HI Pedro nagtinangis tungod han duro nga kasubo katapos niya ignigar hi Jesus. Bisan kon kinahanglan pa niya mangalimbasog nga parig-unon utro an iya espirituwalidad, karuyag ni Jesus nga gamiton hiya basi buligan an iba. Salit ginsidngan hiya ni Jesus: ‘Pagbalik mo, parig-ona an imo kabugtoan.’ (Luc. 22:32, 54-62; Baraan nga Kasuratan) Ha urhi, hi Pedro nagin usa nga harigi han Kristiano nga kongregasyon han siyahan nga siglo. (Gal. 2:9) Ha pariho nga paagi, an usa nga nag-alagad hadto sugad nga tigurang mahimo makabalik hito nga pribilehiyo ngan malipay ha pagparig-on ha iya mga igkasi-tumuroo.

May pipira nga natangtang ha pagin paramangno, ngan inabat nira nga pakyas hira. Hi Julio, * nga nagin tigurang ha South America ha sulod hin sobra 20 ka tuig, nagsiring: “Daku nga bahin ha akon kinabuhi an pag-andam ha mga pahayag, pagbisita ha kabugtoan, ngan pag-shepherding ha mga membro han kongregasyon! Salit han nawara ito ha akon, pag-abat ko kulang gud an akon kinabuhi. Masakit ito hinduro.” Yana, tigurang na utro hi Julio.

An disipulo nga hi Santiago nagsurat: “Mga kabugtoan ko, malipay kamo kon nakakaeksperyensya kamo hin magkalain-lain nga pagsari.” (San. 1:2) An gintutudlok dinhi ni Santiago amo an mga pagsari nga resulta han pagtimaraot ngan han aton pagkadiri-hingpit. Iya gin-unabi an makikalugaringon nga mga hingyap, pagpakita hin paboritismo, ngan iba pa. (San. 1:14; 2:1; 4:1, 2, 11) Kon gindidisiplina kita ni Jehova, mahimo ito magin masakit. (Heb. 12:11) Kondi an sugad nga pagbati kinahanglan diri makagwara han aton kalipay.

Bisan kon natangtangan kita hin pribilehiyo ha kongregasyon, may higayon pa gihapon kita nga mapamatud-an kon mationan-o karig-on an aton pagtoo ngan maipakita an aton gugma kan Jehova. Mahimo liwat naton mapamalandong an aton motibo ha pagkab-ot hin pribilehiyo. Ginkab-ot ba naton ito para la ha  aton kaopayan o tungod kay nahigugma kita ha Dios ngan kombinsido kita nga hiya an tag-iya han kongregasyon ngan nagkikinahanglan ito hin mahigugmaon nga pag-ataman? (Buh. 20:28-30) Kon an mga nagin tigurang hadto malipayon pa gihapon ha ira pag-alagad ha Dios, ginpapamatud-an nira ha ngatanan, pati kan Satanas, nga tinuod an ira gugma kan Jehova.

Han gindisiplina hi Hadi David tungod han iya nabuhat nga seryoso nga mga sala, ginkarawat niya ito ngan napasaylo hiya. Hi David nagkanta: “Bulahan adto hiya nga an iya pagsupak ginpasaylo; Adto nga an iya sala gintabonan. Bulahan an tawo nga waray ni Jehova isipa hin karat-an, ngan dida hiton iya espiritu waray limbong.” (Sal. 32:1, 2) Tungod han disiplina, nagin mas maopay nga tawo hi David ngan sigurado nga nagin mas maopay hiya nga paraataman han katawohan han Dios.

Kasagaran nga an mga brother nga nakabalik ha pagin tigurang nagigin mas maopay nga paraataman han mga karnero kay han hadto. “Mas maaram na ako yana kon paonan-o bubuligan adton nakabuhat hin sayop,” siring han usa nga nakabalik ha pagin tigurang. Usa pa nga tigurang an nagsiring: “Mas ginpapabilhan ko na gud yana an akon pribilehiyo ha pagserbi ha kabugtoan.”

An salmista nagsiring: “Ikaw, Ginoo, maopay ngan andam ha pagpasaylo, ngan hura hin mahigugmaon nga kalooy hadton ngatanan nga nagsasangpit ha imo.” (Sal. 86:5) Salit diri naton sadang hunahunaon nga an Dios diri na matapod utro ha usa nga nakahimo hin seryoso nga sala. “Nasubo gud ako hinduro ha akon kapakyasan,” siring ni Ricardo, nga natangtang ha pagin tigurang katapos mag-alagad ha sugad nga pribilehiyo ha sulod hin damu ka tuig. “Maiha nga panahon nga inabat ko nga diri ako takos magserbi utro ha kabugtoan sugad nga paramangno. Nawad-an ako hin kompyansa nga mapapamatud-an ko utro nga masasarigan ako. Kondi tungod kay nalilipay ako pagbulig ha iba, nakagdumara ako hin mga pag-aram ha Biblia, nakagparig-on ha mga kabugtoan ha Kingdom Hall, ngan nakig-upod ha ira ha ministeryo. Nakabulig ito ha akon nga magkaada utro hin kompyansa, ngan yana nakabalik na ako ha pagin tigurang.”

An pagtipig hin kasina mahimo makapugong ha usa nga bumalik ha pagin tigurang. Maopay gud nga subaron an surugoon ni Jehova nga hi David, nga pinalagiw  ha maabugho nga hi Hadi Saul! Waray bumulos hi David kan Saul, bisan kon may mga higayon nga puydi unta niya ito buhaton. (1 Sam. 24:4-7; 26:8-12) Han mamatay hi Saul ha girra, nasubo gud hi David. Gin-unabi niya hi Saul pati an anak hito nga hi Jonatan sugad nga “mahigugmaon ngan makalilipay” nga mga tawo. (2 Sam. 1:21-23) Hi David waray magtipig hin kasina.

Kon pag-abat mo biktima ka hin diri pagkasinabtanay o hin kawaray-hustisya, ayaw tuguti nga madaog ka han kasina. Pananglitan, hi William nga taga-Britain nag-alagad sugad nga tigurang ha sulod hin mga 30 ka tuig. Han natangtang hiya hito nga pribilehiyo, nasina hiya ha pipira nga tigurang. Ano an nakabulig ha iya basi matadong an iya panhunahuna? “An pagbasa ha libro han Job nagparig-on ha akon,” siring niya. “Kon ginbuligan ni Jehova hi Job nga makigmurayaw ha iya tulo nga kasangkayan, sigurado nga bubuligan gud Niya ako nga makigmurayaw ha Kristiano nga mga tigurang!”—Job 42:7-9.

Kon inundang ka ha pagin paraataman ha panon han Dios, maopay kon uusisahon mo kon kay ano nga ginbuhat mo ito. Nabug-atan ka ba tungod han mga problema? May-ada ba iba nga mga butang nga nagin mas importante ha imo? Nahipakdol ka ba han mga kaluyahan han iba? Anoman an nahitabo, hinumdumi nga mas daku an imo naibubulig ha iba han tigurang ka pa. An imo mga pahayag nagparig-on ha ira, an imo ehemplo nakadasig ha ira, ngan an imo mga pag-shepherding nakabulig ha ira nga mailob an mga pagsari. An imo mga ginbuhat sugad nga matinumanon nga tigurang nakapalipay kan Jehova, pati ha imo.—Prob. 27:11.

Ginbubuligan ni Jehova an mga brother basi maibalik an ira kalipay ngan an ira hingyap nga manguna ha kongregasyon. Kon inundang ka ha pagin tigurang o kon natangtang ka hito nga pribilehiyo, mahimo mo utro ‘kab-uton [an pagin] paramangno.’ (1 Tim. 3:1) Hi Pablo ‘waray umundang ha pag-ampo’ nga an mga Kristiano ha Colosas magkaada husto nga kahibaro ha kaburut-on han Dios para “magkinabuhi ha paagi nga inuuyonan ni Jehova basi mapalipay gud Hiya.” (Col. 1:9, 10) Kon nakapribilehiyo ka utro nga magin tigurang, pag-ampo kan Jehova nga magkaada ka kusog, magin mapailubon ka, ngan magin malipayon. Hinin kataposan nga mga adlaw, an katawohan han Dios nanginginahanglan hin espirituwal nga bulig han mahigugmaon nga mga paraataman. Mahimo mo ba parig-unon an imo kabugtoan ngan andam ka ba nga buhaton ito?