Hi Angela * usa nga solo nga sister nga sobra 30 anyos. Bibisitahon hiya han mga tigurang salit medyo kinukulba hiya. Ano an ira isisiring ha iya? Oo, waray hiya makatambong ha pipira nga katirok, pero ginkakapoy hiya katapos han bug-os nga adlaw nga pagtrabaho para ha mga lagas. Labot pa, nababaraka gud liwat hiya ha iya nanay nga may sakit.

Kon kamo an mabisita kan Angela, paonan-o niyo paririg-unon inin “ginugol-an nga kalag”? (Jer. 31:25) Kondi siyahan, paonan-o kamo mangangandam basi magin makapadasig an iyo pagbisita?

Kita ngatanan usahay kinakapoy tungod han aton trabaho o mga responsabilidad sugad nga Kristiano. Pananglitan, hi propeta Daniel “naharaptay” han nakakarawat hiya hin bisyon nga diri niya masabtan. (Dan. 8:27) Ano an nakabulig ha iya? Ha urhi ginsugo han Dios an anghel nga hi Gabriel basi buligan hi Daniel nga masabtan ito ngan pasarigon hiya nga ginpamatian ni Jehova an iya mga pag-ampo. Ginsidngan hiya han anghel nga “hinihigugma” pa gihapon hiya ni Jehova. (Dan. 9:21-23) Ha lain nga higayon, an mag-opay nga pulong nga ginyakan hin lain nga anghel nagpakusog hinin nanluluya nga propeta.—Dan. 10:19.

Ha pariho nga paagi, antes bisitahon an igkasi-tumuroo nga bangin kinakapoy o nanluluya, hunahunaa hin maopay an iya mga kahimtang. Ano an iya mga problema? Paonan-o ito nakakapaluya ha iya? Ano nga mag-opay nga kalidad an iya ginpapakita? “Ginkikita  ko an mag-opay nga kalidad han kabugtoan,” siring ni Richard nga sobra 20 ka tuig na nga tigurang. Nagsiring liwat hiya, “Kon ginhuhunahuna mo hin maopay an ira mga kahimtang antes ka bumisita, nagigin mas masayon an paghatag han ira ginkikinahanglan nga pagparig-on.” Kon may kaupod ka nga usa pa nga tigurang, kay ano nga diri niyo hisgotan an kahimtang han bugto antes hiya bisitahon?

Bangin mauyon ka nga makaarawod an pagsumat han imo inaabat. Pananglitan, an bugto nga ginbibisita bangin mag-alang pakiistorya ha mga tigurang. Paonan-o niyo hiya mabubuligan nga magin komportable? An iyo sinsero nga hiyom ngan nakakaliaw nga mga pulong mahimo magkaada maopay nga epekto. Hi Michael nga sobra 40 ka tuig na nga tigurang, agsob magtikang ha pakiistorya pinaagi ha pagsiring: “Maaram ka, usa han pinakamaopay nga pribilehiyo han tigurang amo an pagbisita ha kabugtoan ha ira balay ngan makilala hira hin maopay. Salit ginpamulat ko gud ini nga amon pagbisita yana.”

Antes magtikang ha paghisgot, mahimo kamo mag-ampo upod han bugto nga ginbibisita. Ha pag-ampo ni apostol Pablo, gin-unabi niya an pagtoo, gugma, ngan pagpailob han kabugtoan. (1 Tes. 1:2, 3) Kon iyo gin-uunabi ha pag-ampo an mag-opay nga kalidad han bugto, gin-aandam niyo an iyo ngan an iya kasingkasing para ha makaparig-on nga iristorya. An iyo pag-ampo mahimo liwat makaliaw ha iya. “Usahay nangangalimtan naton ngatanan an mag-opay nga aton nahihimo,” siring han eksperyensyado nga tigurang nga hi Ray. “Salit kon may nagpapahinumdom hito ha aton, nadadasig kita.”

Pariho kan Pablo, mahimo kamo maghatag hin “espirituwal nga regalo” pinaagi ha pagbasa hin bisan usa la nga teksto ha Biblia. (Roma 1:11) Pananglitan, an nadidepres nga bugto bangin umabat hin kawaray pulos, sugad han  salmista nga iginpariho an iya kalugaringon ha kinuros nga “sudlanan nga anit hin alaksiw nga aada ha aso.” (Sal. 119:83, 176) Katapos isaysay hin halipot ito nga mga pulong, mahimo niyo hiya sidngan nga nasarig kamo nga ‘diri niya nahingangalimtan’ an mga sugo han Dios.

Ha pariho nga paagi, paonan-o an ilustrasyon mahitungod han nawara nga drakma nga sinselyo makakadasig ha usa nga sister nga nagin diri aktibo o nagluya ha pag-alagad? (Luc. 15:8-10) An nawara nga sinselyo bangin bahin han marahalon nga kwintas nga hinimo ha damu nga silber nga sinselyo. Kon hihisgotan niyo ito nga ilustrasyon, mabubuligan hiya nga masabtan nga birilhon hiya nga membro han Kristiano nga kongregasyon. Katapos ito hisgotan, mahimo niyo pabug-atan nga hinigugma gud hiya ni Jehova sugad nga usa han Iya gudtiay nga karnero.

An aton mga igkasi-tumuroo kasagaran nga nalilipay ha pag-istorya mahitungod han ira nabasa ha Biblia. Salit likayi nga kamo la an mag-inistorya! Katapos basahon an usa nga teksto nga aplikado ha ira sitwasyon, mahimo kamo magpili hin importante nga pulong o grupo han mga pulong ha teksto ngan hangyoon hira nga komentohan ito. Pananglitan, katapos basahon an 2 Corinto 4:16, mahimo kamo magpakiana, “Naeksperyensyahan mo na ba kon paonan-o ka ‘ginbabag-o,’ o gintatagan hin kusog ni Jehova?” An sugad hini nga pakiana mahimo magresulta hin ‘pagdinasigay.’—Roma 1:12.

Mahimo liwat niyo madasig an usa nga bugto pinaagi ha paghisgot hin tawohan ha Biblia nga puropariho ha iya an kahimtang. An usa nga nasusubo bangin umabat pariho han gin-abat ni Hana o ni Epafrodito. May mga panahon nga nasubo gud hira pero hinigugma pa gihapon hira han Dios. (1 Sam. 1:9-11, 20; Fil. 2:25-30) Kay ano nga diri hisgotan an mag-opay nga susbaranan ha Biblia kon angayan ha kahimtang?

Maipapakita niyo an iyo totoo nga pagtagad ha kabugtoan pinaagi ha padayon nga pagpakita hin interes katapos han pagbisita. (Buh. 15:36) Ha pagtapos han pagbisita, mahimo kamo makigsabot nga makig-upod ha ira ha ministeryo. Kon nakakaistorya utro han eksperyensyado nga tigurang nga hi Bernard an bugto nga iya pa la ginbisita, mataktika nga nangungumusta hiya mahitungod han iya iginsagdon pinaagi ha pagsiring, “Kumusta, nakabulig ba ito ha imo?” Ha pagpakita hin sugad nga interes, hibabaroan niyo kon ginkikinahanglan pa an dugang nga bulig.

Yana labaw kay ha kan-o pa man, kinahanglan abaton han kabugtoan nga gin-aataman, nasasabtan, ngan hinigugma hira. (1 Tes. 5:11) Salit antes bumisita ha usa nga bugto, hunahunaa hin maopay an iya sitwasyon ngan ig-ampo ito. Pagpili hin angayan nga mga teksto. Katapos hito, makakapili kamo hin husto nga mga pulong nga makakaparig-on ha “ginugol-an nga kalag”!