HI Katherine nagdaku ha United States, ngan han 16 anyos hiya nabawtismohan hiya sugad nga usa han mga Saksi ni Jehova. Maduruto hiya ha ministeryo kondi gutiay la an namamati ha mensahe han Ginhadian ha ira teritoryo. Hiya nagsiring: “May nababasa ako nga mga eksperyensya mahitungod ha mga tawo nga nag-ampo ha Dios nga unta may bumulig ha ira nga makilala Hiya. Karuyag ko gud makabiling hin tawo nga pariho hito, kondi waray gud ito mahitabo.”

Katapos han pipira ka tuig nga pagsinangyaw hito nga teritoryo, nahunahuna ni Katherine nga puydi hiya bumalhin ha lugar diin an mga tawo mas makinarawaton ha mensahe han Ginhadian. Pero nagruhaduha hiya kon kaya ba niya ito. Ha bug-os niya nga kinabuhi, makausa pa la hiya mahibulag ha iya pamilya—ngan duha la ito ka semana—pero adlaw-adlaw namimingaw hiya ha ira. Kondi karuyag gud niya maeksperyensyahan an kalipay ha pagbulig hadton namimiling kan Jehova. Katapos ikonsiderar kon diin nga lugar hiya puydi bumalhin, nagsurat hiya ha sanga nga opisina ha Guam ngan nakakarawat hiya han impormasyon nga iya ginkikinahanglan. Han Hulyo 2007, ha edad nga 26, hi Katherine bumalhin ha Saipan, usa nga isla ha Kadagatan han Pasipiko, nga mga 6,000 ka milya (10,000 ka kilometro) tikang ha iya natawohan nga lugar. Ano an resulta han iya pagbalhin?

Waray pag-iha katapos umabot ni Katherine ha iya bag-o nga kongregasyon, nakilala niya hi Doris, nga mga 45 anyos, nga naruyag magpa-Bible study. Katapos nira pag-adman an siyahan nga tulo nga kapitulo han Igintututdo han Biblia nga libro, nabaraka hi Katherine. “Maopay nga estudyante hi Doris, ngan diri ko karuyag nga makarag ito,” siring niya. “Waray pa gud ako makagdumara hin regular nga Bible study hadto salit inabat ko nga kinahanglan eksperyensyado nga sister an mag-study ha iya, mas maopay kon kaedad niya.” Igin-ampo ni Katherine kan Jehova nga makabiling unta hiya hin angayan nga sister nga mag-i-study kan Doris. Katapos, nagdesisyon hiya nga sumatan hi Doris mahitungod hito.

“Antes ko pa maisumat ito,” siring ni Katherine, “ginsidngan ako ni Doris nga may isusumat hiya ha akon nga problema. Katapos ko hiya pamatian, igin-istorya ko ha iya kon paonan-o ako ginbuligan ni Jehova nga atubangon an pariho hito nga sitwasyon. Nagpasalamat hiya ha akon.” Katapos, hi Doris nagsiring kan Katherine: “Ginagamit ka ni Jehova basi buligan ako. Han siyahan nga bumisita ka ha akon, pipira na ka oras nga ginbibinasa ko an Biblia. Nagtitinangis ako samtang naghahangyo ha Dios nga unta may bumulig ha  akon basi masabtan ko an Biblia. Waray pag-iha, nagtuktok ka ha akon purtahan. Ginbaton ni Jehova an akon pag-ampo!” Nagtatangis hi Katherine kon nahinunumdoman niya iton makalilipay nga panhitabo. Hiya nagsiring: “An mga pulong ni Doris amo an baton han akon pag-ampo. Iginpakita ni Jehova nga kaya ko igpadayon an pagdumara han pag-aram.”

Han 2010, nabawtismohan hi Doris, ngan yana damu na an iya Bible study. Hi Katherine nagsiring: “Mapasalamaton gud ako nga natuman an akon maiha na nga hingyap nga mabuligan an usa nga sinsero nga tawo nga magin surugoon ni Jehova!” Yana, hi Katherine malipayon nga nag-aalagad sugad nga espesyal payunir ha isla han Kosrae ha Pasipiko.

Sobra 100 nga kabugtoan nga tikang ha iba nga nasud (nag-iedad hin 19 tubtob 79) an nag-aalagad ha Micronesia, ha mga lugar nga mas daku an panginahanglan. An gin-aabat hinin madasigon nga kabugtoan makikita ha ginsiring ni Erica, nga binalhin ha Guam han 2006 ha edad nga 19. Hiya nagsiring: “Makalilipay gud an pagpayunir ha teritoryo diin an mga tawo uhaw ha kamatuoran. Mapasalamaton gud ako nga ginbuligan ako ni Jehova nga makag-alagad ha iya hini nga paagi. Amo ini an pinakamaopay nga pagkinabuhi!” Yana, hi Erica malipayon nga nag-aalagad sugad nga espesyal payunir ha Ebeye ha Marshall Islands. Syempre, may mga ayat liwat an pag-alagad ha iba nga nasud. Hisgotan naton an tulo hito ngan kitaon naton kon paonan-o ito gin-atubang han mga binalhin ha Micronesia.

Paagi han Pagkinabuhi. Han umabot ha Palau hadton 2007 an 22 anyos nga hi Simon, hinbaroan dayon niya nga gutiay gud la an iya magigin kità kon itanding ha iya kità ha ira lugar ha England. “Kinahanglan mahibaro ako nga diri paliton an bisan ano la nga akon karuyag. Yana, ginhuhunahuna ko anay hin maopay an pagkaon nga akon papaliton, ngan namimiling liwat ako hin barato. Kon may gamit ako nga naguguba, namimiling ako hin mga piyesa nga segunda mano ngan napabulig ha iba nga maaram mag-ayad hito.” Ano an epekto ha iya hinin simple nga pagkinabuhi? Hi Simon nagsiring: “Nakabulig ini ha akon nga mahibaro kon ano gud la an kinahanglanon ha kinabuhi ngan kon paonan-o magkikinabuhi bisan kon gutiay la an akon kità. Inabat ko gud an mahigugmaon nga bulig ni Jehova ha damu nga kahimtang. Ha sulod hin pito ka tuig nga akon pag-alagad dinhi, pirme gud ako may pagkaon ngan ginkakaturogan.” Oo, ginbubuligan ni Jehova adton nagpapasimple han ira kinabuhi tungod kay karuyag nira unahon an pamiling han Ginhadian.—Mat. 6:32, 33.

Kamingaw. Hi Erica nagsiring: “Duok gud ako ha akon pamilya, ngan nababaraka ako kay bangin maapektohan an akon ministeryo tungod han kamingaw.” Ano an iya ginbuhat basi maiandam an iya kalugaringon? “Antes ako bumalhin, nagbasa ako hin mga artikulo ha Barantayan may kalabotan ha kamingaw. Nakabulig gud ini ha akon nga maiandam an akon kasingkasing basi maatubang ito nga ayat. Ha usa nga artikulo, ginpasarig han usa nga nanay an iya anak mahitungod han pagmangno ni Jehova, nagsiring ito, ‘mas maopay mag-ataman hi Jehova kay ha akon.’ Naparig-on gud ako hito.” Hi Hannah ngan an iya bana nga hi Patrick, bumalhin  ha Majuro ha Marshall Islands. Basi malamposan ni Hannah an kamingaw, nagpokus hiya ha mga kabugtoan ha ira kongregasyon. Hiya nagsiring: “Padayon ako nga nagpapasalamat kan Jehova ha bug-os-kalibotan nga pagminagburugto tungod kay pamilya ko na gihapon hira. Kon waray an ira mahigugmaon nga bulig, diri gud ako makakag-alagad ha lugar nga daku an panginahanglan.”

Pagpahiuyon ha bag-o nga kasangkayan. “Kon naabot ka ha bag-o nga nasud, haros iba an ngatanan,” siring ni Simon. “Usahay nami-miss ko mag-istorya hin pataraw-an nga masasabtan han ngatanan.” Hi Erica nagsiring: “Ha tinikangan, pag-abat ko baga hin diri ako gintatagad, pero nakabulig ito ha akon nga usisahon an motibo han akon pagbalhin. Binalhin ako diri para ha akon kalugaringon nga kaopayan kondi basi magbuhat hin dugang pa para kan Jehova.” Hiya nagpadayon: “Inabot an panahon, nagkaada ako mag-opay nga kasangkayan nga akon gud ginpapabilhan.” Hi Simon nangalimbasog nga mahibaro pagyakan hin Palauan, nakabulig ito ha iya nga ‘abrihan hin haluag an iya kasingkasing’ ha mga kabugtoan didto. (2 Cor. 6:13) Naruyagan gud hiya han kabugtoan tungod han iya pangalimbasog nga mahibaro han ira yinaknan. Oo, kon magbibinuligay an ngatanan nga kabugtoan—adton bumalhin ngan ginbalhinan—magpapahimulos hira hin duok nga pakigsangkay ha sulod han kongregasyon. Ano pa nga mga bendisyon an napapahimulosan hadton malipayon nga nagsasakripisyo ha pag-alagad ha lugar nga daku an panginahanglan?

Hi apostol Pablo nagsiring: “Hiya nga nagsasabwag hin damu mag-aani liwat hin damu.” (2 Cor. 9:6) Ini nga prinsipyo naaplikar gud ha kabugtoan nga nagpapahaluag ha ira ministeryo. Ano an damu nga kapulsanan nga ira ‘gin-aani’ ha Micronesia?

Ha Micronesia, damu pa gihapon an nakarawat hin pag-aram ha Biblia, ngan nakikita mismo hadton mga bumalhin kon paonan-o nag-uuswag ha espirituwal an damu nga nag-aaram ngan nag-aaplikar han mga kamatuoran ha Pulong han Dios. Hira Patrick ngan Hannah nagsangyaw liwat ha Angaur, usa nga gutiay nga isla nga 320 la an naukoy. Paglabay hin duha ka bulan nga ira pagsinangyaw didto, may nakilala hira nga usa nga nagsusolo nga nanay. Dayon ito nagpa-Bible study, ginkarawat an kamatuoran, ngan naghimo hin daku nga mga pagbag-o ha iya kinabuhi. Hi Hannah nagsiring: “Kada katatapos han amon pag-aram, kon tipauli na kami nga mag-asawa sakay han amon bisikleta, nagkikitaay kami ngan nasiring: ‘Salamat Jehova!’” Hi Hanna nagpadayon: “Maaram ako nga ha anoman nga paagi, igpapahirani ni Jehova ha iya ini nga babaye, pero tungod kay nag-alagad kami ha lugar nga daku an panginahanglan, nabilngan namon ngan nabuligan inin maaghop nga tawo nga mahibaro kan Jehova. Usa ini han pinakamakalilipay nga panhitabo ha amon kinabuhi!” Sugad han ginsiring hi Erica, “kon ginbubuligan mo an usa nga makilala hi Jehova, maieksperyensyahan mo an waray kapariho nga kalipay!”

Damu pa nga nasud an nanginginahanglan hin dugang nga magwarali han Ginhadian. Mahimo ka ba bumalhin hito nga mga lugar? Pag-ampo kan Jehova nga parig-unon an imo hingyap nga pauswagon an imo ministeryo. Ig-istorya ini ha mga tigurang ha iyo kongregasyon, ha paramangno han sirkito, o hadton nakapribilehiyo ha pag-alagad ha usa nga nasud nga nanginginahanglan hin bulig. Kon nagpaplano ka, pagsurat ha sanga nga opisina nga nanginginano ha teritoryo nga karuyag mo balhinan, ngan pangaro hin dugang nga impormasyon. * Posible nga magin usa ka liwat hadton yinukot nga kabugtoan—batan-on ngan lagas, solo o inasaw-an—nga malipayon nga nagsasakripisyo ha pag-alagad ngan nakakaeksperyensya hin kalipay tungod ha ‘pag-ani hin damu.’