1, 2. Kay ano nga iginpapariho ni Jehova an iya kalugaringon ha usa nga paraataman han karnero?

IGINPAPARIHO ni Jehova an iya kalugaringon ha usa nga paraataman han karnero. (Esek. 34:11-14) Nabulig ini ha aton nga masabtan kon ano nga klase hin Dios hi Jehova. An usa nga mahigugmaon nga paraataman han karnero naghuhunahuna nga responsabilidad niya an kinabuhi han mga karnero nga iya ginmamangnoan. Iya hira gintutugwayan ngadto ha dapit nga damu an banwa ngan may mga tubig (Sal. 23:1, 2); ginbabantayan hira adlaw ngan gab-i (Luc. 2:8); ginpapanalipdan hira tikang ha mabangis nga mga hayop (1 Sam. 17:34, 35); ginkukugos adton igin-aanak pa la (Isa. 40:11); ginbibiling an mga nawawara, ngan ginmamangnoan hin maopay adton may sakit o nasamaran.—Esek. 34:16.

² Tungod kay mga paraataman han karnero ngan mga parauma an kadam-an han katawohan ni Jehova ha kadaan nga panahon, masayon nira masabtan kon kay ano nga iginpariho hi Jehova ha usa nga mahigugmaon nga paraataman han karnero. Maaram hira nga kinahanglan han karnero an pagmangno ngan atensyon basi magin mahimsog ngan padayon nga mabuhi. Ha pariho nga paagi, an katawohan nagkikinahanglan hin pagmangno ngan giya tikang kan Jehova. (Mar. 6:34) Kon waray ito, mag-aantos an katawohan. Diri hira mahibabaro kon ano an husto ngan kon ano an sayop, ngan waray magpapanalipod ha ira. Pariho hira hin “kakarnerohan nga waray magbarantay.” (1 Hadi 22:17) Kondi hi Jehova mahigugmaon nga nagtatagana han mga panginahanglan han iya katawohan.

3. Ano an aton hihisgotan hini nga artikulo?

³ Nasasabtan liwat naton kon kay ano nga iginpariho hi Jehova ha usa nga paraataman han karnero. Nakikita naton nga iya ginmamangnoan hin maopay an iya katawohan yana. Hisgotan naton kon paonan-o gin-gigiyahan ni Jehova an iya mga karnero yana ngan igintatagana an ira mga  panginahanglan. Aton liwat hisgotan kon ano an sadang buhaton han mga karnero basi magpahimulos han iya mahigugmaon nga pagmangno.

4. Ano an papel ni Jesus ha pag-ataman ha mga karnero ni Jehova?

⁴ Ginpili ni Jehova hi Jesus sugad nga Ulo han Kristiano nga kongregasyon. (Efe. 1:22, 23) Sugad nga “maopay nga paraataman,” iginpakita ni Jesus kon ano an mga karuyag, katuyoan, ngan kalidad han iya Amay. Iya pa ngani ‘iginhatag an iya kalag para ha mga karnero.’ (Juan 10:11, 15) Bendisyon gud para ha katawohan an halad lukat ni Kristo! (Mat. 20:28) Katuyoan ni Jehova nga “an tagsa nga nagpapakita hin pagtoo [kan Jesus] diri mamatay kondi magkaada kinabuhi nga waray kataposan”!—Juan 3:16.

5, 6. (a) Hin-o an ginpili ni Jesus basi magmangno ha iya mga karnero, ngan ano an sadang buhaton han mga karnero basi magpahimulos hito nga pagmangno? (b) Ano an nangunguna nga hinungdan kon kay ano nga karuyag gud naton sumugot ha mga tigurang?

⁵ Paonan-o iginpapakita han mga karnero nga hi Jesu-Kristo an ira Maopay nga Paraataman? Hi Jesus nagsiring: “An akon mga karnero namamati han akon tingog. Kilala ko hira, ngan nasunod hira ha akon.” (Juan 10:27) An pagpamati ha tingog han Maopay nga Paraataman nangangahulogan hin pirme pagsunod han iya giya. Nag-uupod ini ha pakigkooperar ha iya ginpili nga kabulig nga mga paraataman. Iginpakita ni Jesus nga an iya mga apostol ngan mga disipulo an magpapadayon ha buruhaton nga iya gintikangan. Ira ‘tututdoan’ ngan ‘papakaunon an gudtiay nga karnero ni Jesus.’ (Mat. 28:20; basaha an Juan 21:15-17.) Samtang padayon nga iginsasangyaw an maopay nga sumat ngan nagtitikadamu an mga disipulo, ginsiguro ni Jesus nga may-ada hamtong nga mga Kristiano nga magmamangno ha mga kongregasyon.—Efe. 4:11, 12.

⁶ Han nagsurat hi apostol Pablo ha mga paramangno han kongregasyon ha Efeso han siyahan nga siglo, iya gin-unabi nga an baraan nga espiritu an nagpili ha ira sugad nga mga paramangno “basi atamanon an kongregasyon han Dios.” (Buh. 20:28) An mga tigurang yana ginpili liwat han baraan nga espiritu tungod kay ginpili hira uyon ha mga kwalipikasyon nga aada ha Biblia. Salit an pagsugot ha ira nagpapakita nga gintatahod naton hi Jehova ngan hi Jesus, an duha nga gimaopayi nga Paraataman. (Luc. 10:16) Ini an nangunguna nga hinungdan kon kay ano nga karuyag gud naton magpasakop ha mga tigurang. Kondi may iba pa nga hinungdan kon kay ano nga maaramon an pagsunod ha ira giya.

7. Paonan-o ka ginbubuligan han mga tigurang basi matipigan an imo maopay nga relasyon kan Jehova?

⁷ Kon an mga tigurang nagdadasig ngan nagsasagdon ha kabugtoan, pirme nira ito iginbabasar ha Biblia. Diri nira katuyoan nga diktahan an kabugtoan kon paonan-o hira sadang magkinabuhi. (2 Cor. 1:24) Lugod, katuyoan nira nga buligan an kabugtoan nga makahimo hin husto nga mga desisyon ngan magkaada pagkaurosa ngan kamurayawan ha kongregasyon. (1 Cor. 14:33, 40) An mga tigurang ‘nagbabantay han mga kalag’ ha paagi nga karuyag nira buligan an tagsa nga membro han kongregasyon basi matipigan an maopay nga relasyon kan Jehova. Salit ginbubuligan dayon nira an usa nga bugto kon naabat hira nga magbubuhat hiya, o nagbuhat na, hin “sayop nga pitad.” (Gal. 6:1, 2; Jud. 22) Diri ba mag-opay gud ini nga hinungdan nga magin ‘masinugtanon ha mga nangunguna’?—Basaha an Hebreo 13:17.

8. Paonan-o ginpapanalipdan han mga tigurang an panon han Dios?

⁸ Hi apostol Pablo nga usa nga espirituwal nga paraataman han karnero, nagsurat ha iya kabugtoan ha Colosas: “Siguroha nga waray magbihag ha iyo pinaagi han pilosopiya ngan waray pulos nga panlimbong nga iginbasar ha tradisyon han tawo, ha basihan nga mga prinsipyo han kalibotan ngan diri uyon ha katutdoan han Kristo.” (Col. 2:8) Ini nga pahamangno nabulig ha  aton nga makita an usa pa nga maopay nga hinungdan kon kay ano nga sadang mamati kita ha Kasuratanhon nga sagdon han mga tigurang. Ginpapanalipdan nira an panon tikang ha bisan hin-o nga mahimo magpaluya han ira pagtoo. Hi apostol Pedro nagpahamangno kontra ha “buwa nga mga propeta” ngan “buwa nga mga magturutdo” nga mangangalimbasog ha ‘pagsulay ha magluya nga kalag’ basi magbuhat hin sala. (2 Ped. 2:1, 14) An mga tigurang yana sadang maghatag hin pariho nga pahamangno kon ginkikinahanglan. Sugad nga hamtong nga mga Kristiano, damu na an ira eksperyensya ha kinabuhi. Dugang pa, antes hira pilion sugad nga mga tigurang, napamatud-an nira nga may-ada hira matin-aw nga pagsabot ha Kasuratan ngan kwalipikado hira ha pagtutdo han kamatuoran ha Biblia. (1 Tim. 3:2; Tito 1:9) An ira pagin hamtong, pagin timbang, ngan pagkaada hin kinaadman nga basado ha Biblia nabulig ha ira basi magiyahan hin maopay an panon.

9. Paonan-o gin-gigiyahan ngan ginpapakaon ni Jesus an Kristiano nga kongregasyon yana?

⁹ Pinaagi han iya organisasyon, hi Jehova nagtatagana hin hura nga espirituwal nga pagkaon ha ngatanan nga kabugtoan ha bug-os nga kalibotan. Damu nga sagdon nga tikang ha Kasuratan an igintatagana pinaagi ha aton mga publikasyon. Dugang pa, may mga panahon nga an organisasyon direkta nga naghahatag hin giya ha mga tigurang ha kongregasyon, pinaagi man ito hin mga surat o mga instruksyon tikang ha nagbibiyahe nga mga paramangno. Hini nga mga paagi, an  mga karnero nakakakarawat hin matin-aw nga giya.

10. Ano an responsabilidad han mga tigurang may kalabotan ha mga karnero nga nagpahirayo ha panon?

¹⁰ Responsabilidad han mga paramangno nga panalipdan, panginanoon, ngan mangnoan an espirituwal nga kahimsog han mga membro han kongregasyon, labi na adton maluya an pagtoo o may sakit ha espirituwal. (Basaha an Santiago 5:14, 15.) An pipira hini nga mga indibiduwal bangin binulag ha panon ngan inundang ha pakigbahin ha espirituwal nga mga buruhaton. Ha sugad nga kahimtang, diri ba bubuhaton han mahigugmaon nga tigurang an ngatanan nga iya mahihimo basi pamilngon an tagsa nga nawawara nga karnero ngan dasigon nga bumalik ha kongregasyon? Sigurado nga ito gud an iya bubuhaton! Hi Jesus nagsiring: “Diri karuyag han akon Amay ha langit nga mawara an bisan usa la hini nga mga ubos.”—Mat. 18:12-14.

11. Kay ano nga an pipira bangin nakukurian ha pagsunod ha pagpanguna han mga tigurang?

¹¹ Hi Jehova ngan hi Jesus hingpit nga mga Paraataman han karnero. Kondi an kabulig nga mga paraataman nga ira gintaporan ha pagmangno han kongregasyon diri mga hingpit. Tungod hini an pipira bangin nakukurian ha pagsunod ha pagpanguna han mga tigurang. Bangin mangatadongan hira: ‘An mga tigurang diri mga hingpit pariho ha aton. Kay ano nga mamamati kita ha ira sagdon?’ Tinuod, an mga tigurang diri mga hingpit. Kondi kinahanglan magkaada kita husto nga pagtagad ha ira mga kaluyahan ngan mga sayop.

12, 13. (a) Ha naglabay, ano nga mga sayop an nabuhat han pipira nga gintaporan han Dios ha pagpanguna ha iya katawohan? (b) Kay ano nga iginpasurat ha Biblia an ira mga sayop?

¹² Tangkod nga iginsusumat han Biblia an mga kapakyasan hadton gin-gamit ni Jehova ha pagpanguna han iya katawohan ha naglabay. Pananglitan, hi David gindihogan sugad nga hadi ngan lider han Israel. Kondi nagpadaog hiya ha pagsulay ngan nagbuhat hin pag-adulteryo ngan pagpatay. (2 Sam. 12:7-9) Tagda liwat hi apostol Pedro. Bisan kon gintaporan hiya hin mabug-at nga responsabilidad ha Kristiano nga kongregasyon han siyahan nga siglo, nakabuhat hiya hin seryoso nga mga sala. (Mat. 16:18, 19; Juan 13:38; 18:27; Gal. 2:11-14) Labot kan Jesus, waray hingpit nga tawo nga nabuhi tikang ha panahon nira Adan ngan Eva.

¹³ Kay ano nga iginpasurat ni Jehova ha Biblia an mga sayop han kalalakin-an nga iya gintaporan ha pagpanguna ha iya katawohan? An usa nga hinungdan amo nga basi ipakita nga puydi niya gamiton an diri hingpit nga mga tawo ha paggiya ha iya katawohan. Ha pagkamatuod, pirme niya ito ginbubuhat. Salit an pagkadiri-hingpit han nangunguna ha aton diri gud angay gamiton nga pasangil basi magngurutob ha ira o igbalewaray an ira awtoridad. Ginlalaoman ni Jehova nga tatahuron ngan susugton naton hira.—Basaha an Eksodo 16:2, 8.

14, 15. Ano an aton mahibabaroan ha paagi han paghatag ni Jehova hin mga instruksyon ha iya katawohan ha naglabay?

¹⁴ Importante gud nga sugton naton an mga nangunguna ha aton yana. Hunahunaa kon paonan-o naghatag hi Jehova hin instruksyon ha iya katawohan durante han peligroso nga mga panahon ha naglabay. Han binaya an mga Israelita ha kadaan nga Ehipto, nakarawat nira an mga instruksyon han Dios pinaagi kanda Moises ngan Aaron. Basi matalwas tikang ha napulo nga peste, kinahanglan nira sugton an instruksyon nga magkaada hin espesyal nga pangaon ngan wisikan hin dugo han gin-ihaw nga karnero an mga poste ngan mga hamba han purtahan han ira mga balay. Ito nga instruksyon waray nira makarawat pinaagi hin tingog tikang ha langit. Kinahanglan nira mamati ha mga tigurang han Israel, nga kinarawat hin espisipiko nga mga instruksyon tikang kan Moises. (Eks. 12:1-7, 21-23, 29) Hito nga paagi, gin-gamit ni Jehova hi Moises ngan an mga tigurang han Israel basi isumat ha Iya katawohan an Iya mga instruksyon. Gin-gagamit liwat ni Jehova an mga tigurang yana ha pagbuhat hin pariho hito.

 ¹⁵ Bangin may mahunahuna ka pa nga mga hitabo ha Biblia diin gin-gamit ni Jehova an mga tawo o mga anghel ha paghatag hin nagluluwas hin kinabuhi nga mga instruksyon. Hini ngatanan nga hitabo, gumamit an Dios hin mga representante. An mga mensahero nagyakan pinaagi ha iya ngaran, ngan ira iginsumat ha iya katawohan kon ano an kinahanglan nira buhaton basi matalwas ha peligroso nga mga panahon. Diri ba naton nahuhunahuna nga bangin gamiton liwat ni Jehova an pariho nga paagi ha Armagedon? Syempre, an mga tigurang yana nga gintokahan ha pagrepresentar kan Jehova o ha iya organisasyon sadang magin mabinantayon gud nga diri abusuhon an awtoridad nga igintapod ha ira.

16. Ano nga “pulong” an kinahanglan naton pamatian?

¹⁶ An katawohan ni Jehova ginkukompwesto hin “usa nga panon” ha pagpanguna han “usa nga paraataman,” hi Jesu-Kristo. (Juan 10:16) Hi Jesus nagsiring nga makakaupod hiya han iya mga disipulo “ha ngatanan nga adlaw tubtob ha ikatarapos hini nga sistema.” (Mat. 28:20) Sugad nga langitnon nga Hadi, kontrolado niya an ngatanan nga butang nga mahitatabo antes bungkagon an kalibotan ni Satanas. Basi magpabilin nga nagkakaurosa ngan talwas upod an panon han Dios, kinahanglan mamati kita ha ‘usa nga pulong ha aton luyo,’ nga nagtututdo han dalan nga aton paglalaktan. Ini nga “pulong” nag-uupod han ginsisiring han baraan nga espiritu han Dios pinaagi han Biblia ngan han ginsisiring ni Jehova ngan ni Jesus pinaagi han ira pinili nga kabulig nga mga paraataman.—Basaha an Isaias 30:21; Pahayag 3:22.

17, 18. (a) Kay ano nga namimeligro an panon han Dios, kondi ha ano kita makakasarig? (b) Ano an hihisgotan ha sunod nga artikulo?

¹⁷ An Biblia nasiring nga hi Satanas naglilinakat-lakat “pariho hin nagngungurob nga leon, nga nagpipinamiling hin lalamyon.” (1 Ped. 5:8) Pariho hin ihalas ngan mapintas nga hayop, namimiling hiya ha panon hin iya bibiktimahon, naghuhulat hin higayon nga atakehon adton magluya o nahibulag ha panon. Salit kinahanglan nga magpabilin kita nga duok gud ha kongregasyon ngan kan Jehova, an “paraataman ngan paramangno han [aton] mga kalag.” (1 Ped. 2:25) May kalabotan hadton matatalwas ha daku nga kasakitan, an Pahayag 7:17 nasiring: “An Kordero [Jesus] . . . mag-aataman ha ira ngan maggigiya ha ira ngadto ha mga burabod han tubig han kinabuhi. Ngan papahiron han Dios an mga luha ha ira mga mata.” May mas makalilipay pa ba hini nga saad?

¹⁸ Katapos hisgotan an importante gud nga papel han mga tigurang sugad nga kabulig nga mga paraataman han panon, maopay nga pakianhan nira an ira kalugaringon, Paonan-o ko masisiguro nga ginmamangnoan ko hin maopay an mga karnero ni Jesus? Hihisgotan ini ha sunod nga artikulo.