Posible nga may kakilala ka nga ginbulagan han padis. Tungod ito kay komon na gud yana an pagbulag. Pananglitan, sumala ha usa nga pagsaliksik ha Poland, an mga mag-asawa nga 30 anyos an edad nga kasal na hin tulo o unom ka tuig posible gud magbulag; kondi diri la an aada hito nga mga pangidaron an nagbubulag.

Ha pagkamatuod, sumala ha report han GMA News Online, ‘padayon nga nagtitikadamu an nagpa-file hin annulment han kasal ha [Pilipinas] ha naglabay nga walo ka tuig. Han 2012, may aberids nga 28 nga mag-asawa kada adlaw an karuyag nga legal nga tapuson an ira pag-asawa.’ Pariho liwat hito an nahitatabo ha riko nga mga nasud.

Ano an komon nga epekto han pagbulag? Usa nga eksperyensyado nga magsaragdon ha pag-asawa ha Eastern Europe an nagsiring: “Ginhihimo nga legal han diborsyo an mga butang nga nahitabo na—an kadaot han usa nga relasyon ngan an pagbulag han mag-asawa, masakit gud ito hinduro.” Hiya nagdugang nga kasagaran nga an mga diborsyado naabat hin iba-iba nga emosyon—‘duro nga kasina, pagbasol, kapakyasan, kasubo, ngan kaalohi.’ Usahay nakakahunahuna hira nga mag-unay. “Kon igindeklara na han korte an diborsyo, magtitikang na an sunod nga bahin hito. Tungod han duro nga kasubo ngan pag-abat nga nag-uusahan na la hiya, an diborsyado bangin maghunahuna: ‘Yana nga bulag na ako ha akon padis, hin-o na gud ba ako? Ano na an akon hihimoon ha akon kinabuhi?’”

Nahinunumdoman pa ni Ewa an iya inabat mga pipira ka tuig na an naglabay, hiya nagsiring: “Naawod ako hinduro han igindeklara na han korte an amon diborsyo tungod kay gintatawag na ako han akon mga amyaw ngan mga katrabaho nga ‘usa nga diborsyada.’ Napuno gud ako hin kasina. Tungod kay ginbayaan ha akon an amon duha nga gudtiay pa nga anak, kinahanglan ko magin nanay ngan tatay ha ira.” * Hi Adam nga nag-alagad sugad nga respetado nga tigurang ha sulod hin 12 ka tuig, nagsiring: “Haros waray na ako pagtahod ha akon kalugaringon salit may mga panahon nga nasisina ako hinduro, ngan karuyag ko mag-inusahan.”

Tungod kay nababaraka ha ira tidaraon, an pipira nangangalimbasog nga makabangon—bisan kon pipira na ka tuig an naglabay katapos han pagbulag. Bangin maghunahuna hira nga an iba diri interesado ha ira. Dugang pa, usa nga kolumnista an nagsiring nga kinahanglan nira “bag-uhon an ira mga nahiaraan ngan hibaroan kon paonan-o aatubangon an mga problema nga hira na la.”

Hi Stanisław nagsiring: “Han nagdiborsyo kami han akon asawa, gindid-an niya ako nga makita an amon duha nga gudtiay nga anak. Tungod hito inabat ko nga waray na gud nahigugma ha akon ngan ginpabay-an  na ako ni Jehova. Diri ko na karuyag mabuhi. Ha urhi, nasantop ko nga sayop gud an akon panhunahuna.” Hi Wanda nga nagin diborsyada nahulop liwat tungod kay para ha iya waray kasigurohan an iya tidaraon, hiya nagsiring: “Pag-abat ko hadto, diri mag-iiha an mga tawo—bisan an akon mga igkasi-tumuroo—diri na magtatagad ha akon ngan ha akon mga anak. Kondi nakita ko gud kon paonan-o ako ginsuportaran ngan ginbuligan han kabugtoan samtang ginpapangalimbasogan ko nga padakuon an akon mga anak nga magin magsiringba ni Jehova.”

Iginpapakita hini nga mga komento nga katapos han diborsyo, an pipira nadadaog hin negatibo nga mga emosyon. Bangin minuson han iba an ira kalugaringon ngan maghunahuna nga waray hira pulos ngan diri hira takos tagan hin atensyon. Bangin magin kritiko liwat hira ha iba. Salit bangin hunahunaon nira nga diri nagtatagad ngan diri napaid ha ira an kabugtoan ha kongregasyon. Kondi sugad han iginpapakita han eksperyensya nira Stanisław ngan Wanda, masasantop han mga diborsyado nga an ira igkasi-tumuroo nahigugma gud ha ira. Ha pagkatinuod, makatirigamnan nga pagmangno an iginpapakita han mga igkasi-Kristiano, bisan kon diri dayon nakikita an ira bulig.

Hinumdumi nga bisan pa han aton duro nga pangalimbasog, an kabugtoan nga ginbulagan han padis bangin usahay umabat pa gihapon hin duro nga kasubo. An mga sister nga ginbulagan han bana bangin maghunahuna nga gutiay la an nagtatagad ha ira. Hi Alicja nagsiring: “Walo na ka tuig nga diborsyada ako. Pero usahay naabat pa gihapon ako nga waray ako pulos. Ha sugad nga mga kahimtang, karuyag ko na la mag-inusahan ngan magtinangis tungod kay nalolooy ako ha akon kalugaringon.”

Bisan kon an mga pagbati nga ginhisgotan dinhi komon nga gin-aabat han usa nga ginbulagan han padis, an Biblia nagsasagdon nga diri mag-inusahan. Kon diri niya ini susundon, mahimo niya maisalikway an “ngatanan nga maopay nga kinaadman.” (Prob. 18:1) Pero maaramon nga likyan han usa nga nasusubo an pirme pangaro hin sagdon o pagliaw ha usa nga diri kapariho ha sekso. Hito nga paagi, malilikyan an pagkaada hin diri angayan nga romantiko nga pagbati.

Kon an aton igkasi-tumuroo naabat hin duro nga kasubo, pagin isinalikway, ngan kabaraka ha ira magigin tidaraon, sadang naton subaron hi Jehova pinaagi ha pangalimbasog nga masabtan an ira gin-aabat ngan himoon an ngatanan basi buligan hira. (Sal. 55:22; 1 Ped. 5:6, 7) Makakasiguro kita nga aapresyaron gud nira an anoman nga bulig nga aton maihahatag sugad nga ira tinuod nga kasangkayan!—Prob. 17:17; 18:24.