1, 2. (a) Ano nga desisyon an ginhimo ni Moises han 40 anyos na hiya? (Kitaa an retrato hini nga pahina.) (b) Kay ano nga ginpili ni Moises nga maltratuhon hiya kaupod han katawohan han Dios?

MAARAM hi Moises kon ano an iya magigin kabubuwason ha Ehipto. Nakita niya an dagku ngan mag-opay nga balay han mga riko. Membro hiya han panimalay han hadi. ‘Gintutdoan hiya han ngatanan nga kinaadman han mga Ehiptohanon,’ posible nga upod hito an arts, astronomiya, matematika, ngan iba pa nga may kalabotan ha syensya. (Buh. 7:22) Masayon gud la para ha iya nga magkaada hin awtoridad, damu nga bahandi, ngan pribilehiyo nga imposible magkaada an ordinaryo nga Ehiptohanon!

² Kondi han 40 anyos na hi Moises, naghimo hiya hin desisyon nga sigurado nga waray gud masabti han pamilya ni Paraon nga nag-ampon ha iya. Ginpili niya an mas ubos pa kay ha “normal” nga pagkinabuhi han ordinaryo nga Ehiptohanon. Ginpili niya nga magkinabuhi kaupod han mga uripon! Kay ano? Tungod kay may pagtoo hiya. (Basaha an Hebreo 11:24-26.) Pinaagi han pagtoo, nakita niya diri la an pisikal nga mga butang nga nakapalibot ha iya. Sugad nga espirituwal nga tawo, may pagtoo hiya ha “Dios nga diri-nakikita,” hi Jehova, ngan ha katuman han Iya mga saad.—Heb. 11:27.

3. Ano an tulo nga pakiana nga hihisgotan hini nga artikulo?

³ Kinahanglan liwat naton makita an mga butang nga diri nakikita han aton mga mata. Kinahanglan kita an “klase nga may pagtoo.” (Heb. 10:38, 39) Basi maparig-on an aton pagtoo, usisahon naton an asoy mahitungod kan Moises nga mababasa ha Hebreo 11:24-26. Samtang ginbubuhat  naton ito, batona an masunod: Paonan-o an pagtoo nakabulig kan Moises basi isalikway an unudnon nga mga hingyap? Han gin-insulto hiya, paonan-o an pagtoo nakabulig ha iya basi pabilhan an iya mga pribilehiyo ha pag-alagad? Ngan kay ano nga ‘nagpokus hiya ha pagkarawat han premyo’?

4. Ano an nasabtan ni Moises mahitungod han “kalipayan han sala”?

⁴ Pinaagi han mata han pagtoo, nasabtan ni Moises nga temporaryo la an “kalipayan han sala.” Bangin nangatadongan an iba nga bisan kon kalyap gud ha Ehipto an idolatriya ngan espiritismo, pero nagin gamhanan ito nga nasud ha kalibotan, samtang an katawohan ni Jehova nag-aantos ha pagkauripon! Pero maaram hi Moises nga kaya bag-uhon han Dios an mga butang. Bisan kon baga hin naglalampos adton nagpapatagbaw ha ira kalugaringon, natoo hi Moises nga bubungkagon ito nga mga magraot. Salit waray hiya masulay han “temporaryo nga kalipayan han sala.”

5. Ano an mabulig ha aton nga maatohan an “temporaryo nga kalipayan han sala”?

⁵ Paonan-o mo maaatohan an “temporaryo nga kalipayan han sala”? Ayaw gud hingalimti nga madaliay la an kalipay nga iginhahatag han sala. Pinaagi han mata han pagtoo, makikita mo nga “an kalibotan mawawara pati an mga hingyap hito.” (1 Juan 2:15-17) Pamalandonga an magigin tidaraon hadton diri mabinasulon . Aada hira ha “madalunot nga dalan, . . . makangingirhat an ira kataposan.” (Sal. 73:18, 19, Maopay nga Sumat) Kon nasusulay ka ha pagbuhat hin sala, pakianhi an imo kalugaringon, ‘Ano an karuyag ko nga magin kabubuwason ko?’

6. (a) Kay ano nga nagdumiri hi Moises nga “tawagon nga anak han kan Paraon anak nga babaye”? (b) Kay ano nga makakasiring ka nga husto an nagin desisyon ni Moises?

⁶ An pagtoo ni Moises naggiya liwat ha iya ha pagpili hin karera. “Tungod han pagtoo ni Moises, han daku na hiya diniri hiya nga tawagon nga anak han kan Paraon anak nga babaye.” (Heb. 11:24) Waray hiya mangatadongan nga puydi man hiya mag-alagad ha Dios bisan kon hitaas an iya posisyon ha palasyo han hadi, ngan puydi pa ngani niya gamiton an iya karikohan ngan awtoridad basi buligan an iya kabugtoan nga mga Israelita. Lugod determinado hiya nga higugmaon hi Jehova ha iya bug-os nga kasingkasing, kalag, ngan kusog. (Deut. 6:5) An iya mga desisyon nakabulig ha iya nga matalwas tikang ha duro nga pag-antos. Damu nga mga bahandi ha Ehipto nga iya ginbayaan an ginkuha han mga Israelita mismo! (Eks. 12:35, 36) Hi Paraon naalohan ngan namatay. (Sal. 136:15) Ha luyo nga bahin, natalwas hi Moises ngan gin-gamit hiya han Dios basi pangunahan ngan talwason an bug-os nga nasud han Israel. Nagin malampuson gud an iya kinabuhi.

7. (a) Sumala ha Mateo 6:19-21, kay ano nga sadang kita magplano para ha waray kataposan nga kabubuwason? (b) Isaysay an usa nga eksperyensya nga nagpapakita han kaibahan han materyal ngan espirituwal nga mga bahandi.

⁷ Kon usa ka nga batan-on nga surugoon ni Jehova, paonan-o an pagtoo makakabulig ha imo ha pagpili hin propesyon? Maaramon ka kon magpaplano ka para ha imo kabubuwason. Pero an pagtoo ba ha mga saad han Dios magpapagios ha imo nga ‘magtirok,’ o magplano para ha waray kataposan nga kabubuwason imbes nga ha temporaryo la nga kabubuwason? (Basaha an Mateo 6:19-21.) Ini nga pakiana an ginpamalandong ni Sophie, usa nga eksperto nga ballet dancer. Gintanyagan hiya nga magin eskolar ngan magkaada hin maopay nga posisyon ha mga kompanya hin ballet ha iba-iba nga lugar ha United States. “Makalilipay gud kon gindadayaw ka. Ha pagkamatuod, inabat ko nga mas maopay ako sumayaw kay ha akon mga kaupod,” siring niya. “Pero diri ako tinuod nga malipayon.” Katapos nagkita hiya han video nga Young People Ask—What Will I Do With My Life? “Nasantop ko nga nagin malampuson ako hini nga kalibotan ngan gindayaw ako han mga tawo pero an kabalyo hito amo an akon bug-os kasingkasing nga pagsingba kan Jehova,” siring niya. “Sinsero gud ako nga nag-inampo. Katapos, ginbayaan ko an akon propesyon.” Ano an iya gin-abat ha iya desisyon? “Diri gud ako nanganganugon han akon kinabuhi hadto. Yana, bug-os gud ako nga malipayon. Payunir kami nga mag-asawa. Bisan kon diri kami sikat ngan diri kami riko, pero kaupod namon hi Jehova, may mga Bible study kami, ngan may espirituwal nga mga tumong. Waray gud ako ginbabasolan.”

8. Ano nga sagdon ha Biblia an mabulig ha usa nga batan-on ha pagdesisyon kon ano an iya bubuhaton ha iya kinabuhi?

 ⁸ Maaram hi Jehova kon ano an gimaopayi para ha imo. Hi Moises nagsiring: “Ano la an pinangangaro ni Jehova nga imo Dios ha imo, kon diri an kahadlok kan Jehova nga imo Dios, paglakat ha ngatanan niya nga dalan, ngan paghigugma ha iya, ngan pag-alagad kan Jehova nga imo Dios ha bug-os mo nga kasingkasing, ngan ha bug-os mo nga kalag. Pagbantay han mga sugo ni Jehova ngan han iya mga kasugoan nga akon iginsusugo ha imo hini nga adlaw para ha imo kaopayan?” (Deut. 10:12, 13) Samtang batan-on ka pa, pilia an propesyon nga mabulig ha imo nga higugmaon hi Jehova ngan mag-alagad ha iya “ha bug-os mo nga kasingkasing, ngan ha bug-os mo nga kalag.” Makakasarig ka nga ito nga desisyon “para ha imo kaopayan.”

9. Isaysay kon kay ano nga bangin makuri para kan Moises an pagtuman han iya toka.

⁹ “An kaarawdan han Kristo ginhunahuna [ni Moises] nga karikohan nga mas labaw kay han mga bahandi ha Ehipto.” (Heb. 11:26) Gintawag hi Moises sugad nga an “Kristo,” o “Usa nga Pinili,” karuyag sidngon ginpili hiya ni Jehova basi manguna ha Israel paggawas ha Ehipto. Maaram hi Moises nga diri masayon an pagtuman hini, bangin makaeksperyensya pa ngani hiya hin “kaarawdan.” Antes pa hito, gin-insulto hiya hin usa nga Israelita: “Hin-o an naghimo ha imo nga prinsipe ngan maghuhukom ha amon?” (Eks. 2:13, 14) Ha urhi, hi Moises mismo nagpakiana kan Jehova: “Oonanhon man an kan Paraon pamati ha akon?” (Eks. 6:12) Basi makaandam ha pagkontra, igin-ampo ni Moises kan Jehova an iya kahadlok ngan mga kabaraka. Paonan-o hiya ginbuligan ni Jehova basi matuman an iya makuri nga toka?

10. Paonan-o ginbuligan ni Jehova hi Moises basi matuman an iya toka?

¹⁰ Siyahan, ginpasarig ni Jehova hi Moises: “Ha pagkamatuod ako maupod ha imo.” (Eks. 3:12) Ikaduha, ginparig-on hiya ni Jehova pinaagi ha pagsaysay han usa nga bahin han kahulogan han Iya ngaran: “Ako Amo Ako,” o ako magigin sugad ha bisan ano nga karuyag ko magin sugad. * (Eks. 3:14) Ikatulo, gintagan hiya ni Jehova hin urusahon nga gahum nga nagpapamatuod nga ginsugo hiya han Dios. (Eks. 4:2-5) Ikaupat, gintagan hiya ni Jehova hin kaupod ngan tagapagyakan, hi Aaron, basi buligan hiya nga matuman an iya toka. (Eks. 4:14-16) Han hirani na mamatay hi Moises, kombinsido gud hiya nga ginbubuligan han Dios an Iya mga surugoon basi matuman an anoman nga toka nga Iya iginhahatag ha ira, salit may pagsarig nga nakagsiring hiya kan Josue nga sumaliwan ha iya: “Hi Jehova, amo hiya an mag-uuna ha imo: maupod hiya ha imo, diri ka niya kakawangon, diri ka man liwat niya tatalikdan: ayaw kahadlok ngan ayaw kahulop.”—Deut. 31:8.

11. Kay ano nga ginpabilhan gud ni Moises an iya toka?

¹¹ Pinaagi han bulig ni Jehova, ginpabilhan gud ni Moises an iya makuri nga toka, gintagad niya ito nga “mas labaw kay han mga bahandi ha Ehipto.” Kay kon huhunahunaon, ano ba an bili han pag-alagad kan Paraon kon ikompara ha pag-alagad ha Dios nga Makagarahum-ha-ngatanan? Ano an kapulsanan han pagin prinsipe ha Ehipto kon itanding ha pagin an “Kristo,” o pagin dinihogan ni Jehova? Hi Moises ginbalosan tungod kay ginpabilhan niya an espirituwal nga mga butang. Nagkaada hiya duok nga relasyon kan Jehova, nga naghatag ha iya hin urusahon nga gahum samtang ginpapangunahan niya an mga Israelita ngadto ha Tuna nga Iginsaad.—Deut. 34:10-12.

12. Ano nga mga pribilehiyo tikang kan Jehova an sadang naton pabilhan?

¹² May-ada liwat kita toka. Pinaagi han iya Anak, gintagan kita ni Jehova hin sagrado nga buruhaton, sugad han iya iginhatag kan apostol Pablo ngan ha iba pa. (Basaha an 1 Timoteo 1:12-14.) Kita ngatanan may pribilehiyo nga ipasamwak an maopay nga sumat. (Mat. 24:14; 28:19, 20) An pipira nag-aalagad sugad nga bug-os panahon nga mga ministro. An bawtismado ngan hamtong nga kalalakin-an nag-aalagad ha kongregasyon sugad nga mga ministeryal ngan tigurang. Kondi bangin  pagruhaduhaan han imo diri-tumuroo nga mga kapamilya ngan han iba pa an kapulsanan hini nga mga pribilehiyo o bangin tamayon pa ngani an imo mga pagsakripisyo. (Mat. 10:34-37) Kon magpapaapekto ka hito, bangin magtikang ka maghunahuna kon mapulsanon ba an imo mga pagsakripisyo o kon matutuman mo gud ba an imo toka. Kon mahitabo ini, paonan-o an pagtoo makakabulig ha imo basi makapadayon?

13. Paonan-o kita ginbubuligan ni Jehova basi matuman an aton mga toka?

¹³ Pag-ampo kan Jehova ngan sarig nga bubuligan ka niya. Isumat ha iya an imo mga kahadlok ngan kabaraka. Kay baman, hi Jehova an naghatag ha imo hin toka, ngan bubuligan ka niya basi maglampos. Paonan-o? Pariho han iya pagbulig kan Moises. Siyahan, hi Jehova nagpapasarig ha imo: “Ako magpaparig-on ha imo; oo, ako mabulig ha imo; oo akon ka aagang-agangon pinaagi han too nga kamot han akon pagkamatadong.” (Isa. 41:10) Ikaduha, ginpapahinumdoman ka niya nga masasarigan an iya mga saad: “Akon iginyakan, akon liwat ini hihimoon; akon ginhunahuna, akon liwat ini bubuhaton.” (Isa. 46:11) Ikatulo, gintatagan ka niya hin “diri-ordinaryo nga gahum” basi matuman an imo ministeryo. (2 Cor. 4:7) Ikaupat, basi makapadayon ka ha imo toka, an aton mahigugmaon nga Amay nagtatagana hin bug-os kalibotan nga pagminagburugto han tinuod nga mga magsiringba nga ‘padayon nga nagdidinasigay ngan nagpaparig-onay.’ (1 Tes. 5:11) Samtang ginbubuligan ka ni Jehova ha pagtuman han imo mga toka, magririg-on an imo pagtoo ha iya ngan mapapabilhan mo nga an imo mga pribilehiyo ha pag-alagad ha iya mga karikohan nga mas labaw pa kay han anoman nga bahandi ha tuna.

14. Kay ano nga sigurado hi Moises nga makakarawat niya an premyo?

¹⁴ Hi Moises ‘nagpokus ha pagkarawat han premyo.’ (Heb. 11:26) Bisan kon limitado la an iya hinbabaroan mahitungod ha tidaraon, gin-gamit niya ito basi maggiya ha iya mga desisyon. Pariho han iya kaapoy-apoyan nga hi Abraham, nasarig hiya nga kaya banhawon ni Jehova an mga patay. (Luc. 20:37, 38; Heb. 11:17-19) An paglaom ha tidaraon nga mga bendisyon nakabulig kan Moises nga diri hunahunaon an iya 40 ka tuig nga pagin puga ngan an iya 40 ka tuig ha kamingawan sugad nga pagkarag la han iya kinabuhi. Bisan kon diri hiya maaram han ngatanan nga detalye kon paonan-o matutuman an mga saad han Dios, nakita han iya mata han pagtoo an diri nakikita nga premyo.

15, 16. (a) Kay ano nga kinahanglan kita magpokus ha aton premyo? (b) Ano nga mga bendisyon ilarom han pagmando han Ginhadian an ginpapamulat mo gud?

¹⁵ Nakapokus ka ba ha pagkarawat han imo  premyo? Pariho kan Moises, diri gihapon kita maaram han ngatanan nga detalye may kalabotan han mga saad han Dios. Pananglitan, ‘diri kita maaram kon san-o an itinanda nga panahon’ han daku nga kasakitan. (Mar. 13:32, 33) Pero kon ikompara kan Moises, mas damu an aton hinbabaroan may kalabotan ha tiarabot nga Paraiso. Bisan kon diri kita maaram han ngatanan nga detalye, may igo kita nga kahibaro ha mga saad han Dios mahitungod han aton magigin kinabuhi ilarom han Ginhadian han Dios nga “nakapokus” kita dida hito. Kon matin-aw ha aton hunahuna an bag-o nga kalibotan, magpapagios ito ha aton nga unahon an pagpamiling han Ginhadian. Paonan-o? Hunahunaa ini: Mapalit ka ba hin balay bisan kon gutiay gud la an imo hinbabaroan mahitungod hito? Syempre diri! Ha pariho nga paagi, diri naton gagamiton an aton kinabuhi ha pagkab-ot hin diri sigurado nga paglaom. An pagtoo mabulig gud ha aton nga makita hin matin-aw an aton magigin kinabuhi ilarom han pagmando han Ginhadian.

¹⁶ Basi magin matin-aw ha imo hunahuna an kahimtang ha Ginhadian han Dios, ‘pagpokus’ ha imo magigin kinabuhi ha Paraiso. Gamita an imo imahinasyon. Pananglitan, kon gin-aadman mo an kinabuhi han mga tawohan ha Biblia nga nabuhi antes han panahon ni Jesus, hunahunaa kon ano an mahimo mo igpakiana ha ira kon mabanhaw na hira. Hunahunaa kon ano an bangin ipakiana nira ha imo mahitungod han imo kinabuhi durante han kataposan nga mga adlaw. Handurawa an kalipay nga maieksperyensyahan mo kon makilala mo an imo mga kaapoy-apoyan nga nabuhi ginatos ka tuig na an naglabay ngan maisumat mo an ngatanan nga ginhimo han Dios para ha ira. Handurawa an imo kalipay samtang gin-aadman mo an mahitungod han damu nga ihalas nga mananap pinaagi ha pag-obserbar ha ira ha mamurayawon nga palibot. Handurawa kon mationan-o ka magigin mas duok kan Jehova samtang nagtitikahingpit ka.

17. Kon matin-aw ha aton hunahuna an aton diri nakikita nga premyo, paonan-o ito makakabulig ha aton?

¹⁷ Kon matin-aw ha aton hunahuna an aton diri nakikita nga premyo mabulig ini ha aton nga makagpadayon, magin malipayon, ngan makahimo hin mga desisyon nga nagpapakita nga may sigurado kita nga paglaom nga mabuhi ha waray kataposan. Hi Pablo nagsurat ha dinihogan nga mga Kristiano: “Kon diri pa naton nakikita an aton ginlalaoman, mapailubon nga ginpapamulat gud naton ito.” (Roma 8:25) Ito nga prinsipyo aplikado liwat ha ngatanan nga Kristiano nga may paglaom nga mabuhi ha waray kataposan. Bisan kon waray pa naton makarawat an aton premyo, marig-on gud an aton pagtoo salit padayon kita nga naghuhulat hin mapailubon basi ‘makarawat an premyo.’ Pariho kan Moises, diri naton ginhuhunahuna nga karag la an mga tuig nga aton gin-gamit ha pag-alagad kan Jehova. Lugod, kombinsido kita nga “an mga butang nga nakikita temporaryo la, pero an mga butang nga diri-nakikita waray kataposan.”—Basaha an 2 Corinto 4:16-18.

18, 19. (a) Kay ano nga kinahanglan mangalimbasog gud kita basi matipigan an aton pagtoo? (b) Ano an aton hihisgotan ha sunod nga artikulo?

¹⁸ An pagtoo nabulig ha aton nga masabtan “an ebidensya nga totoo an gintotoohan bisan kon diri nakikita.” (Heb. 11:1) An usa nga pisikal nga tawo diri nakakakita han pagkaimportante han pag-alagad kan Jehova. Para ha iya, “kalurongan” an espirituwal nga mga bahandi. (1 Cor. 2:14) Kondi kita, naglalaom nga mabuhi ha waray kataposan ngan makita an pagbanhaw ha mga tawo, mga butang nga ginhuhunahuna han kalibotan nga imposible gud mahitabo. Pariho han mga pilosopo ha panahon ni Pablo nga nagtawag ha iya nga waray hibabroan nga “turaban,” ginhuhunahuna han kadam-an nga tawo yana nga waray pulos an paglaom nga aton iginsasangyaw.—Buh. 17:18.

¹⁹ Tungod kay napapalibotan kita hin mga tawo nga waray pagtoo, kinahanglan mangalimbasog gud kita basi matipigan an aton pagtoo. Pangamuyo kan Jehova nga “diri magluya an imo pagtoo.” (Luc. 22:32) Pariho kan Moises, pirme hunahunaa an magigin resulta han pagbuhat hin sala, an pagin birilhon gud han pag-alagad kan Jehova, ngan an imo paglaom nga kinabuhi nga waray kataposan. Oo, pinaagi han pagtoo ni Moises nakita niya an mga butang nga waray makita han iya mga mata. Hihisgotan naton ha sunod nga artikulo kon paonan-o an pagtoo nakabulig kan Moises nga makita “an Dios nga diri-nakikita.”—Heb. 11:27.