1, 2. (a) Ano an hinungdan han usa nga klase hin pagkabuta? (b) Ano an aton hinbabaroan mahitungod ha Ginhadian han Dios?

SUGAD han bangin maobserbahan mo, kasagaran nga iba-iba nga detalye an nahinunumdoman han mga testigo han usa nga panhitabo. Ha pariho nga paagi, bangin makurian an pasyente nga hinumdoman an eksakto nga ginsiring han doktor mahitungod han iya sakit. O bangin diri nabibilngan han usa an iya yawi o antiyuhos, bisan kon aada la ito ha iya atubangan. Ito ngatanan nga sitwasyon bangin may kalabotan ha ginsisiring han mga parasaliksik nga usa nga klase hin pagkabuta nga nahitatabo kon durungan nga ginhihimo naton an damu nga butang. Matin-aw nga an aton utok makakapokus ha usa la nga butang ha usa nga panahon.

² Damu yana an nakakaeksperyensya hin pariho nga “klase hin pagkabuta” may kalabotan han mga panhitabo ha kalibotan. Bangin natoo hira nga damu na gud an nagbag-o ha kalibotan tikang han 1914, kondi diri nira nasasabtan an tinuod nga kahulogan hini nga mga panhitabo. Sugad nga mga estudyante han Biblia, maaram kita nga han 1914 naestablisar an Ginhadian han Dios han nagin Hadi hi Jesus ha langit. Kondi maaram kita nga waray pa mabaton hin bug-os an pag-ampo nga “Kumanhi unta an imo Ginhadian. Matuman an imo kaburut-on dinhi ha tuna sugad han ha langit.” (Mat. 6:10) Matin-aw  nga mababaton la ito hin bug-os kon tapuson na inin maraot nga sistema. Kon mahitabo na ito, matutuman na an kaburut-on han Dios dinhi ha tuna, sugad han ha langit.

3. Ano an aton mapapahimulsan ha pag-aram ha Pulong han Dios?

³ Tungod kay pirme kita nag-aaram han Pulong han Dios, nakikita naton nga natutuman na yana an mga tagna. Kabaliktaran gud ito ha kadam-an nga mga tawo! Sagipo hira hinduro ha ira kinabuhi ngan ha ira mga buruhaton nga tungod hito diri nira nakikita an matin-aw nga ebidensya nga nagmamando na hi Kristo tikang pa han 1914 ngan ha diri mag-iiha ipapadapat an paghukom han Dios. Kondi tagda ini nga mga pakiana: Kon maiha ka na nga nag-aalagad ha Dios, natoo ka pa ba gihapon nga hirani na gud an kataposan ngan ginpapamatud-an ito han mga panhitabo ha kalibotan? Bisan kon bag-o ka pa la nga Saksi, ha ano nakapokus an imo atensyon? Anoman an aton baton, aton tagdon an tulo nga importante nga rason kon kay ano nga makakasarig kita nga ha diri na maiha an pinili han Dios nga Hadi may-ada dugang nga hihimoon basi bug-os nga matuman an kaburut-on han Dios dinhi ha tuna.

4, 5. (a) Ano an ginbubuhat ni Jesus tikang pa han 1914? (Kitaa an retrato ha tinikangan hini nga artikulo.) (b) Ano an ginsisimbolohan han tulo nga nangangabayo, ngan paonan-o natuman ini nga mga tagna?

⁴ Han 1914, hi Jesu-Kristo nga iginhulagway sugad nga nangangabayo ha busag nga kabayo, nagin Hadi ha Ginhadian han Dios. Sinulong hiya dayon basi pirdihon an maraot nga sistema ni Satanas. (Basaha an Pahayag 6:1, 2.) Iginpapakita han tagna ha Pahayag kapitulo 6 nga katapos maestablisar an Ginhadian han Dios, madagmit nga magtitikaraot an kahimtang han kalibotan. Magkakaada girra, kakulang hin pagkaon, epidemya, ngan iba pa nga hinungdan han kamatayon nga waray pa mahitabo kay ha kakan-o pa man. Ini nga mga panhitabo iginhulagway pinaagi han tulo nga nangangabayo nga duok nga nasunod kan Jesu-Kristo.—Pah. 6:3-8.

⁵ Sugad han igintagna, an kamurayawan ‘ginkuha ha tuna,’ bisan pa han saad han damu nga nasud nga magbuburublig hira para magpabilin an kamurayawan. An Girra ha Kalibotan I masisiring nga amo pa la an tinikangan han dagku nga girra, sugad han ginpapamatud-an han bag-o la nga mga panhitabo ha kalibotan. Ngan bisan pa han daku nga pag-uswag han ekonomiya ngan syensya tikang han 1914, an kakulang hin pagkaon nagpapadayon nga tarhog ha seguridad han kalibotan. Dugang pa, hin-o an makakagnigar nga an mga epidemya, kalamidad, ngan iba pa nga ‘makamaratay nga mga peste’ padayon nga nagigin hinungdan han kamatayon han minilyon nga tawo kada tuig? Ini nga mga panhitabo nagtitikapeligroso, nagtitikaagsob, ngan nagriresulta han kamatayon han mas damu pa nga tawo kay han naglabay. Nasasabtan mo ba kon ano an kahulogan hini?

6. Hin-o an mga mabinantayon ha katumanan han mga tagna ha Biblia, ngan ano an ira ginbuhat han nasabtan nira ito?

⁶ Damu an nahadlok han magtikang an Girra ha Kalibotan I ngan an trangkaso Espanyola. Kondi ginpapamulat gud han dinihogan nga mga Kristiano an 1914 sugad nga an kataposan han Panahon han mga Hentil, o an “itinanda nga panahon han mga nasud.” (Luc. 21:24) Diri hira bug-os nga maaram kon ano an mahitatabo. Kondi maaram hira nga ha 1914 may importante nga mahitatabo may kalabotan ha pagmando han Dios. Han masabtan nira an katumanan han tagna ha Biblia, maisugon nga iginpasamwak nira ha iba nga nagtikang na magmando an Dios. An ira pangalimbasog nga ipasamwak an Ginhadian nagresulta hin duro nga pagtimaraot. Ito nga pagtimaraot nga nahitabo ha damu nga nasud dugang nga katumanan han tagna. Ha paglabay hin damu nga katuigan, an mga parakontra han Ginhadian ‘nagbuhat hin magraot pinaagi han kasugoanan.’ Ira liwat ginkastigo, ginpriso, ngan ginpatay pa ngani an aton kabugtoan pinaagi ha pagbitaya, pagpusila, o pagpugoti.—Sal. 94:20; Pah. 12:15.

7. Kay ano nga diri nasasabtan han kadam-an an tinuod nga kahulogan han mga panhitabo ha kalibotan?

 ⁷ Bisan pa han damu gud nga ebidensya nga an Ginhadian han Dios naestablisar na ha langit, kay ano nga diri ito nakikita han kadam-an nga tawo? Kay ano nga diri nira nasasabtan nga an mga panhitabo ha kalibotan amo an katumanan han mga tagna ha Biblia sugad han maiha na nga iginpapasamwak han katawohan han Dios? Nakapokus la ba hira ha mga butang nga ira nakikita? (2 Cor. 5:7) Sagipo ba hira hinduro ha ira mga buruhaton salit diri nira nakikita an mga ginbubuhat han Dios? (Mat. 24:37-39) Nawawara ba an pokus han iba tungod han mga propaganda ni Satanas? (2 Cor. 4:4) Ginkikinahanglan naton an pagtoo ngan espirituwal nga pagsabot basi makita kon ano an ginbubuhat han Ginhadian han Dios. Malipayon gud kita tungod kay nasasabtan naton kon ano gud an nahitatabo!

8-10. (a) Paonan-o natutuman an 2 Timoteo 3:1-5? (b) Kay ano nga masisiring naton nga an karaotan nagtitikaraot pa gud?

⁸ Ini an ikaduha nga hinungdan kon kay ano nga maaram kita nga diri na mag-iiha magmamando na an Ginhadian han Dios dinhi ha tuna: An karaotan ha kalibotan nagtitikaraot pa gud. Ha sulod hin haros usa ka siglo, nahitatabo na an mga kahimtang nga igintagna ha 2 Timoteo 3:1-5. An panggawi nga iginhuhulagway ha teksto nagtitikakalyap ngan nagtitikaduro. Naoobserbahan mo ba liwat ito? Hisgotan naton an pipira nga ehemplo nga may kalabotan hito.—Basaha an 2 Timoteo 3:1, 13.

⁹ Hunahunaa la an kaibahan han mga butang nga gintatagad nga maraot hinduro hadton dekada 1940 o 1950 ngan han nahitatabo yana ha mga lugar han trabaho, ha kaliawan, isport, ngan ha pamado ngan pag-ayos. Kalyap na gud yana an duro nga kamadarahog ngan imoralidad. Iginhahambog han mga tawo an ira pagin mapintas, maraugdaog, ngan pagin imoral. An gintatagad nga maraot nga mga programa ha TV han dekada 1950, gintatagad na yana sugad nga maopay nga kaliawan para ha pamilya. Ngan damu an nakaobserbar nga daku an impluwensya han mga homoseksuwal may kalabotan ha kaliawan ngan ha pamado ngan pag-ayos, ngan ira pa ngani igin-aaghat ha publiko an ira paagi han pagkinabuhi. Mapasalamaton gud kita nga maaram kita han panhunahuna han Dios mahitungod hini nga mga butang!—Basaha an Judas 14, 15.

 ¹⁰ Itanding liwat an gintatagad nga rebelyoso nga panggawi han mga batan-on hadton dekada 1950 ha ginhihimo han mga batan-on yana. Pananglitan, han dekada 1950 an mga kag-anak nababaraka nga an ira mga anak bangin magsigarilyo, uminom hin makahurubog nga irimnon, o sumayaw hin malaw-ay. Kondi yana ordinaryo na la an makaharadlok nga mga sumat: Ginpusil han usa nga 15 anyos an iya mga kaklase, 2 an namatay ngan 13 an nasamaran. Waray kalooy nga ginpatay han usa nga grupo hin hubog nga mga batan-on an noybe anyos nga daragita ngan ginkastigo an iya tatay ngan patod. Ha usa nga nasud ha Asia ginsisiring nga an mga batan-on an responsable ha katunga han mga krimen nga nahitabo han naglabay nga napulo ka tuig. May-ada ba makakagnigar nga an mga panhitabo yana nagtitikaraot gud?

11. Kay ano nga bangin diri masabtan han damu nga tawo nga an mga butang nagtitikaraot gud?

¹¹ Hi apostol Pedro husto nga nagsiring: “Ha kataposan nga mga adlaw maabot an mga paratamay nga magtatamay han maopay. Magpapadayon hira pagbuhat uyon ha ira mga hingyap ngan masiring: ‘Hain na an iginsaad nga iya presensya? Kay tikang ha adlaw nga an aton kaapoy-apoyan nangaturog ha kamatayon, an ngatanan nga butang nagpapadayon nga amo la gihapon tikang pa ha paghimoa han kalibotan.’” (2 Ped. 3:3, 4) Kay ano nga sugad hito an reaksyon han pipira nga tawo? Kon pirme naton nakikita an usa nga butang, baga hin diri naton ito nahahatagan gud hin atensyon. Pananglitan, bangin mas mahipausa pa kita kon tigda nga magbag-o an batasan han aton duok nga sangkay kay ha paghamubo han moralidad han katawohan ha kabug-osan tungod kay nahiara na kita hito. Bisan pa hito, iton pagtikaraot han moralidad peligroso gud.

12, 13. (a) Kay ano nga diri kita sadang manluya tungod han mga panhitabo ha kalibotan? (b) Ano an mabulig ha aton basi mailob inin kataposan nga mga adlaw nga “makuri pakiangayan”?

¹² Hi apostol Pablo nagpahamangno ha aton nga ha “kataposan nga mga adlaw,” an mga kahimtang magigin “makuri pakiangayan.” (2 Tim. 3:1) Kondi posible ito malamposan salit sadang naton ito atubangon. Ha bulig ni Jehova, han iya espiritu, ngan han Kristiano nga kongregasyon, malalamposan naton an anoman nga kapakyasan ngan kahadlok nga bangin maeksperyensyahan naton. Mahimo kita magpabilin nga matinumanon. ‘An diri-ordinaryo nga gahum nagtitikang ha Dios, diri ha aton kalugaringon.’—2 Cor. 4:7-10.

¹³ Tigamni nga gintikangan ni Pablo an tagna mahitungod han kataposan nga mga adlaw pinaagi han mga pulong nga “hibaroi ini.” Ito nga mga pulong naggagarantiya nga matutuman gud ito nga tagna. Waray ruhaduha nga inin diri diosnon nga kalibotan padayon nga magtitikaraot tubtob nga tapuson ito ni Jehova. Nahibaroan naton tikang ha kasaysayan nga kon naghahamubo gud an suruklan han moral han usa nga nasud, ha urhi nawawad-an ito hin gahum. Kondi ha bug-os nga kasaysayan, yana pa gud la nahitabo an duro nga paghamubo han moralidad han bug-os nga kalibotan. Bangin igbalewaray han damu nga tawo kon ano an kahulogan hini, kondi an mga panhitabo tikang ha 1914 sadang makakombinse ha aton nga hirani na tapuson han Ginhadian han Dios an ngatanan nga karaotan.

14-16. Ano an ikatulo nga hinungdan nga tumoo kita nga diri mag-iiha ‘makanhi’ na an Ginhadian han Dios?

¹⁴ An nahitatabo ha katawohan han Dios naghahatag ha aton han ikatulo nga hinungdan basi sumarig kita nga hirani na an kataposan. Pananglitan, antes maestablisar an Ginhadian han Dios ha langit, usa nga grupo han magtinumanon nga dinihogan an aktibo nga nag-aalagad ha Dios. Han waray matuman an pipira han ira ginlalaoman nga mahitatabo han 1914, ano an ira ginbuhat? An kadam-an ha ira nagpabilin nga matinumanon ha pag-alagad kan Jehova bisan pa han mga pagsari ngan  pagtimaraot. Ha sulod hin damu nga katuigan, kadam-an—kon diri man ngatanan—hinin mga dinihogan an nagpabilin nga matinumanon tubtob ha kamatayon.

¹⁵ Ha detalyado nga tagna ni Jesus mahitungod han ikatarapos hini nga sistema, hiya nagsiring: “Diri gud malabay ini nga henerasyon tubtob nga mahitabo ini ngatanan.” (Basaha an Mateo 24:33-35.) Nasabtan naton nga han gin-unabi ni Jesus “ini nga henerasyon,” gintutudlok niya an duha nga grupo han dinihogan nga mga Kristiano. An siyahan nga grupo nakakita mismo han nahitabo han 1914 ngan nasabtan nira dayon an tigaman nga nagtikang na magmando hi Kristo hito nga tuig. Labot la nga buhi na hira han 1914, gindihogan liwat hira han espiritu sugad nga mga anak han Dios durante hito nga tuig o antes pa hito.—Roma 8:14-17.

¹⁶ An ikaduha nga grupo nga kaupod ‘hini nga henerasyon’ amo an mga dinihogan nga kadungan-dungan han siyahan nga grupo. Labot la nga buhi na hira durante han panahon han nakanhi pa ha tuna an siyahan nga grupo, gindihogan liwat hira han baraan nga espiritu durante hito nga panahon. Salit, diri ngatanan nga dinihogan yana kaupod ‘hini nga henerasyon’ nga gin-unabi ni Jesus. Yana mga lagas na adton nagkukompwesto han ikaduha nga grupo. Kondi an ginsiring ni Jesus ha Mateo 24:34 nagpapasarig ha aton nga may pipira ‘hini nga henerasyon nga diri gud malabay’ antes makita an pagtikang han daku nga kasakitan. Mas nagpaparig-on ini han aton pagsarig nga halipot na la nga panahon an nahibibilin antes gumios an Hadi han Ginhadian han Dios basi bungkagon an magraot ngan pahinaboon an katadongan ha bag-o nga kalibotan.—2 Ped. 3:13.

17. Ano an aton nasabtan tikang ha tulo nga ebidensya nga aton ginhisgotan?

¹⁷ Ano an aton nasabtan tikang hinin tulo nga ebidensya nga aton ginhisgotan? Sugad han iginpahamangno ha aton ni Jesus diri kita maaram han eksakto nga adlaw o oras han kataposan, ngan diri kita mahibabaro hito. (Mat. 24:36; 25:13) Kondi maaram kita han “panahon” han kataposan sugad han gin-unabi ni Pablo. (Basaha an Roma 13:11.) Nagkikinabuhi kita hito nga panahon, an kataposan nga mga adlaw. Kon mabinantayon gud kita ha mga tagna ha Biblia ngan ha ginbubuhat ni Jehova ngan ni Jesu-Kristo, makikita naton hin matin-aw an mga ebidensya nga hirani na gud an kataposan hini nga sistema.

18. Ano an mahitatabo hadton mga nagdudumiri ha pagkilala ha awtoridad ni Jesu-Kristo?

¹⁸ Ha diri mag-iiha, adton mga nagdudumiri ha pagkilala han awtoridad nga iginhatag kan Jesu-Kristo, an daogan nga Nangangabayo ha busag nga kabayo, mapipiritan nga karawaton nga sayop hira. Diri hira makakapalagiw ha paghukom. Hito nga panahon damu an masinggit ha kahadlok: “Hin-o an makakaatubang hito?” (Pah. 6:15-17) Ginbabaton ito han Pahayag kapitulo 7. An mga dinihogan ngan adton ira mga kaupod nga may tunan-on nga paglaom “makakaatubang” gud hito nga adlaw tungod kay gin-uyonan hira han Dios. Katapos an “daku nga grupo” han iba nga karnero makakatalwas ha daku nga kasakitan.—Pah. 7:9, 13-15.

19. Tungod kay kombinsido ka nga hirani na an kataposan, ano an imo ginpapamulat?

¹⁹ Kon padayon kita nga mabinantayon ha mga tagna han Biblia nga natutuman yana, diri mawawara an aton pokus tungod han kalibotan ni Satanas; diri liwat kita mabubuta mahitungod han tinuod nga kahulogan han mga panhitabo ha kalibotan. Diri na mag-iiha, tatapuson ni Kristo an iya pakig-away hinin diri diosnon nga kalibotan pinaagi han ultimo nga pakiggirra uyon ha katadongan. (Pah. 19:11, 19-21) Hunahunaa la an kalipay nga aton aabaton kon mahitabo na ito!—Pah. 20:1-3, 6; 21:3, 4.