1. Ano nga mga topiko an agsob pag-adman han katawohan han Dios, ngan paonan-o nakakabulig ha aton an pauroutro nga pag-aram hito?

SAMTANG nag-aandam ka para ha tiarabot nga Pag-aram ha Barantayan, nahunahuna mo na ba, ‘Baga hin gin-adman na namon ini nga topiko?’ Kon maiha-iha ka na nga nakikig-upod ha Kristiano nga kongregasyon, posible nga naobserbaran mo nga may mga topiko nga pauroutro nga ginhihisgotan. Agsob kita mag-aram mahitungod han Ginhadian han Dios, han lukat, han buruhaton nga paghimo hin mga disipulo, ngan han mga kalidad sugad han gugma ngan pagtoo. Pinaagi han pauroutro nga pag-aram hini nga mga topiko, nabubuligan kita nga magpabilin nga marig-on an pagtoo ngan ‘magin magburuhat han pulong, ngan diri parapamati la.’—San. 1:22.

2. (a) Ano an agsob nga iginpapasabot han mga pahinumdom han Dios? (b) Ano an kaibahan han mga pahinumdom han Dios ha mga balaud han tawo?

² Ha Biblia, an pulong nga “pahinumdom” agsob nga nagpapasabot han mga balaud, sugo, ngan surundon nga iginhahatag han Dios ha iya katawohan. Diri pariho han mga balaud han tawo nga agsob nga kinahanglan liwanan o bag-uhon, an mga balaud ngan surundon ni Jehova pirme masasarigan. Bisan kon an iba hito iginhahatag para ha partikular nga panahon o sitwasyon, diri gud ito nagsasayop. An salmista nagsiring: “An imo mga pagpamatuod [“pahinumdom,” NW] magtadong ha waray kataposan.”—Sal. 119:144.

3, 4. (a) Ano an mahimo mahiupod ha mga pahinumdom ni Jehova? (b) Paonan-o magpapahimulos an mga Israelita kon susundon nira ito?

³ Bangin naobserbaran mo nga an mga pahinumdom ni Jehova usahay nag-uupod hin mga pahamangno. An nasud han Israel pirme nakakakarawat hin mga pahamangno pinaagi han mga propeta han Dios. Pananglitan, antes gud an mga Israelita sumulod ha Tuna nga Iginsaad, hi Moises nagpahamangno ha ira: “Magmatngon kamo ha iyo ngahaw, kay bangin malimbongan an iyo kasingkasing, ngan sumimang kamo, ngan mag-alagad kamo hin lain nga mga dios-dios, ngan magsingba ha ira; ngan an kasina ni Jehova maglalaga patok ha iyo.” (Deut. 11:16, 17) Iginpapakita han  Biblia nga gintagan han Dios an iya katawohan hin damu nga mapulsanon nga pahinumdom.

⁴ Ha damu pa nga higayon, gin-aghat ni Jehova an mga Israelita nga mahadlok ha iya, mamati ha iya tingog, ngan baraanon an iya ngaran. (Deut. 4:29-31; 5:28, 29) Kon susundon nira ini nga mga pahinumdom, sigurado nga makarawat hira hin damu nga bendisyon.—Leb. 26:3-6; Deut. 28:1-4.

5. Kay ano nga hi Jehova nakig-away para kan Hadi Hesekia?

⁵ Ha bug-os nga kasaysayan han Israel, gintuman ni Jehova an iya saad ha ira. Pananglitan, han ginsulong ni Hadi Senakerib han Asirya an Juda ngan gintarhog hi Hadi Hesekia, nagsugo hi Jehova hin anghel basi buligan an iya katawohan. Ha usa la ka gab-i, ginpatay han anghel han Dios an “ngatanan nga tawo nga magkusog ngan mag-isog” ha kasundalohan han Asirya, salit naalohan hi Senakerib ngan napiritan pag-uli. (2 Kron. 32:21; 2 Hadi 19:35) Kay ano nga an Dios nakig-away para kan Hadi Hesekia? Kay “hiya [Hesekia] kinmupkop kan Jehova; waray hiya bumaya ha pagsunod ha iya, kondi nagbantay han iya mga sugo.”—2 Hadi 18:1, 5, 6.

6. Paonan-o iginpakita ni Hadi Josia an iya pagsarig kan Jehova?

⁶ Usa pa nga ehemplo nga sinugot ha mga sugo ni Jehova amo hi Hadi Josia. Tikang han hiya otso anyos pa la, “hiya nagbuhat hadton matadong ha mga mata ni Jehova, . . . ngan waray simang ha too nga kamot o ha wala.” (2 Kron. 34:1, 2) Iginpakita ni Josia an iya pagsarig kan Jehova pinaagi ha pagbungkag han ngatanan nga dios-dios ha bug-os nga nasud ngan pagpahiuli han tinuod nga pagsingba. Tungod hito, diri la hi Josia an ginbendisyonan ni Jehova kondi pati an bug-os nga nasud.—Basaha an 2 Kronikas 34:31-33.

7. Ano an resulta han ginbalewaray han Israel an mga pahinumdom ni Jehova?

⁷ Kondi makasurubo nga may mga panahon nga an katawohan han Dios diri bug-os nga nasarig ha mga pahinumdom ni Jehova. Ha paglabay han mga siglo, pauroutro nga nagtalapas hira kan Jehova. Han nagluya an ira pagtoo, agsob hira magin pariho han ginsiring ni apostol Pablo nga “ginpapalid-palid han tagsa nga hangin han katutdoan.” (Efe. 4:13, 14) Ngan sugad han igintagna han Dios, han waray hira sumarig ha iya mga pahinumdom, nag-antos hira.—Leb. 26:23-25; Jer. 5:23-25.

8. Ano nga leksyon an aton hibabaroan ha ehemplo han mga Israelita?

⁸ Paonan-o kita makakapahimulos ha ehemplo han mga Israelita? Pariho ha ira, an mga surugoon han Dios yana nakakakarawat hin sagdon ngan disiplina. (2 Ped. 1:12) An Pulong han  Dios mahimo magpahinumdom ha aton ha kada panahon nga ginbabasa naton ito. Tungod kay may kagawasan kita ha pagpili, puydi naton pilion nga sundon an mga instruksyon ni Jehova o buhaton an ginhuhunahuna naton nga husto. (Prob. 14:12) Aton hisgotan an pipira nga hinungdan kon kay ano nga sadang kita sumarig ha mga pahinumdom ni Jehova ngan kon paonan-o kita magpapahimulos ha pagsunod hito.

9. Han an mga Israelita nakadto ha kamingawan, paonan-o hira ginpasarig ni Jehova nga iya hira ginbubuligan?

⁹ Han nagtikang paglakaton an mga Israelita ha “makalilisang nga kamingawan,” nga inabot hin 40 ka tuig, waray idetalye ni Jehova kon paonan-o niya hira gigiyahan, papanalipdan, ngan mamangnoan. Bisan pa hito, pauroutro nga iginpakita niya nga makakasarig hira ha iya ngan ha iya mga instruksyon. Pinaagi hin harigi nga dampog ha adlaw ngan hin harigi nga kalayo ha gab-i, iginpahinumdom ni Jehova ha mga Israelita nga iya hira ginbubuligan ha ira makuri nga paglakaton. (Deut. 1:19; Eks. 40:36-38) Iya liwat igintagana an ngatanan nga ira panginahanglan. “An ira mga panapton waray magkadadaan, ngan an ira mga tiil waray panhubag.” Oo, “waray nakulang ha ira.”—Neh. 9:19-21.

10. Paonan-o ginigiyahan ni Jehova an iya katawohan yana?

¹⁰ An mga surugoon han Dios yana hirani na sumulod ha matadong nga bag-o nga kalibotan. Nasarig ba kita nga hi Jehova nagtatagana han aton ginkikinahanglan basi makatalwas ha tiarabot nga “daku nga kasakitan”? (Mat. 24:21, 22; Sal. 119:40, 41) Oo, hi Jehova diri nagamit hin harigi nga dampog o kalayo ha paggiya ha aton ngadto ha bag-o nga kalibotan. Kondi iya ginagamit an iya organisasyon basi buligan kita nga makapabilin nga mabinantayon. Pananglitan, gin-aaghat kita nga parig-unon an aton espirituwalidad pinaagi han pagbasa han Biblia, pagkaada gab-i para ha Pagsingba han Pamilya, ngan pagin regular ha pagtambong ha mga katirok ngan ha ministeryo. Naghimo na ba kita hin mga pagbag-o basi masunod ini nga mga instruksyon? An pagbuhat hito mabulig ha aton nga magkaada marig-on nga pagtoo nga aton ginkikinahanglan basi makatalwas ngadto ha bag-o nga kalibotan.

11. Ha ano nga mga paagi iginpapakita han Dios nga importante ha iya an aton kaopayan?

¹¹ Labot han pagbulig ha aton nga magpabilin nga nagmamata ha espirituwal, an mga instruksyon nga aton nakakarawat nabulig ha aton ha adlaw-adlaw nga pagkinabuhi. Upod hito an mahitungod han pagkaada timbang nga panhunahuna ha materyal nga mga butang ngan pagkinabuhi hin simple basi maibanan an mga kabaraka. Mapulsanon liwat ha aton an mga instruksyon may kalabotan ha pamado ngan pamostura, pagpili hin maopay nga kaliawan, ngan pagdesisyon kon tubtob san-o maeskwela. Ngan hunahunaa an mga pahinumdom nga nabulig ha aton nga magin talwas ha aton balay, awto, mga Kingdom Hall, ngan magin andam ha mga emergency. An sugad hito nga mga sagdon nagpapakita nga importante ha Dios an aton kaopayan.

12. (a) Ano an usa nga topiko nga pauroutro nga ginhisgotan ni Jesus ha iya mga disipulo? (b) Ano nga leksyon mahitungod han pagkamapainubsanon an waray gud hingalimti ni Pedro, ngan ano an sadang magin epekto hito ha aton?

¹² Ha siyahan nga siglo, an katawohan han Dios regular nga nakarawat hin mga pahinumdom. Hi Jesus pauroutro nga nagsiring ha iya mga disipulo nga kinahanglan kultibaron nira an pagkamapainubsanon. Kondi diri la kay iginsaysay niya ha ira kon ano an karuyag sidngon han pagin mapainubsanon. Iginpakita niya ito pinaagi han iya susbaranan. Ha iya ultimo nga adlaw dinhi ha tuna sugad nga tawo, iya gintirok an iya mga apostol para ha pagsaurog han Paskua. Samtang nangangaon an iya mga  apostol, binuhat hi Jesus ngan ginhimsawan hira—buruhaton nga kasagaran nga ginhihimo hin surugoon. (Juan 13:1-17) Ini nga ginbuhat ni Jesus nagtutdo ha ira hin mapwersa nga leksyon nga waray gud nira hingalimti. Paglabay hin mga 30 ka tuig, hi apostol Pedro, nga nakadto hito nga pangaon, nagsagdon ha iya mga igkasi-tumuroo mahitungod han pagpaubos. (1 Ped. 5:5) An susbaranan ni Jesus sadang magpagios ha aton ngatanan nga magin mapainubsanon ha aton pagtratar ha usa kag usa.—Fil. 2:5-8.

13. Ano nga importante gud nga kalidad an iginpahinumdom ni Jesus ha iya mga disipulo nga kinahanglan nira kultibaron?

¹³ Usa pa nga topiko nga agsob ipakiistorya ni Jesus ha iya mga disipulo amo an panginahanglan nga magkaada marig-on nga pagtoo. Makausa han waray nira mapagawas an demonyo ha usa nga batan-on nga lalaki nga ginsaniban, nagpakiana hira kan Jesus: “Kay ano nga waray namon ito mapagawas?” Hi Jesus binaton: “Kay gutiay an iyo pagtoo. Ha pagkamatuod, susumatan ko kamo: Kon may pagtoo kamo nga bisan sugad la kagutiay han liso han mustasa, . . . waray imposible ha iyo.” (Mat. 17:14-20) Ha bug-os nga ministeryo ni Jesus, iya gintutdoan an iya mga disipulo nga an pagtoo importante gud nga kalidad. (Basaha an Mateo 21:18-22.) Natambong ba kita ha ngatanan nga aton mga kombensyon, asembleya, ngan katirok basi maparig-on naton an aton pagtoo? Diri la ito makalilipay nga mga pagkatirok; mga higayon ito nga ipakita naton an aton pagsarig kan Jehova.

14. Kay ano nga importante nga magpakita yana hin gugma nga pariho han iginpakita ni Kristo?

¹⁴ Ha Kristiano Griego nga Kasuratan damu an pahinumdom ha aton nga magpakita hin gugma ha usa kag usa. Hi Jesus nagsiring nga an ikaduha nga pinakaimportante nga sugo amo ini: “Higugmaa an imo igkasi-tawo sugad ha imo kalugaringon.” (Mat. 22:39) Sugad man, hi Santiago nga bugto ni Jesus ha nanay nagsiring nga an gugma “balaud han Hadi.” (San. 2:8) Hi apostol Juan nagsurat: “Mga hinigugma, an akon iginsusurat ha iyo diri bag-o nga sugo kondi daan nga sugo nga nakarawat niyo ha tinikangan.” (1 Juan 2:7, 8) Ano an gintutudlok ni Juan nga “daan nga sugo”? An iya karuyag sidngon amo an sugo nga magpakita hin gugma. “Daan” ito kay iginsugo ito ni Jesus damu ka tuig antes hito, “ha tinikangan.” Pero “bag-o” liwat ito kay nagkinahanglan ito hin gugma nga may pagsakripisyo, nga bangin pagkinahanglanon han mga disipulo ha ira pag-atubang hin bag-o nga mga sitwasyon. Sugad nga mga disipulo ni Kristo, diri ba gin-aapresyar naton an mga pahamangno nga nabulig ha aton nga diri magkaada makikalugaringon nga disposisyon nga kalyap gud hini nga kalibotan, nga mahimo makawara han aton gugma ha igkasi-tawo?

15. Ano an nangunguna nga katuyoan ni Jesus ha pagkanhi ha tuna?

¹⁵ Hi Jesus nagpakita hin personal nga interes ha mga tawo. Nakikita naton an iya mahigugmaon  nga pagtagad han iya gintambal an magsakit ngan baldado ngan ginbanhaw an mga patay. Kondi an nangunguna nga katuyoan ni Jesus ha pagkanhi ha tuna diri an pagtambal ha mga tawo. An iya pagsangyaw ngan pagtutdo mas daku an naibulig ha mga tawo. Paonan-o? Pananglitan, maaram kita nga an mga gintambal ngan ginbanhaw ni Jesus han siyahan nga siglo nalagas ngan namatay ha urhi, pero an mga kinarawat han mensahe nga iya iginsangyaw nagkaada paglaom nga mabuhi ha waray kataposan.—Juan 11:25, 26.

16. Paonan-o gintutuman han mga Saksi ni Jehova yana an sugo ni Jesus nga manhimo hin mga disipulo?

¹⁶ Hi Jesus nagsugo ha iya mga disipulo: “Salit kadto kamo ha mga tawo han ngatanan nga nasud ngan tutdui hira basi magin akon mga disipulo.” (Mat. 28:19) Iginpadayon han mga Kristiano han siyahan nga siglo an buruhaton nga gintikangan ni Jesus, ngan kita yana nagsasangyaw ha mas damu nga tawo ngan lugar. Sobra pito ka milyon nga aktibo nga mga Saksi ni Jehova an madasigon nga nagpapasamwak han Ginhadian han Dios ha sobra 230 nga katunaan, ngan minilyon an regular nga gindudumarahan nira hin pag-aram ha Biblia. Ini nga pagsangyaw nagpapamatuod nga nagkikinabuhi na kita ha kataposan nga mga adlaw.

17. Ano an iginsagdon ni Pablo ngan ni Pedro?

¹⁷ Matin-aw nga an mga pahinumdom nakabulig ha siyahan nga mga Kristiano nga magpabilin nga marig-on an pagtoo. Pananglitan, sigurado nga nadasig gud hi Timoteo han hi apostol Pablo, nga hito nga panahon priso ha Roma, nagsiring ha iya: “Padayon nga sunda an surubdan han maopay nga mga pulong nga imo nabatian ha akon.” (2 Tim. 1:13) Sugad man, katapos aghaton ni apostol Pedro an iya mga igkasi-Kristiano nga magkultibar han mga kalidad sugad han pagpailob, minagburugto nga gugma, ngan pagpugong ha kalugaringon, hiya nagsiring: “Magigin andam ako pirme ha pagpahinumdom ha iyo mahitungod hito, bisan kon maaram na kamo hito ngan marig-on na gud ha kamatuoran.”—2 Ped. 1:5-8, 12.

18. Paonan-o gintagad han mga Kristiano ha siyahan nga siglo an mga pahinumdom?

¹⁸ Oo, an mga surat nira Pablo ngan Pedro pariho han “mga ginsiring hadto han baraan nga mga propeta.” (2 Ped. 3:2) Nasina ba an aton kabugtoan ha siyahan nga siglo nga ginhatagan hira han sugad nga giya? Waray, kay kapahayagan ito han gugma han Dios, nga nakabulig ha ira nga ‘padayon nga mag-uswag ha diri-matupngan nga pagkabuotan ngan ha kahibaro mahitungod han Ginoo ngan Paratalwas nga hi Jesu-Kristo.’—2 Ped. 3:18.

19, 20. Kay ano nga sadang kita sumarig ha mga pahinumdom ni Jehova, ngan paonan-o kita nagpapahimulos hito?

¹⁹ Yana, damu an aton rason nga sumarig ha mga pahinumdom ni Jehova, nga mababasa ha iya Pulong, an Biblia, nga diri gud nagsasayop. (Basaha an Josue 23:14.) Dida hito aton mababasa an pagtratar han Dios ha diri-hingpit nga mga tawo ha sulod hin yinukot ka tuig. Iginrekord ito para ha aton kapulsanan. (Roma 15:4; 1 Cor. 10:11) Nakita naton an katumanan han mga tagna ha Biblia. An mga tagna maipapariho ha mga pahinumdom nga abanse nga iginsumat. Pananglitan, minilyon an nagin mga magsiringba ni Jehova, sugad han igintagna nga mahitatabo ha “urhi nga mga adlaw.” (Isa. 2:2, 3) An nagtitikaraot nga kahimtang ha kalibotan katumanan liwat han tagna ha Biblia. Ngan sugad han gin-unabi na, an pagsangyaw ha bug-os nga kalibotan direkta nga katumanan han ginsiring ni Jesus.—Mat. 24:14.

²⁰ Tikang pa hadto, iginpapakita gud han aton Maglalarang nga masasarigan naton hiya. Nagpapahimulos ba kita hito? Kinahanglan magkaada kita pagtoo ha iya mga pahinumdom. Ito an ginbuhat ni Rosellen. Hiya nagsiring: “Han nagtikang ako sumarig hin bug-os kan Jehova, mas napamatud-an ko an iya mahigugmaon nga pagsuporta ngan pagparig-on ha akon.” Hinaot kita liwat magpahimulos ha pagsugot ha mga pahinumdom ni Jehova.