“ULI ha imo mga paryente, ngan isumat ha ira an ngatanan nga ginbuhat ni Jehova para ha imo ngan an kalooy niya ha imo,” siring ni Jesu-Kristo. Hito nga panahon posible nga nakadto hiya ha Gadara, ha sur-este han Dagat han Galilea, ngan kaistorya niya an usa nga lalaki nga karuyag magin iya sumurunod. Ini nga ginsiring ni Jesus nagpapakita nga nasasabtan niya an usa nga kinaiya han tawo—an hingyap nga isumat ha ira mga kapamilya o paryente an mga butang nga makapainteres ngan importante ha ira.—Mar. 5:19.

Agsob liwat naton makita yana ito nga kinaiya, labi na ha pipira nga kultura. Ngani, kon an usa nagigin magsiringba han tinuod nga Dios nga hi Jehova, kasagaran nga karuyag gud niya isumat an iya bag-o nga pagtoo ha iya mga kapamilya o paryente. Kondi paonan-o niya ito bubuhaton? Paonan-o niya maaabot an kasingkasing han iya mga kapamilya o paryente nga iba an relihiyon—o diri natoo ha Dios? An Biblia naghahatag hin masasarigan ngan praktikal nga sagdon.

Han siyahan nga siglo, usa hi Andres hadton siyahan nga nakakilala kan Jesus sugad nga an Mesias. Ngan hin-o an iya ginsumatan dayon mahitungod hito? “Una, nakigkita hi Andres ha iya bugto nga hi Simon ngan ginsumatan hiya: ‘Hin-agian namon an Mesias’ (nga nangangahulogan, an Kristo).” Igin-upod ni Andres hi Pedro ngadto kan Jesus, salit nagkaada higayon hi Pedro nga magin disipulo ni Jesus.—Juan 1:35-42.

Paglabay hin mga unom ka tuig samtang nag-uukoy hi Pedro ha Jope, ginhangyo hiya nga magbiyahe tipanorte ngadto ha Cesarea basi bisitahon an panimalay ni Cornelio, usa nga opisyal ha militar. Hin-o an naabtan didto ni Pedro? “Ginpipinamulat gud hira [Pedro ngan an iya mga kaupod] ni Cornelio ngan iya na gintirok an iya mga paryente ngan duok nga kasangkayan.” Hini nga paagi gintagan ni Cornelio hin higayon an iya mga paryente nga makabati han mensahe ni Pedro ngan magdesisyon uyon han ira hinbatian.—Buh. 10:22-33.

 Ano an aton mahibabaroan tikang kanda Andres ngan Cornelio may kalabotan ha ira ginbuhat para ha ira mga kapamilya o paryente?

Waray nira pabay-i an ira mga paryente. Iginpakilala ni Andres hi Pedro kan Jesus, ngan hi Cornelio naghimo hin paagi basi mabatian han iya mga paryente an mensahe ni Pedro. Kondi waray nira pirita an ira mga paryente o waray hira maghimo hin tuso nga mga paagi basi magin mga sumurunod ito ni Kristo. May mahibabaroan ka ba nga leksyon tikang hito? Maopay nga subaron liwat naton an ira ginbuhat. Bangin naisusumat na naton ha aton mga paryente an pipira nga kamatuoran ha Biblia ngan may nakilala na hira nga aton kabugtoan. Bisan pa hito, gintatahod naton an ira kagawasan ha pagpili ngan ginlilikyan nga ipirit ha ira an aton gintotoohan. Ha pag-ilustrar kon paonan-o naton hira mabubuligan, tagda an ehemplo han mag-asawa nga hira Jürgen ngan Petra nga taga-Germany.

Hi Petra nag-aram ha Biblia upod han mga Saksi ni Jehova ngan ha urhi nabawtismohan hiya. An iya bana nga hi Jürgen usa nga opisyal ha militar. Ha siyahan, hi Jürgen waray malipay ha desisyon han iya asawa. Kondi ha urhi nasantop niya nga an mga Saksi nagsasangyaw han kamatuoran tikang ha Biblia. Salit iya liwat igindedikar an iya kinabuhi kan Jehova, ngan yana usa na hiya nga tigurang ha ira kongregasyon. Ano an iya sagdon basi maabot an kasingkasing han usa nga kapamilya o paryente nga iba an gintotoohan?

Hi Jürgen nagsiring: “Diri naton sadang piriton an aton mga kapamilya ngan diri naton sadang pauranan hira hin mga impormasyon may kalabotan ha espirituwal. Bangin mas magdumiri la lugod hira ha pagkarawat hito. Bangin mas maopay kon ha pana-panahon mataktika nga susumatan naton hira hin talagudti la. Makakabulig liwat kon ipapakilala naton hira ha kabugtoan nga kaedad nira ngan kapariho han ira mga karuyag. Hini nga paagi mahimo hira magin komportable ha mga Saksi.”

Ginkarawat dayon ni apostol Pedro ngan han mga paryente ni Cornelio an mensahe han Biblia. Kondi an iba nga nasangyawan ha siyahan nga siglo nagkinahanglan pa hin panahon basi makagdesisyon.

Durante han pagministeryo ni Jesus, may pipira nga iya paryente nga tumoo ha iya. Pananglitan, posible nga hira apostol Santiago ngan Juan mga patod ni Jesus, ngan an ira nanay nga hi Salome iya dada. Bangin usa hiya hadton “damu pa nga kababayin-an nga naggamit han ira panag-iya ha pag-asikaso kan Jesus ngan ha iya mga apostol.”—Luc. 8:1-3.

Pero an iba nga kapamilya ni Jesus waray dayon tumoo ha iya. Pananglitan, ha usa nga hitabo sobra usa ka tuig katapos han iya bawtismo, may damu nga tawo nga nagkatirok ha usa nga balay basi mamati ha iya. “Kondi han nakabati an iya mga paryente mahitungod hito, kinadto hira basi dakpon hi Jesus, kay nagsiniring hira: ‘Nalulurong na hiya.’” Paglabay hin pipira ka panahon, han ginpakianhan hi Jesus han iya kabugtoan ha nanay mahitungod han iya plano ha pagbiyahe, waray hiya maghatag hin direkta nga baton. Kay ano? Tungod kay “ha pagkamatuod, an iya kabugtoan diri natoo ha iya.”—Mar. 3:21; Juan 7:5.

Ano an aton mahibabaroan ha paagi han pagtratar ni Jesus ha iya mga kapamilya? Waray hiya masina han nagsiring an pipira nga nalulurong na hiya. Ngani, katapos niya mamatay ngan mabanhaw, padayon nga ginparig-on niya an iya mga kapamilya pinaagi ha pagpakita ha iya bugto ha nanay nga hi Santiago. Ito nga hitabo baga hin nakabulig nga makombinse hi Santiago ngan an iba pa nga kabugtoan ni Jesus ha nanay nga Hiya gud an Mesias. Salit kaupod hira han mga apostol nga nagkatirok ha usa nga kwarto ha igbaw didto ha Jerusalem  ngan matin-aw nga nakakarawat hira han baraan nga espiritu. Ha urhi, hira Santiago ngan Judas nga kabugtoan ni Jesus nagkaada makalilipay nga mga pribilehiyo.—Buh. 1:12-14; 2:1-4; 1 Cor. 15:7.

Pariho ha siyahan nga siglo, an pipira han aton mga kapamilya o paryente nagkikinahanglan hin mauruiha nga panahon antes nira karawaton an kamatuoran. Tagda pananglitan hi Roswitha, debotado hiya nga Romano Katoliko han mabawtismohan an iya bana sugad nga Saksi ni Jehova hadton 1978. Tungod kay sinsero ha iya mga gintotoohan, ha siyahan ginkontra niya an iya bana. Kondi paglabay hin katuigan, hinay-hinay nga umundang hiya ha pagkontra ngan nakita niya nga an mga Saksi nagtututdo han kamatuoran. Han 2003 nabawtismohan hiya. Ano an nakabulig ha iya nga magbag-o? Imbes nga masina an iya bana ha iya pagkontra, gintagan hiya hito hin panahon basi bag-uhon an iya panhunahuna. Ano an iginsasagdon ni Roswitha? “Daku gud an maibubulig han pagpailob, pagpailob, ngan mas hilawig pa nga pagpailob.”

Han 1974 nabawtismohan hi Monika, ngan an iya duha nga anak nga lalaki nagin Saksi paglabay hin mga napulo ka tuig. Bisan kon an iya bana nga hi Hans diri man nakontra han ira gintotoohan, pero hadton 2006 la hiya nabawtismohan. Tungod han ira hinbaroan tikang ha ira eksperyensya, ano an ira iginsasagdon? “Magpabilin nga maunungon kan Jehova, ngan ayaw ikompromiso an mga butang may kalabotan han imo pagtoo.” Oo, importante nga padayon nga pasarigon nira hi Hans nga hinigugma nira hiya. Ngan waray gud hira mawad-i hin paglaom nga mag-aalagad hiya kan Jehova.

Iginhulagway ni Jesus an mensahe han kamatuoran sugad hin tubig nga naghahatag hin kinabuhi nga waray kataposan. (Juan 4:13, 14) Karuyag naton nga marepreskohan an aton mga paryente pinaagi ha pag-inom han matugnaw ngan matin-aw nga tubig han kamatuoran. Sigurado nga diri naton karuyag nga mabut-okan hira tungod han damu hinduro nga tubig nga iginpipirit naton nga ipainom dayon ha ira. An ira pag-abat hin karepreskohi o kahibut-oki bangin nadepende ha kon paonan-o naton iginsasaysay ha ira an aton gintotoohan. An Biblia nasiring nga “an kasingkasing han matadong nagtutoon pagbaton” ngan “an kasingkasing han makinaadmananon nagtututdo han iya baba, ngan nagdudugang hin hibaro ha iya mga im-im.” Paonan-o naton maiaaplikar ini nga sagdon?—Prob. 15:28; 16:23.

Bangin karuyag isaysay han usa nga asawa ha iya bana an iya gintotoohan. Kon hiya “nagtutoon pagbaton,” o namamalandong anay antes magyakan, pipilion niya an iya gagamiton nga mga pulong ngan diri mag-iistorya hin paturapak. Diri hiya sadang maghatag hin impresyon nga pirme hiya husto o mas maopay hiya kay ha iba. Kon huhunahunaon anay niya an iya isisiring, mahimo ito magin makarepresko ngan makabulig nga magkaada hin kamurayawan. Ha ano nga mga higayon kalmado ngan masayon daupon an iya bana? Ano nga mga topiko an karuyag hito pag-istoryahan o basahon? Interesado ba ito ha syensya, politika, o isport? Paonan-o niya maaaghat an interes han iya bana ha Biblia ngan ha pariho nga panahon ginrirespeto an mga pagbati ngan opinyon hito? An paghunahuna hini mabulig ha asawa nga magyakan ngan gumios nga may hilarom nga pagsabot.

Basi maabot an kasingkasing han aton mga kapamilya nga diri pa Saksi, diri igo na an basta pagsaysay la hin talagudti mahitungod han aton gintotoohan. An aton ginyayakan sadang updan hin maopay nga panggawi.

“Padayon nga iaplikar an mga prinsipyo ha Biblia kada adlaw. Epektibo gud ini nga paagi basi an imo kapamilya o paryente makapamurubuot ngan mainteres ha kamatuoran, bisan kon bangin diri man niya ito karawaton,” siring ni Jürgen nga gin-unabi ha igbaw. Umuyon hito hi Hans nga nabawtismohan paglabay hin haros 30 ka tuig tikang han nabawtismohan an iya asawa. “Importante an maopay nga panggawi han usa nga Kristiano basi makita han aton mga paryente an positibo nga epekto han kamatuoran ha aton kinabuhi.” Sadang makita han aton mga paryente nga bisan kon naiiba kita tungod han aton pagtoo, nakakaopay ito ha aton, diri nakakadaot.

Hi apostol Pedro naghatag hin mapulsanon nga sagdon ha mga asawa nga an bana diri tumuroo: “Magpasakop kamo ha iyo bana, basi kon may bisan hin-o nga diri masinugtanon ha pulong, makabig hira bisan waray pulong pinaagi han iyo panggawi, tungod kay mga testigo hira nga nakakita han iyo putli nga panggawi nga may daku nga respeto. An iyo pagpahusay kinahanglan diri ha gawas la—an pagsalapid han buhok ngan pagsul-ot hin bulawan nga mga alahas o mga bado—lugod an iyo pagpahusay sadang magin ha kasingkasing, nga amo an iyo sulod nga pagkatawo, pinaagi han diri-nadadaan nga pampahusay nga amo an  kalmado ngan malumo nga disposisyon, nga presyoso gud ha pagkita han Dios.”—1 Ped. 3:1-4.

Hi Pedro nagsurat nga an usa nga bana mahimo makombinse tungod han maopay nga panggawi han iya asawa. Pinaagi ha paghunahuna hinin Kasuratanhon nga giya, nangangalimbasog hi Christa nga mabantad an kasingkasing han iya bana pinaagi han iya panggawi tikang pa han mabawtismohan hiya hadton 1972. Bisan kon an iya bana nag-aram ha Biblia kaupod han mga Saksi, pero diri pa ito nagkikinabuhi uyon ha kamatuoran. Nakatambong na ito ha pipira nga Kristiano nga mga katirok ngan nakikig-upod ha kabugtoan ha kongregasyon. Sugad man, ginrirespeto han kabugtoan an iya kagawasan ha pagpili. Paonan-o nangangalimbasog hi Christa nga abuton an kasingkasing han iya bana?

“Determinado ako nga magpabilin ha dalan ni Jehova. Ha pariho nga panahon, nangangalimbasog ako nga makabig ko an akon bana ‘bisan waray pulong’ pinaagi han akon maopay nga panggawi. Kon waray natatalapas nga mga prinsipyo ha Biblia, nangangalimbasog ako nga sundon an iya karuyag. Ngan syempre, ginrirespeto ko an iya kagawasan ha pagpili ngan iginsasarig ko an ngatanan kan Jehova.”

Ini nga ginbuhat ni Christa nagpapakita nga importante nga magin mapauyon-uyon. Gintitipigan niya an maopay nga rutina ha espirituwal, upod na an regular nga pagtambong ha mga katirok ngan madasigon nga pakigbahin ha ministeryo. Kondi masinabuton hiya, maaram hiya nga may katungod an iya bana han iya gugma, panahon, ngan atensyon. Para ha bisan hin-o ha aton nga may mga kapamilya o paryente nga diri tumuroo, maaramon an pagin mapauyon-uyon ngan pagin masinabuton. “Ha tagsa nga butang may-ada usa ka panahon,” siring han Biblia. Nag-uupod ini han panahon nga igin-gagahin para ha mga kapamilya, labi na para ha mga padis nga diri tumuroo. Importante ini para magkaada hin maopay nga komunikasyon. An mga eksperyensya nagpapakita nga an maopay nga komunikasyon nakakabulig nga an diri tumuroo nga mga kapamilya o paryente diri masubo, mangabugho, ngan umabat nga baga hin ginpapabay-an hira.—Ekles. 3:1.

“Importante nga ipakita naton nga hinigugma naton an aton kapamilya ngan ig-ampo naton hiya,” siring ni Holger, nga an tatay nabawtismohan paglabay hin 20 ka tuig katapos mabawtismohan an iba pa nga membro han pamilya. Hi Christa nagsiring nga ‘diri gud hiya nawawad-an hin paglaom nga an iya bana mag-aalagad kan Jehova ngan kakarawaton an kamatuoran.’ May kalabotan ha aton diri tumuroo nga mga kapamilya o paryente, kinahanglan nga pirme kita positibo ngan diri mawad-an hin paglaom.

Tumong naton nga tipigan an maopay nga relasyon ha aton mga kapamilya o paryente, buligan hira nga mahibaro han kamatuoran, ngan mabantad an ira kasingkasing pinaagi han mensahe han Biblia. Ngan ha ngatanan nga butang kinahanglan gumawi kita ha “malumo nga paagi ngan may daku nga respeto.”—1 Ped. 3:15.