Waray hinungdan nga sobra nga mabaraka kon diin malingkod ha Kingdom Hall an usa nga napaiwas ha kongregasyon. Ini nga magasin nangangalimbasog gud nga aghaton an Kristiano nga mga kag-anak nga buligan ha espirituwal an ira ginpaiwas nga anak nga nalungon pa ha ira kon ha ira paghunahuna angayan an pagbuhat hito. Sumala ha gin-unabi ha Oktubre 1, 2001 nga gowa han An Barantayan, pahina 16 tubtob 18, mahimo pa ngani dumarahan hin pag-aram ha Biblia han mga kag-anak an ira ginpaiwas nga minor-de-edad nga anak nga nalungon pa ha ira. Ginlalaoman nga an anak makakakarawat han pagdasig nga ginkikinahanglan basi tadungon an iya pagkinabuhi.

May kalabotan ha paglingkod ha Kingdom Hall, waray problema kon an ginpaiwas nga minor-de-edad nga anak lumingkod hin mamingaw sapit han iya mga kag-anak. Diri gin-oobligar an usa nga ginpaiwas nga lumingkod ha luyo nga bahin han Kingdom Hall, salit diri sadang himoon nga isyu kon an ginpaiwas nga anak nalingkod sapit han iya mga kag-anak, diin man dapit hira nalingkod. Samtang ginmamangnoan han mga kag-anak an espirituwalidad han ira anak, karuyag gud nira siguruhon nga magpahimulos an ira anak ha mga katirok. May kalabotan hini, bangin makabulig nga palingkuron hiya ha ira sapit imbes nga pabay-an la hiya nga lumingkod bisan diin.

Pero ano man kon an ginpaiwas nga anak diri na nalungon ha iya mga kag-anak? May kaibahan ba ini nga kahimtang? Ha naglabay, ginklaro han aton mga publikasyon kon ano an husto nga disposisyon nga sadang pangalimbasogan nga ipakita han usa nga Kristiano may kalabotan ha pakig-upod ha ginpaiwas nga kapamilya nga diri na nira kaupod ha balay. * Kondi an kahimtang diin an usa nga ginpaiwas nalingkod hin mamingaw sapit han iya mga kapamilya durante han katirok iba gud ha kahimtang diin an iya mga kapamilya naghihimo hin paagi nga makaupod hiya bisan kon diri kinahanglanon. Kon an matinumanon nga mga membro han pamilya may husto nga disposisyon may kalabotan ha ira ginpaiwas nga kapamilya ngan nangangalimbasog nga sundon an sagdon han Kasuratan mahitungod han pakig-upod ha iya, baga hin waray hinungdan nga mabaraka.—1 Cor. 5:11, 13; 2 Juan 11.

Diri sadang kabarak-an kon an usa nga ginpaiwas nalingkod sapit han iya kapamilya o han bisan hin-o nga membro han kongregasyon basta nagios hiya hin husto. An paghatag hin restriksyon kon diin malingkod an usa nga indibiduwal mahimo magresulta hin iba-iba nga problema, depende ha kahimtang. Kon an ngatanan nga natambong, pati na an matinumanon nga mga kapamilya, nangangalimbasog nga sundon an mga prinsipyo ha Biblia may kalabotan ha pagpaiwas ha kongregasyon, ngan diri ito makakapakdol ha kabugtoan, diri kinahanglan himoon nga isyu kon diin malingkod an mga natambong ha mga katirok. *