Ha usa nga kanta nga nagdadayaw ha Maglalarang, hi Hadi David ha kadaan nga Israel nagkanta: “Nalilipay ako hin pagsugot han imo kaburut-on, Oh Dios nakon; Ngan an imo balaud aadi ha sakob han akon kasingkasing.” (Sal. 40:8) Bisan pa han kakurian ngan mga problema, nalipay gud hi David ha pagbuhat han kaburut-on han Dios. Syempre, diri la hiya an magsiringba ni Jehova nga nalipay ha pag-alagad ha tinuod nga Dios.

Ha pag-aplikar han mga pulong ha Salmo 40:8 ha Mesias, o Kristo, hi apostol Pablo nagsurat: “Pagkanhi han Kristo ha kalibotan nagsiring hiya: ‘“Waray ka maruyag han halad nga hayop ngan iba pa nga halad, pero nag-andam ka hin lawas para ha akon. Waray ka malipay ha bug-os nga mga halad nga sinunog ngan ha halad para ha sala.” Nagsiring liwat ako, “Kitaa! Kinanhi ako (ha usa nga bahin han libro ini an iginsurat mahitungod ha akon) basi magbuhat han imo kaburut-on, O Dios.”’”​—Heb. 10:5-7.

Han nakanhi hi Jesus ha tuna, nalipay hiya ha pag-obserbar ha mga linarang, pakig-upod ha kasangkayan, ngan pakigturotarampo ha iba ha pangaon. (Mat. 6:26-29; Juan 2:1, 2; 12:1, 2) Kondi an pinakaimportante ha iya ngan naghatag hin daku nga kalipay amo an pagbuhat han kaburut-on han iya langitnon nga Amay. Ha pagkamatuod, hiya nagsiring: “An akon pagkaon amo an pagbuhat han kaburut-on han nagsugo ha akon ngan paghuman han iya buruhaton.” (Juan 4:34; 6:38) Tikang ha ira Agaron nga hi Jesus, an iya mga disipulo nahibaro han sekreto han tinuod nga kalipay. Andam ngan disidido hira nga isangyaw an mensahe han Ginhadian nga may daku nga kalipay.​—Luc. 10:1, 8, 9, 17.

Ginsugo ni Jesus an iya mga sumurunod: “Kadto kamo ha mga tawo han ngatanan nga nasud ngan tutdui hira basi magin akon mga disipulo, bawtismuhi hira ha ngaran han Amay ngan han Anak ngan han baraan nga espiritu, tutdui hira ha pagtuman han ngatanan nga akon iginsugo ha iyo. Ngan hinumdumi niyo  nga kaupod niyo ako ha ngatanan nga adlaw tubtob ha ikatarapos hini nga sistema.” (Mat. 28:19, 20) An pagtuman hini nga sugo nag-uupod han pagsangyaw ha mga tawo diin man hira mabibilngan, pagbalik-bisita ha mga interesado, ngan pagdumara ha ira hin mga pag-aram ha Biblia. An pagbuhat hini magriresulta hin daku nga kalipay.

Magpakita man hin interes an mga tawo ha aton mensahe o diri, importante an aton disposisyon basi magin malipayon ha ministeryo. Kay ano nga padayon kita nga nagsasangyaw han maopay nga sumat bisan pa han pagbalewaray o kawaray-interes? Tungod kay maaram kita nga pinaagi han aton pagsangyaw mahitungod han Ginhadian ngan panhimo hin disipulo naipapakita naton an aton gugma ha Dios ngan ha aton igkasi-tawo. Oo, namimeligro gud an kinabuhi naton ngan han aton mga igkasi-tawo. (Esek. 3:17-21; 1 Tim. 4:16) Aton hisgotan an pipira nga punto nga nakabulig ha damu nga kabugtoan nga magpabilin o mahibalik-utro an ira kadasig ha ministeryo bisan pa ha makuri nga mga teritoryo.

An paggamit hin angayan nga mga pakiana ha aton ministeryo agsob nga may mag-opay nga resulta. Usa ka aga, may nakita hi Amalia ha parke nga usa nga lalaki nga nagbabasa hin dyaryo. Gindaop niya ito ngan ginpakianhan kon may nabasa ba ito nga maopay nga sumat. Han bumaton ito nga waray, hi Amalia nagsiring, “May-ada ako maopay nga sumat ha imo mahitungod han Ginhadian han Dios.” Nainteres hito an lalaki, ngan naruyag mag-Bible study. Ngani, tulo nga Bible study an natikangan ni Amalia hito nga parke.

Ginhimo ni Janice nga teritoryo an iya gintatrabahoan. Han nagpakita hin interes an usa nga gwardya ngan an katrabaho hito ha usa nga artikulo ha Barantayan, nagsiring hiya nga regular nga dadad-an niya hira hin mga magasin. Ito liwat an iya ginbuhat ha usa pa niya nga katrabaho, nga nainteres tungod han iba-iba nga topiko nga ginhihisgotan ha Barantayan ngan Pagpamata! Tungod hito, usa pa nga iya katrabaho an umaro hin mga magasin. “Bendisyon gud ini tikang kan Jehova!” siring ni Janice. Umabot hin 11 an regular nga gintatagan niya hin magasin ha iya trabaho.

Usa nga nagbibiyahe nga paramangno an nagsiring nga ha pagsangyaw ha balay-balay, diri sadang tapuson han mga magwarali an ira pakiistorya pinaagi ha pagsiring la nga mabalik hira ha iba nga adlaw. Lugod, mahimo nira pakianhan an tagbalay: “Karuyag mo ba ipakita ko ha imo kon paonan-o ginhihimo an pag-aram ha Biblia?” o, “Ano nga adlaw ngan oras karuyag mo nga bumalik ako basi ipadayon naton an paghisgot?” An nagbibiyahe nga paramangno nagsiring nga pinaagi hini, an mga kabugtoan ha usa nga kongregasyon nga iya ginbisita nakagtikang hin 44 nga Bible study ha usa ka semana.

Epektibo an pagbalik-bisita dayon bisan paglabay pa la hin pipira ka adlaw tikang han siyahan nga pagbisita. Kay ano? Tungod kay nagpapakita ito nga interesado gud kita nga buligan an sinsero nga mga tawo nga masabtan an Biblia. Han ginpakianhan an usa nga babaye kon kay ano nga nag-Bible study hiya upod han mga Saksi ni Jehova, hiya nagsiring: “Nag-aram ako tungod  kay nagpakita hira ha akon hin sinsero nga interes ngan gugma.”

Waray pag-iha katapos umiskwela ha Pioneer Service School, hi Madaí nakagdumara hin 15 nga Bible study ngan nakaghatag hin sobra 5 pa nga Bible study ha iba nga magwarali. An pipira han iya Bible study regular na nga natambong ha aton mga katirok. Ano an nakabulig kan Madaí nga makagtikang hin damu nga pag-aram ha Biblia? Hinbaroan niya ha eskwelahan nga kinahanglan niya padayon nga bumalik tubtob nga makaistorya niya utro adton nagpakita hin interes. Usa pa nga Saksi nga nakabulig ha damu nga mahibaro han kamatuoran ha Biblia an nagsiring, “Hinbaroan ko nga importante an pagin mapinadayunon ha pagbalik-bisita basi mabuligan an mga tawo nga karuyag makilala hi Jehova.”

Ginkikinahanglan an maduruto nga pangalimbasog ha pagbalik-bisita ngan pagdumara hin mga pag-aram ha Biblia. Kondi bawi gud ito tungod han damu nga bendisyon. Kon bug-os nga makikigbahin kita ha pagsangyaw mahitungod han Ginhadian, mabubuligan naton an iba nga “magkaada husto nga kahibaro ha kamatuoran,” salit matatalwas hira. (1 Tim. 2:3, 4) Maieksperyensyahan liwat naton an katagbaw ngan duro nga kalipay.