Importante ini nga pakiana labi na para ha mga namatayan hin hinigugma nga padis. Bangin karuyag gud nira nga an ira pa gihapon nabanhaw nga padis an ira magin asawa ha bag-o nga kalibotan. Usa nga balo an nagsiring: “Waray gud namon karuyaga nga mag-asawa nga matapos an amon pag-asawa. Hingyap gud namon nga magsingba nga magkaupod ha kadayonan. Ini nga akon pagbati waray magbag-o.” May makatadunganon ba nga rason basi maglaom nga mag-aasawa an mga binanhaw? Diri kita sigurado.

Damu ka tuig na nga an aton mga publikasyon nasiring nga an mga pulong ni Jesus mahitungod ha pagkabanhaw ngan pag-asawa posible nga nagtutudlok ha pagkabanhaw dinhi ha tuna, ngan adton mga babanhawon ha bag-o nga kalibotan posible nga diri mag-aasawa. * (Mat. 22:29, 30; Mar. 12:24, 25; Luc. 20:34-36) Kondi, posible ba nga an ginsiring ni Jesus nagtutudlok ha pagkabanhaw ngadto ha langit? Bisan kon diri kita sigurado may kalabotan hini, aton usisahon an ginsiring ni Jesus.

Hunahunaa an kahimtang. (Basaha an Lucas 20:27-33.) An mga Saduseo, nga diri natoo han pagkabanhaw, tuso nga nagpakiana kan Jesus mahitungod ha pagkabanhaw ngan pag-asawa ha bayaw. * Hi Jesus binaton: “An mga anak hini nga sistema nangangasawa ngan ginpapangasawa, kondi an mga takos banhawon ngan kumarawat han kinabuhi ha tiarabot nga sistema diri na mag-aasawa o pangangasaw-on. Ha pagkamatuod, diri na hira mamamatay kay magigin pariho hira han mga anghel. Ngan tungod kay babanhawon hira, magigin mga anak hira han Dios.”—Luc. 20:34-36.

Kay ano nga an aton mga publikasyon nagsiring nga posible nga an ginhihisgotan ni Jesus amo an pagkabanhaw dinhi ha tuna? May duha nga nangunguna nga rason. Siyahan, bangin an ginhuhunahuna han mga Saduseo amo an pagkabanhaw dinhi ha tuna salit posible nga ginbaton hira ni Jesus uyon hito. Ikaduha, gintapos ni Jesus an iya baton pinaagi ha pag-unabi kanda Abraham, Isaac, ngan Jacob. Inin magtinumanon nga kalalakin-an babanhawon dinhi ha tuna.—Luc. 20:37, 38.

Kondi, posible nga an ginhuhunahuna ni Jesus amo an pagkabanhaw ngadto ha langit. Kay ano nga makakasiring kita hito? Aton usisahon an duha nga ginsiring ni Jesus.

“An mga takos banhawon.” An matinumanon nga mga dinihogan ‘takos ha Ginhadian han Dios.’ (2 Tes. 1:5, 11) Iginpahayag hira nga matadong para ha kinabuhi pinaagi han lukat; salit diri hira mamamatay sugad nga ginhukman nga mga salaan. (Roma 5:1, 18; 8:1) Gintawag hira nga “malipayon ngan baraan” ngan ginhuhunahuna nga takos han pagkabanhaw ngadto ha langit. (Pah. 20:5, 6) Ha kabaliktaran, kaupod ha mga babanhawon dinhi ha tuna an mga “diri-matadong.” (Buh. 24:15) Masisiring ba naton nga “takos” hira han pagkabanhaw?

“Diri na hira mamamatay.” Ha iba nga bersyon ginhubad ini nga mga pulong nga “diri na hira makakaeksperyensya hin kamatayon”  ngan “an kamatayon waray na gahum ha ira.” An matinumanon nga mga dinihogan nga namatay ginbabanhaw ngadto ha langit ngan gintatagan hin imortalidad—kinabuhi nga dayon nga diri nadadaot. (1 Cor. 15:53, 54) An kamatayon waray na gahum hadton nakakarawat hin pagkabanhaw ngadto ha langit. *

Basado ha mga nahisgotan, ano an mahimo naton magin konklusyon? Posible nga an ginsiring ni Jesus mahitungod ha pag-asawa ngan pagkabanhaw naaplikar ha pagkabanhaw ngadto ha langit. Kon sugad, may pipira kita nga mahibabaroan ha iya ginsiring may kalabotan ha mga babanhawon ngadto ha langit: Diri hira mag-aasawa, diri mamamatay, ngan ha pipira nga paagi magigin pariho hira ha mga anghel—espiritu nga mga linarang nga naukoy ha langit. Kondi ini nga konklusyon nagbabangon hin pipira nga pakiana.

Siyahan, kon an ginhuhunahuna han mga Saduseo amo an pagkabanhaw dinhi ha tuna, kay ano nga babatunon hira ni Jesus hin mahitungod ha pagkabanhaw ngadto ha langit? Diri pirme ginbabaton ni Jesus an mga nakontra ha iya uyon ha ira ginhuhunahuna. Pananglitan, han an pipira nga Judio nangaro ha iya hin tigaman, hiya nagsiring: “Bungkaga niyo ini nga templo, ngan titindugon ko utro ini ha sulod hin tulo ka adlaw.” Posible nga maaram hi Jesus nga an ira ginhuhunahuna amo an literal nga templo, “kondi an templo nga iya ginsisiring amo an iya lawas.” (Juan 2:18-21) Bangin inabat ni Jesus nga diri kinahanglan batunon an diri sinsero nga mga Saduseo nga diri natoo ha pagkabanhaw o ha pag-eksister han mga anghel. (Prob. 23:9; Mat. 7:6; Buh. 23:8) Lugod, bangin karuyag ni Jesus nga isumat an kamatuoran mahitungod han pagkabanhaw ngadto ha langit para ha kapulsanan han iya sinsero nga mga disipulo, nga ha maabot nga panahon makakakarawat hin sugad nga pagkabanhaw.

Ikaduha, kay ano nga gintapos ni Jesus an iya paghisgot pinaagi ha pag-unabi kanda Abraham, Isaac, ngan Jacob, nga babanhawon dinhi ha tuna? (Basaha an Mateo 22:31, 32.) Tigamni nga antes unabihon ni Jesus an mahitungod hini nga mga patriarka, gin-unabi anay niya an mga pulong nga “may kalabotan ha pagkabanhaw.” Ini nga mga pulong mahimo magpakita nga nagbag-o an iya ginhisgotan. Gin-unabi anay niya an pagkabanhaw ngadto ha langit ngan katapos an pagkabanhaw dinhi ha tuna. Maaram hi Jesus nga natoo an mga Saduseo ha mga sinurat ni Moises, salit ginkotar niya an ginsiring han Dios kan Moises didto ha naglalaga nga kasapinitan. Karuyag pamatud-an ni Jesus ha mga Saduseo nga an pagkabanhaw dinhi ha tuna bahin han katuyoan han Dios.—Eks. 3:1-6.

Ikatulo, kon an mga ginsiring ni Jesus mahitungod ha pagkabanhaw ngan pag-asawa naaplikar ha pagkabanhaw ngadto ha langit, nangangahulogan ba ini nga an mga babanhawon dinhi ha tuna mag-aasawa? An Pulong han Dios waray maghatag hin direkta nga baton hini nga pakiana. Kon an ginhihisgotan gud man ni Jesus amo an pagkabanhaw ngadto ha langit, kon sugad an iya ginsiring diri nagsasaysay kon an mga babanhawon dinhi ha tuna mag-aasawa ha bag-o nga kalibotan.

Maaram kita nga an Pulong han Dios matin-aw nga nasiring nga an kamatayon amo an magtatapos han pag-asawa. Salit an usa nga balo diri sadang makonsensya kon magdesisyon hiya nga mag-asawa utro. Personal ito nga desisyon, ngan an sugad nga mga indibiduwal diri sadang kwestyunon ha pagpamiling hin padis nga mahigugma ha ira.—Roma 7:2, 3; 1 Cor. 7:39.

Oo, bangin damu an aton pakiana may kalabotan han kinabuhi ha bag-o nga kalibotan. Imbes nga magbanabana kon ano an mga baton hito, maghulat na la kita. Kondi ini an aton masisiguro: An masinugtanon nga mga tawo magigin malipayon kay tatagbawon ni Jehova an ngatanan nira nga panginahanglan ngan hingyap ha pinakamaopay nga paagi.—Sal. 145:16.