HA PAGKAMATUOD, waray ako masubo bisan kon gutiay la an tinambong hito nga akon pahayag han 1957, tungod kay awdanon gud ako. Ngani han bata pa ako natago ako kon may nabisita ha balay, bisan kon kakilala ko hira.

Salit bangin mahipausa ka gud nga kadam-an han akon toka ha organisasyon ni Jehova nagkinahanglan nga makig-upod ako ha damu nga tawo​—mga kasangkayan ngan diri mga kakilala. Kinahanglan ko padayon nga mangalimbasog nga malamposan an akon pagin awdanon ngan kawaray-pagsarig ha kalugaringon, salit waray ko gud angay ighambog ha bisan ano nga kalamposan hini nga akon mga toka. Lugod, napamatud-an ko nga tinuod ini nga saad ni Jehova: “Ako magpaparig-on ha imo; oo, ako mabulig ha imo; oo akon ka aagang-agangon pinaagi han too nga kamot han akon pagkamatadong.” (Isa. 41:10) An kasagaran nga ginagamit ni Jehova ha pagbulig ha akon amo an Kristiano nga kabugtoan. Tuguti ako nga ig-istorya ha iyo an pipira hito, tikang han bata pa ako.

Usa ka masirak nga aga han Domingo han dekada 1940, ginbisita kami ni Elsie Huntingford ha amon uma ha sur-weste han Ontario. Tungod kay awdanon hi Tatay pariho ha akon, hi Nanay an nag-abri han purtahan  ngan nakiistorya ha iya samtang kami ni Tatay nakadto la ha sulod nangangalingkod ngan namamati ha ira. Kahuna ni Tatay nga may iginbabaligya hi Sister Huntingford ngan mapalit hi Nanay hin diri namon kinahanglanon, salit humirani hiya ha ira ngan nagsiring nga diri kami interesado. “Diri ba kamo interesado mag-aram ha Biblia?” nagpakiana hi Sister Huntingford. “Syempre interesado kami hito,” binaton hi Tatay.

Tayming gud an pagbisita ni Sister Huntingford. An akon mga kag-anak bag-o la nga binaya ha relihiyon nga United Church ha Canada nga hadto aktibo hira nga membro hito. Kay ano? Kay an ministro nagpaskin ha may purtahan han singbahan hin listahan han ngatanan nga nagdonar sumala han kantidad nga ira iginhatag. Tungod kay pobre la an akon mga kag-anak, kasagaran nga aada hira ha kataposan han listahan, ngan ginpirit hira han mga nagdudumara han singbahan nga magdonar hin dugang. Usa pa nga ministro an nagsiring nga diri niya igintututdo kon ano gud an iya gintotoohan basi diri hiya matangtang ha trabaho. Salit ginbayaan namon ito nga relihiyon kondi karuyag pa gihapon namon magsingba ha Dios ngan mahibaro mahitungod ha iya.

Tungod kay hito nga panahon igindidiri an buruhaton han mga Saksi ni Jehova ha Canada, Biblia la ngan pipira nga nota nga nakada ha gutiay nga itom nga notbuk an gin-gagamit ni Sister Huntingford ha pagdumara ha amon pamilya hin pag-aram ha Biblia. Han nasiguro niya nga diri namon hiya igsusumat ha mga awtoridad, gintagan niya kami hin mga publikasyon nga basado ha Biblia. Gintatago namon hin maopay an mga publikasyon katapos han tagsa namon nga pag-aram. *

Bisan pa han pagkontra ngan iba pa nga mga ulang, madasigon nga iginsangyaw ni Sister Huntingford an maopay nga sumat. An iya kadasig nagpagios ha akon nga magpabilin nga marig-on ha kamatuoran. Usa ka tuig katapos mabawtismohan an akon mga kag-anak sugad nga mga Saksi ni Jehova, ginsimbolohan ko an akon dedikasyon ha Dios. Han Pebrero 27, 1949, nabawtismohan ako ha usa nga metal nga tubongan nga ginagamit han mga parauma sugad nga irimnan han mga hayop. Disisyete anyos ako hito nga panahon. Katapos hito, nagin determinado ako nga mag-alagad ha bug-os panahon.

Nag-alang ako nga mag-payunir dayon. Nagtrabaho anay ako ha usa nga bangko ngan ha usa nga opisina  kay ginhunahuna ko nga kinahanglan ko magkaada kwarta para masuportaran an akon pagpayunir. Kondi tungod kay batan-on pa ako ngan waray eksperyensya, madagmit la maubos an akon kwarta. Gin-aghat ako han usa nga brother nga hi Ted Sargent nga magin maisugon ngan sumarig kan Jehova. (1 Kron. 28:10) Tungod hito nga pagdasig, nagtikang ako magpayunir han Nobyembre 1951. May-ada la ako 40 ka dolyar, usa nga daan na nga bisikleta, ngan usa nga bag-o nga bag. Kondi pirme igintatagana ni Jehova an akon mga ginkikinahanglan. Mapasalamaton gud ako nga gindasig ako ni Ted nga magpayunir! Ito nga desisyon nagresulta hin damu nga bendisyon.

Usa ka gab-i han ikatarapos han Agosto 1952, may tinawag ha akon tikang ha Toronto. Gin-imbitar ako han sanga nga opisina han mga Saksi ni Jehova ha Canada nga magtikang pag-alagad didto ha Septyembre. Bisan kon awdanon ako ngan waray pa makabisita ha sanga nga opisina, nalipay gud ako tungod kay an iba nga payunir nagsiring ha akon nga maopay ha Bethel. Nagin komportable dayon ako didto.

Duha ka tuig tikang han umabot ako ha Bethel, ginsaliwnan ko hi Bill Yacos sugad nga congregation servant (koordinetor han lawas han mga tigurang na yana) ha Shaw Unit ha Toronto. * Tungod kay 23 anyos pa la ako, pag-abat ko pariho ako hin inosente nga bata nga taga-uma. Kondi mapainubsanon ngan mahigugmaon nga gintutdoan ako ni Brother Yacos kon ano an akon bubuhaton. Ngan ginbuligan gud ako ni Jehova.

Hi Brother Yacos usa nga buksol nga brother nga mahiyom-hiyom. Interesado gud hiya ha mga tawo. Hinigugma niya an kabugtoan, ngan hinigugma liwat hiya nira. Regular nga ginbibisita niya hira ha ira balay, diri la kon may-ada hira mga problema. Gindasig niya ako nga buhaton ko liwat ito ngan makig-upod ha kabugtoan ha ministeryo. Hiya nagsiring, “Ken, ipakita ha kabugtoan nga hinigugma mo hira. Magtatabon ito han damu nga kaluyahan.”

Tikang han Enero 1957, ginbuligan ako ni Jehova ha espesyal nga paagi. Hito nga bulan nagpakasal kami ni Evelyn nga naggradwar ha ika-14 nga klase han Gilead. Antes kami mag-asawa, nag-alagad hiya ha probinsya han Quebec nga nagyayakan hin French. Hito nga panahon, haros kontrolado han Romano Katoliko ito nga lugar. Salit makuri gud para kan Evelyn an pagsangyaw didto, pero nagpabilin hiya nga maunungon ha iya toka ngan kan Jehova.

Maunungon liwat hi Evelyn ha akon. (Efe. 5:31) Ha pagkamatuod, nasarihan an iya pagkamaunungon katapos gud han amon kasal! Plano namon nga magbiyahe ngadto ha Florida, U.S.A., pero kinabuwasan katapos han amon kasal, ginsidngan ako han sanga nga opisina nga umatender ha usa ka semana nga miting ha Canada Bethel. Syempre, waray madayon an amon plano tungod hito nga miting, pero karuyag namon ni Evelyn nga buhaton an anoman nga iginpapabuhat ha amon ni Jehova. Salit ginkansela namon an amon honeymoon. Durante hito nga semana, nagsangyaw hi Evelyn hirani ha sanga nga opisina. Bisan kon an teritoryo iba gud kay ha Quebec, ginbuhat niya an iya gimaopayi.

Ha kataposan hito nga semana, may nahitabo nga diri ginlalaoman. Igintoka ako sugad nga paramangno  han sirkito ha norte han Ontario. Bag-o la ako nga inasaw-an, 25 anyos pa la ngan waray pa gud eksperyensya. Kondi bisan pa hito, ginkarawat namon an toka ngan nasarig kan Jehova. Durante han matugnaw nga panahon ha Canada, nagbiyahe kami ha bug-os nga gab-i sakay hin tren, kaupod namon an damu nga mag-iha na nga nagbibiyahe nga mga paramangno nga tipabalik na ha ira mga toka. Nadasig gud kami nira! Ginpirit pa ngani kami hin usa nga brother nga kami an kumaturog ha higdaan ha tren nga iya unta kakaturogan basi diri kami magliningkod ha bug-os nga gab-i. Kinabuwasan, ika-15 pa la ka adlaw tikang han amon kasal, bumisita na kami ha gutiay nga grupo ha Hornepayne, sugad han akon gin-unabi ha tinikangan hini nga artikulo.

Damu pa nga pagbag-o an mahitatabo ha amon ni Evelyn. Samtang nag-aalagad ako sugad nga paramangno han distrito ha ikatarapos han 1960, nakakarawat ako hin imbitasyon para umiskwela ha ika-36 nga klase han Gilead, nga 10 ka bulan nga kurso nga magtitikang temprano han Pebrero 1961 ha Brooklyn, New York. Syempre nalipay ako, kondi nasubo liwat ako tungod kay diri upod hi Evelyn. Lugod ginhangyo hiya nga magsurat, pariho han iba nga mga asawa nga sugad hito an sitwasyon, basi ipahibaro nga andam hiya mahibulag ha akon ha sulod hin 10 ka bulan. Nagtangis hi Evelyn, kondi nagkauyon kami nga maeskwela ako, ngan nalipay hiya nga makakakarawat ako hin birilhon nga pagbansay ha Gilead.

Samtang nakadto ako ha Brooklyn, hi Evelyn nagtrabaho ha Canada Bethel. Nakapribilehiyo hiya nga makaupod ha kwarto an usa nga dinihogan nga sister nga hi Margaret Lovell. Syempre, namingaw gud kami ni Evelyn ha kada tagsa. Kondi pinaagi han bulig ni Jehova nahimo namon an amon temporaryo nga mga toka. Naparig-on gud ako han iya pagin andam magsakripisyo para kan Jehova ngan ha Iya organisasyon.

Paglabay hin mga tulo ka bulan ha Gilead, gintanyagan ako hin espesyal nga imbitasyon ni Brother Nathan Knorr, nga amo an nangunguna hadto ha bug-os kalibotan nga buruhaton. Ginpakianhan niya ako kon andam ba ako bumaya pag-eskwela ha Gilead ngan bumalik ha Canada basi mag-alagad sugad nga temporaryo nga instruktor han Kingdom Ministry School. Ginsidngan ako ni Brother Knorr nga puydi man nga diri ko ito karawaton. Puydi ko tapuson an pag-eskwela ha Gilead kon karuyag ko ngan bangin itoka kami sugad nga misyonero. Nagsiring liwat hiya nga kon bumalik ako ha Canada, bangin diri na ako makaeskwela utro ha Gilead ngan ha urhi bangin itoka kami utro ha mga teritoryo ha Canada. Ako an iya ginpapadesisyon katapos ko kaistoryahon an akon asawa mahitungod hito.

Tungod kay maaram na ako han panhunahuna ni Evelyn may kalabotan ha teokratiko nga mga toka, ginsidngan ko dayon hi Brother Knorr, “Anoman an ipabuhat ha amon han organisasyon ni Jehova, nalilipay kami ha pagbuhat hito.” Para ha amon, diri importante kon ano an amon karuyag. Kinahanglan namon kumadto diin man kami itoka han organisasyon ni Jehova.

Salit han Abril 1961, binalik ako ha Canada basi magtutdo ha Kingdom Ministry School. Ha urhi,  nagin membro kami han pamilya han Bethel. Ngan ha diri ko gud ginlalaoman, nakakarawat ako hin imbitasyon nga makaeskwela han ika-40 nga klase han Gilead nga magtitikang ha 1965. Kinahanglan utro magsurat ni Evelyn nga nauyon hiya nga magbulag la anay kami. Kondi paglabay hin pipira ka semana, nalipay kami tungod kay nakakarawat liwat hiya hin imbitasyon nga umiskwela kaupod ko.

Pag-abot namon ha Eskwelahan han Gilead, ginsidngan kami ni Brother Knorr nga an mga estudyante nga nag-enrol ha klase nga nagyayakan hin French, pariho ha amon, itutoka ha Africa. Kondi durante han amon gradwasyon, igintoka kami utro ha Canada! Ginpili ako sugad nga bag-o nga paramangno han sanga (gintatawag yana nga koordinetor han Komite han Sanga). Tungod kay 34 anyos pa la ako, ginsidngan ko hi Brother Knorr, “Bata pa ako hinduro.” Kondi ginparig-on niya ako. Tikang pa hadto, antes ako maghimo hin mabug-at nga mga desisyon, ginpapangalimbasogan ko nga mamakiana anay ha mas eksperyensyado nga kabugtoan ha Bethel.

Samtang nag-aalagad ha Bethel, damu an akon hinbaroan tikang ha iba. Ginrirespeto ko ngan bilib gud ako ha iba pa nga membro han Komite han Sanga. Maopay liwat nga impluwensya ha akon an ginatos nga Kristiano nga kabugtoan, batan-on ngan lagas, nga nakilala namon dinhi ha sanga nga opisina ngan ha iba-iba nga kongregasyon nga amon gin-alagaran.

Ha Bethel, nagkaada liwat ako higayon nga makagtutdo ha iba ngan maparig-on an ira pagtoo. Hi apostol Pablo nagsiring kan Timoteo: “Padayon nga buhata an mga butang nga imo hinbaroan.” Hiya liwat nagsiring: “Mahitungod han mga butang nga imo nabatian ha akon nga ginsuportahan hin damu nga saksi, itapod ito nga mga butang ha matinumanon nga kalalakin-an, basi hira liwat magin kwalipikado gud ha pagtutdo ha iba.” (2 Tim. 2:2; 3:14) Usahay ginpapakianhan ako han kabugtoan kon ano nga mga leksyon an akon hinbaroan durante han akon 57 ka tuig nga pag-alagad ha Bethel. Simple la an akon baton: “Buhata pirme an iginpapabuhat ha imo han organisasyon ni Jehova. Ngan sarig nga bubuligan ka ni Jehova.”

Nahinunumdoman ko pa gud an akon siyahan nga pag-abot ha Bethel. Awdanon ako ngan waray eksperyensya nga batan-on. Kondi ha ngatanan nga panahon, ‘ginkakaptan ni Jehova an akon too nga kamot.’ Kasagaran nga ginagamit niya an mahigugmaon nga kabugtoan ha panahon nga nanginginahanglan gud ako hin bulig. Hini nga paagi padayon ako nga ginpapasarig ni Jehova: “Ayaw kahadlok; ako mabulig ha imo.”​—Isa. 41:13.