“EUREKA!” Ini nga pulong nagpapasabot hin “Nabilngan ko na!” Ini an ginsisiring han minero kon nakakaagi hiya hin bulawan han nauso an pagpamiling hito ha California, U.S.A., durante han ika-19 ka siglo. Pero hi Charles Taze Russell ngan an iba pa nga Estudyante han Biblia nakabiling hin mas presyoso—an kamatuoran ha Biblia. Ngan karuyag gud nira isumat ito ha iba.

Ha katpaso han 1914, minilyon nga tawo tikang ha dagku nga syudad an nagkita han “Photo-Drama of Creation.” Walo ka oras ini nga presentasyon nga basado ha Biblia, nga ginhimo han International Bible Students Association (I.B.S.A.). May-ada ini makaruruyag gud nga mga pelikula, matin-aw nga mga slide nga de-kolor, makapainteres nga narration o pagsaysay, ngan maopay nga klasikal nga musika. Makikita dinhi hini nga presentasyon an tikang ha paglarang, kasaysayan han tawo, ngan tubtob ha kataposan han Usa ka Yukot ka Tuig nga Pagmando ni Jesu-Kristo.—Pah. 20:4. *

Pero kumusta man an mga naukoy ha gudtiay nga bungto ngan higrayo nga baryo? Basi makapahimulos an ngatanan nga nagbibiling han kamatuoran, han Agosto 1914, iginrelis han I.B.S.A. an “Eureka Drama”—usa nga bersyon han “Photo Drama” nga masayon dad-on ngan waray upod nga pelikula. May-ada ini tulo nga klase nga mapipilian, ngan an tagsa hito makukuha ha damu nga yinaknan: An set han “Eureka X” may kompleto nga nakarekord nga pagsaysay ngan musika. An set han “Eureka Y” may kompleto nga rekording ngan mag-opay nga slide nga de-kolor. Ngan an “Eureka Family Drama,” nga gindisenyo para ha pamilya, may ginpili nga mga pagsaysay ngan mga kanta ha pagdayaw ha Dios. May mapapalit liwat nga barato nga mga ponograpo ngan mga garamiton para ha pagpasalida.

Tungod kay diri na nagkikinahanglan hin projector o daku nga eskren, mahimo dad-on han mga Estudyante han Biblia inin libre nga presentasyon ha higrayo nga baryo salit nakaabot an mensahe han Ginhadian ha mga lugar nga waray pa masangyawi. An “Eureka X” mahimo ipatokar ha adlaw o gab-i. An slide projector han “Eureka Y” mahimo gamiton bisan waray koryente, pinaagi hin carbide lamp. “Puydi namon ini ipasalida ha haros bisan diin,” siring han report han Watch Tower ha Finnish nga yinaknan. Ito gud an nahitabo!

Imbes nga magplete hin dagku nga teatro, an madiskarte nga mga Estudyante han Biblia kasagaran nga nakakabiling hin libre nga mga pasilidad, sugad han eskwelahan, korte, estasyon han tren, ngan bisan ha sala han dagku nga balay. Damu nga pagpasalida an ginhimo ha gawas, nga an pinakaeskren usa nga halapad nga  busag nga tela nga iginsasab-it ha ligid han kamalig. Hi Anthony Hambuch nga kaapi han grupo nga nagpipresentar han “Eureka” nagsurat: “An mga parauma naghimo ha ira uma hin gutiay nga istadyum nga kahoy an materyales basi didto lumingkod an mga nagkikita han programa.” An ira grupo gumamit hin karuwahe nga gindadanas hin kabayo ha pagdara han ira mga gamit para ha presentasyon, pagkaturog, pagluto, ngan mga bagahe.

May panahon nga an magkirita ngan mamarati han “Eureka” gutiay la, usahay naman ginatos. Ha usa nga bungto ha United States nga 150 la an naukoy, 400 an nagkita hito ha usa nga eskwelahan diin ito iginpasalida. Ha iba nga lugar, may pipira nga nagbaktas hin mga 8 ka kilometro basi magkita han “Eureka Drama.” Ha Sweden, an mga amyaw ni Charlotte Ahlberg nga nagtirirok ha iya gutiay nga balay “nabantad gud” katapos mamati han rekording. Ha Australia, mga 1,500 an nagkita han iginpasalida ito ha usa nga hirayo nga syudad nga may mga minahan. Iginreport han Watch Tower nga ha mga eskwelahan han hayskul ngan kolehiyo, “an mga propesor ngan mga estudyante bumilib gud ha mga slide ngan mag-opay nga rekording ha ponograpo.” An “Eureka Drama” popular gud bisan ha mga lugar nga may mga sinehan.

Daku an naibulig han “Eureka Drama” ha “Class Extension Work,” diin an mga klase han Estudyante han Biblia nagpapadara hin mga mamumulong basi makag-establisar hin bag-o nga mga klase. Makuri hibaroan kon pira kadamu an nagkita han “Eureka Drama.” Damu nga serye hito an pirme iginpapasalida. Kondi han 1915, ha 86 nga grupo hito, 14 la an regular nga nagrireport. Bisan pa hito, sumala ha report ha kataposan han tuig, sobra usa ka milyon an nagkita han “Drama.” Mga 30,000 nga indibiduwal an naghangyo hin mga literatura ha Biblia.

Bisan kon an “Eureka Drama” bangin diri sugad ka makatirigamnan ha kasaysayan, kondi posible nga minilyon an nakakita hinin naiiba nga presentasyon tikang ha Australia ngadto ha Argentina, tikang ha South Africa ngadto ha British Isles, India, ngan ha Caribbean. Pinaagi hini, damu ha ira an nakabiling han kamatuoran ha Biblia nga mas presyoso kay han bulawan, ngan nakagsiring “Eureka!”