“Nag-i-enjoy gud kami ha amon Pagsingba han Pamilya salit kasagaran nagagab-ihan kami hinduro kon diri ko pa ito iuundang,” siring han usa nga tatay nga taga-Brazil. Usa nga ulo han pamilya ha Japan an nagsiring nga diri napapanginano han iya 10 anyos nga anak an paglabay han oras ngan nadiri nga matapos an ira pag-aram. Kay ano? “Eksayted hiya ha pag-aram salit nalilipay hiya,” ito an naobserbaran han tatay.

Oo, diri ngatanan nga kabataan eksayted ha pagsingba han pamilya, ngan ha pagkamatuod, may pipira nga diri nag-i-enjoy hito. Kay ano? Usa nga tatay nga taga-Togo an nagsiring, “Kinahanglan diri makauuyam an pagsingba kan Jehova.” Kon makauuyam ito, tungod ba ito han paagi han pagdumara han pag-aram? Napamatud-an han damu nga an pagsingba han pamilya mahimo magin ‘makalilipay’ sugad han ginsiring ni Isaias may kalabotan han Sabbath.—Isa. 58:13, 14.

Nasantop han Kristiano nga mga amay nga basi mag-enjoy an ngatanan ha ira pagsingba han pamilya, kinahanglan diri ito magin sobra kapormal. Hi Ralf, nga may upat nga anak, tulo nga babaye ngan usa nga lalaki, nagsiring nga an ira pagsingba han pamilya sugad hin nag-iiristorya la imbes nga magin pormal nga pag-aram; an ngatanan nakikigbahin. Oo, usahay diri masayon para ha ngatanan nga magpabilin nga nakapokus ha pag-aram. Usa nga nanay an nagsiring: “Karuyag ko unta nga magin makalilipay an amon pagsingba han pamilya, pero usahay kulang ako hin kadasig basi mahimo ito.” Ano an iyo bubuhaton basi magin makalilipay an pagsingba han pamilya?

“Kinahanglan namon magin mapauyon-uyon,” siring han usa nga tatay nga may duha nga anak nga taga-Germany. “An pinakaimportante ha amon pamilya amo an pagkaada hin iba-iba nga aktibidad ha kada namon pag-aaram,” siring ni Natalia nga may duha nga anak. Ginbabahin-bahin han damu nga pamilya an ira pagsingba han pamilya ha iba-iba nga aktibidad. “Nabulig ito nga magin mas makapainteres an pag-aram  ngan makigbahin an ngatanan,” siring ni Cleiton, nga may duha nga tin-edyer nga anak nga taga-Brazil. Kon ginbabahin-bahin an panahon han pag-aram ha iba-iba nga aktibidad, nahahatagan hin atensyon han mga kag-anak an panginahanglan han tagsa nga bata bisan kon daku an lat-ang han ira edad. Hito nga paagi, magigin mapauyon-uyon an mga kag-anak ha pagpili hin materyal nga gagamiton ngan ha paagi han pag-aram.

Ano an ginbubuhat han pipira nga pamilya basi magin iba-iba an aktibidad? Gintitikangan han iba an ira pagsingba han pamilya pinaagi ha pagkanta kan Jehova. “Nabulig ito nga magin relaks kami ngan maiandam an amon hunahuna ha materyal nga hihisgotan,” siring ni Juan nga taga-Mexico. An iya pamilya nagpipili hin mga kanta nga may kalabotan ha materyal nga ira pag-aadman hito nga gab-i.

Damu nga pamilya an urosa nga nagbabasa hin asoy ha Biblia. Basi diri ito magin makauuyam, iba-iba nga membro an nagbabasa han ginyakan han tagsa nga tawohan ha Biblia. Usa nga amay ha Japan an nagsiring, “ha siyahan diri ako komportable pagbasa ha sugad hito nga paagi.” Kondi malipayon an iya duha nga anak nga makita nga nag-i-enjoy an ira mga kag-anak kaupod nira. Igindadrama pa ngani han pipira nga pamilya an mga istorya ha Biblia. An kabataan “kasagaran nga may nakikita nga mga punto ha Biblia nga diri naton nahahatagan hin pagtagad sugad nga mga kag-anak,” siring ni Roger nga may duha nga anak nga taga-South Africa.

An usa pa nga paagi nga puydi himoon han pamilya amo an urosa nga paghimo hin proyekto sugad han modelo han arka ni Noe o han templo ni Solomon. An sugad nga mga proyekto nagkikinahanglan hin pagsaliksik nga mahimo magin eksayting. Pananglitan, ha Asia, usa nga 5 anyos nga bata kaupod han iya mga kag-anak ngan lola an naghimo dida ha ira sala hin board game mahitungod han mga ruta ni apostol Pablo sugad nga misyonero. An iba nga pamilya naghimo hin mga board game mahitungod han mga asoy ha libro han Eksodo. Tungod han iba-iba nga aktibidad, “nagin mas makalilipay an amon pagsingba han pamilya ngan an amon mismo pamilya,” siring han 19 anyos nga hi Donald nga taga-Togo. May nahunahuna ka ba nga proyekto nga makakabulig nga magin mas makalilipay an iyo pagsingba han pamilya?

Bisan kon an paghimo hin iba-iba nga aktibidad ngan pagin mapauyon-uyon makakabulig nga magin makalilipay an pagsingba han pamilya, mas magpapahimulos an pamilya kon mag-aandam an ngatanan. Usahay an mga bata nauuyam ha maiha nga pagliningkod ngan pag-inaram, salit kinahanglan pilion han tatay an materyal nga gagamiton ngan pag-adman ito hin maopay. Usa nga tatay an nagsiring, “Kon andam ako, nagpapahimulos an ngatanan ha pag-aram.” An usa nga tatay nga taga-Germany abanse nga nagpapahibaro ha iya pamilya kon ano an ira hihisgotan para ha masunod nga mga semana. Abanse nga iginhahatag han usa nga tatay nga may unom nga batan-on nga anak nga taga-Benin an mga pakiana ha iya pamilya kon ginagamit an basado ha Biblia nga mga DVD ha ira pagsingba han pamilya. Oo, an pagpangandam nakakabulig gud basi magin mas mapulsanon an aton pagsingba han pamilya.

Kon an pamilya maaram na han ira sunod nga pag-aadman, bangin pag-uruistoryahan nira ito ha bug-os nga semana, salit magigin mas eksayted hira hito. Ngan kon may toka an tagsa nga membro, aabaton han kada usa nga kaapi hiya ha ira pagsingba han pamilya.

Damu nga pamilya an nakukurian nga magin regular an ira pagsingba han pamilya.

An pipira nga kag-anak kinahanglan magtrabaho hin damu ka oras basi masuportahan an panginahanglan han ira pamilya. Pananglitan, usa nga tatay ha Mexico an nabaya ha ira balay ha alas–6:00 han aga ngan nauli ha alas–8:00 han gab-i. Dugang pa, may panahon nga bangin kinahanglan i-adjust an eskedyol han Pagsingba han Pamilya tungod han iba nga espirituwal nga buruhaton sugad han bisita han paramangno han sirkito.

Pero kinahanglan pa gihapon magin determinado kita nga magin regular an aton pagsingba han pamilya. An usa nga 11 anyos nga hi Loïs nga taga-Togo nagsiring mahitungod han determinasyon han iya pamilya: “Bisan kon usahay diri kami dayon nakakagtikang ha amon family worship tungod han diri ginlalaoman nga mga sitwasyon, pirme pa gihapon kami nagpa-family worship.” Salit may mga pamilya nga nag-ieskedyol han ira pagsingba han pamilya ha siyahan nga mga adlaw han semana. Kon may nahitatabo nga diri ginlalaoman, ira igin-a-adjust an ira pagsingba han pamilya ha urhi nga bahin hito nga semana.

An termino nga “pagsingba han pamilya” nagpapakita nga bahin ito han iyo pagsingba kan Jehova. Hinaot kada semana, an ngatanan nga membro han iyo pamilya maghatag kan Jehova han ‘mga umagwas nga baka han halad han iyo mga im-im.’ (Hos. 14:2) Ngan hinaot an pagsingba han pamilya magin makalilipay nga panahon para ha tagsa nga membro han pamilya, “kay an kalipay ni Jehova amo an iyo kusog.”—Neh. 8:9, 10.