1. (a) Ano an reaksyon han mga tawo ha mga pahinumdom, ngan kay ano? (b) Paonan-o an pagpahitaas mahimo makaapekto ha panhunahuna han usa ha sagdon?

IBA-IBA an reaksyon han mga tawo ha instruksyon. Bangin karawaton nira an pahinumdom han usa nga may awtoridad kondi isalikway an sagdon han usa nga ira kaedad o han usa nga mas ubos an posisyon. Magkalain-lain gud liwat an reaksyon han mga tawo kon gindidisiplina ngan ginsasagdonan. An iba nasusubo, nabibido, o naaawod, kondi an iba naaaghat, nagkakaada kompyansa, ngan napapagios nga magbuhat hin mas maopay. Kay ano nga iba-iba an reaksyon? Usa nga hinungdan amo an pagpahitaas. Oo, an pagpahitaas mahimo makaaghat ha usa nga maghunahuna nga diri aplikado ha iya an sagdon, ngan tungod hito diri niya ito kakarawaton salit diri hiya makakapahimulos ha mapulsanon nga instruksyon.—Prob. 16:18.

2. Kay ano nga ginpapabilhan han tinuod nga mga Kristiano an mga sagdon tikang ha Pulong han Dios?

² Ha luyo nga bahin, ginpapabilhan han tinuod nga mga Kristiano an mapulsanon nga mga sagdon, labi na kon iginbasar ito ha Pulong han Dios. An mga pahinumdom ni Jehova nabulig ha aton nga magkaada hilarom nga pagsabot. Nagtututdo ngan nabulig ito ha aton nga malikyan an mga lit-ag sugad han materyalismo, seksuwal nga imoralidad, ngan sayop nga paggamit hin droga o de-alkohol nga mga irimnon. (Prob. 20:1; 2 Cor. 7:1; 1 Tes. 4:3-5; 1 Tim. 6:6-11) Dugang pa, nalilipay kita tungod han “kahimongaya han kasingkasing” nga resulta han pagsunod ha mga pahinumdom han Dios.—Isa. 65:14.

3. Ano nga disposisyon han salmista an maopay nga subaron naton?

³ Basi matipigan an aton birilhon nga relasyon ha aton langitnon nga Amay, kinahanglan padayon nga iaplikar naton ha aton kinabuhi an maaramon nga mga instruksyon ni Jehova. Maopay gud kon subaron naton an disposisyon han salmista nga nagsurat: “An imo mga pagpamatuod [“pahinumdom,”  NW] akon kinuha sugad hin panurundon ha waray kataposan; kay amo ito an kalipay han akon kasingkasing”! (Sal. 119:111) Nalilipay ba liwat kita ha mga sugo ni Jehova, o usahay ginhuhunahuna naton nga makuri ito sundon? Bisan kon usahay nakukurian kita pagsunod ha iginsasagdon ha aton, diri kita sadang manluya. Mahimo naton makultibar an marig-on nga pagsarig ha waray katupong nga kinaadman han Dios! Hisgotan naton an tulo nga paagi ha pagbuhat hito.

4. Ano an usa nga butang an waray gud magbag-o ha kinabuhi ni David?

⁴ Hi Hadi David nakaeksperyensya hin mag-opay ngan magraot nga kahimtang ha iya kinabuhi, kondi usa nga butang an waray gud magbag-o—an iya bug-os nga pagsarig ha iya Maglalarang. Hiya nagsiring: “Ha imo, O Jehova, binibikyaw ko an akon kalag. O Dios ko, ha imo nagsarig ako.” (Sal. 25:1, 2) Ano an nakabulig kan David nga magkaada sugad hito nga pagsarig ha iya langitnon nga Amay?

5, 6. Ano an iginsusumat ha aton han Pulong han Dios mahitungod ha relasyon ni David kan Jehova?

⁵ Damu nga tawo an nag-aampo la ha Dios kon makuri an ira kahimtang. Ano man kon an usa mo nga sangkay nakikiistorya la ha imo kon nagkikinahanglan hiya hin kwarta o bulig? Maabot an panahon nga bangin maghunahuna ka kon ano an iya tinuod nga motibo ha pakigsangkay ha imo. Kondi diri sugad hito hi David. Nakita ha iya relasyon kan Jehova an iya pagtoo ngan gugma ha iya Dios ha bug-os niya nga kinabuhi—ha maopay ngan maraot nga kahimtang.—Sal. 40:8.

⁶ Tagda an kan David mga pulong han pagdayaw ngan pagpasalamat kan Jehova: “O Jehova, nga amon Ginoo, pagkadaku nga waray tupong iton imo ngaran ha bug-os nga tuna, nga iginbutang mo an imo kahimayaan ha igbaw han mga langit!” (Sal. 8:1) Diri ba maaabat mo gud an duok nga relasyon ni David ha iya langitnon nga Amay? An iya pag-apresyar ha pagkaharangdon ngan himaya han Dios nakaaghat ha iya nga dayawon hi Jehova “ha bug-os nga adlaw.”—Sal. 35:28.

7. Paonan-o kita nagpapahimulos ha pagin duok ha Dios pinaagi ha pag-ampo?

⁷ Pariho kan David, kinahanglan regular nga makigkomunikar kita kan Jehova basi maparig-on an aton pagsarig ha iya. An Biblia nasiring: “Magin duok kamo ha Dios, ngan magigin duok hiya ha iyo.” (San. 4:8) An pagin duok ha Dios pinaagi han pag-ampo usa liwat nga importante nga paagi nga nakakarawat naton an iya baraan nga espiritu.—Basaha an 1 Juan 3:22.

8. Kay ano nga sadang naton likyan nga uroutruhon an amo gihapon nga mga pulong kon nag-aampo kita?

⁸ Kon nag-aampo ka, may tendensya ka ba nga uroutruhon an amo gihapon nga mga pulong o ekspresyon? Kon amo, antes ka mag-ampo, paggahin hin gutiay nga panahon ha paghunahuna kon ano an karuyag mo isiring. Kon gin-uuroutro naton an amo gihapon nga mga pulong ha kada panahon nga nakikiistorya kita ha usa nga sangkay o paryente, malilipay ba hiya hito? Bangin diri na hiya maruyag pamati ha aton. Syempre, diri gud igbabalewaray ni Jehova an sinsero nga pag-ampo han usa han iya maunungon nga mga surugoon. Kondi sadang naton likyan nga uroutruhon an amo gihapon nga mga pulong ha kada panahon nga nag-aampo kita ha iya.

9, 10. (a) Ano an mahimo naton iupod ha aton mga pag-ampo? (b) Ano an makakabulig ha aton nga mag-ampo hin kinasingkasing?

⁹ Matin-aw nga kon karuyag naton magin duok ha Dios, kinahanglan an aton mga pag-ampo diri kay mahitungod la ha pankabug-osan nga mga butang. Kon mas ginsusumat naton kan Jehova an aton tinuod nga ginhuhunahuna ngan inaabat, mas magigin duok ngan mas masarig kita ha iya. Kondi ano an sadang naton iupod ha aton mga pag-ampo? An Pulong han Dios nasiring: “Ha ngatanan nga butang pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo.” (Fil. 4:6) Ha tinuod la, angayan ig-ampo an bisan ano nga nakakaapekto ha aton relasyon ha Dios o ha aton kinabuhi sugad nga iya surugoon.

¹⁰ Damu an aton hibabaroan ha pag-usisa han mga pag-ampo han matinumanon nga kalalakin-an ngan kababayin-an nga nakarekord ha Biblia.  (1 Sam. 1:10, 11; Buh. 4:24-31) Mababasa ha Mga Salmos an damu nga kinasingkasing nga mga pag-ampo ngan kanta kan Jehova. Iginpapakita hito an ngatanan nga emosyon han tawo, tikang ha duro nga kasakit ngadto ha duro nga kalipay. An pag-usisa hini nga mga pag-ampo makakabulig ha aton nga mag-ampo kan Jehova hin kinasingkasing.

11. Kay ano nga kinahanglan pamalandungon naton an mga sagdon tikang ha Dios?

¹¹ Hi David nagsiring: “An pagpamatuod [“pahinumdom,” NW] ni Jehova totoo, nga nakakahimo nga makinaadmananon an usa nga numnom.” (Sal. 19:7) Oo, bisan kon waray kita eksperyensya, mahimo kita magin maaramon pinaagi ha pagsunod ha mga sugo han Dios. Kondi may mga sagdon ha Biblia nga kinahanglan pamalandungon naton basi bug-os kita nga magpahimulos. Pananglitan, an pamalandong hito makakabulig ha aton nga tipigan an aton integridad kon ginsusulay kita ha eskwelahan o ha trabaho, sundon an balaud han Dios may kalabotan ha dugo, magpabilin nga neutral, ngan iaplikar an mga prinsipyo ha Biblia may kalabotan ha pamado ngan pamostura. An paghibaro han panhunahuna han Dios ha sugad hito nga mga butang mabulig ha aton nga mangandam ha posible magin mga problema. Katapos, makakagdesisyon kita kon ano an aton bubuhaton kon umatubang kita ha sugad hito nga sitwasyon. An sugad hini nga abanse nga paghunahuna ngan pangandam makakabulig ha aton nga malikyan an duro nga kasubo.—Prob. 15:28.

12. Ano an sadang naton pamalandungon nga makakabulig ha aton nga matipigan an mga pahinumdom han Dios?

¹² Samtang naghuhulat kita han katumanan han mga saad han Dios, iginpapakita ba han aton pagkinabuhi nga nagpapabilin kita nga nagmamata ha espirituwal? Pananglitan, natoo gud ba kita nga an Babilonya nga Gamhanan hirani na bungkagon? An mga bendisyon ba ha tidaraon, sugad han kinabuhi nga waray kataposan ha paraiso nga tuna ngan han pagkabanhaw, tinuod pa gihapon ha aton yana pariho han siyahan nga hinbaroan naton ito? Nagpapabilin ba kita nga aktibo ha ministeryo imbes nga unahon an aton kalugaringon nga mga hingyap? Kumusta man an mahitungod han pagbaraan han ngaran ni Jehova ngan pagbindikar han iya pagkasoberano? Importante pa ba hinduro ha aton ito nga mga isyu? An pagpamalandong hito nga mga pakiana makakabulig ha aton nga buhaton an sugad han ginsiring han salmista nga tipigan an mga pahinumdom han Dios “sugad hin panurundon ha waray kataposan.”—Sal. 119:111.

13. Kay ano nga an mga Kristiano ha siyahan nga siglo nakurian pagsabot ha pipira nga butang? Paghatag hin ehemplo.

¹³ May mga gin-uunabi an Biblia nga bangin diri pa naton bug-os nga nasasabtan yana kay waray pa umabot an panahon ni Jehova nga ipatin-aw ito. Pauroutro nga ginsidngan ni Jesus an iya mga apostol nga kinahanglan hiya mag-antos ngan patayon. (Basaha an Mateo 12:40; 16:21.) Kondi waray masabti han mga apostol an iya karuyag sidngon. Nasabtan la nira ito katapos niya mamatay ngan mabanhaw han naggamit hiya hin tawhanon nga lawas, nagpakita ha iya mga disipulo, ngan “gin-abrihan hin bug-os an ira hunahuna basi masabtan nira an kahulogan han Kasuratan.” (Luc. 24:44-46; Buh. 1:3) Sugad man, nasabtan la han mga sumurunod ni Kristo nga ha langit maiestablisar an Ginhadian han Dios han iginbubo ha ira an baraan nga espiritu han Pentekostes 33 C.E.—Buh. 1:6-8.

14. Ha tinikangan han ika-20 ka siglo, ano nga maopay nga susbaranan an iginpakita ha aton han aton kabugtoan?

¹⁴ Ha pariho nga paagi, ha tinikangan han ika-20 ka siglo, an tinuod nga mga Kristiano may sayop nga mga ginlalaoman may kalabotan ha “kataposan nga mga adlaw.” (2 Tim. 3:1) Pananglitan, han 1914 an iba ha ira naghunahuna nga hirani na hira dad-on ha langit. Han waray matuman an ira ginlalaoman, padayon nga gin-usisa nira an Kasuratan ngan ira nasabtan nga kinahanglan anay magkaada daku nga kampanya han pagsangyaw. (Mar. 13:10) Salit han 1922, hi J. F. Rutherford, nga hito nga panahon amo an nangunguna ha pagsangyaw  nga buruhaton, nagsiring ha mga tinambong ha internasyonal nga kombensyon ha Cedar Point, Ohio, U.S.A.: “Kitaa, an Hadi nagmamando na! Kamo an iya mga ahente nga magpapasamwak hito. Salit ipasamwak, ipasamwak, ipasamwak, an Hadi ngan an iya ginhadian.” Tikang hito nga panahon, an mga surugoon ni Jehova ha moderno nga panahon nagin kilala ha pagpasamwak han “maopay nga sumat han Ginhadian.”—Mat. 4:23; 24:14.

15. Kay ano nga mapulsanon ha aton an pagpamalandong ha paagi han pagtratar han Dios ha iya katawohan?

¹⁵ Pinaagi han pagpamalandong ha maopay gud nga paagi han pagtratar ni Jehova ha iya katawohan hadto ngan yana, nadudugangan an aton pagsarig ha iya kapas nga tumanon an iya kaburut-on ngan katuyoan ha tidaraon. Sugad man, an mga pahinumdom han Dios nabulig ha aton nga pirme pamulaton an iya mga saad nga matutuman ha tidaraon. Makakasiguro kita nga an pagbuhat hito mabulig ha aton nga maparig-on an aton pagsarig ha iya mga saad.

16. Ano nga mga bendisyon an aton nakakarawat tungod ha pagpabilin nga aktibo ha ministeryo?

¹⁶ Hi Jehova nga aton Dios gamhanan gud, usa nga Dios nga padayon nga nagbubuhat. “Hin-o an makusog hinduro sugad ha imo, O Jehova?” nagpakiana an salmista. Nagsiring liwat hiya: “Makusog an imo kamot, ngan hitaas an imo too nga kamot.” (Sal. 89:8, 13) Tungod hito, ginpapabilhan ngan ginbibendisyonan ni Jehova an aton mga pangalimbasog nga buhaton an aton gimaopayi ha pag-alagad ha iya. Nakikita niya nga an iya mga surugoon, lalaki man o babaye, batan-on o lagas, diri nag-iinukoy ngan nakaon han “tinapay ha kahubya.” (Prob. 31:27) Ha pagsubad ha aton Maglalarang, pirme kita okupado ha teokratiko nga mga buruhaton. An pag-alagad ha Dios hin bug-os-kasingkasing nakakapalipay ha aton, ngan nalilipay gud hi Jehova nga bendisyonan an aton ministeryo.—Basaha an Salmo 62:12.

17, 18. Kay ano nga makakasiring kita nga an mga buhat tungod han pagtoo nabulig ha aton nga maparig-on an aton pagsarig ha mga instruksyon ni Jehova? Paghatag hin ehemplo.

 ¹⁷ Ha ano nga paagi an aton mga buhat tungod han pagtoo nabulig ha aton nga maparig-on an aton pagsarig kan Jehova? Tagda an asoy han Kasuratan mahitungod han pagsulod han Israel ha Tuna nga Iginsaad. Ginsugo na ni Jehova an mga saserdote nga nagdadara han arka han kauyonan nga maglakat diretso ngadto ha Salog Jordan. Kondi samtang an katawohan nagtitikahirani ha salog, ira nakita nga hilarom hinduro ito ngan masulog tungod han mga uran ha katsaringsing. Ano an ira ginbuhat? Nagkampo ha ligid han salog ngan naghulat hin pipira ka semana o mas maiha pa tubtob nga maghamabaw an tubig? Waray, bug-os nga sinarig hira kan Jehova ngan ginsunod an iya mga instruksyon. Ano an resulta? An asoy nasiring: ‘Han paghitunlob han mga tiil han mga saserdote ha daplin han tubig, an tubig hinmunong, ngan an mga saserdote nagtindog ha bawbaw han mamara nga tuna ha butnga han Jordan ngada nga an bug-os nga nasud naubos hin pakatabok.’ (Jos. 3:12-17) Sigurado nga nalipay gud an mga Israelita ha pakakita nga inundang pag-awas an masulog nga salog! Oo, naparig-on an ira pagtoo kan Jehova kay sinarig hira ha iya mga instruksyon.

¹⁸ Syempre, hi Jehova diri naghihimo hin sugad nga mga milagro para ha iya katawohan yana, kondi ginbibendisyonan niya an ira mga buhat tungod han pagtoo. An baraan nga espiritu han Dios naghahatag ha ira hin kaisog nga tumanon an igintoka ha ira nga buruhaton nga pagsangyaw han mensahe han Ginhadian ha bug-os nga kalibotan. Ngan an nangunguna nga Saksi ni Jehova, an binanhaw nga hi Kristo Jesus, nagpasarig ha iya mga disipulo nga iya hira bubuligan hinin importante nga buruhaton. Hiya nagsiring: “Salit kadto kamo ha mga tawo han ngatanan nga nasud ngan tutdui hira basi magin akon mga disipulo . . . Kaupod niyo ako ha ngatanan nga adlaw tubtob ha ikatarapos hini nga sistema.” (Mat. 28:19, 20) Damu nga Saksi ni Jehova nga bangin awdanon o hadlukon an makakagpamatuod nga an baraan nga espiritu han Dios naghatag ha ira hin kaisog nga makiistorya ha mga tawo ha ministeryo.—Basaha an Salmo 119:46; 2 Corinto 4:7.

19. Bisan pa han aton mga limitasyon, ano an iginpapasarig ha aton?

¹⁹ An iba nga kabugtoan limitado gud an nahihimo ha pag-alagad ha Dios tungod han sakit o kalagas. Kondi makakasiguro hira nga “an Amay han mahigugmaon nga kalooy ngan an Dios han ngatanan nga pagliaw” nakakasabot han kahimtang han tagsa nga tinuod nga Kristiano. (2 Cor. 1:3) Iya ginpapabilhan an ngatanan nga aton nahihimo ha pag-alagad ha iya. Kinahanglan hinumdoman naton ngatanan nga an aton kaluwasan nadepende labi na ha aton pagtoo ha halad lukat ni Kristo samtang ginbubuhat naton an ngatanan nga igintutugot han aton kahimtang.—Heb. 10:39.

20, 21. Ano an pipira nga paagi nga maipapakita naton an pagsarig kan Jehova?

²⁰ An aton pagsingba nag-uupod hin paggamit han aton panahon, kusog, ngan materyal nga mga panag-iya tubtob ha aton maaakos. Oo, bug-os-kasingkasing nga karuyag naton ‘buhaton an buruhaton han ebanghelisador.’ (2 Tim. 4:5) Nalilipay kita nga buhaton ito, kay nabulig ito ha iba nga “magkaada husto nga kahibaro ha kamatuoran.” (1 Tim. 2:4) Matin-aw nga an pagpasidungog ngan pagdayaw kan Jehova nakakahimo ha aton nga riko ha espirituwal. (Prob. 10:22) Ngan nabulig ito ha aton nga bug-os nga sumarig ha aton Maglalarang anoman an mahitabo.—Roma 8:35-39.

²¹ Sugad han aton ginhisgotan, diri kita awtomatiko nga nagkakaada pagsarig kan Jehova para han iya maaramon nga giya; kinahanglan mangalimbasog kita nga magkaada hito. Salit parig-ona an imo pagsarig kan Jehova pinaagi ha pag-ampo. Pamalandonga kon paonan-o gintuman ni Jehova an iya kaburut-on ha naglabay ngan kon paonan-o niya ito tutumanon ha tidaraon. Ngan padayon nga parig-ona an imo pagsarig kan Jehova pinaagi han mga buhat han pagsingba. Hinumdumi nga an mga pahinumdom ni Jehova magpapadayon ha waray kataposan. Ngan kon susundon mo ito, mahimo ka mabuhi ha waray kataposan!