TUIG hadto han 1923. Puno hin mga tawo an concert hall han Drama and Music Conservatory ha São Paulo! Nagpapahayag didto hi George Young ngan iginhuhubad ito ha Portuguese. Atentibo gud nga namamati an ngatanan nga 585 nga natambong. Iginpapakita ha iskren an mga teksto ha Biblia ha Portuguese. Ha pangataposan nga bahin han pahayag, iginpanhatag an usa ka gatos nga kopya han bokleta nga Millions Now Living Will Never Die! ha Portuguese, English, German, ngan Italian. Malampuson gud an pahayag! Nagsarang an sumat mahitungod hito nga panhitabo. Paglabay hin duha ka gab-i, napuno na liwat hin mga tawo an concert hall para hin iba pa nga pahayag. Kondi kay ano nga nahitabo ito?

Han 1867, hi Sarah Bellona Ferguson ngan an iya pamilya nga tikang ha United States bumalhin ha Brazil. Han 1899, nasantop ni Sarah nga nabilngan niya an kamatuoran katapos niya mabasa an pipira nga literatura nga basado ha Biblia nga gindara ha Brazil han iya manghod nga lalaki nga tikang ha United States. Tungod kay mahilig hiya magbasa, kinuha hiya hin subskripsyon han magasin nga Watch Tower ha English. Nalipay hiya ha mensahe han Biblia, salit nagsurat hiya kan Brother C. T. Russell. Nagsiring hiya nga usa hiya nga “buhi nga pamatuod nga maaabot an usa nga tawo mationan-o man hiya kahirayo.”

Ginbuhat ni Sarah Ferguson an ngatanan niya nga mahihimo basi isumat ha iba an kamatuoran ha Biblia, kondi agsob niya mahunahuna kon may-ada pa ba makakabulig ha iya ngan ha iya pamilya, pati ha mag-opay nga tawo ha Brazil. Han 1912, ginsidngan hiya han Brooklyn Bethel nga may makada ha São Paulo nga may dara nga yinukot nga tract nga may ulohan nga Where Are the Dead? ha Portuguese nga yinaknan. Han 1915, nagsiring hiya nga nahipausa hiya han mahibaroan niya nga damu nga Estudyante han Biblia an naglalaom nga diri na mag-iiha masaka na hira ha langit. Ha pagpahayag han iya panhunahuna, hiya nagsurat: “Ano man an mahitatabo ha Brazil ngan ha bug-os nga South America? . . . Kon huhunahunaon mo kon mationan-o kahiluag  an bahin han South America ha kalibotan, matin-aw nga damu pa gud an buruhaton ha pag-ani.” Oo, damu pa hinduro an buruhaton ha pag-ani!

Han mga 1920, walo nga batan-on nga tripulante nga tikang ha Brazil an tinambong ha pipira nga katirok ha kongregasyon ha New York City samtang gin-aayad an ira barko nga pan-girra. Pagbalik nira ha Rio de Janeiro, iginsumat nira ha iba an bag-o nga paglaom nga ira hinbaroan ha Biblia. Waray pag-iha katapos hito, han Marso 1923, hi George Young, nga usa nga pilgrim, o nagbibiyahe nga paramangno, inabot ha Rio de Janeiro, diin may nabilngan hiya didto nga mga interesado. Naghimo hiya hin paagi basi maihubad ha Portuguese an pipira nga publikasyon. Katapos nagbiyahe hiya ngadto ha São Paulo, usa nga syudad nga hadto may mga 600,000 nga umurukoy. Nagpahayag hiya didto ngan nanhatag hin bokleta nga Millions, sugad han gin-unabi ha tinikangan hini nga artikulo. “Tungod kay usa la ako,” siring niya “kinahanglan ko magpaanunsyo ha dyaryo.” Hiya nagdugang, ini “an siyahan nga pahayag publiko nga igin-anunsyo ngan ginsuportaran han I.B.S.A. ha Brazil.” *

Ha usa nga report ha Brazil, an Disyembre 15, 1923 nga Watch Tower nagsiring: “Kon aton huhunahunaon nga an buruhaton didto nagtikang han Hunyo 1 ngan waray pa literatura hito nga panahon, makatirigamnan gud kon paonan-o ginbendisyonan han Ginoo an buruhaton.” An report padayon nga nagsiring nga an mga pahayag ni Brother Young ha São Paulo duha la ha 21 nga iginpahayag niya tikang han Hunyo 1 tubtob Septyembre 30, nga 3,600 an kabug-osan nga tinambong hito. Ha Rio de Janeiro, an mensahe han Ginhadian hinay-hinay nga nagsarang. Ngan ha pipira la ka bulan, sobra 7,000 han aton mga publikasyon ha Portuguese an naipanaltag! Dugang pa, iginpublikar an siyahan nga gowa han The Watch Tower ha Portuguese ha isyu han Nobyembre-Disyembre 1923.

Binisita hi George Young kan Sarah Ferguson, ngan an The Watch Tower nagsiring: “An sister kinadto ha sala, ngan waray anay hiya makayakan. Samtang iya ginkakaptan an kamot ni Brother Young, ngan iya ginkikita an nawong hito, ha urhi hiya nagsiring: ‘Tinuod gud ba nga usa ka nga Pilgrim?’” Waray pag-iha, nabawtismohan hiya pati an pipira niya nga anak. Ha pagkamatuod, 25 ka tuig nga naghinulat hiya basi mabawtismohan! Gin-unabi han Agosto 1, 1924, nga Watch Tower nga 50 an nabawtismohan ha Brazil, nga an kadam-an hito ha Rio de Janeiro.

Yana, mga sobra 90 ka tuig na an naglabay, diri na kita kinahanglan magpakiana: “Ano man an mahitatabo ha Brazil ngan ha bug-os nga South America?” Sobra 760,000 na nga Saksi ni Jehova an nagsasangyaw han maopay nga sumat ha Brazil. Ngan ha bug-os nga South America an mensahe han Ginhadian iginsasangyaw na ha mga yinaknan nga Portuguese, Spanish, ngan ha damu nga nitibo nga pinulongan. Han 1915, husto an ginsiring ni Sarah Ferguson, “Damu pa gud an buruhaton ha pag-ani.”—Tikang ha aton daan nga mga koleksyon ha Brazil.