1, 2. Ano an pagkita ni Jehova ha iya mga surugoon dinhi ha tuna?

KON an mga kag-anak nagkikita samtang nag-uuyag an ira gudtiay pa nga mga anak, kasagaran nga nahipapausa hira ha natural nga mga abilidad hito. Naeksperyensyahan mo na ba ito? An usa nga bata bangin matibaksi o maopay ha isport, samtang an iya bugto bangin mahilig ha mga board game o ha pagdrowing. Kondi anoman an abilidad han ira mga anak, nalilipay an mga kag-anak ha pagdiskobre hito.

² Interesado gud liwat hi Jehova ha iya mga anak dinhi ha tuna. Ginkikita niya an iya mga surugoon yana sugad nga “birilhon nga mga butang han ngatanan nga nasud.” (Hag. 2:7) Labi na nga birilhon hira tungod han ira pagtoo ngan debosyon. Kondi bangin maobserbaran mo nga damu an iba-iba nga talento ngan abilidad han imo mga igkasi-Saksi. An pipira nga brother maopay nga mamumulong, samtang an iba naman maopay mag-organisar. Damu nga sister an madagmit mahibaro hin iba-iba nga yinaknan ngan ginagamit nira ito ha ministeryo, samtang an iba maopay nga susbaranan ha pagdasig o ha pagmangno ha may sakit. (Roma 16:1, 12) Diri ba kita mapasalamaton nga kaupod naton ha kongregasyon an sugad nga kabugtoan?

3. Ano nga mga pakiana an aton hihisgotan hini nga artikulo?

³ Kondi an pipira nga aton igkasi-tumuroo, labi na adton batan-on o bag-o la nga bawtismado nga mga brother, bangin diri pa maaram  kon ano an ira mahihimo para ha kongregasyon. Paonan-o naton hira mabubuligan basi magamit hin bug-os an ira abilidad? Kay ano nga sadang naton pangalimbasogan nga bilngon an maopay ha ira, nga ginkikita hira sugad han pagkita ha ira ni Jehova?

4, 5. Paonan-o iginpapakita han asoy ha Hukom 6:11-16 nga ginkikita ni Jehova an mga abilidad han iya mga surugoon?

⁴ Damu nga asoy ha Biblia an nagsusumat nga an ginkikita ni Jehova ha iya mga surugoon diri la an maopay ha ira kondi pati liwat an ira mga abilidad. Pananglitan, han ginpili hi Gideon nga talwason an katawohan han Dios tikang ha pagtalumpigos han mga Midianitanhon, natigdaan gud hiya han an anghel nagsiring ha iya: “Hi Jehova upod ha imo, ikaw nga makusganon ngan tawo nga maisog.” Hito nga panahon, waray gud mahunahuna ni Gideon nga ‘maisugon’ hiya. Nagruhaduha hiya ngan inabat nga diri hiya takos hito nga toka. Pero ginkita hiya ni Jehova ha mas positibo nga paagi kay han iya pagkita ha iya kalugaringon.—Basaha an Hukom 6:11-16.

⁵ Nasarig hi Jehova nga matatalwas ni Gideon an mga Israelita tungod kay nakita niya an abilidad hito. Pananglitan, nakita han anghel ni Jehova kon paonan-o ginamit ni Gideon an iya kusog ha paggiok hin trigo. May usa pa nga butang nga naobserbaran an anghel. Ha panahon han Biblia, kasagaran nga an mga parauma naglalambos han ira mga lugas ha gawas nga dapit nga an hangin diri nasasalipdan basi igpalid an upa. Makapainteres, hi Gideon patago nga naggigiok hin trigo ha purog-anan hin ubas basi an iya gutiay nga ani diri makita han mga Midianitanhon. Maaramon gud ito nga iya ginbuhat! Diri urusahon nga para kan Jehova, hi Gideon diri la maikmat nga parauma kondi usa liwat hiya nga maaramon nga tawo. Oo, nakita ni Jehova an mga abilidad ni Gideon ngan Iya ito ginbansay.

6, 7. (a) Paonan-o naiiba an pagkita ni Jehova kan propeta Amos kay ha pagkita han pipira nga Israelita? (b) Kay ano nga masisiring naton nga hi Amos diri ignorante?

⁶ Mahibabaroan liwat naton ha kahimtang ni propeta Amos nga ginkikita ni Jehova an mga abilidad han Iya surugoon bisan kon para ha damu ubos la hiya nga tawo o diri importante. Iginhulagway ni Amos an iya kalugaringon sugad nga paraataman han karnero ngan paratusok hin sikomoro—usa nga klase hin igos nga gintatagad nga pagkaon han mga pobre. Han ginsugo hiya ni Jehova nga ipahayag an paghukom ha idolatroso nga napulo nga tribo han ginhadian han Israel, an pipira nga Israelita bangin naghunahuna nga diri hiya takos hito nga toka.—Basaha an Amos 7:14, 15.

⁷ Hi Amos nagtikang ha baryo nga hirayo ha syudad, kondi an iya kahibaro mahitungod ha mga kustomre ngan mga magmarando ha iya panahon nagpapamatuod nga diri hiya ignorante. Posible nga damu an iya hinbabaroan mahitungod han kahimtang han Israel pati ha kahirani nga mga nasud hito tungod han mga negosyante nga napakadto ha ira lugar nga iya nakakaistorya. (Amos 1:6, 9, 11, 13; 2:8; 6:4-6) May pipira nga eskolar ha Biblia yana nga nasiring nga hi Amos maopay nga parasurat. Labot la han simple ngan mapwersa nga mga pulong, gumamit liwat hiya hin mga pagtanding ngan mga ilustrasyon. Oo, an maisugon nga baton ni Amos ha maraot nga saserdote nga hi Amasia nagpamatuod nga husto nga tawo an ginpili ni Jehova ngan magagamit Niya an mga abilidad hito nga posible nga ha tinikangan waray makita han mga tawo.—Amos 7:12, 13, 16, 17.

8. (a) Ano an iginpasarig ni Jehova kan David? (b) Kay ano nga makapadasig an ginsiring ha Salmo 32:8 para hadton bangin kulang an pagsarig ha kalugaringon o ha ira abilidad?

⁸ Oo, nakikita ni Jehova an abilidad han tagsa niya nga surugoon. Ginpasarig niya hi Hadi David nga pirme niya ito gigiyahan, nga ‘an iya mga mata ibubutang ha bawbaw’ ni David. (Basaha an Salmo 32:8.) Kay ano nga makapadasig ini ha aton? Bisan kon bangin kulang an aton pagsarig ha aton kalugaringon, bubuligan kita ni Jehova  nga mahimo an mga butang nga ginhuhunahuna naton nga diri naton kaya ngan makab-ot an mga tumong nga baga hin imposible para ha aton. Sugad la nga gin-gigiyahan han usa nga kag-anak an iya anak nga nag-aaram pa la paglakat, gin-gigiyahan liwat kita ni Jehova basi mag-uswag kita ha espirituwal. Mahimo liwat gamiton ni Jehova an aton kabugtoan basi buligan kita nga magamit hin bug-os an aton mga abilidad. Paonan-o?

9. Paonan-o naton maiaaplikar an sagdon ni Pablo nga magin “matinagaron” ha kaopayan han iba?

⁹ Gin-aghat ni Pablo an ngatanan nga Kristiano nga magin “matinagaron” ha kaopayan han ira mga igkasi-tumuroo. (Basaha an Filipos 2:3, 4.) Ginpapabug-atan hini nga sadang naton obserbaran an mga abilidad han iba ngan kumendasyonan hira. Ano an aton inaabat kon nakikita han iba an aton pag-uswag? Kasagaran nga naaaghat kita nga padayon nga mag-uswag ngan buhaton an ngatanan nga aton mahihimo. Sugad man kon ginkukumendasyonan naton an paningkamot han aton mga igkasi-tumuroo, nabubuligan naton hira nga mag-uswag ngan magin hamtong ha espirituwal.

10. Hin-o an bangin labi na nga nanginginahanglan han aton atensyon?

¹⁰ Hin-o an bangin labi na nga nanginginahanglan han aton atensyon? Syempre, ha panapanahon kita ngatanan nanginginahanglan hin espesyal nga atensyon. Kondi mas kinahanglan nga ipaabat naton ha batan-on o bag-o nga bawtismado nga mga brother nga may mahihimo hira para ha kongregasyon. Mabulig ini nga masabtan nira nga may importante hira nga bahin ha organisasyon ni Jehova. Pero kon diri naton hira kukumendasyonan, bangin diri na hira magkab-ot hin dugang pa nga mga pribilehiyo, imbes nga ito an igin-aaghat han Pulong han Dios nga sadang nira buhaton.—1 Tim. 3:1.

11. (a) Paonan-o ginbuligan han usa nga tigurang nga malamposan han usa nga batan-on an pagin awdanon? (b) Ano nga leksyon an imo hinbaroan ha eksperyensya ni Julien?

¹¹ Hi Ludovic, usa nga tigurang nga nagpahimulos han sinsero nga atensyon nga iginpakita ha iya han bata pa hiya, nagsiring: “Kon nagpapakita ako hin sinsero nga interes ha usa nga bugto, madagmit hiya mag-uswag.” May kalabotan kan Julien nga usa nga batan-on nga lalaki ngan awdanon, hi Ludovic nagsiring: “Tungod kay may panahon nga hi Julien nagios nga baga hin kimas, an iya panggawi baga hin diri maopay. Pero nakita ko nga buotan gud hiya ngan karuyag gud niya buligan an iba ha kongregasyon. Salit imbes nga pagruhaduhaan an iya motibo, nagpokus ako ha iya mag-opay nga kalidad, ngan nangalimbasog ako nga dasigon hiya.” Inabot an panahon, nagin kwalipikado hi Julien nga magin ministeryal ngan yana regular payunir na hiya.

12. Ano an importante nga kalidad nga ginkikinahanglan basi mabuligan an usa nga magamit hin bug-os an iya abilidad? Paghatag hin ehemplo.

¹² Syempre, kon karuyag naton mabuligan an iba nga magamit hin bug-os an ira abilidad, kinahanglan magin masinabuton kita. Sugad han iginpakita han eksperyensya ni Julien, kinahanglan nga an aton kitaon ha usa nga tawo diri an iya kaluyahan kondi an iya mag-opay nga kalidad ngan mga abilidad nga mahimo pa mapauswag. Pariho ini han paagi han pagkita ni Jesus kan apostol Pedro. Bisan kon may panahon nga nanluya hi Pedro, nakita ni Jesus nga magigin marig-on hiya pariho hin bato.—Juan 1:42.

13, 14. (a) Paonan-o gintagad ni Bernabe an batan-on nga hi Marcos? (b) Paonan-o nagpahimulos an usa nga batan-on tikang ha bulig han usa nga tigurang? (Kitaa an retrato ha tinikangan hini nga artikulo.)

¹³ Aton liwat usisahon an ehemplo ni Bernabe ngan ni Juan, nga gintatawag liwat nga Marcos. (Buh. 12:25) Durante han siyahan nga pagbiyahe ni Pablo sugad nga misyonero kaupod hi Bernabe, hi Marcos an posible nga ‘nag-asikaso’ han ira mga panginahanglan. Kondi pag-abot nira ha Pamfilia, tigda nga ginbayaan hira ni Marcos. Salit hira Pablo ngan Bernabe na la an nagbiyahe tipanorte, diin umagi hira hin lugar nga damu an tikasan.  (Buh. 13:5, 13) Kondi matin-aw nga bisan kon nakita ni Bernabe an mga kaluyahan ni Marcos, waray hiya magpokus dida hito. Lugod ha urhi, ginsalingabot niya an higayon basi bansayon ito. (Buh. 15:37-39) Nakabulig ini ha batan-on nga hi Marcos nga magin hamtong nga surugoon ni Jehova. Makapainteres, kumadto hi Marcos ha Roma samtang priso didto hi Pablo basi buligan niya ito. Ngan usa hiya han mga nagpadara hin mga pangumusta ha mga Kristiano ha kongregasyon han Colosas, ngan positibo an ginsiring han apostol mahitungod kan Marcos. (Col. 4:10) Hunahunaa an daku nga kalipay ni Bernabe han maghangyo mismo hi Pablo han bulig ni Marcos.—2 Tim. 4:11.

¹⁴ Nahinumdoman ni Alexandre, nga bag-o la nga tigurang, kon paonan-o hiya nagpahimulos han bulig han usa nga bugto: “Han bata pa ako, nakukurian gud ako pag-ampo ha publiko. Usa nga tigurang an bumulig ha akon kon paonan-o ko iaandam an akon kalugaringon ngan kon paonan-o ako magigin mas relaks. Imbes nga diri na ako paampoon, agsob niya ako hangyoon nga manguna ha pag-ampo ha katirok para ha pag-alagad. Ha urhi, nagkaada ako dugang nga kompyansa ha kalugaringon.”

15. Paonan-o iginpakita ni Pablo nga ginpapabilhan niya an iya kabugtoan?

¹⁵ Kon may nakikita kita nga maopay nga kalidad ha usa nga Kristiano, ginkukumendasyonan ba naton hiya? Ha Roma kapitulo 16, ginkumendasyonan ni Pablo an sobra 20 nga iya igkasi-tumuroo tungod han ira mga kalidad nga iya gud ginpapabilhan. (Roma 16:3-7, 13) Pananglitan, nagsiring hiya nga hira Andronico ngan Junias mas maiha na nga nag-aalagad kan Kristo kay ha iya, ginpabug-atan niya an ira pagin mapailubon. Gin-unabi liwat niya an nanay ni Rufo, posible tungod han mahigugmaon nga pagmangno hito ha iya hadto.

16. Ano an mahimo magin resulta ha paghatag hin kumendasyon ha usa nga batan-on?

¹⁶ Mahimo liwat magkaada mag-opay nga resulta kon sinsero nga ginkukumendasyonan naton an iba. Tagda pananglitan hi Rico, usa nga batan-on nga taga-France, nga nasubo gud tungod kay an iya diri Saksi nga tatay nadiri nga magpabawtismo hiya. Nahulop hiya tungod kay kahuna niya nga kinahanglan anay niya magin adulto basi makag-alagad kan Jehova tungod kay minor-de-edad pa hiya. Nasubo liwat hiya kay gintatamay hiya ha eskwelahan. Hi Frédéric, usa nga tigurang nga nag-Bible study ha iya, nagsiring: “Ginkumendasyonan ko hi Rico kay ito nga pagkontra nahitatabo tungod kay maisugon nga iginpapahayag niya an iya pagtoo.” Ito nga kumendasyon nagparig-on han determinasyon ni Rico nga padayon nga mag-uswag ha espirituwal ngan nakabulig ito ha iya nga magin mas duok ha iya tatay. Hi Rico nabawtismohan han 12 anyos hiya.

17. (a) Paonan-o naton mabubuligan an mga brother basi mag-uswag? (b) Paonan-o iginpakita han usa nga misyonero an iya personal nga interes ha batan-on nga mga brother? Ano an nagin resulta hito?

¹⁷ Ha kada panahon nga ginkukumendasyonan naton an kabugtoan ha ira mag-opay nga nahihimo o han ira mga pangalimbasog, mas napapagios naton hira nga buhaton an ira bug-os nga mahihimo ha pag-alagad kan Jehova. Hi Sylvie, * nga maiha na nga nag-aalagad ha Bethel  ha France, nagsiring nga mahimo liwat kumendasyonan han mga sister an mga brother. Naobserbaran niya nga an mga sister may nakikita nga iba nga mga aspekto nga bangin diri nakikita han mga brother. Salit an ira “makapadasig nga mga pulong mahimo makadugang ha kumendasyon nga waray maunabi han hamtong nga mga brother.” Hiya nagpadayon: “Para ha akon, obligasyon ko an paghatag hin kumendasyon.” (Prob. 3:27) Nabuligan ni Jérôme, nga usa nga misyonero ha French Guiana, an damu nga batan-on nga brother nga magin kwalipikado nga misyonero. Hiya nagsiring: “Naobserbaran ko nga kon ginkukumendasyonan ko an batan-on nga mga brother ha espisipiko nga nabuhat nira ha ministeryo o tungod han ira mag-opay nga komento, mas nagkakaada hira kompyansa ha kalugaringon. Salit mas napapauswag pa nira an ira mga abilidad.”

18. Kay ano nga mapulsanon an pagbuhat kaupod han batan-on nga mga brother?

¹⁸ Madadasig liwat naton an aton kabugtoan nga mag-uswag ha espirituwal pinaagi ha pagbuhat kaupod nira. Pananglitan, an usa nga tigurang mahimo maghangyo ha usa nga batan-on nga brother nga maopay ha kompyuter nga mag-print hin mga impormasyon tikang ha jw.org nga makakapadasig ha mga edaran na nga waray kompyuter. O kon gintokahan ka ha paglimpyo o pag-ayad ha Kingdom Hall, puydi ka ba maghangyo hin batan-on nga brother para bumulig ha imo? Kon mangangalimbasog ka nga magbuhat kaupod han batan-on nga mga brother, maghahatag ito ha imo hin higayon basi maobserbaran hira, mahatagan hin kumendasyon, ngan makita an mga resulta.—Prob. 15:23.

19, 20. Kay ano nga sadang naton buligan an iba nga mag-uswag?

¹⁹ Han gintokahan ni Jehova hi Josue nga manguna ha mga Israelita, Iya liwat ginsugo hi Moises nga ‘dasigon’ ngan ‘parig-unon’ hi Josue. (Basaha an Deuteronomio 3:28.) Nagtitikadamu yana an nagsisingba kan Jehova. An ngatanan nga hamtong nga Kristiano—diri la an mga tigurang—makakabulig ha batan-on ngan ha bag-o la nga bawtismado nga mga brother nga gamiton hin bug-os an ira abilidad. Tungod hito, magtitikadamu an masulod ha bug-os panahon nga pag-alagad pati adton magigin “kwalipikado gud ha pagtutdo ha iba.”—2 Tim. 2:2.

²⁰ Kaupod man kita ha usa nga daku nga kongregasyon o ha usa nga gutiay nga grupo, makakabulig kita kon may mga panginahanglan an organisasyon ha tidaraon. Basi mabuhat ini, kinahanglan naton subaron hi Jehova, nga ginbibiling pirme an maopay ha iya mga surugoon.