1, 2. Kay ano nga napaid hi Pablo ha mga magluya?

KITA ngatanan usahay nanluluya. An trangkaso o allergy bangin magpaluya ha aton nga tungod hito makurian kita paghimo han aton adlaw-adlaw nga mga buruhaton. Yana hunahunaa nga may sakit ka, gin-iinantos mo ito diri la ha sulod hin usa o duha ka semana kondi ha sulod hin mga bulan na. Diri ka ba magpapasalamat kon an iba magpapakita ha imo hin pagpaid?

² Maaram hi apostol Pablo kon ano an inaabat han usa nga nanluluya. Naeksperyensyahan niya ito mismo tungod han mga problema nga nahitabo ha gawas ngan ha sulod han kongregasyon. Damu ka beses nga inabat niya nga diri na niya ito maiilob. (2 Cor. 1:8; 7:5) Ha pagpamalandong han iya kinabuhi ngan ha damu nga problema nga iya naeksperyensyahan sugad nga matinumanon nga Kristiano, hi Pablo nagsiring: “Hin-o an maluya, ngan diri ako nanluluya?” (2 Cor. 11:29) Ngan may kalabotan ha iba-iba nga membro han Kristiano nga kongregasyon nga iginpariho ha mga bahin han lawas, hi Pablo nagsiring nga adton “baga hin maluya, ha pagkamatuod, kinahanglanon.” (1 Cor. 12:22) Ano an iya iginpapasabot? Kay ano nga kinahanglan naton ipahiuyon an aton panhunahuna ha panhunahuna ni Jehova ha mga tawo  nga baga hin magluya? Ngan paonan-o kita magpapahimulos ha pagbuhat hito?

3. Ano an mahimo makaimpluwensya ha aton panhunahuna mahitungod hadton nanginginahanglan hin bulig ha kongregasyon?

³ Nagkikinabuhi kita ha kalibotan nga ginpapabilhan gud an pagin batan-on ngan makusog. Ginbubuhat han damu an ngatanan nga ira mahihimo basi maglampos, kasagaran nga diri na nira ginhuhunahuna an pagbati han mga magluya. Diri naton ginkukonsinter an sugad nga panggawi, kondi bangin diri kita maaram nga nagkakaada na ngay-an kita negatibo nga panhunahuna hadton nanginginahanglan pirme hin bulig, bisan ha sulod han kongregasyon. Kondi mahimo kita magkaada hin mas timbang nga panhunahuna, pariho ha panhunahuna han Dios.

4, 5. (a) Paonan-o an ilustrasyon ha 1 Corinto 12:21-23 mabulig ha aton nga masabtan an panhunahuna ni Jehova ha kaluyahan han tawo? (b)  Paonan-o kita magpapahimulos kon ginbubuligan naton an mga magluya?

⁴ May mahibabaroan kita kon paonan-o ginhuhunahuna ni Jehova an mga kaluyahan han tawo tikang ha ilustrasyon nga mababasa ha siyahan nga surat ni Pablo ha mga taga-Corinto. Ha kapitulo 12, ginpahinumdoman kita ni Pablo nga may gamit bisan adton diri makaruruyag pagkit-on o an pinakamaluya nga bahin han lawas han tawo. (Basaha an 1 Corinto 12:12, 18, 21-23.) An pipira nga natoo ha ebolusyon nasiring nga may mga bahin han lawas nga diri kinahanglanon. Kondi iginpapakita ha mga pagsaliksik mahitungod han lawas han tawo nga adton mga bahin han lawas nga ginhuhunahuna hadto nga waray gamit napamatud-an nga may importante nga nahihimo. * Pananglitan, may pipira nga nagruruhaduha kon may gamit gud ba an kamuyingking ha tiil; kondi nadiskobrehan han mga syentista yana nga daku an naibubulig hito basi magin balanse an bug-os nga lawas.

⁵ Ginpapabug-atan han ilustrasyon ni Pablo nga mapulsanon an ngatanan nga membro han Kristiano nga kongregasyon. Diri pariho kan Satanas nga karuyag nga tumoo kita nga waray kita pulos, gintatagad ni Jehova nga “kinahanglanon” an ngatanan niya nga surugoon, pati na adton baga hin maluya. (Job 4:18, 19) An paghunahuna hini mabulig ha aton nga magin malipayon ha aton nahihimo ha tagsa naton nga kongregasyon ngan han aton pagin bahin han organisasyon ni Jehova ha bug-os nga tuna. Pananglitan, hunahunaa an panahon nga ginbuligan mo an usa nga lagas nga nanginginahanglan. Bangin ginkaptan mo an iya kamot samtang naglalakat kamo basi diri hiya matumba. Diri ba kamo nga duha nagpahimulos hito? Oo, kon nabulig kita ha mga nanginginahanglan nalilipay kita hito, ngan nagigin mas pasensyoso kita, mahigugmaon, ngan hamtong. (Efe. 4:15, 16) An aton mahigugmaon nga Amay maaram nga an usa nga kongregasyon nga nagpapabili ha ngatanan nga membro hito, bisan pa han ira mga limitasyon, nagpapakita hin gugma ngan pagin timbang.

6. Ano an iginpapasabot ni Pablo han gin-gamit niya an mga pulong nga “maluya” ngan “magkusog”?

⁶ Makapainteres, ha surat ni Pablo ha mga taga-Corinto, gin-gamit niya an pulong nga “maluya” ha pag-unabi kon paonan-o ginhunahuna han mga diri-tumuroo an siyahan-siglo nga mga Kristiano ngan pati liwat ha paghulagway han iya inabat ha iya kalugaringon. (1 Cor. 1:26, 27; 2:3) Han gin-gamit niya an pulong nga “magkusog” ha paghulagway ha pipira nga Kristiano, diri niya iginpapasabot nga mas labaw hira kay ha iba. (Roma 15:1) Lugod karuyag sidngon niya nga adton mas hamtong nga mga Kristiano sadang magin pasensyoso ha mga diri pa marig-on ha kamatuoran.

7. Kay ano nga bangin mag-alang kita pagbulig hadton nanginginahanglan?

⁷ Kon aton ginbubuligan an “kablasanon,” diri la kay ginsusubad naton hi Jehova kondi nakakarawat  liwat naton an iya pag-uyon. (Sal. 41:1; Efe. 5:1) Kondi an paghunahuna hin negatibo ha mga nanginginahanglan usahay bangin magpugong ha aton ha pagbulig ha ira. O tungod kay diri kita maaram kon ano an aton isisiring, bangin mag-alang kita ngan lumikay na la ha usa nga may problema. Pananglitan, hi Cynthia * nga usa nga sister nga ginbayaan han iya bana, nagsiring: “Masakit gud kon ginlilikyan ka han kabugtoan o diri ginbubuhat han imo duok nga kasangkayan an imo ginlalaoman. Kon nakakaeksperyensya ka hin mga problema, ginkikinahanglan mo an bulig han mga tawo nga duok ha imo.” Maaram hi David han kadaan nga panahon kon ano an inaabat han usa nga ginlilikyan han mga tawo.—Sal. 31:12.

8. Ano an mabulig ha aton nga magin mas mapinairon?

⁸ Posible nga magigin mas mapinairon kita kon huhunahunaon naton nga an pipira han aton hinigugma nga kabugtoan nanluluya tungod han magkuri nga kahimtang—nag-aantos hin sakit, naukoy kaupod han ira diri-tumuroo nga mga kapamilya, o may depresyon. Bangin umabot an panahon nga maeksperyensyahan liwat naton an pariho nga kahimtang. Antes sumulod ha Tuna nga Iginsaad an mga Israelita, nga mga kablas ngan magluya hadto ha Ehipto, ginpahinumdoman hira nga diri nira sadang ‘patig-ahon an ira kasingkasing’ ha ira nag-aantos nga kabugtoan. Ginlalaoman ni Jehova nga ira bubuligan adton pobre ngan magluya.—Deut. 15:7, 11; Leb. 25:35-38.

9. Ano an sadang naton magin prayoridad kon nabulig kita hadton nakakaeksperyensya hin magkuri nga problema? Iilustrar.

⁹ Imbes nga maghukom o magsuspetsa, sadang kita maghatag hin espirituwal nga pagliaw ha mga nakakaeksperyensya hin magkuri nga problema. (Job 33:6, 7; Mat. 7:1) Ha pag-ilustrar: Kon an usa nga drayber hin motorsiklo naaksidente ngan gindara ha emergency room ha hospital, pagpipinakianhan ba anay hiya han mga doktor ngan nars basi hibaroan kon hin-o an angay basulon ha aksidente? Diri, lugod tatambalon dayon nira hiya. Ha pariho nga paagi, kon an aton igkasi-tumuroo nanluluya tungod han mga problema, an aton sadang magin prayoridad amo an pagbulig ha iya ha espirituwal.—Basaha an 1 Tesalonica 5:14.

10. Paonan-o an pipira nagigin “riko ha pagtoo” bisan kon ha pagkita naton baga hin maluya hira?

¹⁰ An pipira han aton kabugtoan baga hin maluya. Kondi kon aton huhunahunaon an ira kahimtang, bangin masantop naton nga diri ngay-an hira maluya. Hunahunaa an usa nga sister nga maiha na nga ginkukontra han iya mga kapamilya. Kon aton kikitaon baga hin maluya hiya, kondi diri ba hiya nagpapakita hin marig-on nga pagtoo ngan hin kaisog? Kon nakikita mo an usa nga nagsusolo nga nanay nga regular nga natambong ha mga katirok upod an iya mga anak, diri ka ba napaparig-on han iya pagtoo ngan pagkamapinadayunon? Kumusta man an mga tin-edyer nga nagpapabilin nga matinumanon ha kamatuoran bisan pa han magraot nga impluwensya ha eskwelahan? Kon mapainubsanon nga huhunahunaon naton ito ngatanan, masasantop naton nga ito nga kabugtoan “riko ha pagtoo” bisan kon baga hin magluya hira.—San. 2:5.

11, 12. (a) Ano an mabulig ha aton basi maipahiuyon an aton panhunahuna ha panhunahuna ni Jehova ha kaluyahan han tawo? (b) Ano an aton hibabaroan ha paagi han pagtratar ni Jehova kan Aaron?

¹¹ An pagpamalandong kon paonan-o gintratar ni Jehova an pipira han iya mga surugoon mabulig ha aton nga maipahiuyon an aton panhunahuna ha panhunahuna ni Jehova ha kaluyahan han mga tawo. (Basaha an Salmo 130:3.) Pananglitan, kon kaupod ka ni Moises han nangangatadongan hi Aaron kon kay ano nga naghimo hiya hin bulawan nga baka, ano daw la an imo huhunahunaon mahitungod ha mga pasangil ni Aaron? (Eks. 32:21-24) O ano an imo huhunahunaon ha paggawi ni Aaron han naimpluwensyahan ito han iya bugto nga hi Miriam nga pakarauton hi Moises tungod ha pag-asawa hin diri Israelita? (Num. 12:1, 2) Ano daw la an imo  magigin reaksyon han waray pasidunggi nira Aaron ngan Moises hi Jehova han milagroso nga naghatag Hiya hin tubig ha Meriba?—Num. 20:10-13.

¹² Mahimo unta sirotan dayon ni Jehova hi Aaron tungod hini nga mga sayop. Kondi maaram Hiya nga bisan kon may panahon nga nanluya hi Aaron, diri hiya maraot nga tawo. Baga hin nabuhat la niya ito tungod han makuri nga sitwasyon o naimpluwensyahan hiya han iba. Kondi han ginkompronta hiya ha iya sala, kinaburut-on nga ginkarawat niya ito pati an desisyon ni Jehova ha iya. (Eks. 32:26; Num. 12:11; 20:23-27) Nagpokus hi Jehova ha pagtoo ni Aaron ngan ha pagin mabinasulon hito. Paglabay hin mga siglo, hi Aaron ngan an iya katulinan nahinunumdoman pa gihapon sugad nga mga mahadlukon kan Jehova.—Sal. 115:10-12; 135:19, 20.

13. Paonan-o naton maipapahiuyon an aton panhunahuna ha panhunahuna ni Jehova ha kaluyahan han tawo?

¹³ Basi maipahiuyon an aton panhunahuna ha panhunahuna ni Jehova, sadang naton usisahon kon paonan-o naton gintatratar adton baga hin maluya. (1 Sam. 16:7) Pananglitan, ano an aton reaksyon kon an usa nga tin-edyer diri maaramon ha pagpili hin mga kaliawan o kon nagpapakita hiya hin maraot nga batasan? Imbes nga magin sobra ka kritiko, kay ano nga diri hunahunaon kon paonan-o naton hiya mabubuligan basi magin hamtong? Mahimo kita mag-una ha pagbulig ha usa nga nanginginahanglan, ngan kon bubuhaton naton ito, magigin mas masinabuton kita ngan mahigugmaon.

14, 15. (a) Ano an inabat ni Jehova han nawad-an hin kaisog hi Elias? (b) Ano nga leksyon an aton hibabaroan tikang ha eksperyensya ni Elias?

¹⁴ Mabubuligan liwat kita nga magkaada husto nga panhunahuna ha iba pinaagi ha pagtanding ha aton panhunahuna ha kon paonan-o gintratar ni Jehova an pipira han iya mga surugoon nga nanluya. Usa ha ira hi Elias. Bisan kon waray kahadlok nga gin-ayat niya an 450 nga propeta ni Baal, pinalagiw hiya kan Rayna Jesebel han hinbaroan niya an plano hito nga pagpatay  ha iya. Katapos magbinaktas hin mga 150 ka kilometro ngadto ha Beer-seba, nagbaktas na liwat hiya hin hirayo ngadto ha kamingawan. Tungod kay kapoy na ha pagbinaktas ilarom han mapaso nga sirak, an propeta sinirong ha usa nga kahoy ngan ‘nangaro nga mamatay na unta hiya.’—1 Hadi 18:19; 19:1-4.

¹⁵ Ano daw la an inabat ni Jehova han makita niya an iya matinumanon nga propeta nga nawawad-an na hin paglaom? Ginsalikway ba niya ito tungod kay nasubo ito hinduro ngan nawad-an hin kaisog? Waray gud! Ginkonsiderar ni Jehova an mga limitasyon ni Elias ngan nagpadara hiya hin anghel basi buligan ito. Duha ka beses nga gin-aghat han anghel hi Elias nga kumaon basi magkaada hiya igo nga kusog para maipadayon an iya paglakaton. (Basaha an 1 Hadi 19:5-8.) Oo, antes pa tagan ni Jehova hin instruksyon hi Elias, ginpamatian na niya an iya propeta ngan iginhatag an bulig nga ginkikinahanglan hito.

16, 17. Paonan-o naton masusubad an pagmangno ni Jehova kan Elias?

¹⁶ Paonan-o naton masusubad an aton mahigugmaon nga Dios? Diri kita sadang magdali-dali pagsagdon. (Prob. 18:13) Mas maopay kon ipapakita anay naton nga napaid kita hadton naghuhunahuna nga ‘diri hira sugad kadungganon’ tungod han ira kahimtang. (1 Cor. 12:23) Kon bubuhaton naton ito, mabubuligan naton hiya ha kon ano gud an iya ginkikinahanglan.

¹⁷ Tagda an eksperyensya ni Cynthia nga gin-unabi kanina. Han hiya ngan an iya duha nga anak ginbayaan han iya bana, pag-abat nira gin-abandona hira. Ano an ginbuhat han kabugtoan ha kongregasyon? Hiya nagsiring: “Katapos namon hira tawagan ngan sumatan han nahitabo, kumadto dayon hira ha balay paglabay hin 45 minutos. Nagtinangis hira. Waray kami nira bayai ha sulod hin duha o tulo ka adlaw. Tungod kay waray kami gana kumaon ngan emosyonal pa kami hinduro, ginpaukoy anay kami nira ha ira balay.” Posible nga nagpapahinumdom ito ha imo han iginsurat ni Santiago: “Kon may bugto nga lalaki o babaye nga waray iginbabado ngan igo nga pagkaon para hito nga adlaw, ngan usa ha iyo an nasiring ha ira: ‘Lakat nga mamurayawon, magkaada unta kamo mga bado ngan pagkaon ha kada adlaw,’ pero waray niyo hira tagi han ira ginkikinahanglan para ha ira lawas, ano an kapulsanan hito? Sugad man, an pagtoo nga waray mga buhat patay.” (San. 2:15-17) Tungod han napapanahon nga bulig han ira mga kakongregasyon, naparig-on hi Cynthia ngan an iya duha nga anak, salit nag-auxiliary payunir hira paglabay la hin unom ka bulan katapos hiton makasurubo nga panhitabo.—2 Cor. 12:10.

18, 19. (a) Paonan-o naton mabubuligan adton usahay nanluluya? (b) Hin-o an nagpapahimulos kon ginbubuligan naton an mga magluya?

¹⁸ Kon may-ada kita grabe nga sakit, nagkikinahanglan hin panahon basi matambal kita tikang hito. Ha pariho nga paagi, an usa nga Kristiano nga nanluluya tungod han nahimo nga sala o han mabug-at nga mga problema posible magkinahanglan hin panahon basi magin mahimsog utro ha espirituwal. Tinuod, kinahanglan parig-unon han aton igkasi-tumuroo an iya mismo pagtoo pinaagi han personal nga pag-aram, pag-ampo, ngan iba pa nga Kristiano nga mga buruhaton. Kondi padayon ba naton hiya nga bubuligan tubtob nga makabangon hiya? Ngan durante hito nga panahon, padayon ba nga ipapakita naton ha iya an aton gugma? Padayon ba nga bubuligan naton adton usahay nanluluya basi abaton nira nga ginpapabilhan ngan hinigugma naton hira?—2 Cor. 8:8.

¹⁹ Ayaw gud hingalimti nga kon ginbubuligan naton an aton kabugtoan, naieksperyensyahan naton an kalipay tungod ha paghatag. Napapatubo liwat naton an pagin mapinairon ngan mapailubon. Kondi may-ada pa ito dugang nga kapulsanan. An bug-os nga kongregasyon nagigin mas mahigugmaon. Labaw ha ngatanan, ginsusubad naton hi Jehova, nga nagpapabili ha tagsa nga indibiduwal. Oo, kita ngatanan may maopay nga mga hinungdan basi iaplikar an sagdon nga ‘buligi an mga magluya.’—Buh. 20:35.