SAMTANG nagdadaku hi Pascal ha usa nga pobre nga nasud han Côte d’Ivoire, naghingyap gud hiya hin mas maopay nga kinabuhi. Sugad nga bag-ohan nga boksingero, naghunahuna hiya, ‘Diin ko daw la mabibilngan an oportunidad nga magin sikat ha isport ngan magin riko?’ Han 25 anyos hiya, naghunahuna hiya nga ha Europa matutuman an iya mga ambisyon. Pero tungod kay waray hiya mga papeles para ha pagbiyahe, makakakadto la hiya ha Europa ha ilegal nga paagi.

Han 1998, han 27 anyos na hiya, nagtikang hiya pagbiyahe. Kumadto hiya ha Ghana, nagbiyahe tikadto ha Togo ngan tumabok ha Benin, ngan ha urhi nakaabot hiya ha bungto han Birni Nkonni ha Niger. Yana, magtitikang pa la an peligroso gud nga bahin han iya pagbiyahe. Basi makaabot ha norte, kinahanglan patago nga sumakay hiya hin trak ngan tumabok ha Sahara Desert. Ngan kon makaabot na hiya ha Mediterranean, masakay hiya hin barko tipakadto ha Europa. Ito an iya plano, kondi nabag-o ito tungod han duha nga butang nga nahitabo ha Niger.

Siyahan, naubos an iya kwarta. Ikaduha, nakilala niya hi Noé, usa nga payunir nga nag-Bible study ha iya. An iya hinbaroan nakabantad han iya kasingkasing ngan nakapabag-o ha iya pagtagad han kinabuhi. An iya mga hingyap ha materyal nasaliwnan hin espirituwal nga mga tumong. Han Disyembre 1999, nabawtismohan hi Pascal. Basi ipakita an iya pagpasalamat kan Jehova, han 2001 nagpayunir hiya ha Niger, ha bungto mismo diin hinbaroan niya an kamatuoran. Ano an iya inaabat mahitungod ha iya pag-alagad? Hiya nagsiring, “malipayon hinduro an akon kinabuhi!”

Pariho kan Pascal, napamatud-an han damu nga mas makalilipay an pagkinabuhi nga nakapokus ha pagkab-ot hin espirituwal nga mga tumong. Basi mahimo ito, an pipira bumaya ha Europa ngan bumalhin ha Aprika basi mag-alagad ha mga lugar diin may mas daku nga panginahanglan hin mga magwarali. Ha pagkamatuod, mga 65 nga Saksi ha Europa, nga nag-iedad hin 17 tubtob 70 an binalhin basi magboluntaryo ha mga nasud han Weste nga Aprika sugad han Benin, Burkina Faso, Niger, ngan Togo. * Ano an nagpagios ha ira nga bumalhin, ngan ano an nagin resulta?

Hi Anne-Rakel nga taga-Denmark nagsiring: “An akon mga kag-anak nagin mga misyonero ha Senegal. Malipayon nga gin-iistorya nira pirme an mahitungod ha pagmisyonero salit naruyag liwat ako nga magin misyonero.” Paglabay hin mga 15 ka tuig, han sobra 20 anyos na hi Anne-Rakel, binalhin hiya ha Togo diin nag-alagad hiya ha usa nga kongregasyon han sign language. Paonan-o an iya pagbalhin nakadasig ha iba? Hiya nagsiring: “Ha urhi an akon manghod nga babaye ngan lalaki bumalhin liwat ha Togo.”

 Hi Aurele, usa nga 70 anyos nga inasaw-an nga brother nga taga-France, nagsiring: “Han nagretiro ako mga lima ka tuig na an naglabay, may-ada ako mapipilian: magkinabuhi hin komportable ha France ngan hulaton na la an pag-abot han Paraiso o maghimo hin mga paagi basi mapauswag an akon ministeryo.” Ginpili niya nga pauswagon an iya ministeryo. Mga tulo ka tuig na an naglabay, hiya ngan an iya asawa hi Albert-Fayette, bumalhin ngadto ha Benin. “An pagin andam nga mag-alagad kan Jehova dinhi amo an pinakamaopay nga butang nga amon nahimo,” siring ni Aurele. Nahiyom nga nagdugang hiya: “Ha pagkamatuod, may mga teritoryo kami nga hirani ha baybayon nga nagpapahinumdom ha akon han Paraiso.”

Hi Clodomir ngan an iya asawa nga hi Lysiane, binalhin tikang ha France ngadto ha Benin mga 16 ka tuig na an naglabay. Ha siyahan, namingaw gud hira ha ira pamilya ngan kasangkayan ha France, ngan nahadlok hira nga bangin diri hira makapahiuyon ha ira bag-o nga kinabuhi. Kondi waray hinungdan nga mahadlok hira. Naeksperyensyahan nira an duro nga kalipay. “Ha sulod hin 16 ka tuig,” siring ni Clodomir, “nakapribilehiyo kami nga makabulig, ha aberids, hin usa ka tawo kada tuig nga kumarawat han kamatuoran.”

An mag-asawa nga hira Sébastien ngan Johanna nga taga-France, bumalhin ha Benin han 2010. “Damu gud an buruhaton ha kongregasyon,” siring ni Sébastien. “An pag-alagad dinhi pariho hin pagtambong ha teokratiko nga pagbansay diin damu gud dayon an imo mahibabaroan!” Ano an reaksyon han mga tawo ha ira ministeryo? Hi Johanna nagsiring: “An mga tawo uhaw ha kamatuoran. Bisan kon diri kami nagsasangyaw, an mga tawo ha kalsada nadaop ha amon basi magpakiana mahitungod ha Biblia ngan mangaro han aton mga publikasyon.” Ano an epekto han ira pagbalhin ha ira relasyon sugad nga mag-asawa? Hi Sébastien nagsiring: “Nagparig-on ito han amon pag-asawa. Makalilipay gud nga makaupod an akon asawa ha bug-os nga adlaw ha pagministeryo.”

Hi Eric ngan an iya asawa nga hi Katy, nagpayunir ha norte han Benin nga gutiay la an naukoy. Mga napulo ka tuig na an naglabay, han nakadto pa hira ha France, nagbinasa hira hin mga artikulo mahitungod ha pag-alagad ha mga lugar nga may mas daku nga panginahanglan ngan nakig-istorya ha mga nag-aalagad hin bug-os-panahon. Nagpagios ini ha ira nga magboluntaryo ha iba nga nasud, ngan ginbuhat nira ito han 2005. Makalilipay gud an pag-uswag nga ira nakita. Hi Eric nagsiring: “Han naglabay nga duha ka tuig, an amon grupo ha bungto han Tanguiéta may-ada la 9 nga magwarali; yana 30 na kami. Kon Domingo, mga 50 tubtob 80 an natambong. Makalilipay gud nga makita an sugad nga pag-uswag!”

Ano nga mga ulang an gin-atubang hadton pipira nga boluntaryo? Hi Benjamin, 33 anyos, bugto ni Anne-Rakel. Han 2000, ha Denmark, nakilala niya an usa nga misyonero ha Togo. Hi Benjamin nagsiring: “Han ginsumatan ko an misyonero nga karuyag ko magpayunir, hiya nagsiring: ‘Maaram ka, puydi ka magpayunir ha Togo.’” Ginhunahuna ito ni Benjamin. Hiya nagsiring: “Waray pa ako mag-20 anyos hito nga panahon, kondi an akon duha nga bugto nga kababayin-an nagbuboluntaryo na ha Togo. Tungod hito, diri na ako makukurian pagkadto.” Salit bumalhin hiya. Kondi may-ada pa gihapon ulang. Hiya nagsiring: “Waray ko hinbabaroan bisan usa man la nga pulong nga French. Nakurian ako han siyahan nga unom ka bulan tungod kay diri ako nakakayakan hin French.” Kondi paglabay han panahon, nahibaro hiya hito. Yana nag-aalagad na hiya ha Bethel ha Benin, nagdideliber hin mga literatura ngan nabulig ha computer department.

Hira Eric ngan Katy nga gin-unabi kanina, nag-alagad ha France ha teritoryo nga iba an yinaknan antes bumalhin ha Benin. Ano an kaibahan han kahimtang ha Weste nga Aprika? Hi Katy nagsiring: “Makuri makabiling hin komportable nga balay nga mauukyan. Mga pipira ka bulan nga umukoy kami ha balay nga waray koryente ngan gripo.” Hi Eric nagdugang: “An amon mga amyaw makusog hinduro magpatokar hin musika tubtob ha katutnga han gab-i. Kinahanglan mo magin mapailubon ngan magin andam magpahiuyon.” Hira nagsiring: “Bawi an bisan ano nga kakurian tungod han kalipay ha pag-alagad ha mga teritoryo nga haros waray pa masangyawi.”

Hira Michel ngan Marie-Agnès, mag-asawa nga taga-France nga hirani na mag-60 anyos, bumalhin ha Benin mga lima ka tuig na an naglabay. Ha siyahan nabaraka hira. Hi Michel nagsiring: “An amon pagbalhin iginpariho han pipira ha usa nga sirkero nga nalatay ha alambre ngan may ginduduso nga kariton—ngan kami an sakay han kariton! Makaharadlok gud kon diri ka maaram nga hi Jehova an sirkero nga nalatay ha alambre. Salit bumalhin kami tungod kan Jehova ngan pinaagi han iya bulig.”

Ginpabug-atan hadton nakagboluntaryo na an pagkaimportante nga maiandam han usa an iya kalugaringon pinaagi ha paghimo han masunod nga butang: Abanse nga magplano. Hibaroi kon paonan-o magpapahiuyon. Ayaw paggasto hin lahos han imo badyet. Sarig kan Jehova.—Luc. 14:28-30.

Hi Sébastien nga gin-unabi kanina, nagsiring: “Antes bumalhin, nagtirok kami ni Johanna hin kwarta ha sulod hin duha ka tuig. Gin-ibanan namon an amon gin-gagasto para ha kaliawan ngan diri kami napalit hin mga butang nga diri kinahanglan.” Basi makapadayon ha pagboluntaryo ha iba nga nasud, nagtatrabaho hira ha Europa hin  pipira ka bulan kada tuig, ngan an iba nga bulan gin-gagamit nira ha pagpayunir ha Benin.

Hi Marie-Thérèse usa han mga 20 nga solo nga sister nga tikang ha iba nga nasud nga nagbuboluntaryo ha Weste nga Aprika. Nagtrabaho hiya sugad nga drayber hin bus ha France; pero han 2006 nag-leave hiya hin usa ka tuig basi magpayunir ha Niger. Waray pag-iha, nasantop niya nga ito an klase han kinabuhi nga karuyag gud niya. Hiya nagsiring: “Han bumalik ako ha France, nakiistorya ako ha akon boss nga karuyag ko bag-uhon an akon eskedyol ha trabaho, ngan umuyon hiya hito. Yana, tikang ha Mayo tubtob Agosto nagtatrabaho ako sugad nga drayber hin bus ha France, ngan tikang ha Septyembre tubtob Abril nagpapayunir ako ha Niger.”

Adton ‘gin-uuna an pagpamiling han Ginhadian’ makakasarig nga hi Jehova magtatagana ha ira han ‘ngatanan nga iba pa nga kinahanglanon nga butang.’ (Mat. 6:33) Pananglitan, tagda an eksperyensya ni Saphira, usa nga solo nga sister nga taga-France nga hirani na mag-30 anyos ngan nagpapayunir ha Benin. Han 2011, bumalik hiya ha France basi makatirok hin igo nga kwarta nga makakasuporta ha iya ha sulod hin usa ka tuig (ika-unom niya nga pagbalik) ha Aprika. Hiya nagsiring: “Biernes adto, ultimo ko na nga adlaw ha trabaho, pero kinahanglan ko pa magtrabaho hin napulo ka adlaw basi makatirok hin igo nga kwarta para ha sunod nga tuig. Duha na la ka semana an akon pag-ukoy ha France. Nag-ampo ako kan Jehova mahitungod han akon kahimtang. Waray pag-iha katapos hito, gintawagan ako han usa nga agency ngan nagpakiana kon puydi ba ako magtrabaho ha sulod hin duha ka semana basi saliwnan an usa nga empleyado.” Pagka-Lunes, hi Saphira kumadto ha iya pagtatrabahoan basi bansayon han empleyado nga iya sasaliwnan. Hiya nagsiring: “Diri gud ako makatoo han hinbaroan ko nga Saksi hiya ngan kinahanglan niya mag-leave hin napulo ka adlaw basi umiskwela ha Pioneer Service School! An iya boss diri natugot nga mag-leave hiya kon waray hiya mabibilngan nga kasaliwan. Nangamuyo hiya han bulig ni Jehova—sugad han akon ginbuhat.”

An pipira nga kabugtoan nga nagbuboluntaryo ha Weste nga Aprika ha sulod hin damu na ka tuig didto na nag-ukoy. An iba nagbuboluntaryo hin pipira ka tuig ngan katapos nabalik ha ira nasud. Kondi bisan yana, nagpapahimulos pa gihapon hira han ira mga eksperyensya ha pag-alagad ha iba nga nasud. Hinbaroan nira nga an tinuod nga kalipay nagtitikang ha pag-alagad kan Jehova.