1, 2. (a) Kay ano nga importante nga “magin mabinantayon may kalabotan ha mga pag-ampo”? (b) Ano nga mga pakiana mahitungod ha pag-ampo an sadang naton igpakiana ha aton kalugaringon?

“AN PINAKAMAKURI nga oras han gab-i nga magpabilin nga nagmamata amo an antes han kaagahon,” siring han usa nga pan-gab-i hadto an trabaho. Posible nga mauyon hito adton iba nga kinahanglan magmata ha bug-os nga gab-i. An mga Kristiano yana naatubang liwat hin pariho nga kahimtang tungod kay nagkikinabuhi na kita ha pinakamasirom nga panahon hinin maraot nga sistema ni Satanas. (Roma 13:12) Peligroso gud kon mahingaturog kita ha espirituwal! Kinahanglan ‘magkaada kita maopay nga panhunahuna’ ngan sundon an sagdon han Kasuratan nga “magin mabinantayon may kalabotan ha mga pag-ampo.”—1 Ped. 4:7.

² Tungod kay hirani na gud an kataposan han kalibotan ni Satanas, maaramon nga pakianhan naton an aton kalugaringon: ‘Mabinantayon gud ba ako may kalabotan ha pag-ampo? Ginagamit ko ba an ngatanan nga klase han pag-ampo, ngan padayon ba ako nga nag-aampo? Agsob ba ako mag-ampo para ha iba, o nag-aampo ako para la ha akon mga panginahanglan ngan mga karuyag? Ngan kay ano nga importante an pag-ampo para ha akon katalwasan?’

3. Ano an pipira nga klase han pag-ampo?

³ Ha surat ni apostol Pablo ha mga taga-Efeso, nag-unabi hiya han “ngatanan nga klase han pag-ampo.” (Efe. 6:18) Ha aton pag-ampo, kasagaran na nga naghahangyo kita kan Jehova nga ihatag an aton mga panginahanglan ngan buligan kita nga masulbad an aton mga problema. An Parapamati han pag-ampo mahigugmaon nga namamati kon nangangaro kita hin bulig. (Sal. 65:2) Kondi, sadang liwat naton gamiton an iba pa nga klase han pag-ampo. Nag-uupod  ito han pagdayaw, pagpasalamat, ngan pangamuyo.

4. Kay ano nga sadang naton dayawon hi Jehova hin agsob ha aton mga pag-ampo?

⁴ Damu an hinungdan kon kay ano nga sadang naton dayawon hi Jehova ha aton mga pag-ampo. Pananglitan, napapagios kita nga dayawon hiya kon ginhuhunahuna naton an ‘iya gamhanan nga mga buhat’ ngan an iya pagkaharangdon. (Basaha an Salmo 150:1-6.) Ngani, an unom nga bersikulo ha ika-150 han Salmo nag-uunabi hin 13 ka beses nga pagdayaw kan Jehova! Tungod han hilarom nga pagtahod ha Dios, an parasiday han usa pa nga salmo nagkanta: “Pipito kabalik ha usa ka adlaw gindadayaw ko ikaw, tungod han imo matadong nga mga sugo.” (Sal. 119:164) Takos gud nga dayawon hi Jehova. Salit, diri ba angayan la nga dayawon naton hiya ha aton mga pag-ampo hin ‘pito ka balik ha usa ka adlaw,’ karuyag sidngon, hin agsob gud?

5. Kay ano nga an pagin mapasalamaton ha aton mga pag-ampo usa nga proteksyon?

⁵ An pagpasalamat usa pa nga importante nga klase han pag-ampo. Hi Pablo nagsagdon ha mga Kristiano ha syudad han Filipos: “Ayaw kamo kabaraka ha bisan ano, kondi ha ngatanan nga butang pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo.” (Fil. 4:6) Usa nga proteksyon an pagpahayag hin kinasingkasing nga pagpasalamat kan Jehova ha pag-ampo. Importante ini labi na kay nagkikinabuhi na kita ha kataposan nga mga adlaw diin an mga tawo “diri mapasalamaton.” (2 Tim. 3:1, 2) Kalyap na gud ha kalibotan ito nga disposisyon. Kon diri kita mabinantayon, mahimo kita maimpluwensyahan hito. An pagpasalamat ha Dios ha pag-ampo nabulig ha aton nga magin kontento ngan diri ‘magngurutob ngan magreklamo mahitungod han aton kahimtang ha kinabuhi.’ (Jud. 16) Dugang pa, kon an amay nag-aampo upod han iya pamilya ngan iya igin-aapi an pagpasalamat, mag-aaghat ito ha iya asawa ngan mga anak nga magin mapasalamaton.

6, 7. (a) Ano an pangamuyo? (b) Ano nga mga butang an puydi naton ipangamuyo kan Jehova?

⁶ An pangamuyo amo an sinsero nga pag-ampo upod an hilarom nga pagbati. Ano an puydi naton ipangamuyo kan Jehova? Sigurado nga mangangamuyo kita kon gintitimaraot kita o kon may-ada kita grabe nga sakit. Ha sugad nga mga kahimtang, makatadunganon la nga mangamuyo kita ha Dios para han bulig. Kondi ini la ba an mga higayon nga mangangamuyo kita kan Jehova?

⁷ Tagda an modelo nga pag-ampo ni Jesus, ngan tigamni an iya ginsiring mahitungod han ngaran han Dios, han Iya Ginhadian, ngan han Iya kaburut-on. (Basaha an Mateo 6:9, 10.) Ini nga kalibotan puno na gud hin karaotan, ngan an gobyerno han tawo diri nakakaghatag bisan man la han nangunguna nga mga panginahanglan han mga tuminungnong hito. Salit, angayan gud la nga ig-ampo naton nga baraanon an ngaran han aton langitnon nga Amay ngan tapuson han iya Ginhadian an pagmando ni Satanas dinhi ha tuna. Ini liwat an panahon nga mangamuyo kita kan Jehova nga matuman an iya kaburut-on dinhi ha tuna sugad han ha langit. Salit magpabilin kita nga mabinantayon ngan gamiton naton an ngatanan nga klase han pag-ampo.

8, 9. Kay ano nga diri naton sadang hukman hi Pedro ngan an iba pa nga apostol han ira kahingaturog ha hardin han Getsemani?

⁸ Bisan kon hi apostol Pedro nagsagdon ha mga Kristiano nga “magin mabinantayon may kalabotan ha mga pag-ampo,” ha usa nga higayon, hiya mismo napakyas ha pagbuhat hito. Usa hiya han mga disipulo nga nahingaturog samtang nag-aampo hi Jesus ha hardin han Getsemani. Bisan kon ginsidngan pa la hira ni Jesus nga “padayon . . . nga magbantay ngan mag-ampo,” waray nira ito buhata.—Basaha an Mateo 26:40-45.

⁹ Imbes nga hukman hi Pedro ngan an iba pa nga apostol tungod han kahingaturog, sadang  naton hinumdoman nga kapoy hira hinduro tungod han ira mga ginbuhat hito nga bug-os nga adlaw. Nag-andam hira ngan nagsaurog han Paskua hito nga gab-i. Katapos gintikangan ni Jesus an Panihapon han Ginoo. Iginpakita hito kon paonan-o isasaurog ha tidaraon an Memoryal han iya kamatayon. (1 Cor. 11:23-25) “Katapos nira magkanta hin mga pagdayaw, kinadto hira ha Bukid han mga Olibo,” diin nagbaktas hira hin hurohirayo ha haligot nga mga kalsada han Jerusalem. (Mat. 26:30, 36) Bangin pasado alas-12 na ito han gab-i. Kon nakadto kita ha hardin han Getsemani hito nga gab-i, bangin nahingaturog liwat kita. Imbes nga masina hi Jesus ha kapoy na nga mga apostol, mahigugmaon nga ginsabot niya an ira kahimtang ngan nagsiring, “An espiritu disidido pero an lawas maluya.”

10, 11. (a) Ano nga leksyon an hinbaroan ni Pedro ha iya eksperyensya ha hardin han Getsemani? (b) Ano an imo hinbaroan tikang ha eksperyensya ni Pedro?

¹⁰ Hi Pedro nahibaro hin makasurubo kondi importante nga leksyon han gab-i nga nahingaturog hiya ha hardin han Getsemani. Antes hito nga panhitabo, hi Jesus nagsiring: “Babayaan ako niyo ngatanan tungod han mahitatabo ha akon yana nga gab-i.” Kondi hi Pedro nagsiring: “Bisan bayaan ka nira ngatanan tungod han mahitatabo ha imo, diri ko gud ikaw babayaan!” Katapos nagsiring hi Jesus nga igninigar hiya ni Pedro hin makatulo ka beses. Kondi hi Pedro marig-on nga binaton: “Bisan pa ako mamatay kaupod mo, diri ko gud ikaw igninigar.” (Mat. 26:31-35) Pero natuman an ginsiring ni Jesus, iginnigar hiya ni Pedro. Han nasantop ni Pedro an iya nabuhat, “nagtangis [hiya] tungod han duro nga kasubo.”—Luc. 22:60-62.

¹¹ Hini nga panhitabo, nahibaro hi Pedro hin leksyon nga diri sobra nga sumarig ha iya kalugaringon. Sigurado nga hini nga kahimtang, nakabulig ha iya an pag-ampo. Ha pagkamatuod, tikang pa ngani ha iya an sagdon nga “magin mabinantayon may kalabotan ha mga pag-ampo.” Ginsusunod ba naton iton giniyahan nga sagdon? Dugang pa, ‘padayon ba kita nga nag-aampo’ ngan iginpapakita an aton pagsarig kan Jehova? (Sal. 78:7) Aton liwat sundon an sagdon ni apostol Pablo: “An naghuhunahuna nga natindog hiya magbantay nga diri hiya matumba.”—1 Cor. 10:12.

12. Kay ano nga maopay nga susbaranan hi Nehemia para ha aton?

¹² Tagda hi Nehemia nga nagtrabaho sugad nga paratagay ni Hadi Artaherhes han Persia han ika-5 ka siglo B.C.E. Nagpakita hiya hin maopay nga susbaranan han sinsero nga pag-ampo. Ha sulod hin pipira ka adlaw, padayon hiya nga “nagpuasa ngan nag-ampo ha atubangan han Dios” tungod han makuri nga kahimtang han mga Judio ha Jerusalem. (Neh. 1:4) Han ginpakianhan hiya ni Artaherhes kon kay ano nga  masurub-on hiya, ‘nag-ampo [dayon] hiya ha Dios ha langit.’ (Neh. 2:2-4) Ano an resulta? Ginbaton ni Jehova an iya mga pag-ampo ngan ginmaniobra an mga butang basi buligan an Iya katawohan. (Neh. 2:5, 6) Sigurado nga nagparig-on gud ito han pagtoo ni Nehemia!

13, 14. Ano an sadang naton buhaton basi matipigan nga marig-on an aton pagtoo ngan maatohan an mga pagsulay ni Satanas para paluyahon kita?

¹³ An padayon nga pag-ampo sugad han ginbuhat ni Nehemia nabulig nga matipigan nga marig-on an aton pagtoo. Waray gud kalooy hi Satanas, ngan agsob hiya umatake ha aton kon maluya kita. Pananglitan, kon masakit kita o nadidepres, bangin umabat kita nga an oras nga aton ginagamit ha ministeryo kada bulan diri ginpapabilhan han Dios. An pipira ha aton bangin may ginhihinunahuna nga makapaluya, posible nga tungod han diri maopay nga eksperyensya han naglabay. Karuyag ni Satanas nga abaton naton nga waray kita pulos. Ginsasalingabot niya inin negatibo nga mga pagbati basi paluyahon an aton pagtoo. Kondi pinaagi ha pagin “mabinantayon may kalabotan ha mga pag-ampo,” matitipigan naton nga marig-on an aton pagtoo. Oo, pinaagi han ‘daku nga taming han pagtoo mapaparong naton an ngatanan nga naglalaga nga pana han usa nga maraot.’—Efe. 6:16.

¹⁴ Kon “mabinantayon [kita] may kalabotan ha mga pag-ampo,” diri kita matitigdaan kon may mga pagsari nga diri naton ginlalaoman ngan diri naton maikukompromiso an aton pagtoo. Kon nakakaeksperyensya kita hin mga pagsari ngan mga pagsulay, aton hinumdoman an susbaranan ni Nehemia ngan mag-ampo dayon ha Dios. Maaatohan la naton an mga pagsulay ngan maiilob an mga pagsari pinaagi han bulig ni Jehova.

15. May kalabotan ha pag-ampo para ha iba, ano an sadang naton igpakiana ha aton kalugaringon?

¹⁵ Hi Jesus nangamuyo para kan Pedro basi  diri magluya an pagtoo han apostol. (Luc. 22:32) Ini nga ginbuhat ni Jesus ginsubad han matinumanon nga Kristiano han siyahan nga siglo nga hi Epafras, nga nangalimbasog gud ha pag-ampo para ha iya kabugtoan ha Colosas. Hi Pablo nagsurat ha ira: “Dayoday gud an iya paniguro hin pag-ampo, basi mahingpit kamo ngan magmasarig ha iyo an kaburut-on han Dios.” (Col. 4:12, An Baraan nga Biblia) Maopay nga pakianhan naton an aton kalugaringon: ‘Nangangalimbasog gud ba ako pag-ampo para ha akon kabugtoan ha bug-os nga kalibotan? Agsob ko ba ig-ampo an kabugtoan nga nabiktima hin kalamidad? Kakan-o ko ultimo nga igin-ampo adton may mabug-at nga responsabilidad ha organisasyon ni Jehova? Nag-ampo pa la ba ako para ha akon mga kakongregasyon nga may-ada mga problema?’

16. Makakabulig ba an aton mga pag-ampo para ha iba? Isaysay.

¹⁶ An aton pag-ampo para ha iba makakabulig gud ha ira. (Basaha an 2 Corinto 1:11.) Bisan kon diri obligado hi Jehova nga batunon an usa nga pag-ampo tungod la kay damu nga iya surugoon an pauroutro nga nag-aampo hito, nalilipay hiya nga makita an ira sinsero nga pagtagad ha usa kag usa. Iya babatunon an ira mga pag-ampo uyon ha iya kaburut-on. Salit sadang naton seryosohon an aton pribilehiyo ngan responsabilidad nga mag-ampo para ha iba. Pariho kan Epafras, sadang naton ipakita an aton sinsero nga gugma ngan pagtagad ha aton kabugtoan pinaagi ha pangalimbasog ha pag-ampo para ha ira. Kon bubuhaton naton ito magigin mas malipayon kita tungod kay “mas makalilipay an paghatag kay ha pagkarawat.”—Buh. 20:35.

17, 18. Paonan-o makakabulig ha aton an pagin “mabinantayon may kalabotan ha mga pag-ampo”?

¹⁷ Antes magsiring hi Pablo nga “hilarom na an kagab-ihon, ngan an adlaw hirani na,” hiya nagsurat: “Maaram kamo han panahon, nga oras na yana nga magmata kamo tikang ha pagkaturog, kay an aton katalwasan mas hirani na yana kay han panahon nga nagin mga tumuroo kita.” (Roma 13:11, 12) Hirani na an bag-o nga kalibotan nga iginsaad han Dios, ngan an aton katalwasan mas hirani na kay han bangin ginhuhunahuna naton. Kinahanglan diri kita mahingaturog ha espirituwal, ngan diri gud naton tugotan an mga buruhaton ha kalibotan nga makaubos han aton panahon nga para ha aton pribado nga pag-ampo kan Jehova. Lugod, “magin mabinantayon [kita] may kalabotan ha mga pag-ampo.” An pagbuhat hito mabulig ha aton nga magin ‘baraan ha aton panggawi ngan ha mga buhat tungod han debosyon ha Dios’ samtang ginhuhulat naton an adlaw ni Jehova. (2 Ped. 3:11, 12) An paagi han aton pagkinabuhi magpapakita kon padayon ba kita nga nagmamata ha espirituwal ngan kon natoo gud ba kita nga hirani na an kataposan hinin maraot nga sistema. Salit hinaot “padayon [kita] nga mag-ampo.” (1 Tes. 5:17) Subaron liwat naton hi Jesus pinaagi ha pagpamiling hin mamingaw nga lugar para ha aton pribado nga pag-ampo. Kon maggagahin kita hin igo nga panahon para ha aton pag-ampo, magigin mas duok kita kan Jehova. (San. 4:7, 8) Daku gud ito nga bendisyon!

¹⁸ An Biblia nasiring: “Han nagkikinabuhi pa an Kristo dinhi ha tuna naghalad hiya hin mga pangamuyo ngan mga hangyo ha Dios nga nagtalwas ha iya tikang ha kamatayon, nga may mga araba ngan mga pagtangis, ngan ginpamatian gud an iya mga pag-ampo kay may kahadlok hiya ha Dios.” (Heb. 5:7) Hi Jesus nangamuyo, naghangyo, ngan nagpabilin nga matinumanon ha Dios tubtob ha kamatayon. Tungod hito, gintalwas ni Jehova inin Iya hinigugma nga Anak tikang ha kamatayon ngan ginbalosan hin diri-mamaratyon nga kinabuhi ha langit. Mahimo liwat kita magin matinumanon ha aton langitnon nga Amay anoman nga pagsulay ngan pagsari nga bangin maeksperyensyahan naton ha tidaraon. Oo, makakarawat naton an premyo nga kinabuhi nga waray kataposan kon magpapabilin kita nga “mabinantayon may kalabotan ha mga pag-ampo.”