saul ngan David. Han hi Hadi David nakabuhat hin pag-adulteryo kaupod hi Bat-seba, nagkaada ito maraot nga epekto ha iya ngan ha iba. Bisan kon hadi hi David, marig-on nga gindisiplina hiya ni Jehova. Ginsugo han Dios an iya propeta nga hi Natan basi isumat kan David an mapwersa nga mensahe. (2 Sam. 12:1-12) Ano an reaksyon ni David? Nasubo gud hiya ha iya ginbuhat ngan nagbasol. Tungod hito nakarawat niya an kalooy han Dios.—Basaha an 2 Samuel 12:13.

 ⁷ Ha kabaliktaran, an nahiuna nga hadi kan David nga hi Hadi Saul waray mamati ha sagdon. Pinaagi kan propeta Samuel, ginsugo ni Jehova hi Saul: Gunawa an ngatanan nga Amalekanhon ngan an ira mga hayop. Waray sumunod hi Saul hini nga sugo han Dios. Waray niya pataya an hadi nga hi Agag ngan an mag-opay nga klase han mga hayop. Kay ano? Usa nga hinungdan kay karuyag niya pasidunggan an iya kalugaringon. (1 Sam. 15:1-3, 7-9, 12) Han ginsagdonan hi Saul, namati unta hiya ngan nagpamolde ha Harangdon nga Parahimo  hin Daba. Pero waray hiya sumunod ha pagmolde ha iya. Nangatadongan hiya nga diri sayop an iya ginbuhat. Naghunahuna hiya nga an mga hayop mahimo gamiton sugad nga halad, ngan iya ginminos an sagdon ni Samuel. Ginsalikway ni Jehova hi Saul sugad nga hadi, ngan waray na gud maibalik ni Saul an iya maopay nga relasyon ha tinuod nga Dios.—Basaha an 1 Samuel 15:13-15, 20-23.

8. Ano nga leksyon an aton hibabaroan ha reaksyon han nasud han Israel ha pagmolde ni Jehova?

⁸ Diri la ha mga indibiduwal hi Jehova naghahatag hin higayon nga sumunod ha iya pagmolde kondi pati liwat ha mga nasud. Han 1513 B.C.E., an mga Israelita nakatalwas ha pagkauripon ha Ehipto ngan nagin espesyal nga katawohan ni Jehova. An Israel amo an pinili nga nasud han Dios ngan nakapribilehiyo hira nga moldehon niya, sugad hin iginbutang hira ha hurmaan han Harangdon nga Parahimo hin Daba. Kondi an katawohan padayon nga nagbuhat hin maraot ha paniplatan ni Jehova, ngan ira pa ngani ginsingba an mga dios han mga nasud ha ira palibot. Hi Jehova pauroutro nga nagsugo hin mga propeta basi buligan hira nga magbag-o, kondi an Israel waray mamati. (Jer. 35:12-15) Tungod kay diri hira nasunod kan Jehova, kinahanglan nira hin marig-on nga disiplina. Pariho hin surudlan nga angay bungkagon, an napulo ka tribo nga ginhadian ha norte ginsakop han mga Asiryahanon ngan an duha ka tribo nga ginhadian ha sur ginsakop han mga Babilonyahanon. Importante gud nga leksyon an igintututdo hini ha aton! Magigin mapulsanon la ha aton an pagmolde ni Jehova kon susundon naton ito.

9, 10. Ano an ginbuhat han mga taga-Ninibe han ginpahamangnoan hira han Dios?

 ⁹ An mga tawo ha Ninibe, an kapital han Asirya, gintagan liwat ni Jehova hin higayon nga sumunod ha iya pahamangno. Hi Jehova nagsiring kan Jonas: “Bangon, kadto ha Ninibe, ito nga daku nga bungto, ngan singgit patok hito; kay an ira karaotan inabot ha akon atubangan.” An Ninibe angayan gud bungkagon.—Jon. 1:1, 2; 3:1-4.

¹⁰ Kondi han iginpasamwak ni Jonas an mensahe han kabungkagan, “an mga tawo ha Ninibe nanoo han Dios; ngan hira nagpasangyaw hin pagpuasa, ngan nagsul-ot hin panapton nga sako, tikang ha gidadakui ha ira ngadto ha gigutiayi ha ira.” An ira hadi “binangon tikang ha iya trono, ngan hinukas an iya bisti nga hilaba tikang ha iya, ngan nagtabon ha iya ngahaw hin panapton nga sako, ngan naglingkod dida ha mga agbon.” An mga taga-Ninibe sinunod ha pagmolde ni Jehova ngan nagbasol. Sugad nga resulta, waray hira bungkaga ni Jehova.—Jon. 3:5-10.

11. Ano nga kalidad ni Jehova an matin-aw nga nakita ha iya pagtratar ha Israel ngan ha Ninibe?

¹¹ Bisan kon an Israel pinili nga nasud, kinahanglan hira disiplinahon. Ha kabaliktaran, an mga taga-Ninibe diri espesyal nga katawohan han Dios. Bisan pa hito, iginpahayag ni Jehova an iya paghukom ha ira ngan ginkaloy-an hira han iginpakita nira nga sugad hira hin mahumok nga lapok ha iya mga kamot. Inin duha nga ehemplo matin-aw gud nga nagpapakita nga an aton Dios nga hi Jehova “waray pinalabi ha mga tawo.”—Deut. 10:17.

12, 13. (a) Kay ano nga ginbabag-o han Dios an iya desisyon kon an mga indibiduwal nasunod ha iya pagmolde? (b) Ano an kahulogan han ‘pagbasol’ ni Jehova ha kahimtang ni Saul? han Ninibe?

¹² An paagi han pagmolde ha aton ni Jehova nagpapakita nga makatadunganon ngan mapauyon-uyon hiya. Nakikita ito ha mga kahimtang diin hi Jehova may determinado nga buhaton ha katawohan uyon ha iya matadong nga paghukom kondi nagbabag-o an iya desisyon tungod han ira reaksyon. Mahitungod ha siyahan nga hadi han Israel, an Kasuratan nasiring nga hi Jehova ‘nagbasol nga iya iginbutang hi Saul nga hadi.’ (1 Sam. 15:11) Han an mga taga-Ninibe nagbasol ngan binaya ha pagbuhat hin maraot, an Biblia nasiring: “An Dios nagbasol han maraot nga iya iginsiring nga iya bubuhaton ngada ha ira; ngan hiya waray magbuhat hini.”—Jon. 3:10.

¹³ An Hebreo nga pulong nga iginhubad nga “nagbasol” nagpapasabot hin pagbag-o hin disposisyon o intensyon. Ha tinikangan, gin-uyonan ni Jehova hi Saul. Kondi han nagin diri masinugtanon hi Saul, iginsalikway hiya ni Jehova sugad nga hadi. Nahitabo ini nga pagbag-o, diri tungod kay nagsayop hi Jehova ha pagpili kan Saul, kondi tungod kay hi Saul nagpakita hin kawaray pagtoo ngan nagin diri masinugtanon. Ha kahimtang han mga taga-Ninibe, an tinuod nga Dios nagbasol, karuyag sidngon, ginbag-o niya an iya desisyon mahitungod ha ira. Nakakaliaw gud an paghibaro nga hi Jehova, an aton Parahimo hin Daba, makatadunganon ngan mapauyon-uyon, buotan ngan maloloy-on, andam magbag-o hin desisyon uyon ha positibo nga pagbag-o han mga nakasala!

14. (a) Paonan-o kita ginmumolde ni Jehova yana? (b) Ano an aton sadang magin reaksyon ha pagmolde han Dios?

¹⁴ Ginmumolde kita yana ni Jehova pinaagi han iya Pulong, an Biblia, ngan han iya organisasyon. (2 Tim. 3:16, 17) Diri ba sadang naton karawaton an bisan ano nga sagdon o disiplina nga iginhahatag ha aton pinaagi hini? Anoman kita kaiha nga bawtismado o anoman kadamu nga pribilehiyo an aton nakarawat, kinahanglan padayon kita nga sumunod ha sagdon ni Jehova, nagpapamolde hito basi kita magin mga surudlan para ha dungganon nga paggamit.

15, 16. (a) Ano nga negatibo nga mga pagbati an bangin abaton kon an disiplina nag-uupod han kawad-i hin mga pribilehiyo? Paghatag hin ehemplo. (b) Ano an makakabulig ha aton nga malamposan an negatibo nga mga pagbati tungod han disiplina?

 ¹⁵ An iba nga disiplina bangin iginhahatag ha aton pinaagi hin mga instruksyon o pagtadong. Kondi ha iba nga kahimtang bangin kinahanglan disiplinahon kita tungod kay nakabuhat kita hin sayop. An disiplina bangin mag-upod han kawad-i hin mga pribilehiyo. Tagda an ehemplo ni Dennis * nga nag-alagad sugad nga tigurang. Nakabuhat hiya hin sayop tungod han diri maaramon nga desisyon may kalabotan ha negosyo, ngan ginsaway hiya ha pribado. Ano an inabat ni Dennis ha gab-i nga iginpahibaro ha kongregasyon nga diri na hiya tigurang? “Inabat ko nga pakyas gud ako,” siring niya. “Ha naglabay nga 30 ka tuig damu an akon nagin pribilehiyo. Nagin regular payunir ako, nag-alagad ha Bethel, napili sugad nga ministeryal nga surugoon ngan katapos nagin tigurang. Ngan diri pa la maiha nagkaada ako han akon siyahan nga pahayag ha usa nga distrito nga kombensyon. Tigda la nga nawara ito ngatanan. Labot han pag-abat hin kaawod, naghunahuna liwat ako nga waray na ako lugar ha organisasyon.”

¹⁶ Kinahanglan bag-uhon ni Dennis an iya paggawi ngan bumaya ha pagbuhat han sayop nga nagin hinungdan nga sawayon hiya. Kondi ano an nakabulig ha iya nga malamposan an negatibo nga mga pagbati? Hiya nagsiring: “Determinado ako nga ipadayon an maopay nga rutina ha espirituwal. Ngan sugad liwat kaimportante an suporta ha akon han kabugtoan ngan an pagdasig nga akon nakarawat ha aton mga publikasyon. An artikulo nga ‘May-ada Ka ba Pribilehiyo Hadto? Magigin Kwalipikado Ka ba Utro?’ ha Agosto 15, 2009 nga An Barantayan baga hin surat nga para ha akon sugad nga baton ha akon mga pag-ampo. Ini an sagdon nga akon gud ginpabilhan, ‘Samtang waray ka pa dugang nga responsabilidad ha kongregasyon, parig-ona an imo espirituwalidad.’” Paonan-o nagpahimulos hi Dennis ha disiplina? Paglabay hin pipira ka tuig, hiya nagsiring, “Ginbendisyonan na liwat ako ni Jehova han pribilehiyo nga mag-alagad sugad nga ministeryal nga surugoon.”

17. Paonan-o an pagpaiwas ha kongregasyon mahimo makabulig ha nakasala? Paghatag hin ehemplo.

¹⁷ An pagpaiwas ha kongregasyon usa pa nga klase hin disiplina tikang kan Jehova. Ginpapanalipdan hito an kongregasyon ha maraot nga impluwensya ngan mahimo makabulig ha nakasala nga magbasol. (1 Cor. 5:6, 7, 11) Hi Robert ginpaiwas ha kongregasyon hin hirani 16 ka tuig, ngan durante hito nga panahon an iya mga kag-anak ngan kabugtoan marig-on ngan maunungon nga nagsunod han instruksyon han Pulong han Dios nga diri makig-upod ha mga magburuhat hin maraot, bisan ngani ha pagpangumusta ha ira. Yana, pipira na ka tuig nga nakabalik hi Robert ngan nag-uuswag hiya hin maopay ha espirituwal. Han ginpakianhan hiya kon ano an nagpagios ha iya nga bumalik kan Jehova ngan ha Iya katawohan katapos hin maiha nga panahon, nagsiring hiya nga tungod kay an iya pamilya waray makig-upod ha iya. “Kon an akon pamilya nakig-upod ha akon hin bisan madaliay la, pananglitan ha pagpangumusta ha akon, makukontento na unta ako hito ngan posible nga an akon hingyap nga makaupod hira diri na magpapagios ha akon nga bumalik ha Dios.”

18. Ano an sadang naton magin reaksyon kon ginmumolde kita han Dios?

¹⁸ Bangin diri man kita magkinahanglan hin sugad hito nga disiplina, pero magigin ano nga klase kita hin lapok dida ha kamot han aton Harangdon nga Parahimo hin Daba? Ano an aton magigin reaksyon kon gindidisiplina? Magigin pariho ba kita kan David o kan Saul? Hi Jehova, an Harangdon nga Parahimo hin Daba, aton Amay. Ayaw gud hingalimti nga “an hinihigugma ni Jehova iya sinasaway, bisan sugad han amay ha anak nga iya ikinalilipay.” Salit “ayaw pagtamaya an pagbadlong ni Jehova; ayaw man kauyam han iya pagsaway.”—Prob. 3:11, 12.