1. Pag-unabi hin asoy ha Biblia nga nagpapakita kon paonan-o ginlimbongan han pipira nga katawohan han Dios an ira kalugaringon. (Kitaa an retrato hini nga pahina.)

USA ka aga, an Hitaas nga Saserdote nga hi Aaron natukdaw ha ganghaan han tabernakulo ni Jehova, may kapot hiya nga burutangan hin kalayo nga may insenso. Ha iya hirani makikita hi Kore ngan an 250 nga kalalakin-an nga naghahalad liwat hin insenso kan Jehova, gamit an ira tagsa-tagsa nga burutangan hin kalayo. (Num. 16:16-18) Ha siyahan nga pagkita, baga hin hira ngatanan maunungon nga magsiringba ni Jehova. Kondi diri pariho kan Aaron, hi Kore ngan an iya mga parasuporta hambog nga mga rebelde nga nangangalimbasog pag-agaw han pagkasaserdote. (Num. 16:1-11) Ginlimbongan nira an ira kalugaringon ha paghunahuna nga kakarawaton han Dios an ira pagsingba. Kondi nakakainsulto ito kan Jehova, nga nakakabasa han mga kasingkasing ngan nakakakita han ira pagkahipokrito.—Jer. 17:10.

2. Ano an ginsiring ni Moises nga mahitatabo, ngan paonan-o ito natuman?

² Ha adlaw antes hito nga hitabo, hi Moises nagsiring: “Ha aga ipakikita ni Jehova kon hin-o an iya.” (Num. 16:5) Iginpakita gud man ni Jehova kon hin-o an iya tinuod nga mga magsiringba ngan kon hin-o an nagpapakunokuno han “inulyab an kalayo tikang kan Jehova, ngan  tinilap [hi Kore ngan] an duha ka gatos kalim-an nga tawo nga naghalad han insenso.” (Num. 16:35; 26:10) Kondi waray pataya ni Jehova hi Aaron. Iginpakita niya nga hi Aaron an tinuod nga saserdote ngan tinuod nga iya magsiringba.—Basaha an 1 Corinto 8:3.

3. (a) Ano an nahitabo ha panahon ni apostol Pablo? (b) Ano an aton mahibabaroan may kalabotan ha ginbuhat ni Jehova ha mga rebelde ha panahon ni Moises?

³ Paglabay hin mga 1,500 ka tuig, nagkaada hin pariho hito nga panhitabo ha panahon ni apostol Pablo. Ginkarawat han pipira nga nag-aangkon nga mga Kristiano an buwa nga mga katutdoan, kondi padayon pa gihapon hira nga nakikig-upod ha kongregasyon. Ha siyahan nga pagkita, ini nga mga apostata baga hin waray kaibahan ha iba nga membro han kongregasyon. Kondi ha pagkamatuod, pariho hira hin mapintas nga mga lobo, ngan “gindadaot nira an pagtoo han iba.” (2 Tim. 2:16-18) Nakikita ba hira ni Jehova? Oo. Maaram hi Pablo han ginbuhat han Dios ha mga rebelde—kan Kore ngan ha mga parasuporta hito—salit sigurado hiya nga maaram gud hi Jehova han nahitatabo. May kalabotan hini, aton hisgotan an usa nga makapainteres nga teksto ngan kitaon naton kon ano nga praktikal nga mga leksyon an aton mahibabaroan tikang hito.

4. Ha ano nakakasiguro hi Pablo, ngan ano an iya ginsiring kan Timoteo?

⁴ Sigurado hi Pablo nga maaram hi Jehova hadton nagpapakunokuno nga nagsisingba ha Iya, ngan kombinsido liwat hiya nga kilala ni Jehova adton masinugtanon ha Iya. Makikita ito ha ginsiring ni Pablo ha iya giniyahan nga surat kan Timoteo. Katapos isaysay ni Pablo an espirituwal nga peligro nga ginpapahinabo hini nga mga apostata ha pipira dida ha kongregasyon, hiya nagsurat: “Bisan pa hito, padayon nga natindog an marig-on nga pundasyon han Dios nga may nakasurat sugad nga selyo: ‘Kilala ni Jehova an iya mga gintatag-iya,’ ngan: ‘Sadang isalikway han ngatanan nga natawag ha ngaran ni Jehova an pagkadiri-matadong.’”—2 Tim. 2:18, 19.

5, 6. Kay ano nga makapainteres an paggamit ni Pablo han mga pulong nga “marig-on nga pundasyon han Dios”? Ano an epekto kan Timoteo hito nga mga pulong?

⁵ Ano an makapainteres ha ginsiring ni Pablo hini nga teksto? Ha Biblia, ini la an nag-unabi han mga pulong nga “marig-on nga pundasyon han Dios.” Ginagamit han Biblia an pulong nga “pundasyon” ha paghulagway hin iba-iba nga butang, sugad han literal nga Jerusalem nga sentro nga syudad han kadaan nga Israel. (Sal. 87:1, 2) Iginpariho liwat ha usa nga pundasyon an papel ni Jesus ha katuyoan ni Jehova. (1 Cor. 3:11; 1 Ped. 2:6) Ano an ginhuhunahuna ni Pablo han iginsurat niya an mahitungod han “marig-on nga pundasyon han Dios”?

⁶ Han gin-unabi ni Pablo an “marig-on nga pundasyon han Dios,” iya liwat ginkotar an ginsiring ni Moises mahitungod kan Kore ngan han mga parasuporta hito nga mababasa ha Numeros 16:5. Matin-aw nga an ginhihisgotan dinhi ni Pablo amo an mga panhitabo ha panahon ni Moises basi dasigon ngan pahinumdumon hi Timoteo nga nakikita ni Jehova an rebelyoso nga mga ginbubuhat ngan kaya Niya pugngan ito. Sugad la nga waray mapugngi ni Kore an katuyoan ni Jehova, diri liwat ito mapupugngan han mga apostata ha kongregasyon. Waray idetalye ni Pablo kon ano an ginsisimbolohan han “marig-on nga pundasyon han Dios.” Kondi an iya ginsiring sigurado nga nakabulig kan Timoteo nga sumarig ha mga paagi ni Jehova.

7. Kay ano nga makakasiguro kita nga hi Jehova padayon nga magbubuhat hin matadong ngan pirme magigin matinumanon?

⁷ An hitaas nga mga prinsipyo ni Jehova diri gud nagbabag-o. “An sagdon ni Jehova natukdaw hin marig-on ha waray kataposan, an mga hunahuna han iya kasingkasing ngadto ha ngatanan nga mga katulinan,” siring han Salmo 33:11. Gin-uunabi ha iba nga teksto nga magpapadayon ha waray kataposan an kan Jehova pagmando, mahigugmaon nga kalooy, pagkamatadong, ngan pagin matinumanon. (Eks. 15:18; Sal. 100:5; 112:9) An Malakias 3:6 nasiring: “Ako, hi Jehova, diri nababalhin.” Nasiring liwat an Santiago 1:17 nga hi  Jehova “diri nag-iiba o nagbabag-o, diri pariho han nagbuburobag-o nga mga lambong.”

8, 9. Ano nga leksyon an aton hibabaroan tikang ha “selyo” ha ilustrasyon ni Pablo?

⁸ An ilustrasyon nga gin-unabi ni Pablo ha 2 Timoteo 2:19 naghuhulagway hin usa nga pundasyon nga may-ada mensahe dida hito, sugad hin nakaukit ito nga selyo. Ha kadaan nga panahon, komon la an pagbutang hin nakaukit nga mensahe ha pundasyon han usa nga bilding, bangin basi ipakilala kon hin-o an nagtukod hito o kon hin-o an nagtatag-iya hito. Hi Pablo an siyahan nga parasurat han Biblia nga gumamit hin sugad nga ilustrasyon. * An selyo nga makikita ha “marig-on nga pundasyon han Dios” may-ada duha nga kapahayagan. Siyahan, “Kilala ni Jehova an iya mga gintatag-iya.” Ikaduha, “Sadang isalikway han ngatanan nga natawag ha ngaran ni Jehova an pagkadiri-matadong.” Nagpapahinumdom ini ha aton han ginsisiring han Numeros 16:5.—Basaha.

⁹ Ano nga leksyon an aton hibabaroan tikang ha “selyo” ha ilustrasyon ni Pablo? Para ha mga gintatag-iya han Dios, an mga suruklan ngan prinsipyo ni Jehova iginbasar ha duha nga importante nga kamatuoran: (1) Hinigugma ni Jehova adton maunungon ha iya, ngan (2) nangangalas hi Jehova ha pagkadiri-matadong. Ano an koneksyon hini nga leksyon ha apostasya nga nahitatabo ha sulod han kongregasyon?

10. Paonan-o nakaapekto ha magtinumanon nga Kristiano ha panahon ni Pablo an ginbubuhat han mga apostata?

¹⁰ Hi Timoteo ngan an iba pa nga magtinumanon posible nga nabaraka ha ginbubuhat han mga apostata nga kaupod nira. Bangin ginkwestyon han pipira nga Kristiano kon kay ano nga gintutugotan ini nga mga apostata nga magpabilin ha kongregasyon. Bangin nagruhaduha pa ngani an magtinumanon kon nakikita gud ba ni Jehova kon hin-o adton maunungon ha iya ngan kon hin-o adton mga apostata nga nagpapakunokuno nga nagsisingba ha iya.—Buh. 20:29, 30.

11, 12. Paonan-o an surat ni Pablo nagparig-on ha pagtoo ni Timoteo?

¹¹ Sigurado nga an surat ni Pablo nagparig-on ha pagtoo ni Timoteo. Nagpahinumdom ito ha iya kon ano an nahitabo han gin-uyonan ni Jehova an matinumanon nga hi Aaron ngan han ginbuhayhag, ginsalikway, ngan ginbungkag an apostata nga hi Kore ngan an mga kaupod hito. Sugad hin nasiring hi Pablo nga bisan kon may-ada mga nagpapakunokuno nga mga Kristiano nga kaupod nira, kilala ni Jehova kon hin-o an iya mga gintatag-iya, sugad han iya ginbuhat ha panahon ni Moises.

 ¹² Hi Jehova diri gud nagbabag-o; masasarigan hiya. Nangangalas hiya ha pagkadiri-matadong, ngan ha itinanda nga panahon sisirotan niya an diri-mabinasulon nga magburuhat hin maraot. Sugad nga “natawag ha ngaran ni Jehova,” napahinumdoman liwat hi Timoteo nga kinahanglan niya isalikway an maraot nga impluwensya han nagpapakunokuno nga mga Kristiano. *

13. Ha ano kita makakasiguro?

¹³ An giniyahan nga mga pulong ni Pablo mahimo liwat magparig-on ha aton pagtoo. Paonan-o? Maaram gud hi Jehova nga maunungon kita ha iya. Pero diri la kay basta maaram hiya, interesado gud hiya ha iya mga gintatag-iya. An Biblia nasiring: “An mga mata ni Jehova nadalagan ngadto nganhi sahid an bug-os nga kalibotan, ha pagpakita ha iya ngahaw nga makusog ha ngaran nira kan kanay kasingkasing hingpit tipakadto ha iya.” (2 Kron. 16:9) Salit makakasiguro kita nga diri gud makakawang an anoman nga aton ginbubuhat para kan Jehova “tikang ha limpyo nga kasingkasing.”—1 Tim. 1:5; 1 Cor. 15:58.

14. Ano an klase hin pagsingba nga diri ginkukonsinter ni Jehova?

¹⁴ Diri ginkukonsinter ni Jehova an nagpapakunokuno nga pagsingba. An iya mga mata “nadalagan ngadto nganhi sahid an bug-os nga kalibotan,” salit nakikita niya adton kasingkasing nga diri “hingpit tipakadto ha iya.” “An malinarisnon [o malimbong] mangil-ad kan Jehova,” siring han Proberbios 3:32, sugad han usa nga nagpapakunokuno nga masinugtanon pero patago nga nagbubuhat hin sala. Bisan kon bangin malimbongan niya an iba ha sulod hin pipira ka panahon, ginsisiguro ni Jehova nga ‘diri mauswag an [usa nga] nagtatabon han iya mga pagtalapas’ tungod kay hi Jehova makagarahum ha ngatanan ngan matadong.—Prob. 28:13; basaha an 1 Timoteo 5:24; Hebreo 4:13.

15. Ano an sadang naton likyan, ngan kay ano?

¹⁵ Kadam-an han katawohan ni Jehova kinasingkasing nga nahigugma ha iya. Talagsa gud la an aada ha kongregasyon nga tutuyoon nga magin malimbungon ha iya pagsingba kan Jehova. Pero kon nahitabo ito ha panahon ni Moises ngan ha kongregasyon ha siyahan-siglo nga mga Kristiano, puydi liwat ito mahitabo yana. (2 Tim. 3:1, 5) Kondi karuyag sidngon ba hini nga sadang naton pagruhaduhaan an pagkamaunungon kan Jehova han aton mga igkasi-Kristiano? Diri gud! Sayop gud kon magsususpetsa kita ha aton kabugtoan. (Basaha an Roma 14:10-12; 1 Corinto 13:7.) Dugang pa, makakadaot ha aton espirituwalidad kon pagruruhaduhaan naton an integridad han aton kabugtoan.

16. (a) Ano an mahimo buhaton han kada tagsa ha aton basi malikyan an pagpakunokuno ha aton kasingkasing? (b) Ano nga mga leksyon an aton hibabaroan ha kahon nga “Padayon nga Usisaha . . . Padayon nga Pamatud-i . . .”?

¹⁶ An tagsa nga Kristiano sadang ‘mag-usisa han iya mga buhat.’ (Gal. 6:4) Tungod kay diri kita hingpit, may tendensya kita nga magkaada sayop nga motibo ha aton pagsingba kan Jehova. (Heb. 3:12, 13) Salit ha panapanahon, mahimo naton usisahon an aton mga motibo ha pag-alagad kan Jehova. Mahimo naton pakianhan an aton kalugaringon: ‘Ginsisingba ko ba hi Jehova tungod kay hinigugma ko hiya ngan ginkikilala ko an iya pagkasoberano? O mas importante ba ha akon an mga bendisyon nga akon mapapahimulosan ha Paraiso?’ (Pah. 4:11) Sigurado nga magpapahimulos kita ngatanan kon aton uusisahon an aton mga ginbubuhat ngan isasalikway an anoman nga pagpakunokuno ha aton kasingkasing.

17, 18. Kay ano nga sadang magin sinsero an aton pagsingba kan Jehova?

¹⁷ Samtang nangangalimbasog kita nga magin sinsero ha aton pagsingba, damu nga kapulsanan an aton nakakarawat. “Bulahan an tawo nga waray ni Jehova isipa hin karat-an, ngan dida hiton  iya espiritu waray limbong,” siring han salmista. (Sal. 32:2) Oo, kon wawad-on naton an anoman nga pagpakunokuno ha aton kasingkasing, magigin mas malipayon kita yana ngan bug-os nga magigin malipayon kita ha tidaraon.

¹⁸ Ha itinanda nga panahon, ibubuhayhag ni Jehova an ngatanan nga nagbubuhat hin karaotan o may doble nga pagkinabuhi. Ipapakita niya an “ginkakalainan han matadong ngan han maraot, han ginkakalainan niya nga nag-aalagad ha Dios ngan niya nga diri nag-aalagad ha iya.” (Mal. 3:18) Samtang diri pa ito naabot, makaparig-on an paghibaro nga an “mga mata ni Jehova nagkikita ha mga matadong, ngan an iya mga talinga namamati ha ira pangamuyo.”—1 Ped. 3:12.