1. Ano an ginkikinahanglan han mga tawo, ngan hin-o an magtatagbaw hito nga panginahanglan?

GINKIKINAHANGLAN han mga tawo an duok nga relasyon ha iba. Masisiring nga an duha nga tawo “duok ha usa kag usa kon karuyag gud nira ngan kilala gud nira an kada tagsa.” Nalilipay kita ha pagkaada mga kapamilya ngan kasangkayan nga nahigugma, nag-aapresyar, ngan nakakasabot ha aton. Kondi, an usa nga Persona nga kinahanglan kita magkaada hin pinakaduok nga relasyon amo an aton Harangdon nga Maglalarang.—Ekles. 12:1.

2. Ano an saad ni Jehova ha aton, kondi kay ano nga damu an diri natoo hito?

² Ha Biblia, gin-aaghat kita ni Jehova nga “magin duok” ha iya, ngan nagsasaad hiya nga kon bubuhaton naton ito, “magigin duok hiya” ha aton. (San. 4:8) Makalilipay gud ito! Kondi, damu an naghuhunahuna nga diri makatadunganon nga tumoo nga karuyag han Dios nga magin duok ha ira; pag-abat nira, diri hira takos humirani ha iya o hirayo gud hiya. Posible gud ba nga magin duok kita kan Jehova?

3. Ano an kinahanglan naton hibaroan mahitungod kan Jehova?

³ Hi Jehova ‘hirani ha tagsa’ nga namimiling ha iya salit posible nga makilala naton hiya. (Basaha an Buhat 17:26, 27; Salmo 145:18.) Katuyoan han aton Dios nga magin duok ha iya bisan an diri hingpit  nga mga tawo, ngan andam hiya ngan karuyag gud niya nga magin duok niya hira nga kasangkayan. (Isa. 41:8; 55:6) Tungod han naeksperyensyahan han salmista, hiya nakagsurat mahitungod kan Jehova: “O ikaw nga nabati hin pag-ampo, ngadto ha imo makanhi an ngatanan nga unod. Bulahan an tawo nga imo ginpipili, ngan imo padaraunon ha imo.” (Sal. 65:2, 4) Kitaon naton an usa nga asoy ha Biblia mahitungod han hadi han Juda nga hi Asa nga nagin duok ha Dios, ngan kon paonan-o an Dios nagin duok liwat ha iya. *

4. Ano nga ehemplo an iginpakita ni Hadi Asa ha katawohan han Juda?

⁴ Hi Hadi Asa madasigon gud para ha putli nga pagsingba. Iya ginkuha an prostitusyon ha templo ngan an idolatriya nga kalyap gud ha nasud. (1 Hadi 15:9-13) Tungod kay may kagawasan hiya ha pagyakan, iya ginsagda an mga tawo nga ‘pangitaon hi Jehova, an Dios han ira mga amay, ngan magbuhat han balaud ngan han sugo.’ Ginbendisyonan ni Jehova hin bug-os nga kamurayawan an siyahan nga napulo ka tuig nga pagmando ni Asa. Hin-o an ginpasidunggan ni Asa hito nga kamurayawan? Hiya nagsiring ha katawohan: “An tuna aada pa ha aton atubangan, tungod kay nangita kita kan Jehova nga aton Dios; pinangita naton hiya, ngan iya kita tinagan hin kapahuwayan ha tagsa nga ligid.” (2 Kron. 14:1-7) Aton kitaon an sunod nga nahitabo.

5. Ha ano nga kahimtang nasarihan an pagsarig ni Asa ha Dios, ngan ano an nagin resulta?

⁵ Hunahunaa nga ikaw hi Asa. Hi Sera nga taga-Etiopia nasulong ha Juda upod an 1,000,000 nga kasundalohan ngan 300 nga karomata. (2 Kron. 14:8-10) Ano an imo bubuhaton samtang nakikita mo an damu hinduro nga kasundalohan nga nasulong ha imo ginhadian? Haros doble an ira kadamu kay han imo kasundalohan nga 580,000 la! Maghuhunahuna ka ba kon kay ano nga gintutugotan han Dios ini nga pag-atake? Masarig ka ba ha imo kalugaringon nga kinaadman, o masarig nga papanalipdan ka ni Jehova? Makikita ha ginbuhat ni Asa nga duok hiya ngan nasarig hiya kan Jehova. Sinsero nga nagsinggit hiya: “Buligi kami, O Jehova nga amon Dios; kay nasarig kami ha imo, ngan ha imo ngaran kami nakanhi patok hini nga kadam-an. O Jehova, ikaw an amon Dios; ayaw itugot nga an tawo magdaog patok ha imo.” Paonan-o hiya ginbaton han Dios? “Hinampak ni Jehova an mga Etiopiahanon.” Waray bisan usa nga kaaway an nakatalwas!—2 Kron. 14:11-13.

6. Paonan-o naton masusubad hi Asa?

⁶ Ano an nakabulig kan Asa basi bug-os nga sumarig ha giya ngan panalipod han Dios? An Biblia nasiring nga “hi Asa nagbuhat hadton matadong ha mga mata ni Jehova” ngan an iya ‘kasingkasing hingpit kan Jehova.’ (1 Hadi 15:11, 14) Kinahanglan liwat nga hingpit, o bug-os, an aton kasingkasing ha pag-alagad ha Dios. Importante gud ini kon karuyag naton magkaada hin duok nga relasyon ha iya yana ngan ha tidaraon. Mapasalamaton gud kita nga hi Jehova an siyahan nga naghimo hin paagi basi magin duok kita ha iya ngan nabulig basi magkaada kita maopay nga relasyon ha iya ngan matipigan naton ito! Kitaon naton an duha nga paagi kon paonan-o ito ginbuhat han Dios.

7. (a) Ano an ginbuhat ni Jehova basi magin duok kita ha iya? (b) Ano an pinakaimportante nga ginbuhat han Dios basi magin duok kita ha iya?

⁷ Iginpakita ni Jehova an iya gugma ha katawohan pinaagi ha paglarang hin maopay nga tuna basi pag-ukyan naton. Iginpapakita pa gihapon niya an iya gugma ha aton pinaagi ha pagtagana han aton mga ginkikinahanglan basi padayon kita nga mabuhi. (Buh. 17:28; Pah. 4:11) Labaw ha ngatanan, igintatagana ni Jehova  an aton mga ginkikinahanglan basi magkaada kita maopay nga relasyon ha iya. (Luc. 12:42) Ginpapasarig liwat kita niya nga hiya mismo an namamati kon nag-aampo kita ha iya. (1 Juan 5:14) Kondi, an pagtagana han lukat amo an pinakaimportante nga ginbuhat han Dios basi magin duok kita ha iya ngan maipakita an iya gugma ha aton. (Basaha an 1 Juan 4:9, 10, 19.) Ginsugo ni Jehova an iya “bugtong nga Anak” nganhi ha tuna basi matalwas kita tikang ha sala ngan kamatayon.—Juan 3:16.

8, 9. Ano an papel ni Jesus ha katuyoan ni Jehova?

⁸ Ginpahinabo ni Jehova nga magpahimulos han lukat bisan an mga tawo nga nabuhi antes han panahon ni Kristo. Han igintagna ni Jehova an mahitungod han tidaraon nga Paratalwas han katawohan, para ha iya sugad hin iginbayad na an lukat tungod kay maaram hiya nga diri mapapakyas an iya katuyoan. (Gen. 3:15) Paglabay hin mga siglo, iginpahayag ni apostol Pablo an pagpasalamat ha Dios tungod han “lukat nga iginbayad ni Kristo Jesus.” Hiya nagdugang: “Nagpailob ngan nagpasaylo [an Dios] han mga sala nga nabuhat ha naglabay.” (Roma 3:21-26) Importante gud an papel ni Jesus basi magin duok kita ha Dios!

⁹ Pinaagi la kan Jesus mahimo makilala han mapainubsanon nga mga tawo hi Jehova ngan magkaada duok nga relasyon ha Iya. Paonan-o ini ginpapabug-atan han Kasuratan? Hi Pablo nagsurat: “Iginpakita ha aton han Dios an iya gugma hini nga paagi: An Kristo namatay para ha aton samtang makasasala pa kita.” (Roma 5:6-8) Igintagana an halad-lukat ni Jesus tungod kay hinigugma kita, diri tungod kay takos kita hito. Hi Jesus nagsiring: “Waray tawo nga makakakanhi ha akon gawas la kon igpahirani hiya han Amay nga nagsugo ha akon.” Ha iba nga higayon, hiya nagsiring: “Waray nakakakadto ha Amay kon diri pinaagi ha akon.” (Juan 6:44; 14:6) Pinaagi han baraan nga espiritu, iginpapahirani ni Jehova ha Iya an mga tawo pinaagi kan Jesus ngan ginbubuligan hira nga magpabilin ha Iya gugma samtang ginpapamulat an kinabuhi nga waray kataposan. (Basaha an Judas 20, 21.) Kitaon naton an usa pa nga ginbuhat ni Jehova basi magin duok kita ha iya.

10. Ano an igintututdo ha aton han Biblia nga nabulig ha aton nga magin duok ha Dios?

¹⁰ Hini nga artikulo, nagkotar o nag-unabi kita hin mga teksto tikang ha 14 nga libro han Biblia. Kon waray an Biblia, paonan-o naton hibabaroan nga mahimo kita magin duok ha aton Maglalarang? Kon waray ito, paonan-o naton hibabaroan an mahitungod han lukat ngan kon paonan-o gin-gagamit ni Jehova hi Jesus basi magin duok kita ha Iya? Pinaagi han iya espiritu, gin-giyahan ni Jehova an pagsurat ha Biblia, nga nagsusumat ha aton han iya makaruruyag nga mga kalidad ngan han iya mga katuyoan. Pananglitan, ha Eksodo 34:6, 7, iginhulagway ni Jehova kan Moises an iya kalugaringon sugad nga “usa ka Dios nga maloloy-on ngan mapinairon, mahinay ha pagkasina, ngan hura hin pagkalooy ngan hin kamatuoran: Matinipigon hin pagkalooy ha mga yinukot, mapinasayloon hin karat-an ngan hin pagtalapas ngan hin sala.” Hin-o an diri maruruyag nga magin duok ha sugad hito nga persona? Maaram hi Jehova nga samtang mas nahibabaro kita mahitungod ha iya pinaagi han Biblia, mas nagigin tinuod hiya ha aton salit nagigin mas duok kita ha iya.

11. Kay ano nga importante nga mahibaro kita mahitungod han mga kalidad ngan mga buhat han Dios? (Kitaa an retrato ha tinikangan hini nga artikulo.)

¹¹ Ha pagsaysay kon paonan-o kita magkakaada duok nga relasyon ha Dios, an introduksyon han libro nga Magin Duok kan Jehova nasiring: “Ha anoman nga pakigsangkay naton, an bugkos iginbabasar ha pagkilala ha tawo, pagdayaw ngan pagpabili han iya naiiba nga mga kalidad. Salit an mga kalidad ngan mga buhat han Dios, sugad han iginpapahayag ha Biblia, importante nga bahin nga kinahanglan pag-adman.” Mapasalamaton  gud kita nga iginpasurat ni Jehova an iya Pulong ha paagi nga masasabtan han mga tawo!

12. Kay ano nga mga tawo an gin-gamit ni Jehova ha pagsurat han Biblia?

¹² Puydi unta gamiton ni Jehova an mga anghel ha pagsurat han Biblia. Kay baman, interesado gud hira ha aton ngan ha aton mga buruhaton. (1 Ped. 1:12) Sigurado nga kaya isurat han mga anghel an mensahe han Dios para ha katawohan. Kondi an ira ba panhunahuna ha mga butang pariho han panhunahuna han mga tawo? Masasabtan ba nira an aton mga panginahanglan, kaluyahan, ngan mga karuyag? Diri. Maaram hi Jehova han ira mga limitasyon may kalabotan hini. Tungod kay iginpasurat ni Jehova ha mga tawo an Biblia, karuyag sidngon nga ginhimo niya ito para gud ha aton. Nasasabtan naton an panhunahuna ngan pagbati han mga parasurat han Biblia ngan han iba pa nga gin-unabi ha Kasuratan. Nasasabtan naton an ira mga kapakyasan, pagruhaduha, kahadlok, ngan mga kaluyahan. Nalilipay liwat kita han ira mga kalipay ngan mga kalamposan. Pariho kan propeta Elias, an ngatanan nga parasurat han Biblia “may mga pagbati nga pariho ha aton.”—San. 5:17.

13. Ano an imo inaabat mahitungod han pag-ampo ni Jonas?

¹³ Pananglitan, hi Jonas gintagan han Dios hin importante nga toka, kondi pinalagiw hiya. Kon anghel an gin-gamit ni Jehova ha pagsurat hini, bangin diri maisaysay hin maopay an gin-abat ni Jonas. Maopay gud nga hi Jonas mismo an ginpasurat ni Jehova han iya eksperyensya, pati na an mahitungod han iya sinsero nga pag-ampo ha Dios han nakadto hiya ha kahiladman han dagat! Hi Jonas nagsiring: ‘Han nahiraptay an akon kalag, nahinumdom ako kan Jehova.’—Jon. 1:3, 10; 2:1-9.

14. Kay ano nga nasasabtan mo an ginsiring ni Isaias mahitungod ha iya kalugaringon?

¹⁴ Hunahunaa liwat an iginpasurat ni Jehova kan Isaias. Katapos makita an usa nga bisyon  han himaya han Dios, nasantop han propeta an iya pagin makasasala. Hiya nagsiring: “Kairo ko! Kay ako patay na; tungod kay ako tawo nga mahugaw an mga im-im, ngan ako nag-uukoy ha butnga han katawohan nga maghugaw an mga im-im: kay an akon mga mata nakakita han Hadi, hi Jehova han mga kasundalohan.” (Isa. 6:5) Diri gud ito masisiring han usa nga anghel mahitungod ha iya kalugaringon. Pero nayakan ito ni Isaias, ngan nasasabtan naton an iya gin-abat.

15, 16. (a) Kay ano nga nasasabtan naton an gin-aabat han aton mga igkasi-tawo? Paghatag hin ehemplo. (b) Ano an mabulig ha aton nga magin mas duok kan Jehova?

¹⁵ Makakagsiring ba an mga anghel nga hira “diri takos,” sugad han ginsiring ni Jacob, o “makasasala” hira sugad han gin-abat ni Pedro? (Gen. 32:10; Luc. 5:8) ‘Mahahadlok’ ba hira sugad han mga disipulo ni Jesus, o kinahanglan ba han magtadong nga anghel an ‘pagparig-on’ basi “waray kahadlok” nga maipasamwak nira an maopay nga sumat bisan pa han mga pagkontra, sugad han kinahanglan buhaton ni Pablo ngan han iba pa? (Juan 6:19; 1 Tes. 2:2) Diri. An mga anghel hingpit ha ngatanan nga paagi ngan mas makusog hira kay ha mga tawo. Kondi kon an diri hingpit nga mga tawo nagpapahayag hin sugad hito nga mga pagbati, nasasabtan naton dayon ito tungod kay mga tawo la liwat kita. Kon ginbabasa naton an Pulong han Dios, sigurado nga ‘nalilipay kita upod han mga nalilipay; nagtatangis kita upod han mga nagtatangis.’—Roma 12:15.

¹⁶ Kon ginpapamalandong naton an ginsisiring han Biblia mahitungod han pagtratar ni Jehova ha iya matinumanon nga mga surugoon han naglabay, damu hinduro nga mag-opay nga butang an aton hibabaroan mahitungod ha aton Dios, nga mapailubon ngan mahigugmaon nga dumuok ha diri hingpit nga mga tawo. Salit mas makikilala naton hi Jehova ngan mas maghihilarom an aton gugma ha iya. Tungod hito, mas magigin duok kita ha iya.—Basaha an Salmo 25:14.

17. (a) Ano an maopay nga sagdon ni Asaria kan Asa? (b) Paonan-o ginbalewaray ni Asa an sagdon ni Asaria, ngan ano an nagin resulta?

¹⁷ Katapos magin madaugon ni Hadi Asa ha Etiopiahanon nga kasundalohan, an propeta han Dios nga hi Asaria nagsagdon ha iya pati ha iya katawohan. Hi Asaria nagsiring: “Hi Jehova maupod ha iyo samtang nga kamo naupod ha iya; ngan kon mangita kamo ha iya, hiaagian hiya niyo; kondi kon kamo bumaya ha iya, hiya mabaya ha iyo.” (2 Kron. 15:1, 2) Kondi ha urhi, napakyas hi Asa ha pagsunod hiton maopay nga sagdon. Han an norte nga ginhadian han Israel nagtarhog ha iya, nangaro hiya hin bulig ha mga taga-Sirya. Imbes nga mag-ampo kan Jehova para hin bulig, nakig-alyansa hiya ha mga pagano. Angayan la nga ginsidngan hi Asa: “Dida hini nagbuhat ka hin linurong; kay tikang niyan ikaw mamamay-ada mga away.” Nagin masamok an nahibilin nga katuigan han pagmando ni Asa tungod han damu nga girra. (2 Kron. 16:1-9) Ano an leksyon hini para ha aton?

18, 19. (a) Ano an sadang naton buhaton kon nagtitikahirayo na kita ha Dios? (b) Paonan-o kita magigin mas duok kan Jehova?

¹⁸ Diri gud kita sadang magpahirayo kan Jehova. Kon nagtitikahirayo na kita ha iya, sadang kita gumios dayon uyon han ginsisiring ha Hosea 12:6: “Balik ikaw ngadto ha imo Dios: bantayi an pagpaid ngan an kasubayan, ngan paghulat han imo Dios ha dayoday.” Salit, magin mas duok pa gud kita kan Jehova pinaagi ha pagpamalandong ngan pagpasalamat ha lukat ngan ha maduruto nga pag-aram han iya Pulong, an Biblia.—Basaha an Deuteronomio 13:4.

¹⁹ An salmista nagsurat: ‘Maopay ha akon nga pumahirani ako ha Dios.’ (Sal. 73:28) Hinaot kita ngatanan padayon nga mahibaro hin bag-o nga mga butang mahitungod kan Jehova. Pinaagi hito, mas maghihilarom pa gud an aton gugma ha iya. Ngan hinaot magin mas duok pa hi Jehova ha aton yana ngan ha waray kataposan!