1, 2. (a) Kay ano nga gin-aapresyar naton an mga sangkay nga maunungon ngan mapinasayloon? (b) Ano nga mga pakiana an aton babatunon?

PARA ha imo, ano an tinuod nga sangkay? “Ha akon, an tinuod nga sangkay pirme aada para ha imo ngan nagpapasaylo ha imo kon nagsasayop ka,” siring han sister nga hi Ashley. Kita ngatanan nag-aapresyar han mga sangkay nga maunungon ngan mapinasayloon. Ginbubuligan nira kita nga umabat nga talwas ngan hinigugma.—Prob. 17:17.

² Hi Jehova an aton pinakamaunungon ngan pinakamapinasayloon nga Sangkay. Ini an ginsiring han salmista mahitungod ha iya: “Ikaw, Ginoo, maopay ngan andam ha pagpasaylo, ngan hura hin mahigugmaon nga kalooy [o, “maunungon nga gugma”] hadton ngatanan nga nagsasangpit ha imo.” (Sal. 86:5) Ano an karuyag sidngon han pagin maunungon ngan mapinasayloon? Paonan-o iginpapakita ni Jehova inin makaruruyag gud nga mga kalidad? Ngan paonan-o naton masusubad an iya susbaranan? An mga baton hini mabulig ha aton nga mas higugmaon an aton pinakamaopay nga Sangkay, hi Jehova. Mabulig liwat ini ha aton nga maparig-on an aton pakigsangkay ha usa kag usa.—1 Juan 4:7, 8.

3. Ano an karuyag sidngon han pagin maunungon?

³ An pagkamaunungon amo an makaruruyag nga kalidad nga nag-uupod hin debosyon, pagkamatinumanon, ngan nagpapadayon nga suporta. An maunungon nga tawo diri nagbabag-o. Lugod, iginpapakita niya an iya gugma pinaagi ha padayon nga pagbulig ngan pagsuporta ha usa ka tawo (o butang), ngan nagpapabilin nga duok bisan ha magkuri nga sitwasyon. Oo, hi Jehova amo an “maunungon nga Dios.” Waray na malabaw ha iya ha pagin maunungon.—Pah. 16:5.

4, 5. (a) Paonan-o iginpapakita ni Jehova an pagkamaunungon? (b) Paonan-o kita mapaparig-on ha pagpamalandong han pagpakita han Dios hin pagkamaunungon?

⁴ Paonan-o iginpapakita ni Jehova an pagkamaunungon?  Diri gud niya ginpapabay-an an iya matinumanon nga mga magsiringba. Usa ha ira amo hi Hadi David, nga nagpamatuod han pagkamaunungon ni Jehova. (Basaha an Salmo 37:28.) Han nakaeksperyensya hi David hin mga pagsari, hi Jehova maunungon nga naggiya, nagpanalipod, ngan nagtalwas ha iya. (2 Sam. 22:1) Maaram hi David nga diri ha pulong la iginpapakita ni Jehova an Iya pagkamaunungon. Kay ano nga nagin maunungon hi Jehova kan David? Kay hi David maunungon ha iya. Ginpapabilhan ni Jehova an pagkamaunungon han iya mga magsiringba, ngan maunungon hiya ha mga maunungon ha iya.—Prob. 2:6-8.

⁵ Mapaparig-on kita ha pagpamalandong han kan Jehova pagpakita hin pagkamaunungon. “Nakakabulig gud ha akon kon ginbabasa ko an mahitungod han pagtratar ni Jehova kan David ha panahon nga makuri an mga kahimtang,” siring han matinumanon nga brother nga hi Reed. “Bisan han hi David napalagiw ngan naukoy ha iba-iba nga lungib, pirme hiya ginbubuligan ni Jehova. Makapadasig gud ito ha akon! Iginpapahinumdom hito ha akon nga anoman an kahimtang, bisan kon baga hin waray na paglaom an sitwasyon, diri ako papabay-an ni Jehova kon magpapabilin ako nga maunungon ha iya.” Sigurado nga ito liwat an imo inaabat.—Roma 8:38, 39.

6. Ano an iba pa nga paagi nga iginpapakita ni Jehova an pagkamaunungon, ngan ano an kapulsanan hito ha iya mga magsiringba?

⁶ Ano an iba pa nga paagi nga iginpapakita ni Jehova an pagkamaunungon? Usa nga paagi amo an iya pirme pagsunod han iya mga suruklan. Hi Jehova nagpapasarig ha aton: “Bisan ngada ha tigurang na nga panuigon ako amo hiya.” (Isa. 46:4) An iya mga desisyon pirme iginbabasar ha iya diri-nagbabag-o nga mga suruklan han husto ngan sayop. (Mal. 3:6) Dugang pa, iginpapakita ni Jehova an iya pagkamaunungon pinaagi ha pirme pagtuman han iya mga saad. (Isa. 55:11) An ngatanan nga magsiringba ni Jehova nagpapahimulos han iya pagkamaunungon. Paonan-o? Kon ginbubuhat naton an aton gimaopayi ha pagsunod han mga suruklan ni Jehova, makakasiguro kita nga tutumanon niya an iya saad nga iya kita bibendisyonan.—Isa. 48:17, 18.

7. Ano an usa nga paagi nga masusubad naton an pagkamaunungon han Dios?

 ⁷ Paonan-o naton masusubad an pagkamaunungon ni Jehova? Usa nga paagi amo an pagbulig ha mga aada ha magkuri nga kahimtang. (Prob. 3:27) Pananglitan, may kilala ka ba nga igkasi-tumuroo nga nanluluya, bangin tungod han problema ha kahimsog, pagkontra han pamilya, o kalugaringon nga mga kaluyahan? Kay ano nga diri hiya dasigon pinaagi hin ‘mag-opay ngan nakakaliaw nga mga pulong’? (Sak. 1:13) * Kon bubuhaton mo ito, ginpapamatud-an mo nga maunungon ka ngan tinuod nga sangkay, usa nga “surusuok pa kay han bugto.”—Prob. 18:24.

8. Paonan-o naton masusubad an pagkamaunungon ni Jehova, pananglitan, kon inasaw-an kita?

⁸ Masusubad liwat naton an pagkamaunungon ni Jehova pinaagi ha pagpabilin nga maunungon ha aton mga hinigugma. Pananglitan, kon inasaw-an kita, maaram kita nga kinahanglan magpabilin kita nga maunungon ha aton padis. (Prob. 5:15-18) Salit ginlilikyan naton an pagbuhat hin bisan ano nga mahimo magresulta hin pag-adulteryo. (Mat. 5:28) Dugang pa, iginpapakita naton nga maunungon kita ha kabugtoan pinaagi han paglikay ha nakakasakit nga mga tsismis o pakaraot mahitungod ha ira. Diri kita nagpapasarang hin sugad nga negatibo nga mga istorya o bisan ngani pagpamati hito.—Prob. 12:18.

9, 10. (a) Kan kanay labi na nga karuyag naton magpabilin nga maunungon? (b) Kay ano nga an pagsunod ha mga sugo ni Jehova diri pirme masayon?

⁹ Labaw ha ngatanan, karuyag naton magpabilin nga maunungon kan Jehova. Paonan-o naton ito bubuhaton? Pinaagi ha pangalimbasog nga subaron an iya panhunahuna. Aton ginhihigugma  an iya hinigugma ngan ginkakangalasan an iya nangangalasan, ngan iginpapakita naton ito ha aton pagkinabuhi. (Basaha an Salmo 97:10.) Samtang mas ginsusubad naton an panhunahuna ngan pagbati ni Jehova, nagigin mas masayon ha aton an pagsunod ha iya mga sugo.—Sal. 119:104.

¹⁰ Syempre, diri pirme masayon an pagsunod ha mga sugo ni Jehova. Bangin kinahanglan mangalimbasog kita basi magpabilin nga maunungon. Pananglitan, an pipira nga solo nga Kristiano karuyag mag-asawa, pero waray pa hira makaagi hin angayan nga padis dida ha mga magsiringba ni Jehova. (1 Cor. 7:39) An usa nga sister bangin pirme igintutugpo han iya diri-Saksi nga mga katrabaho ha puydi niya magin bana. An sister bangin naabat hin kamingaw. Bisan pa hito, nangangalimbasog hiya nga magpabilin nga matinumanon kan Jehova. Diri ba gin-aapresyar naton an sugad nga maopay gud nga susbaranan ha pagkamaunungon? Sigurado nga babalosan ni Jehova an ngatanan nga nagpapabilin nga matinumanon ha iya bisan pa han mga kakurian.—Heb. 11:6.

11. Ano an karuyag sidngon han pagin mapinasayloon?

¹¹ Upod han pinakamakaruruyag nga mga kalidad ni Jehova amo an iya pagin andam magpasaylo. Ano an karuyag sidngon han pagin mapinasayloon? Ha kabug-osan nag-uupod ito han pagpasaylo ha nakasala kon tinuod hiya nga nagbabasol. Diri ito nangangahulogan nga an mapinasayloon nga tawo nagkukonsinter han sala o naglilirong hito. Lugod, nagdidesisyon hiya nga diri magdumot. An Kasuratan nagtututdo ha aton nga hi Jehova “andam ha pagpasaylo” ha mga tinuod nga nagbabasol.—Sal. 86:5.

12. (a) Paonan-o iginpapakita ni Jehova an pagkamapinasayloon? (b) Ano an karuyag sidngon han ‘pagpara’ han mga sala han usa?

¹² Paonan-o iginpapakita ni Jehova an pagkamapinasayloon? Kon nagpapasaylo hi Jehova ginbubuhat niya ito “hin damu gud”; an iya pagpasaylo bug-os ngan permanente. (Isa. 55:7) Paonan-o kita nahibaro nga hi Jehova bug-os nga nagpapasaylo? Tagda an pasarig nga mababasa ha Buhat 3:19. (Basaha.) Gin-aghat ni apostol Pedro an iya mga mamarati nga ‘magbasol ngan magbag-o.’  Kon an usa nga nakasala tinuod nga nagbabasol, nasusubo gud hiya han iya nahimo nga sayop. Determinado liwat hiya nga diri na utruhon an iya sala. (2 Cor. 7:10, 11) Dugang pa, an tinuod nga pagbasol nagpapagios ha nakasala nga ‘magbag-o,’ karuyag sidngon, bumaya ha pagbuhat hin sayop ngan magkinabuhi ha paagi nga nakakapalipay ha Dios. Kon ipapakita han mga mamarati ni Pedro an sugad nga tinuod nga pagbasol, ano an magigin resulta? Hi Pedro nagsiring nga an ira mga sala ‘papasayloon.’ An orihinal nga Griego nga pulong nasiring nga “paraon,” nga nagpapasabot han ideya han usa nga nagamit hin parâ basi paraon an sinurat. Salit kon nagpapasaylo hi Jehova, sugad hin iya ginpapara an aton mga sala. Bug-os nga nagpapasaylo hiya.—Heb. 10:22; 1 Juan 1:7.

13. Ano an iginpapasarig ha aton han mga pulong nga “an ira sala diri ko na dudumdumon”?

¹³ Paonan-o kita nahibaro nga permanente an pagpasaylo ni Jehova? Tagda an tagna ni Jeremias mahitungod han bag-o nga kauyonan para ha dinihogan nga mga Kristiano, diin nagigin posible an tinuod nga pagpasaylo ha mga nagpapakita hin pagtoo ha lukat. (Basaha an Jeremias 31:34.) Hi Jehova nagsiring: “Akon igpapasaylo an ira karat-an, ngan an ira sala diri ko na dudumdumon.” Salit ginpapasarig kita ni Jehova nga kon nagpasaylo na hiya, diri na gud kita niya sisirotan ha tidaraon tungod hito nga mga sala. Diri niya padayon nga ginhuhunahuna an aton mga sala basi akusaran o sirotan kita hin pauroutro. Lugod, ginpapasaylo ni Jehova ito nga mga sala ngan ginkakalimtan ito hin permanente.—Roma 4:7, 8.

14. Paonan-o kita maliliaw ha pagpamalandong han pagkamapinasayloon ni Jehova? Paghatag hin ehemplo.

¹⁴ Maliliaw kita ha pagpamalandong han pagkamapinasayloon ni Jehova. Tagda an usa nga ehemplo. Damu ka tuig na an naglabay, usa nga sister nga tatawagon naton ha ngaran nga Elaine an napaiwas ha kongregasyon. Paglabay hin pipira ka tuig nakabalik hiya. “Bisan kon ginsidngan ko an akon kalugaringon ngan an iba nga natoo ako nga ginpasaylo na ako ni Jehova,” siring ni Elaine, “pirme ako naabat nga baga hin hirayo hiya o nga an iba mas duok ha iya ngan mas tinuod hiya ha ira.” Kondi, naliaw ni Elaine ha pagbasa ngan pagpamalandong han pipira nga ilustrasyon nga gin-gamit han Biblia ha pagsaysay han pagkamapinasayloon ni Jehova. “Inabat ko an kan Jehova gugma ngan pagkamalumo ha akon ha paagi nga waray ko gud masantop hadto,” siring ni Elaine. Nabantad hiya labi na hini nga mga pulong: “Kon nagpapasaylo hi Jehova han aton mga sala, diri na naton kinahanglan abaton nga gindadara naton an mantsa han sugad nga mga sala ha bug-os naton nga kinabuhi.” * Hi Elaine nasiring: “Nasantop ko nga waray ako tumoo nga bug-os nga mapapasaylo ako ni Jehova, ngan naghunahuna ako nga dadad-on ko ini nga akon pinas-an ha bug-os ko nga kinabuhi. Maaram ako nga magkikinahanglan ini hin panahon, pero nagtitikang na ako umabat nga mahimo ngay-an ako magin mas duok kan Jehova, ngan naabat ako nga ginkuha an akon pinas-an.” Mahigugmaon ngan mapinasayloon gud nga Dios an aton ginsisingba!—Sal. 103:9.

15. Paonan-o naton masusubad an pagkamapinasayloon ni Jehova?

¹⁵ Masusubad naton an pagkamapinasayloon ni Jehova pinaagi ha pagin mapinasayloon ha usa kag usa kon an nakasala tinuod nga nagbabasol. (Basaha an Lucas 17:3, 4.) Hinumdumi nga kon nagpapasaylo hi Jehova, iya ginkakalimtan an aton mga sala ha paagi nga diri na niya ito padayon nga ginhuhunahuna basi gamiton ha urhi kontra ha aton. Kon ginpapasaylo naton an iba, mahimo liwat naton kalimtan an ira mga sala ngan diri na ito unabihon ha urhi.

16. (a) An pagin mapinasayloon ba nagpapasabot nga aton kukonsinteron an mga sayop o tutugotan an iba nga salingabuton an aton pagkabuotan? Isaysay. (b) Ano an sadang naton buhaton kon karuyag naton mapasaylo han Dios?

 ¹⁶ An pagin mapinasayloon diri nagpapasabot nga aton kukonsinteron an mga sayop o tutugotan an iba nga salingabuton an aton pagkabuotan. Nangangahulogan ito nga diri kita nagdudumot. Kondi, importante hinumdoman nga basi  mapasaylo han Dios, kinahanglan subaron naton an pagkamapinasayloon ni Jehova ha aton pagtratar ha iba. (Mat. 6:14, 15) An empatiya nagpapagios kan Jehova nga hinumdoman nga “mga tapotapo kita.” (Sal. 103:14) Kon sugad, diri ba an empatiya sadang liwat magpagios ha aton nga sabuton an mga kaluyahan han iba ngan kinaburut-on nga pasayloon hira hin kinasingkasing?—Efe. 4:32; Col. 3:13.

17. Ano an makakabulig ha aton kon an aton igkasi-tumuroo nakasakit ha aton?

 ¹⁷ Syempre, diri pirme masayon an pagpasaylo. Bisan an pipira nga dinihogan nga Kristiano ha siyahan nga siglo nakurian pagsulbad han ira diri pagsinabtanay. (Fil. 4:2) Kon an aton igkasi-tumuroo nakasakit ha aton, ano an makakabulig ha aton? Hunahunaa an nahitabo kan Job. Nasakitan gud hiya han an iya “kasangkayan” nga hira Elipas, Bildad, ngan Sopar nag-akusar ha iya hin waray basihan. (Job 10:1; 19:2) Ha urhi, ginsaway ni Jehova iton buwaon nga mga parag-akusar. Ginsugo hira han Dios nga kumadto kan Job ngan maghalad para han ira mga sala. (Job 42:7-9) Kondi may iginpabuhat liwat hi Jehova kan Job. Ano ito? Ginsugo ni Jehova hi Job nga ig-ampo an mga nag-akusar ha iya. Ginbuhat ni Job an sugo ni Jehova, ngan ginbendisyonan hiya ni Jehova tungod han iya pagkamapinasayloon. (Basaha an Job 42:10, 12, 16, 17.) Ano an leksyon hini para ha aton? An sinsero nga pag-ampo para ha usa nga nakasayop ha aton bangin makabulig ha aton nga diri magdumot ha iya.

18, 19. Paonan-o naton padayon nga mas maaapresyar an makaruruyag gud nga personalidad ni Jehova?

¹⁸ Sigurado nga narepreskohan kita ha paghisgot han magkalain-lain nga kalidad ni Jehova. Hinbaroan naton nga hiya masayon madaop, waray pinaurog, mahinatagon, makatadunganon, maunungon, ngan mapinasayloon. Syempre, damu pa gud an aton hibabaroan mahitungod kan Jehova. Malilipay kita ha paghibaro hin dugang pa mahitungod ha iya ha waray kataposan. (Ekles. 3:11) Nauyon kita kan apostol Pablo nga nagsurat: “An mga bendisyon han Dios abunda gud, ngan an iya kinaadman ngan kahibaro hilarom gud!” Sugad liwat hito an aton masisiring ha gugma han Dios ngan ha iya unom nga kalidad nga aton ginhisgotan hini nga mga artikulo.—Roma 11:33.

¹⁹ Hinaot kita ngatanan padayon nga mas mag-apresyar han makaruruyag gud nga personalidad ni Jehova. Mahihimo naton ito pinaagi ha paghibaro han iya mga kalidad, pagpamalandong hito, ngan katapos pagsubad hito ha aton kinabuhi. (Efe. 5:1) Samtang ginbubuhat naton ito, sigurado nga mas mauyon kita ha salmista, nga nagkanta: “Maopay ito ha akon nga pumahirani ako ngadto ha Dios.”—Sal. 73:28.