1, 2. Paonan-o nakikigkomunikar hi Jehova ha iya mga surugoon?

HA BUG-OS nga kasaysayan han Biblia, an mga tawo nakakarawat hin giya tikang kan Jehova ha iba-iba nga paagi. May pipira nga ginkaistorya han Dios pinaagi hin mga anghel o hin mga bisyon o inop, basi igpahayag ha ira kon ano an mahitatabo ha tidaraon. Gintagan liwat hira ni Jehova hin espisipiko nga mga toka. (Num. 7:89; Esek. 1:1; Dan. 2:19) An iba naman nakakarawat hin giya pinaagi han mga tawo nga representante ni Jehova nga nag-aalagad ha tunan-on nga bahin han Iya organisasyon. Ha anoman nga paagi nakarawat han katawohan ni Jehova an iya pulong, adton nagsunod han iya mga instruksyon iya ginbendisyonan.

² Yana, gin-gigiyahan ni Jehova an iya katawohan pinaagi han Biblia, han iya baraan nga espiritu, ngan han kongregasyon. (Buh. 9:31; 15:28; 2 Tim. 3:16, 17) Matin-aw gud an giya nga aton nakakarawat tikang ha iya nga baga hin an ‘aton mga talinga nakakabati han usa nga pulong ha aton luyo, nga nasiring: Amo ini an dalan, maglakat kamo dida hini.’ (Isa. 30:21) Gin-gagamit liwat ni Jehova hi Jesus basi isumat ha aton an Iya mensahe. Iya ginpili hi Jesus basi manguna ha kongregasyon pinaagi han “matinumanon ngan maaramon nga uripon.” (Mat. 24:45) Kinahanglan seryosohon naton an giya ngan instruksyon ni Jehova, tungod kay an pagkaada naton hin kinabuhi nga waray kataposan nadepende ha aton pagin masinugtanon.—Heb. 5:9.

3. Ano an mahimo makapugong ha aton bug-os nga pagsugot ha mga giya ni Jehova? (Kitaa an retrato ha tinikangan hini nga artikulo.)

 ³ Hi Satanas nga Yawa nangangalimbasog gud nga mawara an aton pokus ha pagpamati han nagluluwas-kinabuhi nga giya tikang kan Jehova. Dugang pa, an aton ‘malimbungon nga kasingkasing’ mahimo makapugong ha aton bug-os nga pagsugot ha mga giya ni Jehova. (Jer. 17:9) Salit, aton hisgotan kon paonan-o naton madadaog an mga ulang ha aton pagpamati ha tingog han Dios. Aton liwat hisgotan kon paonan-o an maopay nga komunikasyon kan Jehova magpapanalipod han aton relasyon ha iya anoman an mahitabo.

4. Paonan-o nangangalimbasog hi Satanas nga impluwensyahan an panhunahuna han mga tawo?

⁴ Hi Satanas nangangalimbasog nga impluwensyahan an panhunahuna han mga tawo pinaagi ha paggamit hin buwa nga impormasyon ngan malimbong nga propaganda. (Basaha an 1 Juan 5:19.) Labot pa han nakaimprinta nga mga barasahon, an mga radyo, TV, ngan Internet nagpapasarang liwat hin mga impormasyon ha bug-os nga kalibotan. Bisan kon nagsusumat ito hin pipira nga mapulsanon nga impormasyon, kasagaran nga nag-aaghat ito hin panggawi ngan mga suruklan nga diri uyon ha mga suruklan ni Jehova. (Jer. 2:13) Pananglitan, ginkakarawat han media ngan han industriya han kaliawan an pag-asawa han magkapariho an sekso, ngan inaabat han damu nga istrikto hinduro an ginsisiring han Biblia mahitungod ha homoseksuwalidad.—1 Cor. 6:9, 10.

5. Paonan-o naton malilikyan nga maimpluwensyahan han propaganda ni Satanas?

⁵ Paonan-o an mga tawo nga nahigugma ha mga suruklan han Dios makakalikay ha impluwensya han kalyap nga propaganda ni Satanas? Paonan-o nira hibabaroan kon ano an maopay ngan kon ano an maraot? Pinaagi ‘ha pagbantay [sumala] ha mga pulong’ han Dios! (Sal. 119:9) Mababasa ha Pulong han Dios an importante nga giya nga mabulig ha aton basi hibaroan an kaibahan han tinuod nga impormasyon ngan han malimbong nga propaganda. (Prob. 23:23) Ha pagkotar ha Kasuratan, hi Jesus nagsiring nga ‘an tawo nabubuhi ha tagsa nga pulong nga nagawas ha baba ni Jehova.’ (Mat. 4:4) Kinahanglan naton hibaroan kon paonan-o iaaplikar an mga prinsipyo ha Biblia. Pananglitan, maiha pa antes igsurat ni Moises an balaud ni Jehova may kalabotan han pag-adulteryo, an batan-on nga hi Jose maaram na nga sala ha Dios an sugad nga buhat. Han ginsulay hiya han asawa ni Potipar nga magbuhat hin maraot, waray man la sumulod ha iya hunahuna nga magtalapas kan Jehova. (Basaha an Genesis 39:7-9.) Bisan kon maiha na hiya nga ginsisinulay han asawa ni Potipar waray hiya mamati, lugod ginpili niya nga mamati ha tingog ni Jehova. Basi hibaroan liwat naton an husto ngan sayop, kinahanglan mamati kita ha tingog ni Jehova ngan diri ha propaganda nga padayon nga iginpapasarang ni Satanas.

6, 7. Ano an kinahanglan naton buhaton basi malikyan an maraot nga sagdon ni Satanas?

⁶ Tungod kay kalyap gud ha kalibotan an nagkakasumpaki nga mga katutdoan ngan doktrina may kalabotan ha relihiyon, damu nga tawo an naghuhunahuna nga imposible mabilngan an tinuod nga relihiyon. Kondi matin-aw gud an giya nga iginhahatag ni Jehova para hadton karuyag mamati ha iya. Kinahanglan naton pumili kon hin-o an aton  papamatian. Tungod kay imposible an pagpamati ha duha nga tingog ha pariho nga higayon, kinahanglan naton ‘kilalahon an tingog’ ni Jesus ngan mamati ha iya. Hiya an gintokahan ni Jehova basi mag-ataman han Iya panon.—Basaha an Juan 10:3-5.

⁷ Hi Jesus nagsiring: “Tagi hin atensyon an iyo hinbabatian.” (Mar. 4:24) An sagdon ni Jehova matin-aw ngan husto, kondi kinahanglan naton ito tagan hin atensyon ngan pamatian pinaagi ha pag-andam han aton kasingkasing ha pagkarawat hito. Kon diri kita magbabantay, bangin an maraot nga sagdon ni Satanas an aton mapamatian imbes nga an mahigugmaon nga sagdon han Dios. Ayaw gud tuguti nga kontrolon an imo kinabuhi han kalibotanon nga mga musika, video, salida ha TV, libro, kaupod, magturutdo, o han mga eksperto kunohay.—Col. 2:8.

8. (a) Ha ano nga paagi an aton kasingkasing nagigin hinungdan nga masayon kita maimpluwensyahan han mga taktika ni Satanas? (b) Ano an mahitatabo ha aton kon aton igbabalewaray an mga sintomas?

⁸ Maaram hi Satanas han aton tendensya nga makasala ngan ginsasalingabot niya ito basi madaog kita. Kon ginbubuhat niya ito, nagigin makuri gud ha aton nga magpabilin nga maunungon kan Jehova. (Juan 8:44-47) Paonan-o naton mahimo malamposan ini nga pagsari? Tagda an usa nga tawo nga nagpokus ha madaliay nga kalipay nga ha urhi nagin hinungdan han iya pakabuhat hin sayop nga iya ginhunahuna nga diri gud niya mabubuhat. (Roma 7:15) Kay ano nga nahitabo ito? Posible nga tungod kay hinay-hinay nga nawara an iya pokus ha pagpamati ha tingog ni Jehova. Bangin waray niya makita an mga sintomas nga may problema an iya kasingkasing o iya la ito ginbalewaray. Pananglitan, bangin diri na hiya nag-aampo, talagsa na la makigbahin ha ministeryo, o diri na regular nga natambong ha mga katirok. Ha urhi, nagpadaog hiya han iya hingyap ngan nakabuhat hin usa nga butang nga maaram hiya nga sayop. Malilikyan naton an sugad nga seryoso nga sayop kon magpapabilin kita nga alerto ha anoman nga mga sintomas hito ngan magios dayon basi tadungon ito. Ngan kon namamati kita ha tingog ni Jehova, diri gud kita mamamati ha anoman nga ideya han mga apostata.—Prob. 11:9.

9. Kay ano nga importante hinduro nga mahibaroan dayon an mga tendensya ha pakasala?

⁹ Kon mahibaroan dayon an sakit han usa nga tawo, daku an posibilidad nga matambal ito. Ha pariho nga paagi, malilikyan an mga problema kon mahibabaroan dayon naton an mga tendensya nga mahimo magtugway ha aton ha pakasala. Kon mahibabaroan dayon naton ito, maaramon nga gumios dayon antes pa kita ‘madakop nga buhi [ni Satanas] basi magbuhat han iya kaburut-on.’ (2 Tim. 2:26) Ano an sadang naton buhaton kon naoobserbaran naton nga nahisisimang na an aton panhunahuna ngan mga hingyap tikang ha mga ginkikinahanglan ha aton ni Jehova? Kinahanglan mapainubsanon nga bumalik dayon kita  ha iya, mamiling han iya sagdon, ngan mamati ha iya ha bug-os naton nga kasingkasing. (Isa. 44:22) Sadang naton hinumdoman nga an paghimo hin sayop nga desisyon mahimo magresulta hin duro nga kasakit nga aton aantuson samtang aanhi pa kita hini nga sistema. Mas maopay gud kon magios dayon kita basi diri kita makabuhat hin seryoso nga sayop!

10, 11. (a) Ano an pangirilal-an han usa nga mapahitas-on nga tawo? (b) Ano nga leksyon an aton hibabaroan tikang ha pagrebelde nira Kore, Datan, ngan Abiram?

¹⁰ Sadang naton hinumdoman nga an aton kasingkasing mahimo magpasimang ha aton. Daku gud an epekto ha aton han tendensya naton nga makasala! Tagda pananglitan an pagpahitaas ngan kahakog. Hunahunaa kon paonan-o ini nga mga kalidad mahimo makagwara han aton pokus ha pagpamati ha tingog ni Jehova ngan magin hinungdan nga makabuhat kita hin seryoso nga sayop. An mapahitas-on nga tawo naghuhunahuna nga mas importante hiya kay ha iba. Para ha iya, katungod niya nga buhaton an bisan ano nga iya karuyag ngan waray magdidikta ha iya kon ano an iya bubuhaton. Salit bangin hunahunaon niya nga diri na niya kinahanglan an giya ngan sagdon han igkasi-Kristiano, han mga tigurang, o bisan han organisasyon han Dios. Para ha iya, nagigin mahinay na gud an tingog ni Jehova.

¹¹ Durante han paglakaton ha kamingawan han mga Israelita, nagrebelde hira Kore, Datan, ngan Abiram, ha awtoridad nira Moises ngan Aaron. Tungod han pagpahitaas, ini nga mga rebelde nagsingba kan Jehova ha ira kalugaringon nga paagi. Ano an ginbuhat ni Jehova? Iya hira ginpamatay. (Num. 26:8-10) Nagtututdo ini ha aton hin importante nga leksyon! Maraot gud an magigin resulta han pagrebelde kan Jehova. Hinumdoman liwat naton nga an “palabilabi nag-uuna han pagkagunaw.”—Prob. 16:18; Isa. 13:11.

12, 13. (a) Pag-unabi hin ehemplo nga nagpapakita nga an kahakog mahimo magkaada maraot gud nga resulta. (b) Isaysay kon paonan-o mahimo magtikaduro an kahakog kon papasagdan ito.

¹² An kahakog peligroso liwat. An hakog nga tawo kasagaran nga nagigin paragbuot ngan nagios hin diri husto. Han natambal an leprosi ni Naaman, an nangunguna han kasundalohan han Sirya, naghatag hiya hin mga regalo kan propeta Eliseo, pero waray ito karawata. Kondi karuyag han surugoon ni Eliseo nga hi Gehasi nga magin iya ito nga mga regalo. Hiya nagsiring: ‘Sugad nga hi Jehova buhi, lalanaton ko hi Naaman, ngan makuha ako hin bisan magutiay la tikang ha iya.’ Diri maaram hi Eliseo nga ginlanat ni Gehasi hi Naaman ngan nagbuwa ito basi makaghangyo hin “usa ka talento nga salapi, ngan hin duha ka hukas nga panapton.” Ano an nahitabo hinin hakog nga hi Gehasi? An sanla ni Naaman nahingadto ha iya!—2 Hadi 5:20-27.

¹³ An kahakog bangin magtikang ha simple nga hingyap, ngan kon papasagdan ito, mahimo ito magtikaduro ngan madaog kita hito. Iginpapakita han asoy ha Biblia nga ito an nahitabo kan Akan. Hunahunaa kon paonan-o madagmit nga nagtikaduro an kahakog ni Akan. Hiya nagsiring: “Ha pakakita ko sakot han mga dinag-an usa nga maopay nga kurigpos nga binuhat ha Babilonya, ngan hin duha ka gatos ka siklo nga salapi, ngan hin usa ka sisip nga bulawan nga kalim-an ka siklo an kabug-aton, dida hito ako naipa ha ira ngan ginkuha ko hira.” Imbes nga isalikway an maraot nga hingyap, may kahakog nga ginkawat ni Akan ito nga mga butang ngan gintago ito ha iya tolda. Han naibuhayhag an sala ni Akan, ginsidngan hiya ni Josue nga sisirotan hiya ni Jehova. Hito mismo nga adlaw, hi Akan ngan an iya pamilya ginbato tubtob mamatay. (Jos. 7:11, 21, 24, 25) An tagsa ha aton mahimo liwat magin hakog pariho kan Akan. Salit sadang gud kita “mag-ikmat kontra han ngatanan nga klase hin kahakog.” (Luc. 12:15) Bisan kon usahay nakakahunahuna kita hin maraot o imoral nga mga butang, importante nga kontrolon naton an aton hunahuna ngan diri tugotan nga magtikaduro an aton mga hingyap tubtob nga makabuhat kita hin sala.—Basaha an Santiago 1:14, 15.

14. Ano an sadang naton buhaton kon nasusulay kita pagbuhat hin maraot tungod han pagpahitaas o kahakog?

¹⁴ An pagpahitaas ngan kahakog mahimo magkaada maraot gud nga resulta. An pagpamalandong  han magigin resulta han pagbuhat hin sayop mabulig ha aton nga maatohan an sugad nga tendensya ngan padayon nga mabatian an tingog ni Jehova. (Deut. 32:29) Ha Biblia, an tinuod nga Dios diri la nagsusumat ha aton kon ano an husto kondi iginsasaysay liwat niya an mga kapulsanan han pagsunod hito pati an mga resulta han pagbuhat hin sayop. Kon nasusulay kita pagbuhat hin usa nga butang tungod han pagpahitaas ngan kahakog, maaramon gud kon huhunahunaon naton an magigin epekto hito ha aton, ha aton mga hinigugma, ngan labi na ha aton relasyon kan Jehova.

15. May kalabotan ha pakigkomunikar kan Jehova, ano an aton mahibabaroan ha ehemplo ni Jesus?

¹⁵ Karuyag ni Jehova an gimaopayi para ha aton. (Sal. 1:1-3) Nagtatagana hiya hin hura nga giya ha panahon nga kinahanglanon gud naton ito. (Basaha an Hebreo 4:16.) Bisan kon hingpit hi Jesus, regular hiya nga nakikigkomunikar kan Jehova basi hiya maglampos, ngan pirme hiya nag-aampo. Ginbuligan ngan gin-giyahan ni Jehova hi Jesus ha urusahon nga mga paagi. Nagpadara hi Jehova hin mga anghel basi mag-ataman ha iya, naghatag ha iya hin baraan nga espiritu, ngan naggiya ha iya ha pagpili han 12 nga apostol. Nagyakan pa ngani hi Jehova tikang ha langit basi ipahayag an iya suporta ngan pag-uyon kan Jesus. (Mat. 3:17; 17:5; Mar. 1:12, 13; Luc. 6:12, 13; Juan 12:28) Pariho kan Jesus, kinahanglan isumat naton an ngatanan nga aada ha aton kasingkasing ha aton pag-ampo. (Sal. 62:7, 8; Heb. 5:7) Pinaagi hito, matitipigan naton an maopay nga komunikasyon kan Jehova ngan maipapahiuyon an aton kinabuhi ha paagi nga nagpapasidungog ha iya.

16. Paonan-o kita ginbubuligan ni Jehova basi mabatian naton an iya tingog?

¹⁶ Bisan kon damu nga sagdon an igintatagana ha aton ni Jehova, diri kita niya ginpipirit nga sundon ito. Kinahanglan aroon naton an iya baraan nga espiritu, ngan hura nga ihahatag niya ito ha aton. (Basaha an Lucas 11:10-13.) Kondi, importante nga ‘tagan naton hin atensyon kon paonan-o kita namamati.’ (Luc. 8:18) Pananglitan, magigin hipokrito kita kon mangangaro kita hin bulig kan Jehova basi malamposan an tendensya nga makabuhat hin imoralidad samtang padayon kita nga nagkikinita hin pornograpiya o hin maglaw-ay nga salida. Basi makarawat an bulig ni Jehova, kinahanglan nga aada kita ha mga lugar o kahimtang diin presente an espiritu ni Jehova, sugad ha aton mga katirok ha kongregasyon. Damu nga surugoon ni Jehova an nakalikay ha pagbuhat hin seryoso nga sala pinaagi han pagpamati kan Jehova durante ha aton mga katirok. Kon naoobserbaran nira nga nagkakaada na hira sayop nga hingyap, ira ito gintatadong.—Sal. 73:12-17; 143:10.

17. Kay ano nga peligroso an pagsarig ha aton kalugaringon?

¹⁷ Hunahunaa hi Hadi David han kadaan nga Israel. Han batan-on pa hiya, ginpirde niya an Pilisteohanon nga higante nga hi Goliat. Katapos nagin sundalo hiya, ngan ha urhi nagin hadi. An iya buruhaton amo an pagpanalipod ngan paghimo hin mag-opay nga desisyon para ha nasud han Israel. Kondi han nagtikang hiya sumarig ha iya kalugaringon, nalimbongan hiya han iya kasingkasing ngan nakabuhat hira ni Batseba hin seryoso nga sala, naghimo pa ngani hiya hin paagi basi mamatay an bana hito nga hi Uria. Pero han gindisiplina hiya, mapainubsanon nga ginkarawat niya an iya sala ngan nahibalik utro an iya maopay nga relasyon kan Jehova.—Sal. 51:4, 6, 10, 11.

18. Ano an mabulig ha aton basi padayon kita nga mamati ha tingog ni Jehova?

¹⁸ Ha 1 Corinto 10:12, mahibabaroan naton nga diri kita sadang sumarig ha aton kalugaringon. Tungod kay diri naton kaya ‘mandoan an aton mga pitad,’ ha urhi bangin mamati kita ha tingog ni Jehova o ha tingog ni Satanas. (Jer. 10:23) Hinaot pirme kita mag-ampo, sumunod ha giya han baraan nga espiritu, ngan padayon nga mamati hin maopay ha tingog ni Jehova.