Ini an usa pa nga kahimtang: Usa nga solo nga nanay nga may duha nga anak an gin-imbitar hin mag-asawa nga ira kakongregasyon para ha usa nga pangiklop. Han ginsumatan niya an iya mga anak mahitungod hito, nalipay gud hira. Eksayted na gud hira nga umabot ito nga gab-i. Kondi usa na la ka adlaw antes hito, an nanay ginsidngan han mag-asawa nga may nahitabo nga diri ginlalaoman salit kinahanglan nira ikansela an imbitasyon. Ha urhi, hinbaroan han nanay an hinungdan han mag-asawa. Katapos hiya imbitaron, an mag-asawa gin-imbitar liwat han pipira nira nga kasangkayan ha pariho nga gab-i, ngan ginkarawat nira ito.

Syempre, sugad nga mga Kristiano kinahanglan naton tumanon an aton mga saad. Diri gud kita sadang sumiring hin “Oo pero Diri ngay-an.” (2 Cor. 1:18) Kondi sugad han iginpapakita han duha nga ehemplo, iba-iba an sitwasyon. May mga panahon nga baga hin waray gud kita mahihimo kondi kanselahon an usa nga ginkasabotan. Naeksperyensyahan ito ni apostol Pablo.

Han 55 C.E., samtang nakadto hi Pablo ha Efeso ha iya ikatulo nga pagbiyahe sugad nga misyonero, nagplano hiya pagtabok ha Dagat Aegean pakadto ha Corinto ngan tikang didto makadto hiya ha Macedonia. Ha iya pagtipabalik ha Jerusalem, nagplano hiya pagbisita ha kongregasyon han Corinto ha ikaduha nga higayon, posible basi kuhaon an ira kinaburut-on nga regalo para ha kabugtoan ha Jerusalem. (1 Cor. 16:3) Nahibaro kita hito tungod kay ha 2 Corinto 1:15, 16, aton mababasa: “Tungod hini nga pagsarig, nagplano ako hadto pagkada ha iyo ha ikaduha nga higayon basi malipay na liwat kamo. Mahapit ako dida basi makigkita ha iyo ngan katapos makadto ako ha Macedonia. Tikang ha Macedonia mabalik ako ha iyo ngan mapaupod ako ha iyo hin pipira ka distansya pagtikadto ko ha Judea.”

Ha nahiuna nga surat ni Pablo, baga hin iginsumat niya ha mga kabugtoan ha Corinto an mahitungod han iya plano ha pagbisita ha ira. (1 Cor. 5:9) Kondi waray pag-iha katapos niya igsurat ito, hinbatian niya tikang ha panimalay  ni Cloe nga may pagkabahin-bahin ha kongregasyon. (1 Cor. 1:10, 11) Nagdesisyon hi Pablo nga bag-uhon an iya siyahan nga plano, ngan nagpadara hiya hin surat nga aton mababasa yana ha 1 Corinto. Hito nga surat, naghatag hi Pablo hin mahigugmaon nga sagdon ngan pagsaway. Iya liwat gin-unabi nga iya ginbag-o an iya ruta ha pagbiyahe, ginsumatan hira nga makadto anay hiya ha Macedonia ngan katapos ngadto ha Corinto.—1 Cor. 16:5, 6. *

Posible nga han nakarawat han kabugtoan ha Corinto an surat ni Pablo, an pipira nga “sobra-kaopay nga mga apostol” hito nga kongregasyon nag-akusar ha iya nga paburobag-o an iya hunahuna ngan diri nagtutuman han iya mga saad. Sugad nga pagdepensa ha iya kalugaringon, hiya nagpakiana: “Han ginplano ko ito, waray ko hunahunaa nga diri ito importante, diri ba? O ginpaplano ko ba an mga butang uyon ha panhunahuna han tawo, salit nasiring ako nga ‘Oo, syempre’ ngan katapos nasiring nga ‘Diri, diri gud’?”—2 Cor. 1:17; 11:5.

Bangin kita magpakiana, Hini nga kahimtang tinuod gud ba nga ginhunahuna ni Pablo nga ‘diri importante’ an iya ginsiring? Syempre diri! An pulong nga iginhubad nga ‘diri importante’ nangangahulogan hin paburobag-o an hunahuna, sugad hin usa nga tawo nga diri masasarigan ngan diri nagtutuman han iya mga saad. An pakiana ni Pablo nga “ginpaplano ko ba an mga butang uyon ha panhunahuna han tawo?” nakabulig unta ha mga Kristiano ha Corinto nga masabtan nga an pagbag-o ni Pablo han iya plano diri tungod kay diri hiya masasarigan.

Marig-on nga ginbaton ni Pablo an akusasyon, hiya nagsurat: “Pero sugad la nga masasarigan an Dios, diri kami nasiring ha iyo hin Oo pero Diri ngay-an.” (2 Cor. 1:18) Sigurado nga han ginbag-o ni Pablo an iya mga plano ginhunahuna niya kon ano an pinakamaopay para ha iya kabugtoan ha Corinto. Ha 2 Corinto 1:23, mababasa naton nga ginbag-o niya an iya siyahan nga plano pagkadto ha Corinto basi ‘diri hira dugang nga masubo.’ Oo, gintagan niya hira hin higayon basi sulbaron anay an problema antes niya hira bisitahon. Ngan ito an ira ginbuhat. Samtang nakadto hi Pablo ha Macedonia, hinbaroan niya kan Tito nga an iya surat nakabulig gud ha ira nga masabtan an ira sayop salit nagbasol hira. Nakapalipay gud ito kan Pablo.—2 Cor. 6:11; 7:5-7.

An akusasyon nga paburobag-o hi Pablo ngan diri nagtutuman han iya mga saad mahimo magpasabot nga diri liwat hiya masasarigan ha buruhaton nga pagsangyaw. Kondi ginpahinumdoman ni Pablo an mga taga-Corinto nga iya iginsangyaw ha ira hi Jesu-Kristo. “An Anak han Dios nga hi Kristo Jesus nga iginsangyaw ha iyo pinaagi ha amon, karuyag sidngon, pinaagi ha akon ngan kanda Silvano ngan Timoteo, waray magin Oo pero nagin Diri, lugod an Oo pirme Oo ha iya kahimtang.” (2 Cor. 1:19) Makakasiring ba kita nga an susbaranan ni Pablo nga hi Jesu-Kristo diri masasarigan? Diri! Ha bug-os nga kinabuhi ngan ministeryo ni Jesus, pirme hiya nagyayakan han kamatuoran. (Juan 14:6; 18:37) Kon tinuod gud ngan masasarigan an iginsangyaw ni Jesus ngan ito gihapon nga mensahe an iginsangyaw ni Pablo, kon sugad masasarigan liwat an pagsangyaw ni Pablo.

Syempre, hi Jehova amo an “Dios han kamatuoran.” (Sal. 31:5) Makikita naton ini ha sunod nga iginsurat ni Pablo: “Mationan-o man kadamu an mga saad han Dios, nagin Oo ito pinaagi ha iya,” karuyag sidngon, pinaagi kan Kristo. Tungod kay nagpabilin hi Jesus nga matinumanon han nakanhi pa hiya ha tuna, makakasarig kita nga tutumanon ni Jehova an iya mga saad. Hi Pablo nagpadayon: “Salit pinaagi liwat ha iya [Jesus] ginsisiring an “Amen” ha Dios basi makaghatag kita hin himaya ha iya.” (2 Cor. 1:20) Oo, hi Jesus an garantiya mismo ni Jehova, an “Amen,” nga tutumanon gud Niya an ngatanan Niya nga saad!

Sugad la nga hi Jehova ngan hi Jesus pirme nagyayakan han kamatuoran, pirme liwat gintutuman ni Pablo an iya ginsisiring. (2 Cor. 1:19) Diri paburobag-o an iya hunahuna, ngan waray hiya magsaad “uyon ha panhunahuna han tawo.” (2 Cor. 1:17) Lugod, ‘nagkinabuhi [hiya]  uyon ha espiritu.’ (Gal. 5:16) Ha iya pakig-upod ha iba, pirme niya ginbubuhat kon ano an makakaopay gud ha ira. An iya Oo nangahulogan hin Oo!

Yana, komon na la ha mga tawo nga diri nagkikinabuhi uyon ha mga prinsipyo ha Biblia an diri pagtuman ha ira mga saad kon nagkakaada hin bisan gutiay la nga problema o kon may butang nga mas karuyag nira buhaton. Ha negosyo, an “oo” diri pirme nangangahulogan hin “oo,” bisan kon may ginpirmahan nga kasabotan. Diri na gintatagad han damu an pag-asawa sugad nga kasabotan nga sadang tumanon ha bug-os nira nga kinabuhi. Lugod an pagtikadamu han nagdidiborsyo nagpapakita nga damu an nagtatagad han ira panumpa ha kasal sugad nga diri seryoso nga kasabotan nga masayon la tapuson.—2 Tim. 3:1, 2.

Kumusta ka man? An imo ba Oo nangangahulogan hin Oo? Tinuod, sugad han gin-unabi ha tinikangan hini nga artikulo, bangin may mga sitwasyon nga kinahanglan mo kanselahon an imo ginhimo nga pakigsabot, diri tungod kay paburobag-o an imo hunahuna, pero tungod ha mga butang nga diri mo kontrolado. Kondi sugad nga Kristiano, kon nagsasaad ka o nakikigsabot, sadang mo buhaton an ngatanan basi tumanon ito. (Sal. 15:4; Mat. 5:37) Kon bubuhaton mo ito, makikilala ka sugad nga tawo nga masasarigan, usa nga nagtutuman kon ano an iginsaad ngan pirme nagyayakan han kamatuoran. (Efe. 4:15, 25; San. 5:12) Kon nakikita han mga tawo nga masasarigan ka ha ngatanan nga butang, bangin mas andam hira mamati kon iginsusumat mo ha ira an kamatuoran mahitungod ha Ginhadian han Dios. Salit hinaot nga siguruhon naton nga an aton Oo mangahulogan gud hin Oo!