Han dyes anyos pa la ako hadton 1985, may bumalhin nga mga bata nga taga-Cambodia ha amon eskwelahan ha Columbus, Ohio, U.S.A. Usa ha ira an medyo maaram mag-English. Pinaagi hin mga drowing, ginsumatan niya ako hin magpakaharadlok nga istorya mahitungod ha mga tawo nga ginpapasakitan, ginpapamatay, ngan mga napalagiw basi matalwas an ira kinabuhi. Nagtatangis ako ha gab-i kon nahuhunahuna ko ini nga mga bata. Karuyag ko hira sumatan mahitungod han paglaom nga Paraiso ngan han pagkabanhaw, pero diri nira nasasabtan an akon yinaknan. Bisan kon bata pa ako, nagdesisyon ako nga mag-aram hin Cambodian basi makagsangyaw ha akon mga kaeskwela mahitungod kan Jehova. Waray ako maghunahuna nga ini nga desisyon magkakaada daku nga epekto ha akon kabubuwason.

Makuri an pag-aram hin Cambodian. Duha ka beses nga naghunahuna ako pag-undang, kondi ginparig-on ako ni Jehova pinaagi han akon mga kag-anak. Ha urhi, gin-inaghat ako han akon mga titser ngan mga kaeskwela nga kumuha hin kurso nga makakabulig ha akon nga magkaada hin trabaho nga hitaas an sweldo. Kondi karuyag ko magpayunir, salit nagdesisyon ako nga umiskwela hin mga kurso ha hayskul nga makakabulig ha akon nga makabiling hin part-time nga trabaho basi makab-ot ito nga tumong. Katatapos han amon klase, naupod ako ha pipira nga payunir ha pagministeryo. Nag-tutor liwat ako ha mga estudyante nga nag-aaram hin English—usa nga desisyon nga ha urhi nakabulig gud ha akon.

Han 16 anyos ako, nahibaroan ko nga may grupo hin kabugtoan nga nagyayakan hin Cambodian ha Long Beach, California, U.S.A. Bumisita ako didto ngan nahibaro ako pagbasa hin Cambodian. Pag-gradwar ko gud, nagpayunir ako ngan nagpadayon pagsangyaw ha mga tawo nga nagyayakan hin Cambodian nga naukoy hirani ha amon balay. Han nag-18 anyos ako, nagplano ako pagbalhin ha Cambodia. Peligroso pa gihapon ito nga lugar, kondi may-ada napulo ka milyon nga naukoy didto, ngan kadam-an ha ira waray pa makabati han maopay nga sumat. Hito nga panahon, usa pa la an kongregasyon nga may 13 nga magwarali ha bug-os nga nasud. Disinoybe anyos ako han siyahan nga bumisita ako ha Cambodia. Paglabay hin duha ka tuig, nagdesisyon ako pagbalhin ngan didto na mag-ukoy. Nakabiling ako hin part-time nga trabaho. Naghubad ngan nagtutdo ako hin English basi masuportahan an akon ministeryo. Ha urhi, nakaasawa ako, ngan pariho an amon mga tumong. Nalilipay kami pagbulig ha damu nga taga-Cambodia nga magdedikar han ira kinabuhi ha Dios.

Iginhatag ni Jehova ha akon an ‘pinangangaro han akon kasingkasing.’ (Sal. 37:4) An panhimo hin mga disipulo amo an pinakamakalilipay nga buruhaton. Durante han 16 ka tuig nga akon pag-ukoy ha Cambodia, iton gutiay nga kongregasyon nga may 13 nga magwarali nagin 12 na nga kongregasyon ngan may 4 nga nahibubulag nga grupo!—Iginsumat ni Jason Blackwell.