1, 2. Ano an kaibahan han mahigugmaon nga pagbantay ni Jehova ha nahihimo han mga surveillance camera?

HA DAMU nga nasud, ginagamit an mga surveillance camera basi mamonitor an trapiko ngan mairekord an mga aksidente. Kon may drayber nga makaligis ngan pumalagiw, an nahirekord ha mga surveillance camera makakabulig basi mabilngan han mga pulis an drayber ngan maaresto ito. Oo, tungod hini nga mga kamera, an mga kriminal mas masayon madakop ngan masirotan.

² Kondi, an kalyap nga paggamit hin mga surveillance camera maipapariho ba ha ginbubuhat han aton mahigugmaon nga Amay, hi Jehova? An Biblia nasiring nga an iya mata “aada ha tagsa-tagsa nga lugar.” (Prob. 15:3) Pero karuyag sidngon ba hini nga ginbibinantayan kita ni Jehova basi la makita kon nasunod gud ba kita ha iya mga balaud? Naghihinulat la ba hiya nga makasala kita basi sirotan kita niya dayon? (Jer. 16:17; Heb. 4:13) Diri gud! Ginkikita kita ni Jehova tungod kay nahigugma hiya ha tagsa ha aton ngan interesado hiya ha aton kaopayan.—1 Ped. 3:12.

3. Ano an aton hihisgotan nga lima nga paagi nga iginpapakita han Dios an iya mahigugmaon nga pagmangno?

³ Ano an mabulig basi maapresyar naton an mahigugmaon nga pagbantay ha aton han Dios? Hisgotan naton kon paonan-o niya ito  iginpapakita. (1) Ginpapahamangnoan kita kon nakikita niya nga may tendensya kita nga magbuhat hin maraot, (2) gintatadong kita kon nagbubuhat kita hin sayop, (3) gin-gigiyahan kita pinaagi han mga prinsipyo nga mababasa ha iya Pulong, (4) ginbubuligan kita kon naatubang kita hin iba-iba nga pagsari, ngan (5) ginbibendisyonan kita kon nagbubuhat kita hin husto.

4. Kay ano nga ginpahamangnoan ni Jehova hi Cain nga an sala “aada ha ganghaan”?

⁴ Siyahan, hisgotan naton kon paonan-o kita ginpapahamangnoan han Dios kon nagkakaada na kita tendensya nga magbuhat hin maraot. (1 Kron. 28:9) Basi maapresyar ini nga bahin han mahigugmaon nga pagbantay han Dios, tagdon naton kon paonan-o niya gintratar hi Cain, nga “nasina hinduro” han waray makarawat an iya pag-uyon. (Basaha an Genesis 4:3-7.) Ginsagda ni Jehova hi Cain nga ‘buhaton an maopay.’ Kay kon diri, nagpahamangno ha iya hi Jehova nga an sala “aada ha ganghaan.” An Dios nagpakiana ha iya: ‘Paghahadian [o madadaog] mo ba ito’? Karuyag niya nga mamati hi Cain ha pahamangno ngan maibalik utro an Iya pag-uyon. Kon mamamati hi Cain, padayon hiya nga magkakaada hin maopay nga relasyon ha Dios.

5. Ha ano nga mga paagi ginpapahamangnoan kita ni Jehova kon may tendensya kita ha pagbuhat hin sayop?

⁵ Kumusta man kita yana? Nakikita ni Jehova kon ano an aada ha aton kasingkasing; diri naton maitatago ha iya an aton mga hingyap ngan tinuod nga motibo. Karuyag han aton mahigugmaon nga Amay nga buhaton naton an husto; kondi diri kita niya ginpipirit nga magbag-o. Pinaagi han iya Pulong, an Biblia, ginpapahamangnoan kita niya kon nakikita niya nga may tendensya kita ha pagbuhat hin sayop. Paonan-o? Ha aton adlaw-adlaw nga pagbasa han Biblia, agsob nga may nababasa kita nga usa nga teksto nga nabulig ha aton basi maatohan an sayop nga mga tendensya ngan hingyap. Dugang pa, bangin may mabasa kita nga mga artikulo ha aton mga publikasyon may kalabotan ha usa nga problema nga bangin naieksperyensyahan naton ngan kon paonan-o naton ito malalamposan. Ngan ha aton mga katirok ha kongregasyon, kita ngatanan nakakakarawat hin mga sagdon ha husto gud nga panahon!

6, 7. (a) Kay ano nga masisiring naton nga an espirituwal nga mga tagana nga igin-andam para ha minilyon nagpapamatuod han mahigugmaon nga pagmangno han Dios ha imo? (b) Paonan-o ka magpapahimulos han mahigugmaon nga pagmangno ha imo ni Jehova?

⁶ An ngatanan nga pahamangno ni Jehova nagpapamatuod han iya mahigugmaon nga pagbantay ha aton sugad nga indibiduwal. Tinuod nga an Biblia, an aton mga publikasyon, ngan an aton mga katirok napapahimulosan han minilyon nga tawo. Bisan pa hito, gin-aaghat ka ni Jehova nga mamati ha iya mga pahamangno dida ha iya Pulong basi mabuhat mo an husto. Iginpapakita hini nga mahigugmaon nga nagmamangno hi Jehova ha imo.

⁷ Basi magpahimulos kita ha mga pahamangno han Dios, kinahanglan tumoo anay kita nga nagmamangno gud hiya ha aton. Ngan kinahanglan sugton naton an iya Pulong, mangalimbasog nga wad-on an anoman nga panhunahuna nga diri nakakapalipay ha iya. (Basaha an Isaias 55:6, 7.) Kon mamamati kita ha mga pahamangno, malilikyan naton an damu nga kasakit. Pero kumusta man kon nadadaog kita han aton sayop nga mga tendensya? Paonan-o kita bubuligan han aton mahigugmaon nga Amay?

8, 9. Kon may nagsasagdon ha aton tikang ha Biblia, paonan-o ini nagpapamatuod nga interesado gud hi Jehova ha aton kaopayan? Paghatag hin ehemplo.

⁸ Labi na nga inaabat naton nga interesado gud hi Jehova ha aton kaopayan kon gintatadong kita niya. (Basaha an Hebreo 12:5, 6.) Tinuod, diri kita nalilipay kon ginsasagdonan o gindidisiplina kita. (Heb. 12:11) Kondi hunahunaa kon ano an sadang ikonsiderar han usa nga nagsasagdon ha aton. Kinahanglan niya hibaroan an aton ginbubuhat nga mahimo makaapekto han aton  relasyon kan Jehova, tagdon an aton mga pagbati, magin andam ha paggahin hin panahon ngan mangalimbasog nga ipakita ha aton tikang ha Biblia kon ano an kinahanglan naton bag-uhon basi mapalipay an Dios. Gintatahod naton ito nga sagdon tungod kay an Surok hito amo hi Jehova.

⁹ Tagdon naton an usa nga ehemplo kon paonan-o an tawhanon nga mga magsaragdon mahimo magpakita han gugma han Dios ha aton. Antes hibaroan han usa nga brother an kamatuoran, naadik hiya ha pagkinita hin pornograpiya, kondi naiundang niya ito. Pero waray pa gihapon mawara an iya hingyap para hito, sugad hin baga nga waray maparong. Han nakapalit hiya hin bag-o nga celfon, mas nagtikaduro ito nga iya maraot nga hingyap. (San. 1:14, 15) Gin-gamit niya an celfon basi maka-access hin mga Web site ha Internet nga may maglaw-ay nga mga kiritaon. Usa ka adlaw, samtang nagsasangyaw pinaagi han telepono, iginpahuram niya an iya celfon ha usa nga tigurang basi mamiling hin mga numero ha telepono. Samtang gin-gagamit han tigurang an celfon, nakita niya dida hito an kwestyonable nga mga Web site. Maopay na la nga nahitabo ito tungod kay nabuligan an brother nga namimeligro ha espirituwal. Nakakarawat hiya hin napapanahon nga sagdon, nakapahimulos han pagtadong, ngan hinay-hinay nga nalamposan an maraot nga mga hingyap. Mapasalamaton gud kita ha aton mahigugmaon nga langitnon nga Amay, nga nakikita niya bisan an aton tinago nga mga sala ngan gintatadong kita niya antes pa madaot an aton maopay nga relasyon ha iya!

10, 11. (a) Paonan-o naton maipapakita nga nagpapagiya kita ha Dios? (b) Paonan-o naeksperyensyahan han usa nga pamilya nga maaramon an pagsunod han giya ni Jehova?

¹⁰ An salmista nagkanta kan Jehova: “Imo ako pagmamandoan han imo sagdon.” (Sal. 73:24) Ha anoman nga panahon nga nagkikinahanglan kita hin giya, ‘ginhihinumdom’ o ginkukonsiderar naton hi Jehova pinaagi ha pag-usisa ha iya Pulong basi hibaroan naton an iya panhunahuna ha mga butang. Kon iaaplikar naton an mga prinsipyo ha Biblia, diri la kita magpapahimulos ha espirituwal kondi usahay bisan ha materyal.—Prob. 3:6; Maopay nga Sumat.

¹¹ Tagda pananglitan an ehemplo han usa nga brother nga saop nga parauma nga nag-uukoy ha kabukiran nga bahin han Masbate ha Pilipinas. Hiya ngan an iya asawa mga regular payunir bisan kon daku an ira pamilya nga kinahanglan atamanon. Usa ka adlaw, nakakarawat hira hin surat nga ginpapaiwas na hira han ira agaron. Kay ano? Gin-akusaran hira nga diri kuno hira  tangkod. Bisan kon nabaraka an brother kon diin niya pauukyon an iya pamilya, hiya nagsiring: “Hi Jehova magtatagana. Pirme niya iginhahatag an aton mga panginahanglan anoman an mahitabo.” Ginbendisyonan an pagsarig nga iginpakita han brother. Paglabay hin pipira ka adlaw, nalipay an pamilya kay hinbaroan nira nga diri na hira papaiwason. Ano an nahitabo? Nakita han ira agaron nga bisan pa kon gin-akusaran hira, nagpabilin hira nga matinalahuron ngan mamurayawon tungod han ira pagsunod ha mga prinsipyo ha Biblia. Bumilib gud hini an ira agaron salit waray na niya hira paiwasa ngan gintagan pa niya hira hin dugang nga urumhan. (Basaha an 1 Pedro 2:12.) Oo, gin-gigiyahan kita ni Jehova pinaagi han iya Pulong basi maatubang naton an mga problema.

12, 13. Ha ano nga mga sitwasyon bangin magruhaduha an pipira kon nakikita gud ba han Dios an ira pag-antos?

¹² Kondi usahay nakakaeksperyensya kita hin mga problema nga baga hin maiha na naton nga gin-iinantos. Bangin may-ada kita grabe nga sakit, ginkukontra kita han aton mga kapamilya, o padayon kita nga gintitimaraot. May mga panahon nga nagkakaproblema liwat kita ha aton kabugtoan ha kongregasyon tungod han pagkaibaiba han aton personalidad.

¹³ Pananglitan, bangin nasakitan ka han ginyakan han usa nga bugto nga para ha imo diri maopay. Bangin sumiring ka, ‘Diri gud ini angay mahitabo ha sulod han organisasyon han Dios!’ Kondi, an bugto nga nakasakit ha imo nakakakarawat hin mga pribilehiyo ha kongregasyon ngan baga hin ginrirespeto hiya han iba. Bangin magpakiana ka, ‘Kay ano nga nahitatabo ini? Diri ba ini nakikita ni Jehova? Diri ba niya ini susolusyonan?’—Sal. 13:1, 2; Hab. 1:2, 3.

14. Ano an posible nga hinungdan kon kay ano nga diri nanginginlabot hi Jehova ha pagsulbad ha aton mga problema?

¹⁴ Bangin may maopay nga mga hinungdan hi Jehova kon kay ano nga diri hiya nanginginlabot ha usa nga problema. Pananglitan, bangin ginhuhunahuna mo nga an bugto an sayop, pero bangin iba an panhunahuna ni Jehova. Para ha iya, bangin ikaw an sayop ngan diri mo la ito nasasantop. An imo ginhuhunahuna nga masakit nga ginyakan, ha pagkatinuod, bangin usa ito nga maopay nga sagdon nga sadang mo hunahunaon. Pananglitan, hi Brother Karl Klein, nga nag-alagad sugad nga membro han Nagmamando nga Lawas, nagsiring nga may panahon nga prangka nga ginsaway hiya ni Brother J. F. Rutherford. Waray pag-iha katapos hito, malipayon nga ginkumusta hiya ni Brother Rutherford nga nagsiring, “Hello, Karl!” Kondi tungod kay nasasakitan pa gihapon hi Brother Klein, haros ngani diri hiya bumaton. Tungod kay nakita ni Brother Rutherford nga maraot pa gihapon an buot ni Brother Klein, ginpahamangnoan niya ito nga diri magpalit-ag ha Yawa. Ha urhi, hi Brother Klein nagsurat: “Kon nagdudumot kita ha usa nga bugto, labi na kon tungod ito kay nagyakan hiya hin usa nga butang nga may katungod man hiya ha pagsiring hito, gintatagan naton hin higayon an Yawa nga mabitik kita han iya mga lit-ag.” *

15. Kon naatubang ka hin mga pagsari, ano an mabulig ha imo nga magin mapailubon samtang ginhuhulat an bulig ni Jehova?

¹⁵ Bangin diri kita magin mapailubon kon an usa nga pagsari baga hin diri natatapos. Paonan-o naton ito aatubangon? Hunahunaa nga nagmamaneho ka ha usa nga kalsada nga matrapik hinduro. Diri ka maaram kon mag-iiha ba an imo kadelatar. Kon masisina ka ngan magbibiling hin iba nga ruta, bangin mawara ka. Bangin mag-iniha ka la lugod nga makaabot ha imo destinasyon kay ha kon mapailubon ka nga maghuhulat. Ha pariho nga paagi, kon padayon nga susundon mo an husto nga dalan nga aada ha Pulong han Dios, makakaabot ka ha imo destinasyon.

16. Ano an usa pa nga hinungdan kon kay ano nga bangin diri nanginginlabot hi Jehova ha aton mga pagsari?

¹⁶ Bangin diri nanginginlabot hi Jehova ha  aton mga pagsari tungod kay karuyag niya nga bansayon kita. (Basaha an 1 Pedro 5:6-10.) An Dios diri amo an nagpapahinabo han aton mga pagsari. (San. 1:13) “An iyo kaaway nga amo an Yawa” amo an nagpapahinabo han kadam-an nga pag-antos. Kondi mahimo gamiton han Dios an usa nga makuri nga kahimtang basi buligan kita nga magin marig-on ha espirituwal. Nakikita niya an aton mga pag-antos, ngan tungod kay “napaid hiya” ha aton, sisiguruhon niya nga “madaliay” na la ito. Gin-aapresyar mo ba an mahigugmaon nga pagbantay ni Jehova kon nag-aantos ka hin mga pagsari, ngan nasarig nga tatagan ka niya hin kusog basi makailob?—2 Cor. 4:7-9.

17. Ano an gin-uusisa ni Jehova, ngan kay ano?

¹⁷ Ha kataposan, gin-uusisa ni Jehova an kasingkasing han ngatanan nga tawo basi makita niya kon hin-o gud an nahigugma ha iya. Pinaagi kan propeta Hanani hiya nagsiring kan Hadi Asa: “An mga mata ni Jehova nadalagan ngadto nganhi sahid an bug-os nga kalibotan, ha pagpakita ha iya ngahaw nga makusog ha ngaran nira kan kanay kasingkasing hingpit tipakadto ha iya.” (2 Kron. 16:9) Bisan kon nakita han Dios nga diri hingpit an kasingkasing ni Asa, ‘ipapakita niya an iya kusog’ ha imo kon padayon nga bubuhaton mo an husto.

18. Kon inaabat mo nga diri nakikita han iba an imo maopay nga ginbubuhat, ano an sadang mo hinumdoman mahitungod kan Jehova? (Kitaa an retrato ha tinikangan hini nga artikulo.)

¹⁸ Karuyag han Dios nga ‘pangitaon naton an maopay,’ ‘higugmaon an maopay,’ ngan “buhaton an maopay” basi “malooy” hiya ha aton. (Amos 5:14, 15; Maopay nga Sumat; 1 Ped. 3:11, 12) Nakikita ni Jehova an mga matadong ngan iya hira ginbibendisyonan. (Sal. 34:15) Tagda pananglitan an Hebreohanon nga mga partera nga hira Sipra ngan Pua. Han an Israel uripon ha Ehipto, inin duha nga babaye nahadlok ha Dios kay ha kan Paraon, nga nagsugo ha ira nga patayon an ngatanan nga igin-aanak nga bata nga lalaki nga Hebreohanon. Matin-aw nga an ira kahadlok ha Dios nagpagios ha ira nga diri patayon an mga minasus-an. Ha urhi, ginbendisyonan hira ni Jehova hin ira kalugaringon nga pamilya. (Eks. 1:15-17, 20, 21) An ira maopay nga buhat nakita gud ni Jehova. Usahay bangin inaabat naton nga diri nakikita han iba an aton maopay nga ginbubuhat. Kondi nakikita ito ni Jehova. Nakikita niya an ngatanan nga maopay nga ginbubuhat naton, ngan iya kita babalosan.—Mat. 6:4, 6; 1 Tim. 5:25; Heb. 6:10.

19. Paonan-o napamatud-an han usa nga sister nga nakikita ni Jehova an iya maopay nga ginbubuhat?

¹⁹ Pananglitan, napamatud-an han usa nga sister ha Austria nga nakikita han Dios an iya mga pangalimbasog. Tungod kay maaram hiya magyakan hin Hungarian, gintagan hiya hin adres hin usa nga nagyayakan hin Hungarian basi bisitahon niya ito. Ginkadto dayon niya ito pero waray tawo an balay. Kondi padayon hiya nga nagbinalikbalik. May mga panahon nga naobserbaran niya nga baga hin may tawo an balay pero waray la nabaton. Nagbilin hiya hin literatura, surat, iya adres, ngan iba pa. Paglabay hin usa ngan tunga ka tuig nga iya pagbinalik-balik hito nga balay, may nag-abri gihapon ha iya! Usa nga makisangkayon nga babaye an gumawas, ngan nagsiring: “Alayon pagsulod. Nabasa ko an ngatanan nga imo iginbilin ngan naghinulat ako ha imo.” An tagbalay nagpapa-chemotheraphy ngay-an ngan nadiri makig-istorya ha mga tawo. Natikangan an pag-aram ha Biblia. Oo, ginbendisyonan han Dios an maduruto nga pangalimbasog han sister!

20. Ano an sadang mo hunahunaon mahitungod han mahigugmaon nga pagbantay ha imo ni Jehova?

²⁰ Nakikita ni Jehova an bisan ano nga imo ginbubuhat ngan ha urhi bibendisyonan ka niya. Diri naton hunahunaon nga ginbabantayan kita han Dios basi la makita niya an aton mga sayop sugad han ginhihimo han surveillance camera. Lugod, hinaot abaton mo nga nagigin mas duok ka ha mahigugmaon nga Dios nga interesado gud han imo kaopayan!