1, 2. Ano nga higayon may-ada an mga sangkay ni Jehova?

“HAROS 35 ka tuig na kami nga mag-asawa,” siring han sister nga hi Monika. “Kilala gud namon an usa kag usa. Pero bisan kon maiha na kami nga mag-asawa, may nahibabaroan pa gihapon kami mahitungod ha usa kag usa nga diri gud kami maaram hadto!” Sigurado nga sugad liwat hito an kahimtang han damu nga mag-asawa ngan magsarangkay.

² Nalilipay kita nga mas makilala an aton mga hinigugma. Kondi ha ngatanan nga pakigsangkay nga puydi kita magkaada, waray na mas importante kay han aton pakigsangkay kan Jehova. Diri gud naton hibabaroan an ngatanan nga puydi mahibaroan mahitungod ha iya. (Roma 11:33) Magkakaada kita higayon ngan kalipay nga mas apresyaron an mga kalidad ni Jehova ha waray kataposan.—Ekles. 3:11.

3. Ano an aton hihisgotan hini nga artikulo?

³ An nahiuna nga artikulo nakabulig ha aton nga mas maapresyar an pagin masayon madaop ngan pagin waray pinaurog ni Jehova. Yana hisgotan naton an duha pa nga makaruruyag gud nga mga kalidad ni Jehova—an iya pagkamahinatagon ngan pagkamakatadunganon. Mabulig ito ha aton nga mas masabtan nga “hi Jehova maopay ha ngatanan; ngan an iya mahumok nga mga kalooy aada ha iya ngatanan nga mga buhat.”—Sal. 145:9.

4. Ano an karuyag sidngon han tinuod nga pagkamahinatagon?

⁴ Ano an karuyag sidngon han pagin mahinatagon? Hibabaroan naton an baton ha ginsiring ni Jesus nga mababasa ha Buhat 20:35: “Mas makalilipay an paghatag kay ha pagkarawat.” Pinaagi hiton simple nga mga pulong iginsumat ni Jesus an karuyag sidngon han tinuod nga pagkamahinatagon. An tawo nga mahinatagon kinaburut-on nga naghahatag han iya panahon, kusog, ngan panag-iya para ha kapulsanan han iba—ngan nalilipay hiya ha pagbuhat hito. Oo, an pagkamahinatagon diri ginsusukol pinaagi  ha kadaku han regalo, kondi pinaagi han motibo han naghahatag. (Basaha an 2 Corinto 9:7.) Waray makakatupong ha pagkamahinatagon han aton “malipayon nga Dios,” hi Jehova.—1 Tim. 1:11.

5. Ha ano nga mga paagi iginpapakita ni Jehova an pagkamahinatagon?

⁵ Paonan-o iginpapakita ni Jehova an pagkamahinatagon? Igintatagana niya an mga panginahanglan han ngatanan nga tawo, upod na adton diri pa nagsisingba ha iya. Oo, “hi Jehova maopay ha ngatanan.” Iya “ginpapasirang an adlaw ha magraot ngan mag-opay nga tawo ngan nagpapauran ha magtadong ngan diri-magtadong.” (Mat. 5:45) Ito an hinungdan nga han nakiistorya hi apostol Pablo ha mga diri tumuroo, nakasiring hiya nga hi Jehova ‘nagbubuhat hin maopay pinaagi ha paghatag ha iyo hin uran tikang ha langit ngan hin mga panahon han abunda nga pamunga, gintatagan kamo hin damu nga pagkaon ngan ginpupuno an iyo kasingkasing hin kalipay.’ (Buh. 14:17) Matin-aw nga hi Jehova mahinatagon ha ngatanan nga tawo.—Luc. 6:35.

6, 7. (a) Kan kanay mga panginahanglan an labi na nga nalilipay hi Jehova ha pagtagana? (b) Paghatag hin ehemplo kon paonan-o an Dios nagtatagana ha iya magtinumanon nga magsiringba.

⁶ Hi Jehova nalilipay labi na ha pagtagana han mga panginahanglan han iya magtinumanon nga magsiringba. Hi Hadi David nagsiring: “Nagin bata ako, ngan yana lagas na ako; kondi waray pa ako makakita nga an mga magtadong pagpasibay-an, bisan ngani waray pa an iya mga katulinan pagpakilimos hin tinapay.” (Sal. 37:25) Napamatud-an han damu nga matinumanon nga Kristiano an sugad hito nga pagmangno ni Jehova. Tagda an usa nga ehemplo.

⁷ Pipira ka tuig an naglabay, hi Nancy nga usa nga payunir inatubang hin makuri nga kahimtang. “Kinahanglan ko hin $66 basi ibayad han akon plete, ngan kinahanglan bayaran ko ito kinabuwasan,” siring ni Nancy. “Diri ako maaram kon paonan-o ako magkakaada hito nga kantidad. Igin-ampo ko ito nga akon problema, ngan katapos sinulod ako ha akon trabaho sugad nga waitress. Waray ako maglaom nga makakarawat hin damu nga tip hito nga gab-i kay ha sugad hito nga mga adlaw kasagaran na nga diri damu an kustomer. Nahipausa ako kay damu nga kustomer an kinadto ha restawran hito nga gab-i. Katapos han akon trabaho, gin-ihap ko an ngatanan nga tip ha akon ngan inabot ito hin $66.” Napamatud-an ni Nancy nga mahinatagon nga igintagana ni Jehova kon ano gud an iya ginkinahanglan.—Mat. 6:33.

8. Ano an pinakamaopay nga regalo ni Jehova?

⁸ An pinakamaopay nga regalo ni Jehova mahimo makarawat han ngatanan. Ano ito? An halad lukat han iya Anak. Hi Jesus nagsiring: “Hinigugma gud han Dios an kalibotan salit iginhatag niya an iya bugtong nga Anak basi an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.” (Juan 3:16) Hini nga konteksto “an kalibotan” nagtutudlok ha katawohan. Oo, an pinakamaopay nga regalo ni Jehova mahimo mapahimulsan han ngatanan nga nagdidesisyon nga karawaton ito. An nagpapakita hin pagtoo kan Jesus makakakarawat hin  kinabuhi nga waray kataposan! (Juan 10:10) Ito an pinakamaopay nga pamatuod nga hi Jehova mahinatagon.

9. Paonan-o naton masusubad an pagkamahinatagon ni Jehova?

 ⁹ Paonan-o naton masusubad an pagkamahinatagon ni Jehova? Hi Jehova “hura nga nagtatagana ha aton han ngatanan nga butang nga aton nalilipayan,” salit sadang liwat kita magin “andam ha pagpaangbit” ha iba basi magin malipayon hira. (1 Tim. 6:17-19) Nalilipay kita paggamit han aton mga panag-iya basi magregalo ha aton mga hinigugma ngan bumulig ha mga nanginginahanglan. (Basaha an Deuteronomio 15:7.) Ano an makakabulig ha aton nga mahinumdom nga magin mahinatagon? Ini an ginbubuhat han iba nga Kristiano: Ha kada panahon nga nakakakarawat hira hin regalo, namimiling hira hin higayon nga maghatag hin regalo ha iba. Ha Kristiano nga kongregasyon damu nga kabugtoan an nagkukultibar han pagin mahinatagon.

10. Ano an usa han pinakamaopay nga mga paagi ha pagin mahinatagon?

¹⁰ Usa han pinakamaopay nga mga paagi ha pagin mahinatagon amo an paggamit han aton panahon ngan kusog ha pagbulig ngan pagdasig ha iba. (Gal. 6:10) Mahinatagon ka ba hini nga paagi? Puydi mo pakianhan an imo kalugaringon: ‘Iginpapakita ko ba nga andam ako mamati ha iba? Kon may nagpapabulig ha akon ha usa nga proyekto o buruhaton, andam ba ako bumulig? Kakan-o an akon kataposan nga paghatag hin sinsero nga kumendasyon ha usa nga kapamilya o igkasi-tumuroo?’ Kon aton ‘nabatasan an paghatag,’ makakasiguro kita nga magigin mas duok kita kan Jehova ngan ha aton kasangkayan.—Luc. 6:38; Prob. 19:17.

11. Ano an pipira nga paagi nga mahimo kita magin mahinatagon kan Jehova?

 ¹¹ Mahimo liwat kita magin mahinatagon kan Jehova. An Biblia nag-aaghat ha aton: “Pasidunggi hi Jehova pinaagi han imo manggad.” (Prob. 3:9) Ito nga “manggad” nag-uupod han aton panahon, kusog, ngan mga panag-iya nga magagamit naton  ha pag-alagad ha Dios. Bisan an kabataan mahimo mahibaro nga magin mahinatagon kan Jehova. “Kon an amon pamilya naghahatag hin donasyon ha Kingdom Hall, an amon kabataan an amon ginpapahulog hito ha donation box,” siring han tatay nga hi Jason. “Nalilipay hira hito, kay siring nira nga may-ada hira ‘ginhahatag kan Jehova.’” An kabataan nga nakakaeksperyensya han kalipay ha paghatag kan Jehova samtang bata pa posible nga padayon nga magigin mahinatagon kan Jehova pagdaku nira.—Prob. 22:6.

12. Ano an karuyag sidngon han pagin makatadunganon?

¹² Usa pa han makaruruyag gud nga mga kalidad ni Jehova amo an pagkamakatadunganon. Ano an karuyag sidngon han pagin makatadunganon? An orihinal nga pulong nga kasagaran na nga iginhuhubad ha Bag-o nga Kalibotan nga Hubad nga “makatadunganon” literal nga nangangahulogan nga “diri iginpipirit an aton karuyag.” (Tito 3:1, 2) An makatadunganon nga tawo diri nag-iinsister nga pirme sundon hin letra-por-letra an balaud, ngan diri hiya sobra kaistrikto o mapintas. Lugod, nangangalimbasog hiya nga magin malumo ha pagtratar ha iba, gintatagad an ira mga kahimtang. Andam hiya mamati ha iba ngan kon angayan, nasugot ha ira karuyag ngan ginbabag-o an iya mga ginkikinahanglan.

13, 14. (a) Paonan-o iginpapakita ni Jehova an pagkamakatadunganon? (b) Ano nga leksyon an aton hibabaroan mahitungod ha pagkamakatadunganon ha paagi han pagtratar han Dios kan Lot?

¹³ Paonan-o iginpapakita ni Jehova an pagkamakatadunganon? Maloloy-on nga gintatagad niya an inaabat han iya mga surugoon, ngan kasagaran nga iya ginpapamatian an ira mga hangyo. Pananglitan, tagda an pagtratar ni Jehova ha matadong nga hi Lot. Han nagdesisyon hi Jehova nga iya bubungkagon an Sodoma ngan Gomorra, naghatag hiya hin matin-aw nga instruksyon kan Lot nga pumalagiw ngadto ha kabukiran. Kondi ha pipira nga hinungdan, nakimalooy hi Lot nga pumalagiw ha iba nga lugar. Hunahunaa la ito—naghangyo hi Lot kan Jehova nga bag-uhon an Iya mga instruksyon!—Basaha an Genesis 19:17-20.

¹⁴ Bangin masayon la hukman hi Lot sugad nga maluya ngan diri masinugtanon. Syempre, sigurado nga mapapanalipdan hiya ni Jehova nga diri mamatay bisan diin hiya kumadto, salit waray hinungdan nga mahadlok hi Lot. Bisan pa hito, nahadlok la gihapon hiya, ngan sinugot hi Jehova ha iya hangyo. Tinugot hi Jehova nga pumalagiw hi Lot ha syudad nga Iya unta bubungkagon. (Basaha an Genesis 19:21, 22.) Matin-aw nga hi Jehova diri istrikto o mapintas. Pirme hiya makatadunganon.

15, 16. Paonan-o iginpakita han Mosaiko nga Balaud an pagkamakatadunganon ni Jehova? (Kitaa an retrato ha tinikangan hini nga artikulo.)

¹⁵ Tagda an usa pa nga ehemplo han pagkamakatadunganon ni Jehova nga iginpakita ha Mosaiko nga Balaud. Kon an usa nga Israelita pobre hinduro ngan diri makakaghalad hin karnero o kanding, puydi hiya maghalad hin duha nga tukmo o duha nga sarapati. Kondi, ano man kon an usa nga Israelita pobre hinduro nga diri niya maaakos bisan an paghalad hin duha nga sarapati? Hito nga kahimtang, igintugot ni Jehova nga maghalad hiya hin gutiay nga harina. Kondi tagda inin importante nga detalye: Kinahanglan diri ito bisan la ano nga klase hin harina, kondi “harina nga pino” o maopay, an klase hin harina nga ginagamit para ha dungganon nga mga bisita. (Gen. 18:6) Kay ano nga importante ito?—Basaha an Lebitiko 5:7, 11.

¹⁶ Hunahunaa nga usa ka nga pobre hinduro nga Israelita. Pag-abot mo ha tabernakulo dara an gutiay nga harina sugad nga imo halad, nakita mo an mas riko nga mga Israelita nga may dara nga mga hayop. Bangin maawod ka han imo gutiay la nga halad. Katapos mahinunumdoman mo nga ha pagkita ni Jehova importante gud an imo halad. Kay ano? Ha usa nga hinungdan, kay ginkinahanglan ni Jehova an maopay gud nga klase nga harina. Sugad hin nasiring hi Jehova ha mas pobre nga mga Israelita: ‘Maaram ako nga diri kamo makakaghalad sugad han maihahalad han iba, kondi maaram liwat ako nga an iyo iginhahatag ha akon amo an iyo gimaopayi.’ Oo, iginpapakita ni  Jehova an pagkamakatadunganon pinaagi ha pagtagad ha mga limitasyon ngan kahimtang han iya mga surugoon.—Sal. 103:14.

17. Ano nga klase hin pagsingba an sigurado kita nga ginkakarawat ni Jehova?

 ¹⁷ Naliliaw kita ha paghibaro nga makatadunganon hi Jehova ngan ginkakarawat niya an aton bug-os-kalag nga pag-alagad. (Col. 3:23) Usa nga edaran nga sister ha Italy nga hi Constance an nagsiring: “Tikang pa hadto, an pagsumat ha iba mahitungod han akon Maglalarang amo an pinakanaruruyagan ko nga buhaton. Salit padayon ako nga nagsasangyaw ngan nagdudumara hin mga pag-aram ha Biblia. Usahay nasusubo ako nga diri na daku an akon nabubuhat tungod han akon kahimsog. Kondi nasasantop ko nga maaram hi Jehova han akon mga limitasyon ngan hinigugma niya ako, ngan gin-aapresyar niya an akon nahihimo.”

18. Ano an usa nga paagi nga masusubad han mga kag-anak an susbaranan ni Jehova?

¹⁸ Paonan-o naton masusubad an pagkamakatadunganon ni Jehova? Hunahunaa utro an paagi han pagtratar ni Jehova kan Lot. Hi Jehova an may awtoridad, pero mapinairon nga namati hiya samtang iginpapahayag ni Lot an iya inaabat. Ngan tinugot an Dios ha hangyo ni Lot. Kon usa ka nga kag-anak, masusubad mo ba an susbaranan ni Jehova? Mahimo ka ba mamati ha mga hangyo han imo mga anak ngan, kon angayan, tumugot ha ira ginhahangyo? May kalabotan hini, an Septyembre 1, 2007 nga gowa han An Barantayan nag-unabi nga mahimo iupod han iba nga kag-anak an ira mga anak kon naghihimo hin mga patakaran ha panimalay. Pananglitan, an mga kag-anak nagdidesisyon nga magkaada hin curfew, ngan syempre an mga kag-anak may katungod nga pumili hin espisipiko nga oras nga an ira mga anak kinahanglan aada na ha balay. Bisan pa hito, an Kristiano nga mga kag-anak mahimo mamati ha ginsisiring han ira mga anak mahitungod han ginpili nga oras. Ha pipira nga kahimtang an mga kag-anak mahimo magdesisyon nga maghimo hin mga pagbag-o ha ginpili nga oras basta waray natatalapas nga mga prinsipyo ha Biblia. Kon gintatagad han mga kag-anak an panhunahuna han ira mga anak mahitungod ha mga patakaran ha panimalay, mas masasabtan ito han mga anak ngan mas maruruyag hira pagsunod hito.

19. Paonan-o an mga tigurang mahimo mangalimbasog nga subaron an pagkamakatadunganon ni Jehova?

¹⁹ An mga tigurang ha kongregasyon nangangalimbasog nga subaron an pagkamakatadunganon ni Jehova pinaagi ha pagtagad han mga kahimtang han ira mga igkasi-tumuroo. Hinumdumi nga ginpabilhan ni Jehova bisan an mga halad han mas pobre nga mga Israelita. Ha pariho nga paagi, limitado gud an nahihimo ha ministeryo han pipira nga kabugtoan, bangin tungod han problema ha kahimsog o kalagas. Ano man kon inin hinigugma nga kabugtoan masubo tungod han ira mga limitasyon? Mabubuligan hira han mga tigurang nga masantop nga hinigugma hira ni Jehova kay ira ginbubuhat an ira gimaopayi ha pag-alagad ha iya.—Mar. 12:41-44.

20. Ano an karuyag sidngon han pagin makatadunganon ha pag-alagad ha Dios?

²⁰ Syempre, an pagin makatadunganon diri nangangahulogan nga gutiay la an aton bubuhaton ha pag-alagad ha Dios basi la magin buotan ha aton kalugaringon. (Mat. 16:22) Diri naton karuyag nga magbuhat la hin gutiay kon maaakos naton an pagbuhat hin mas damu. Lugod, kita ngatanan kinahanglan ‘maniguro gud’ ha pagsuporta ha mga buruhaton han Ginhadian. (Luc. 13:24) Oo, nangangalimbasog kita nga magin timbang ha duha nga prinsipyo. Naniniguro gud kita, diri nagbubuhat hin gutiay la ha aton pag-alagad kon maaakos naton an pagbuhat hin mas damu. Ha luyo nga bahin, maaram kita nga hi Jehova diri gud nag-aaro han labaw kay han aton maihahatag. Kon ginhahatag naton ha iya an aton gimaopayi, makakasiguro kita nga nalilipay hiya. Diri ba nalilipay kita ha pag-alagad ha sugad kamaapresyaron ngan makatadunganon nga Agaron? Ha sunod nga artikulo aton hihisgotan an duha pa nga makaruruyag gud nga mga kalidad ni Jehova.—Sal. 73:28.