1, 2. Ano an posible gud nga ginhunahuna han mga apostol antes an ultimo nga pagbiyahe ni Jesus pakadto ha Jerusalem?

NAKITA han mga magbarantay ha Jerusalem an gimata, o new moon. Iginpahibaro ito ha Sanhedrin ngan igindeklara nira nga nagtikang na an bag-o nga bulan, an Nisan. Katapos, iginpasarang ito nga sumat pinaagi han pagpalaga han kalayo nga naghahatag hin sinyales o pinaagi hin mga mensahero. Maaram an mga apostol nga an panahon han Paskua nagtitikahirani na. Posible gud nga ginhunahuna nira nga karuyag ni Jesus makaabot ha Jerusalem antes an Paskua.

² Hito nga panahon, hi Jesus ngan an iya mga apostol nakadto ha Perea (tabok han Jordan) ha iya ultimo nga pagbiyahe pakadto ha Jerusalem. (Mat. 19:1; 20:17, 29; Mar. 10:1, 32, 46) Kon hibaroan na an siyahan nga adlaw han Nisan, an Paskua isasaurog paglabay hin 13 ka adlaw, katunod han adlaw ha Nisan 14.

3. Kay ano nga angayan gud la nga magin interesado an mga Kristiano ha petsa han Paskua?

³ An petsa han Panihapon han Ginoo nga katugbang ha petsa han Paskua, mahitutuman ha Abril 14, 2014, katunod han adlaw. Espesyal ito nga adlaw para ha tinuod nga mga Kristiano ngan ha mga interesado. Kay ano? Tungod han aton mababasa ha 1 Corinto 11:23-25: “Han tatraydoran na an Ginoo nga hi Jesus, kinuha hiya hin tinapay, ngan katapos magpasalamat, iya gintipik-tipik ito ngan nagsiring: ‘Nagsisimbolo ini han akon lawas nga ihahatag para ha iyo. Padayon nga buhata niyo ini sugad nga hinumdoman ha akon.’ Sugad liwat hito an iya ginbuhat ha kopa.”

4. (a) Ano an posible igpakiana mahitungod han Memoryal? (b) Paonan-o mahibabaroan an petsa han Memoryal kada tuig? (Kitaa an kahon nga  “Memoryal ha 2014.”)

⁴ An Memoryal an amo la nga okasyon nga iginsugo ni Jesus nga isaurog kada tuig han iya mga sumurunod, ngan sigurado nga karuyag mo tumambong hito. Antes pa hito, pakianhi an imo kalugaringon: ‘Paonan-o ako mangangandam para hito nga okasyon? Ano nga mga emblema an gagamiton?  Ano an bubuhaton durante hito? Kay ano nga importante ha akon ito nga okasyon ngan an mga emblema nga ginagamit para hito?’

5. Ano an iginsugo ni Jesus ha iya mga apostol mahitungod ha pagpangandam para ha ultimo nga Paskua?

⁵ Han ginsugo ni Jesus an iya mga apostol nga mag-andam hin kwarto nga gagamiton para ha panihapon ha Paskua, waray hiya magsiring nga butangan ito hin damu nga dekorasyon; lugod, posible nga karuyag la niya an simple ngan malimpyo nga kwarto nga may igo nga espasyo para ha iya ngan ha iya mga apostol. (Basaha an Marcos 14:12-16.) Iaandam nira an ngatanan nga butang nga ginkikinahanglan para ha panihapon, upod na an tinapay nga waray ipaturubo ngan an pula nga bino. Katapos han panihapon, naghisgot hi Jesus mahitungod hiton duha nga emblema.

6. (a) Katapos han panihapon ha Paskua, ano an ginsiring ni Jesus mahitungod han tinapay? (b) Ano nga klase hin tinapay an ginagamit ha Memoryal?

⁶ Hi apostol Mateo presente hito nga okasyon ngan ha urhi hiya nagsurat: “Kinuha hi Jesus hin tinapay, ngan katapos mag-ampo gintipik-tipik ito, iginhatag ha mga disipulo ngan nagsiring: ‘Kuha kamo ngan kaona niyo.’” (Mat. 26:26) An “tinapay” waray ipaturubo, pariho han gin-gamit para ha Paskua. (Eks. 12:8; Deut. 6:3) Ginhimo ito tikang ha trigo nga harina ngan tubig, waray bisan ano nga salakot sugad han asin. Tungod kay waray ito ipaturubo, waray ito tumubo. Ordinaryo la ito, mamara, maragumok, ngan masayon tipik-tipikon. Yana, antes an Memoryal, an mga tigurang puydi magtoka hin bugto nga magluluto hito. Lulutoon niya ito ha karaha nga may gutiay nga mantika. (Kon waray trigo nga harina, puydi gamiton an harina nga tikang ha bugas, mais, o ha mga lugas nga puropariho hito.)

7. Ano nga klase hin bino an ginhisgotan ni Jesus, ngan ano nga klase hin bino an mahimo naton gamiton yana ha Memoryal?

⁷ Hi Mateo nagpadayon: “Kinuha . . . [hi Jesus] hin kopa nga may bino, ngan kahuman mag-ampo, iginhatag ito ha mga apostol ngan nagsiring: ‘Inom kamo ngatanan hito.’” (Mat. 26:27, 28) An ginkuha ni Jesus amo an kopa nga may pula nga bino. (Posible nga diri ito bag-o nga duga han ubas, tungod kay hito nga panahon, maiha na nga natapos an pag-ani han ubas.) Waray bino han siyahan nga panihapon  ha Paskua didto ha Ehipto, kondi waray magsiring hi Jesus nga sayop an pag-inom hito durante han Paskua. Naggamit pa ngani hiya hito durante han Panihapon han Ginoo. Salit an mga Kristiano nagamit liwat hin bino durante han Memoryal. Kinahanglan waray ito halo nga alkohol o mga panakot, sugad la nga waray iginhalo ha dugo ni Jesus basi magin mas birilhon ito. Salit puro nga pula nga bino an sadang gamiton. Puydi nga hinimo la ito o ginpalit, sugad han Beaujolais, Burgundy, o Chianti.

8. Kay ano nga interesado an mga Kristiano ha ginsisimbolohan han tinapay ngan han bino?

⁸ Iginpatin-aw ni apostol Pablo nga labot la ha mga apostol, an mga Kristiano liwat sadang magsaurog han Panihapon han Ginoo. Hiya nagsurat ha iya mga igkasi-tumuroo ha Corinto: “An nakarawat ko tikang ha Ginoo igintutdo ko ha iyo, nga . . . an Ginoo nga hi Jesus, kinuha . . . hin tinapay, ngan katapos magpasalamat, iya gintipik-tipik ito ngan nagsiring: ‘Nagsisimbolo ini han akon lawas nga ihahatag para ha iyo. Padayon nga buhata niyo ini sugad nga hinumdoman ha akon.’” (1 Cor. 11:23, 24) Tungod hito, ginpapabilhan gud han mga Kristiano yana inin tinuig nga espesyal nga okasyon ngan interesado hira ha ginsisimbolohan han tinapay ngan han bino.

9. Ano an sayop nga gintotoohan han pipira mahitungod han tinapay nga gin-gamit ni Jesus?

⁹ An pipira nga relihiyoso naghuhunahuna nga literal an ginsiring ni Jesus: “Ini an akon lawas,” salit natoo hira nga an tinapay milagroso nga nagin unod mismo ni Jesus. Kondi diri ito uyon ha kamatuoran. * An lawas ni Jesus ngan an tinapay nga waray ipaturubo nakada ha atubangan han matinumanon nga mga apostol. Matin-aw nga nagyayakan hi Jesus ha simboliko nga paagi, sugad han iya ginbuhat ha damu nga higayon.—Juan 2:19-21; 4:13, 14; 10:7; 15:1.

10. Ano an ginsisimbolohan han tinapay nga gin-gamit durante han Panihapon han Ginoo?

 ¹⁰ An tinapay nga nakikita han mga apostol ngan ha diri na mag-iiha kakaunon nira, nagsisimbolo han lawas ni Jesus. Hadto, ginhunahuna han mga surugoon han Dios nga an tinapay nagsisimbolo ha kongregasyon han dinihogan nga mga Kristiano, nga gintatawag nga “lawas han Kristo,” tungod kay an tinapay gintipik-tipik ni Jesus samtang an iya mga tul-an waray man magkababari. (Efe. 4:12; Roma 12:4, 5; 1 Cor. 10:16, 17; 12:27) Kondi katapos han dugang nga pagsaliksik, nasabtan nira nga an tinapay nagsisimbolo han tawhanon nga lawas ni Jesus. “Nag-antos [hi Jesus] han tawo pa hiya,” iginraysang pa ngani ha pasakitan nga kahoy. Salit ha Panihapon han Ginoo, an tinapay nagsisimbolo han tawhanon nga lawas ni Jesus nga ‘nagdara han aton mga sala.’—1 Ped. 2:21-24; 4:1; Juan 19:33-36; Heb. 10:5-7.

11, 12. (a) Ano an ginsiring ni Jesus mahitungod han bino? (b) Ano an ginsisimbolohan han bino nga gin-gamit ha Panihapon han Ginoo?

¹¹ An paghibaro han ginsisimbolohan han tinapay nabulig ha aton nga masabtan kon ano an kahulogan han ginsiring ni Jesus mahitungod han bino. Aton mababasa: “Sugad liwat hito an iya ginbuhat ha kopa, katapos niya manihapon, nagsiring hiya: ‘Ini nga kopa nagsisimbolo han bag-o nga kasabotan nga ginhimo pinaagi han akon dugo.’” (1 Cor. 11:25) Damu nga Biblia an may pariho nga hubad han literal nga bersyon ni Robert Young: “Ini nga kopa amo an bag-o nga kasabotan han akon dugo.” (Amon an italiko.) An kopa ba nga ginkakaptan mismo ni Jesus amo an bag-o nga kasabotan? Diri. An pulong nga “kopa” nagtutudlok ha kon ano an sulod hito—an bino. Ano an ginsiring ni Jesus nga ginsisimbolohan hito? An iya iginpaagay nga dugo.

¹² Ha ebanghelyo ni Marcos, mababasa naton an ginsiring ni Jesus: “Nagsisimbolo ito han akon ‘dugo han kasabotan,’ nga igpapaagay para ha damu nga tawo.” (Mar. 14:24) Oo, an dugo ni Jesus “igpapaagay basi mapasaylo an mga sala han damu nga tawo.” (Mat. 26:28) Salit an pula nga bino angayan nga nagsisimbolo han literal nga dugo ni Jesus. Pinaagi hito nga dugo, magkakaada kita kagawasan tungod han lukat, ‘mapapasaylo an aton mga pagtalapas.’—Basaha an Efeso 1:7.

13. Isaysay kon paonan-o ginsasaurog an tinuig nga Memoryal han kamatayon ni Kristo.

¹³ Kon matambong ka ha Memoryal upod han mga Saksi ni Jehova ha siyahan nga higayon, ano an imo malalaoman? Ito nga okasyon posible himoon ha usa nga simple ngan malimpyo nga katirokan, diin an ngatanan nga natambong komportable ngan magpapahimulos hito. Bangin may makita ka nga mga bukad, pero waray ka makikita nga magarbo nga mga dekorasyon, ngan diri ito sugad hin party. Usa nga kwalipikado nga tigurang an magpapahayag kon ano an ginsisiring han Biblia mahitungod han okasyon. Isasaysay niya nga hi Kristo namatay sugad nga lukat basi kita mabuhi.—Basaha an Roma 5:8-10.

14. Durante han pahayag ha Memoryal, ano an duha nga paglaom nga isasaysay han mamumulong?

¹⁴ Isasaysay liwat han mamumulong an duha nga magkaiba nga paglaom han mga Kristiano nga ginhisgotan ha Biblia. An siyahan amo an paglaom nga magmando ha langit kaupod ni Kristo, an paglaom han pipira han iya mga sumurunod, sugad han matinumanon nga mga apostol. (Luc. 12:32; 22:19, 20; Pah. 14:1) An ikaduha amo an paglaom han kadam-an nga Kristiano nga maunungon nga nag-aalagad kan Jehova. Naglalaom hira nga mabuhi ha waray kataposan ha paraiso nga tuna. Katapos, an kaburut-on han Dios matutuman dinhi ha tuna sugad han ha langit, nga maiha na nga igin-iinampo han mga Kristiano. (Mat. 6:10) Iginsusumat han Kasuratan an makalilipay nga kahimtang nga ira maieksperyensyahan ha kadayonan.—Isa. 11:6-9; 35:5, 6; 65:21-23.

15, 16. Ano an bubuhaton ha tinapay durante han Memoryal?

¹⁵ Katapos isaysay iton duha nga paglaom, an mamumulong masiring nga inabot na an  oras basi buhaton an ginhimo ni Jesus hadton Panihapon han Ginoo. Sugad han gin-unabi na, duha nga emblema an gagamiton, an tinapay nga waray ipaturubo ngan an pula nga bino. Bangin ibutang ito ha usa nga lamesa nga hirani ha mamumulong. Babasahon niya ha Biblia an mga asoy nga nagsasaysay kon ano an ginbuhat ni Jesus ha tinapay. Pananglitan, ha asoy ni Mateo aton mababasa: “Kinuha hi Jesus hin tinapay, ngan katapos mag-ampo gintipik-tipik ito, iginhatag ha mga disipulo ngan nagsiring: ‘Kuha kamo ngan kaona niyo. Nagsisimbolo ini han akon lawas.’” (Mat. 26:26) Gintipik-tipik ni Jesus an tinapay basi maipasa ito ha iya mga apostol. Ha pagsaurog han Memoryal ha Abril 14, makikita mo dida ha mga plato an gintipik-tipik nga tinapay nga waray ipaturubo.

¹⁶ Igo nga kadamu hin plato an gagamiton basi madagmit nga maipasa an tinapay ha ngatanan nga natambong. Bubuhaton ini hin waray espesyal nga mga rituwal. Mag-aampo hin madaliay, katapos ipapasa an mga plato ha mahapsay nga paagi, uyon ha kon ano an praktikal ha lugar nga ginkakatirokan. May pipira o bangin waray makaon han tinapay, sugad han nahitabo ha kadam-an nga kongregasyon han iginpasa ito durante han Memoryal han 2013.

17. Durante han Memoryal, paonan-o susubaron an ginbuhat ni Jesus ha bino?

¹⁷ Katapos, babasahon han mamumulong an ginbuhat ni Jesus ha bino: “Kinuha . . . hiya hin kopa nga may bino, ngan kahuman mag-ampo, iginhatag ito ha mga apostol ngan nagsiring: ‘Inom kamo ngatanan hito, kay nagsisimbolo ito han akon “dugo han kasabotan,” nga igpapaagay basi mapasaylo an mga sala han damu nga tawo.’” (Mat. 26:27, 28) Ha pagsubad hito nga ginbuhat ni Jesus, mag-aampo utro ngan katapos ipapasa ha ngatanan nga natambong an mga “kopa” nga may pula nga bino.

18. Bisan kon pipira la o bangin waray makigbahin han mga emblema, kay ano nga importante pa gihapon nga tumambong ha Memoryal?

¹⁸ Kadam-an han mga natambong diri makaon han tinapay ngan mainom han bino samtang iginpapasa ito tungod kay nagsiring hi Jesus nga an makikigbahin la hito amo adton magmamando kaupod niya ha langit. (Basaha an Lucas 22:28-30; 2 Tim. 4:18) Bisan kon an kadam-an nga Kristiano diri nakikigbahin han mga emblema, importante pa gihapon nga tumambong hira ha Memoryal, tungod kay an ira presensya nagpapakita nga ginpapabilhan gud nira an halad lukat ni Jesus. Durante han Memoryal, mapapamalandong nira an mga bendisyon nga ira mapapahimulosan tungod han lukat. Sugad nga bahin han “daku nga grupo,” may paglaom hira nga makatalwas ha tiarabot nga “daku nga kasakitan.” Hira adton mga magsiringba nga ‘ginlabhan an ira hilaba nga bado ngan ginpabusag ha dugo han Kordero.’—Pah. 7:9, 14-17.

19. Ano an imo bubuhaton ha pagpangandam para ha Memoryal basi magpahimulos ka hito?

¹⁹ An mga Saksi ni Jehova ha bug-os nga tuna nangangandam para hinin espesyal nga okasyon. Mga pipira ka semana antes hito, nangangalimbasog gud kita ha pag-imbitar ha damu nga tawo nga tumambong hito. Dugang pa, mga pipira ka adlaw antes han Memoryal, kadam-an ha aton an magbabasa han mga asoy ha Biblia mahitungod han ginbuhat ni Jesus ngan kon ano an nahitabo antes han Panihapon han Ginoo han 33 C.E. Abanse nga paplanuhon naton an aton mga buruhaton basi makatambong hito. Maopay gud kon umabot kita antes an siyahan nga kanta ngan pag-ampo basi maabiabi naton an mga bisita ngan bug-os nga magpahimulos han programa. Kita ngatanan, mga membro han kongregasyon ngan mga bisita, magpapahimulos kon susundan naton ha aton Biblia an mga teksto nga ginbabasa ngan ginsasaysay han mamumulong. Labaw ha ngatanan, an aton pagtambong ha Memoryal nagpapakita han aton kinasingkasing nga pagpasalamat han halad lukat ni Jesus ngan han aton pagsugot ha iya sugo: “Padayon nga buhata niyo ini sugad nga hinumdoman ha akon.”—1 Cor. 11:24.