Nabasa mo ba hin maopay an bag-o nga mga gowa han An Barantayan ngan The Watchtower? Kitaa kon mababaton mo an masunod nga mga pakiana:

Ano nga bahin han adlaw han Nisan 14 gin-iihaw an karnero han Paskua?

An pipira nga hubad han Biblia nasiring nga gin-iihaw ito “ha nagsisirom”—katunod han adlaw pero samtang malamrag pa. (Eks. 12:6)—12/15, pahina 18-19.

Ano nga mga prinsipyo ha Biblia an mabulig ha mga batan-on ha paghimo hin maaramon nga mga desisyon?

May-ada ito tulo nga prinsipyo. (1) Unaha an pagpamiling han Ginhadian han Dios ngan han iya katadongan. (Mat. 6:19-34) (2) Pagin malipayon ha pag-alagad ha iba. (Buh. 20:35) (3) Pahimulusi an pag-alagad kan Jehova samtang batan-on ka pa. (Ekles. 12:1)—1/15, pahina 19-20.

Ano an upat nga mangangabayo nga nagios na tikang pa han 1914?

Hi Jesus, sugad nga nasakay ha busag nga kabayo, ginios basi paiwason ha langit hi Satanas ngan an iya mga demonyo. An nasakay ha pula nga kabayo nagsisimbolo ha girra nga nagin hinungdan han pag-antos han mga tawo. An nasakay ha itom nga kabayo nagsisimbolo ha gutom. An nasakay ha duason nga kabayo nagdadara hin kamatayon pinaagi hin peste, nga minilyon an namamatay tungod hito. (Pah. 6:2-8)—2/1-E, pahina 6-7.

San-o mahitatabo “an kasal han Kordero”? (Pah. 19:7)

“An kasal han Kordero” mahitatabo kon matapos na an pakig-away han Hadi nga hi Jesu-Kristo, karuyag sidngon, kon mabungkag na an Babilonya nga Gamhanan ngan matapos na an girra ha Armagedon.—2/15, pahina 10.

Kay ano nga an mga Judio ha panahon ni Jesus ‘naghinulat’ ha Mesias? (Luc. 3:15)

Diri kita sigurado kon pariho ha aton an pagsabot han siyahan-siglo nga mga Judio ha tagna ni Daniel mahitungod han Mesias. (Dan. 9:24-27) Kondi, posible nga nabatian nira an ginsiring han anghel ha pipira nga paraataman han karnero o an ginsiring han propetisa nga hi Ana han nakita niya ha templo an minasus-an nga hi Jesus. May mga astrologo liwat nga nagpinamiling ha “natawo nga hadi han mga Judio.” (Mat. 2:1, 2) Ha urhi, hi Juan nga Parabaptis nagsiring nga ha diri mag-iiha, maabot na an Kristo.—2/15, pahina 26-27.

Paonan-o naton malilikyan nga an aton Oo magin Diri? (2 Cor. 1:18)

Tinuod, may mga panahon nga baga hin waray gud kita mahihimo basi matuman naton an aton saad. Kondi kon nagsaad kita o naghimo hin pakigsabot, sadang naton buhaton an ngatanan basi tumanon ito.—3/15, pahina 32.

Paonan-o naton maaatohan nga masulay ha pagkita hin pornograpiya?

An tulo nga paagi nga makakabulig amo an (1) Lumingiw dayon kon may makita kita nga malaw-ay. (2) Bantayan naton an aton hunahuna pinaagi ha pagpokus ha positibo nga mga butang ngan ha pag-ampo ha Dios. (3) Bantayan naton an aton pitad pinaagi ha paglikay hin mga salida o Web site nga may maglaw-ay nga kiritaon.—4/1-E, pahina 10-12.

Ano an diri ginlalaoman nga mga resulta kon bayaan han usa nga Kristiano an iya pamilya basi magtrabaho ha abroad?

Kon burublag an pamilya, an mga anak mahimo maapektohan ha emosyon ngan mag-antos hin kadaot ha moral. Bangin diri na nira karuyag nga makaupod an ira (mga) kag-anak. Ngan an mag-asawa nga hirayo ha usa kag usa mahimo masulay nga magbuhat hin imoral.—4/15, pahina 19-20.

Kay ano nga ginbabari an mga bitiis han mga kriminal nga ginbibitay?

Ginbibitay han mga Romano an pipira nga kriminal ha usa nga kahoy. Naghangyo an mga Judio nga barion an mga bitiis han mga kriminal nga nakabitay ha sapit ni Jesus. Tungod hito, an mga kriminal makukurian ngan mamamatay dayon hira. Salit diri na nira kinahanglan magpabilin ha kahoy ha bug-os nga gab-i. (Deut. 21:22, 23)—5/1-E, pahina 11.

Ano an upat nga pakiana nga sadang naton hinumdoman kon nakikiistorya kita ha mga tawo ha aton ministeryo?

Hin-o an akon kaistorya? Diin ko hira ginkakaistorya? San-o an pinakamaopay nga oras ha pakiistorya ha ira? Paonan-o ko hira sadang kaistoryahon?—5/15, pahina 12-15.

Mationan-o kamakamaratay an pagsigarilyo?

Durante han naglabay nga siglo, 100,000,000 nga tawo an namatay tungod hito. Hinin bag-o la, mga 6,000,000 an namatay ha sulod hin usa ka tuig.—6/1-E, pahina 3.