1. Kay ano nga naghilarom an gugma han Dios ngan han iya Anak ha usa kag usa?

AN ANAK ni Jehova nga hi Jesu-Kristo nagsiring: “Hinigugma ko an Amay.” (Juan 14:31) Nagsiring pa hiya: “Pinalangga han Amay an Anak.” (Juan 5:20) Diri kita sadang mahipausa hito. Kay ha sulod hin minilyon nga katuigan antes hi Jesus magin tawo, hiya an “labaw nga magburuhat” han Dios. (Prob. 8:30) Samtang hi Jehova ngan hi Jesus magkaupod nga nagbubuhat, damu an hinbaroan han Anak mahitungod han mga kalidad han iya Amay ngan damu gud an iya hinungdan basi higugmaon an iya Amay. Oo, tungod han ira duok nga pagkaupod naghilarom an ira gugma ha usa kag usa.

2. (a) Ano an nahiuupod ha paghigugma ha usa nga tawo? (b) Ano nga mga pakiana an aton hihisgotan?

² Kon hinigugma mo an usa nga tawo, may-ada ka hilarom nga pagbati ha iya. Hi salmista David nagkanta: “Ginhihigugma ko ikaw, O Jehova, nga akon kusog.” (Sal. 18:1) Ini an sadang naton abaton para ha Dios tungod kay nahigugma hiya ha aton. Kon susugton naton hi Jehova, ipapakita niya an iya gugma ha aton. (Basaha an Deuteronomio 7:12, 13.) Kondi posible gud ba naton higugmaon an Dios bisan kon diri naton hiya nakikita? Ano an kahulogan han paghigugma kan Jehova? Kay ano nga sadang naton hiya higugmaon? Ngan paonan-o naton maipapakita an aton gugma ha Dios?

3, 4. Kay ano nga diri imposible para ha aton nga higugmaon hi Jehova?

³ “An Dios Espiritu” salit diri naton hiya nakikita. (Juan 4:24) Bisan pa hito, diri imposible nga higugmaon hi Jehova, ngan ginsusugo kita han Kasuratan nga ipakita ito nga gugma. Pananglitan, ginsidngan ni Moises an mga Israelita: “Higugmaon mo hi Jehova nga imo Dios ha bug-os mo nga kasingkasing, ngan ha bug-os mo nga kalag, ngan ha bug-os mo nga kusog.”—Deut. 6:5.

⁴ Kay ano nga mahimo kita magkaada hilarom nga gugma ha Dios? Tungod kay ginlarang kita niya nga may espirituwal nga panginahanglan ngan gintagan kita niya hin abilidad nga ipakita an gugma. Kon natatagbaw naton ito nga panginahanglan, naghihilarom an aton gugma kan Jehova ngan nagkakaada kita hin marig-on nga hinungdan nga magin malipayon. Hi Jesus nagsiring: “Malipayon an mga mahunahunaon han ira espirituwal nga panginahanglan, kay para ha ira an Ginhadian han langit.” (Mat. 5:3) May kalabotan ha natural nga hingyap han mga tawo nga magsingba ha Dios, hi A. C. Morrison nagsiring ha iya libro nga Man Does Not Stand Alone: ‘Sadang kita mahipausa nga kadam-an han mga tawo namimiling ngan natoo ha supremo nga persona.’

5. Kay ano nga makakasiring kita nga mabibilngan gud naton an Dios?

⁵ Mabibilngan gud ba naton an Dios? Oo, tungod kay karuyag niya nga bilngon naton hiya. Iginpatin-aw ito ni apostol Pablo han nagsangyaw hiya ha usa nga grupo nga nagkakatirok ha Areopago. Nahitabo ito ha usa nga lugar diin nakikita an Parthenon—usa nga templo nga igindedikar kan Atena, an diosa han kadaan nga mga taga-Atenas. Hunahunaa nga nakadto ka samtang nagyayakan hi Pablo mahitungod ha “Dios nga naghimo han kalibotan ngan han ngatanan nga aada hito,” katapos iya iginsaysay nga “diri [Hiya] naukoy ha mga templo nga hinimo han kamot.” Hi Pablo nagdugang nga “ginhimo niya [han Dios] an ngatanan nga nasud basi mag-ukoy ha bug-os nga tuna, ngan iya iginpahayag an itinanda nga mga panahon ngan an mga tubtoban han urukyan han mga tawo, kay karuyag han Dios nga pamilngon hiya hin maopay han mga tawo basi hiagian gud nira hiya. Ha pagkamatuod, hirani hiya ha tagsa ha aton.” (Buh. 17:24-27) Oo, mabibilngan han mga tawo an Dios. Sobra pito ngan tunga ka milyon nga mga Saksi ni Jehova an ‘nakaagi gud ha iya’ ngan hinigugma gud nira hiya.

6. Sumala kan Jesus, ano an “pinakaimportante ngan an siyahan nga sugo”?

⁶ An aton gugma kan Jehova sadang magtikang ha kasingkasing. Iginpatin-aw ito ni Jesus han an usa nga Pariseo nagpakiana ha iya: “Magturutdo, ano an pinakaimportante nga sugo ha Balaud?” Hi Jesus binaton: “‘Higugmaa hi Jehova nga imo Dios ha bug-os mo nga kasingkasing, ha bug-os mo nga kalag, ngan ha bug-os mo nga hunahuna.’ Ini an pinakaimportante ngan an siyahan nga sugo.”—Mat. 22:34-38.

7. Ano an iginpapasabot han paghigugma ha Dios ha aton (a) ‘bug-os nga kasingkasing’? (b) ‘bug-os nga kalag’? (c) ‘bug-os nga hunahuna’?

⁷ Ano an iginpapasabot ni Jesus han hiya nagsiring nga kinahanglan naton higugmaon an Dios ha aton ‘bug-os nga kasingkasing’? Karuyag sidngon niya nga kinahanglan naton higugmaon hi Jehova ha aton bug-os nga simboliko nga kasingkasing, nga nakakaimpluwensya ha aton mga hingyap, emosyon, ngan pagbati. Kinahanglan liwat naton higugmaon hiya ha aton ‘bug-os nga kalag,’ o ha aton kinabuhi ngan pagkatawo. Dugang pa, kinahanglan naton higugmaon an Dios ha aton ‘bug-os nga hunahuna,’ o ha aton bug-os nga pagsabot. Oo, kinahanglan naton higugmaon hi Jehova hin bug-os.

8. Kon hinigugma naton an Dios hin bug-os, magpapagios ito ha aton nga buhaton an ano?

⁸ Kon hinigugma naton an Dios ha aton bug-os nga kasingkasing, kalag, ngan hunahuna, magigin maduruto kita ha pag-aram han iya Pulong, kinaburut-on nga bubuhaton naton an ngatanan nga iya iginsusugo, ngan magigin madasigon kita ha pagpasamwak han maopay nga sumat han Ginhadian. (Mat. 24:14; Roma 12:1, 2) An aton tinuod  nga gugma kan Jehova magpapahinabo nga magin mas duok kita ha iya. (San. 4:8) Syempre, imposible nga maunabi naton an ngatanan nga hinungdan kon kay ano nga sadang naton higugmaon an Dios. Kondi hisgotan naton an pipira hito.

9. Kay ano nga hinigugma naton hi Jehova sugad nga aton Maglalarang ngan Paratagana?

⁹ Hi Jehova an aton Maglalarang ngan Paratagana. “Pinaagi ha iya nagkaada kita kinabuhi, nakakakiwa, ngan naeksister,” siring ni Pablo. (Buh. 17:28) Gintagan kita ni Jehova hin maopay hinduro nga tuna basi magin urukyan naton. (Sal. 115:16) Nagtatagana liwat hiya hin pagkaon ngan iba pa nga butang nga aton ginkikinahanglan basi padayon kita nga mabuhi. Salit nakagsiring hi Pablo ha mga taga-Listra nga nagsisingba ha mga dios-dios nga an ‘buhi nga Dios pirme nagpapakita hin pamatuod han mag-opay nga iya ginbubuhat pinaagi ha paghatag ha iyo hin uran tikang ha langit ngan hin mga panahon han abunda nga pamunga, gintatagan kamo hin damu nga pagkaon ngan ginpupuno an iyo kasingkasing hin kalipay.’ (Buh. 14:15-17) Diri ba maopay ini nga hinungdan basi higugmaon naton an aton Harangdon nga Maglalarang ngan mahigugmaon nga Paratagana?—Ekles. 12:1.

10. Ano an sadang naton abaton ha tagana han Dios ha pagwara han sala ngan kamatayon?

¹⁰ Wawad-on han Dios an sala ngan kamatayon nga aton napapanunod kan Adan. (Roma 5:12) Oo, “iginpakita ha aton han Dios an iya gugma hini nga paagi: An Kristo namatay para ha aton samtang makasasala pa kita.” (Roma 5:8) Sigurado nga nagsasap-ay an aton gugma kan Jehova tungod kay ginpahinabo niya nga mapasaylo kita han aton mga sala kon tinuod kita nga mabinasulon ngan magpapakita hin pagtoo ha halad lukat ni Jesus.—Juan 3:16.

11, 12. Ano nga mga paglaom an iginhahatag ha aton ni Jehova?

¹¹ Hi Jehova naghahatag ha aton hin paglaom nga mabuhi ha waray kataposan. (Roma 15:13) Ini nga hatag han Dios nga paglaom nabulig ha aton basi mailob an mga pagsari ha aton pagtoo. An mga dinihogan nga napamatud-an nga ‘matinumanon bisan pa ha kamatayon tatagan han korona nga kinabuhi ha langit.’ (Pah. 2:10) Adton may tunan-on nga paglaom nga nagpapabilin nga matinumanon magpapahimulos hin waray kataposan nga mga bendisyon ha iginsaad nga Paraiso dinhi ha tuna. (Luc. 23:43) Ano an aton gin-aabat mahitungod hini nga paglaom? Diri ba naghahatag ini ha aton hin daku nga kalipay, kamurayawan, ngan gugma ha Humaratag han ‘tagsa nga maopay nga regalo ngan han tagsa nga perpekto nga hatag’?—San. 1:17.

¹² An Dios naghahatag ha aton hin makalilipay nga paglaom han pagkabanhaw. (Buh. 24:15) Natural la nga masubo gud kita kon may hinigugma kita nga namamatay, kondi tungod han paglaom nga pagkabanhaw, ‘diri kita nasusubo sugad han iba nga waray paglaom.’ (1 Tes. 4:13) Tungod han gugma, karuyag gud ni Jehova nga Dios nga banhawon an mga patay, labi na adton mga matinumanon, pariho han matadong nga hi Job. (Job 14:15) Hunahunaa an daku nga kalipay kon tapoon na naton an mga nabanhaw dinhi ha tuna. Hinigugma gud naton an aton langitnon nga Amay, nga naghahatag ha aton hinin makalilipay nga paglaom han pagkabanhaw!

13. Ano an pamatuod nga napaid gud an Dios ha aton?

¹³ Hi Jehova napaid gud ha aton. (Basaha an Salmo 34:6, 18, 19; 1 Pedro 5:6, 7.) Tungod kay maaram kita nga an aton mahigugmaon nga Dios andam pirme ha pagbulig hadton mga matinumanon ha iya, naabat kita hin seguridad tungod kay bahin kita han ‘kakarnerohan han iya panabsaban.’ (Sal. 79:13) Dugang pa, an gugma han Dios ha aton mas makikita pa gud kon tumanon na niya an iya mga saad pinaagi han Mesianiko nga Ginhadian. Katapos wad-on han iya pinili nga Hadi, hi Jesu-Kristo, an kamadarahog, pagtalumpigos, ngan karaotan dinhi ha tuna, bibendisyonan an masinugtanon nga katawohan hin waray kataposan nga kamurayawan ngan kahuraan. (Sal. 72:7, 12-14, 16) Diri ba ini nga mga paglaom naghahatag ha aton hin hinungdan basi higugmaon an aton mapinairon nga Dios ha aton bug-os nga kasingkasing, kalag, kusog, ngan hunahuna?—Luc. 10:27.

14. Ano an daku nga pribilehiyo nga iginhahatag ha aton han Dios?

 ¹⁴ Gintatagan kita ni Jehova hin daku nga pribilehiyo nga magin iya mga Saksi. (Isa. 43:10-12) Hinigugma naton an Dios tungod kay gintatagan kita niya hin higayon basi ipakita an aton pagsuporta ha iya pagkasoberano ngan isumat an tinuod nga paglaom ha mga tawo hinin masamok nga kalibotan. Dugang pa, iginsasangyaw naton nga may pagtoo ngan kompyansa an maopay nga sumat tungod kay iginbasar ito ha Pulong han tinuod nga Dios, nga an iya mga saad diri gud napapakyas. (Basaha an Josue 21:45; 23:14.) Oo, damu hinduro an aton hinungdan basi higugmaon hi Jehova. Kondi paonan-o naton maipapakita nga hinigugma naton hiya?

15. Paonan-o mabulig ha aton an pag-aram ngan pag-aplikar ha Pulong han Dios?

¹⁵ Magin maduruto ha pag-aram ngan ha pag-aplikar han Pulong han Dios. An pagbuhat hito nagpapakita nga hinigugma naton hi Jehova ngan karuyag gud naton nga an iya pulong magin ‘suga ha aton agian.’ (Sal. 119:105) Kon may-ada kita mga problema, maliliaw kita hinin mahigugmaon nga pasarig: “An ruba ngan an mabinasulon nga kasingkasing, O Dios, diri mo pagtamayon.” “An imo mahigugmaon nga kalooy, O Jehova, binikyaw ha akon. Ha kadam-an ha akon pamurubuot ha sulod ko, an imo mga pagliaw nakalipay ha akon kalag.” (Sal. 51:17; 94:18, 19) Hi Jehova nalolooy ha mga nag-aantos, ngan ito liwat an inaabat ni Jesus. (Isa. 49:13; Mat. 15:32) Kon gin-aadman naton an Biblia, mahibabaro kita mahitungod han gugma ni Jehova ha aton. Mabulig ini ha aton nga maghilarom an aton gugma ha iya.

16. Ha ano nga paagi nabulig an regular nga pag-ampo basi maghilarom an aton gugma ha Dios?

¹⁶ Regular nga mag-ampo ha Dios. Kon nag-aampo kita, nagigin mas duok kita ha Parapamati han pag-ampo. (Sal. 65:2) Kon inaabat naton nga ginbabaton han Dios an aton mga pag-ampo, mas naghihilarom an aton gugma ha iya. Pananglitan, bangin nakita naton nga diri niya gintutugotan nga sulayon kita labaw han aton maiilob. (1 Cor. 10:13) Kon nababaraka kita ngan nangangaro hin bulig kan Jehova pinaagi han sinsero nga pangamuyo, maieksperyensyahan naton an waray kapariho nga “kamurayawan han Dios.” (Fil. 4:6, 7) May mga panahon nga bangin nag-aampo kita hin hilom—pariho han ginbuhat ni Nehemia—ngan inaabat naton nga ginbabaton ito. (Neh. 2:1-6) Kon ‘padayon kita nga mag-aampo’ ngan makita naton kon paonan-o  ginbabaton ni Jehova an aton mga hangyo, mas maghihilarom an aton gugma ha iya. Salit kon umatubang kita hin mga pagsari ha aton pagtoo, makakasarig kita nga bubuligan kita niya nga makailob.—Roma 12:12.

17. Kon nahigugma kita ha Dios, ano an aton magigin panhunahuna ha pagtambong ha mga katirok?

¹⁷ Regular nga tumambong ha Kristiano nga mga katirok, asembleya, ngan mga kombensyon. (Heb. 10:24, 25) An mga Israelita nagkakatirok basi mamati ngan mahibaro mahitungod kan Jehova para magkaada hira daku nga pagtahod ha iya ngan tumanon an iya Balaud. (Deut. 31:12) Kon tinuod an aton gugma ha Dios, diri mabug-at an pagsunod ha iya kaburut-on. (Basaha an 1 Juan 5:3.) Salit diri gud naton sadang igbalewaray an pagtambong ha mga katirok. Sigurado nga diri gud naton karuyag nga mawara an aton siyahan nga gugma kan Jehova.—Pah. 2:4.

18. An aton gugma ha Dios nagpapagios ha aton nga buhaton an ano may kalabotan ha maopay nga sumat?

¹⁸ Madasigon nga isumat ha iba “an kamatuoran han maopay nga sumat.” (Gal. 2:5) An aton gugma ha Dios nagpapagios ha aton nga isumat an mahitungod han Mesianiko nga Ginhadian han iya hinigugma nga Anak, nga ‘masakay tungod han kamatuoran’ ha Armagedon. (Sal. 45:4; Pah. 16:14, 16) Makalilipay gud nga may bahin kita ha buruhaton nga panhimo hin disipulo pinaagi ha pagbulig ha mga tawo nga mahibaro mahitungod han gugma han Dios ngan han iya saad nga bag-o nga kalibotan!—Mat. 28:19, 20.

19. Kay ano nga sadang naton apresyaron an kahikayan ni Jehova ha pagmangno ha iya panon?

¹⁹ Ipakita an apresasyon ha kahikayan han Dios ha pagmangno ha iya panon. (Buh. 20:28) Tagana ni Jehova an Kristiano nga mga tigurang, nga pirme nagbubuhat para ha aton kaopayan. Pariho hira hin “lugar nga luluk-an tikang ha hangin, ngan usa nga sirongan tikang ha bagyo, sugad han nan-gagawas nga tubig dida ha lugar nga mamara, sugad han lambong han daku nga bato dida ha tuna nga guol.” (Isa. 32:1, 2) Mapasalamaton gud kita kon may nakakadtoan kita nga talwas nga lugar durante han makusog nga hangin o uran! Kon mapaso hinduro, mapasalamaton gud kita kon may-ada kita nasisirongan. Ini nga mga ehemplo nabulig ha aton nga makita nga an mga tigurang naghahatag ha aton hin ginkikinahanglan nga espirituwal nga bulig ngan pagdasig. Pinaagi ha pagsugot ha mga nangunguna ha aton, iginpapakita naton nga gin-aapresyar gud naton inin “regalo nga kalalakin-an” ngan nagpapamatuod ito nga hinigugma naton an Dios ngan hi Kristo, an Ulo han kongregasyon.—Efe. 4:8; 5:23; Heb. 13:17.

20. Kon hinigugma mo an Dios, ano an imo bubuhaton?

²⁰ Kon hilarom an imo gugma kan Jehova, magigin ‘magburuhat ka han pulong, ngan diri parapamati la.’ (Basaha an Santiago 1:22-25.) An usa nga “magburuhat” may pagtoo, ngan nagpapagios ito ha iya nga magin madasigon ha pagsangyaw ngan ha pakigbahin ha Kristiano nga mga katirok. Tungod kay hinigugma mo gud hi Jehova, susugton mo an iya ‘hingpit nga balaud,’ nga nag-uupod han ngatanan nga iya ginkikinahanglan ha imo.—Sal. 19:7-11.

21. An imo kinasingkasing nga mga pag-ampo mahimo igpariho ha ano?

²¹ An gugma kan Jehova magpapagios ha imo nga padayon nga mag-ampo ha iya hin kinasingkasing. May kalabotan ha adlaw-adlaw nga pagsunog hin insenso ilarom han Balaud nga kauyonan, hi salmista David nagkanta: “An akon pag-ampo mahibutang ha imo [Jehova] atubangan sugad hin insenso; An pag-igbaw han akon mga kamot sugad han halad han kagab-ihon.” (Sal. 141:2; Eks. 30:7, 8) Hinaot an imo mapainubsanon nga paghangyo, sinsero nga pangamuyo, ngan kinasingkasing nga pagdayaw ngan pagpasalamat ha Dios magin pariho han mahamot nga insenso nga nagsisimbolo han kinakarawat nga mga pag-ampo.—Pah. 5:8.

22. Ano aton hihisgotan ha sunod nga artikulo?

²² Hi Jesus nagsiring nga kinahanglan naton higugmaon an Dios pati an aton igkasi-tawo. (Mat. 22:37-39) Kon hinigugma naton hi Jehova ngan an iya mga prinsipyo, mabulig ini ha aton nga higugmaon ngan trataron hin maopay an aton igkasi-tawo. Ha sunod nga artikulo, aton hihisgotan kon ano an iginpapasabot hito.