1, 2. (a) Ano nga mga regalo an iginhatag han Dios kan Adan? (b) Kay ano nga gintagan han Dios hi Adan hin asawa? (Kitaa an retrato hini nga pahina.)

MAY katuyoan hi Jehova han ginlarang niya an tuna. Iya ‘ginhitsura ito basi pag-ukyan.’ (Isa. 45:18) An siyahan nga tawo nga hi Adan, ginlarang nga hingpit, ngan ginpaukoy hiya han Dios ha usa nga matahom nga urukyan—an hardin han Eden. Sigurado nga nalipay gud hi Adan ha damu nga kahoy, naagos nga mga sapa, ngan nag-uuyag nga mga hayop! Pero may kulang ha iya nga importante hinduro. Iginsumat ni Jehova kon ano ito han hiya nagsiring: “Diri maopay nga an lalaki mag-uusahan la; Ako maghihimo hin iya kabulig.” Salit hi Adan ginpakaturog hin maopay han Dios, ginkuha an usa han iya mga gusok, ngan ‘ginhimo ito nga usa nga babaye.’ Pagmata ni Adan, nalipay hiya hinduro! Hiya nagsiring: “Ini yana tul-an han akon mga tul-an, ngan unod han akon unod. Hiya pagngangaranan nga Babaye, kay hiya kinuha tikang ha Lalaki.”—Gen. 2:18-23.

² An babaye espesyal nga regalo tikang ha Dios kay hiya an magigin hingpit nga kabulig han lalaki. May-ada liwat hiya espesyal nga pribilehiyo nga manganak. Ha pagkamatuod, ‘gintawag [ni Adan] an iya asawa nga Eva; kay ini iroy han ngatanan nga mga buhi.’ (Gen. 3:20) Makalilipay gud an regalo nga iginhatag han Dios ha siyahan nga mag-asawa! May kapas hira nga magkaanak hin hingpit nga mga tawo. Pinaagi hini, an tuna hinay-hinay nga magigin paraiso nga uukyan  hin hingpit nga mga tawo nga mag-aataman han iba pa nga buhi nga mga linarang.—Gen. 1:27, 28.

3. (a) Ano an kinahanglan buhaton nira Adan ngan Eva basi bendisyonan han Dios, kondi ano an nahitabo? (b) Ano nga mga pakiana an aton hihisgotan?

³ Basi makarawat ito nga mga bendisyon, kinahanglan sugton nira Adan ngan Eva hi Jehova ngan magpasakop ha iya pagmando. (Gen. 2:15-17) Hito la nga paagi matutuman nira an katuyoan han Dios para ha ira. Kondi makasurubo, naimpluwensyahan hira han “orihinal nga halas,” hi Satanas, ngan nakasala hira ha Dios. (Pah. 12:9; Gen. 3:1-6) Paonan-o nakaapekto ha kababayin-an ini nga pagrebelde? Ano an nahimo han matinumanon nga kababayin-an han naglabay? Kay ano nga an Kristiano nga kababayin-an yana matatawag nga “daku nga kadam-an”?—Sal. 68:11.

4. Hin-o kanda Adan ngan Eva an responsable ha ira nabuhat nga sala?

⁴ Han ginkaistorya ni Jehova hi Adan kon kay ano nga nagrebelde hiya, nagpasangil hiya: “An babaye nga iginhatag mo nga kaupod ko, hiya naghatag ha akon han bunga han kahoy, ngan ako kinaon.” (Gen. 3:12) Imbes nga karawaton ni Adan an iya sala, iya lugod ginbasol hi Eva, pati pa ngani hi Jehova, nga naglarang han iya asawa! Pariho nakasala hira Adan ngan Eva, pero para kan Jehova, hi Adan an responsable hito nga ira ginbuhat. Salit hi apostol Pablo nagsurat nga “pinaagi han usa nga tawo [hi Adan] an sala sinulod ha kalibotan ngan an kamatayon pinaagi han sala.”—Roma 5:12.

5. Ano an napamatud-an han gintugotan han Dios nga magpadayon ha sulod hin pipira ka panahon an pagmando nga bulag ha iya?

⁵ Nakombinse ni Satanas an siyahan nga mag-asawa nga diri nira kinahanglan hi Jehova sugad nga ira Magmarando. Nagbangon ito hin importante nga pakiana kon hin-o an may katungod nga magmando ha katawohan. Basi mabaton ito, gintugotan han Dios nga magpadayon ha sulod hin pipira ka panahon an pagmando nga bulag ha iya. Maaram hiya nga mapapamatud-an han mga panhitabo nga mapapakyas an sugad nga pagmando. Ha sulod hin ginatos nga katuigan, an sugad nga pagmando nagresulta hin sunod-sunod nga pag-antos han katawohan. Han naglabay la nga siglo, mga 100,000,000 an namatay tungod han mga girra—upod hito an minilyon nga inosente nga kalalakin-an, kababayin-an, ngan kabataan. Salit marig-on ini nga ebidensya nga “diri aada ha tawo nga naglalakat an pagmando han iya mga pitad.” (Jer. 10:23) Tungod kay maaram kita hito, ginkakarawat naton hi Jehova sugad nga aton Magmarando.—Basaha an Proberbios 3:5, 6.

6. Ha damu nga nasud, paonan-o gintatratar an kababayin-an?

⁶ An kalalakin-an ngan kababayin-an pariho nakakaeksperyensya hin pagmaltrato hini nga kalibotan nga ginmamandoan ni Satanas. (Ekles. 8:9; 1 Juan 5:19) An pipira han duro nga pagmaltrato nag-uupod han pag-abuso ha kababayin-an. Ha bug-os nga kalibotan, mga 30 porsyento han mga kababayin-an an nagrireport nga ginkakastigo hira han ira bana o uyab. Ha pipira nga kultura, mas ginpapaboran an kalalakin-an tungod kay hira an ginlalaoman nga magdadara han apelyido han ira pamilya ngan mag-aataman han ira nagtitikalagas na nga mga kag-anak pati han ira mga lolo o lola. Ha pipira nga nasud, an mga kag-anak nadiri hin anak nga babaye, ngan mas damu an iginpapapunit nga bata nga babaye kay ha bata nga lalaki.

7. Ha tinikangan, ano nga klase hin kinabuhi an iginhatag han Dios ha lalaki ngan babaye?

⁷ Sigurado nga diri gud nalilipay an Dios ha pagmaltrato ha kababayin-an. Gintatratar niya hira ha makatadunganon nga paagi ngan ginrirespeto niya hira. Iginpakita niya ito han ginlarang niya hi Eva sugad nga hingpit ngan may mga abilidad nga magin usa nga maopay nga kabulig, diri kay usa nga uripon ni Adan. Usa ito nga hinungdan kon kay ano nga ha kataposan han ikaunom ka adlaw han paglarang, ‘nakita han Dios an ngatanan nga iya ginhimo, ngan ito duro hin  kaopay.’ (Gen. 1:31) Oo, “ngatanan” nga ginhimo ni Jehova “duro hin kaopay.” Ha tinikangan, maopay gud nga kinabuhi an iginhatag han Dios ha lalaki ngan babaye.

8. (a) Isaysay an panggawi han mga tawo ha kabug-osan. (b) Ha bug-os nga kasaysayan han tawo, kan kanay iginpapakita han Dios an iya pag-uyon?

⁸ Ha kabug-osan, an panggawi han kalalakin-an ngan kababayin-an nagtikaraot katapos han pagrebelde ha Eden, ngan mas nagtitikaraot pa gud ito han naglabay nga siglo. Igintagna han Biblia nga an maraot nga panggawi magigin komon na la ha “kataposan nga mga adlaw.” Kalyap na gud an nagbubuhat hin maraot, salit “peligroso gud [ini] nga mga panahon.” (2 Tim. 3:1-5) Kondi ha bug-os nga kasaysayan han tawo, iginpapakita han ‘Ginoo nga hi Jehova’ an iya pag-uyon ha kalalakin-an ngan kababayin-an nga nasarig ha iya, nasugot ha iya mga balaud, ngan nagpapasakop ha iya sugad nga ira Magmarando.—Basaha an Salmo 71:5.

9. Pira an natalwas ha Baha, ngan kay ano?

⁹ Han ginbungkag han Dios an madarahog nga mga tawo pinaagi han Baha ha panahon ni Noe, gutiay gud la an nakatalwas. Kon hito nga panahon buhi pa an kan Noe kabugtoan nga kalalakin-an ngan kababayin-an, sigurado nga namatay liwat hira ha Baha. (Gen. 5:30) Pariho an kadamu han kababayin-an ngan kalalakin-an nga nakatalwas ha Baha—hi Noe, an iya asawa, an iya tulo nga anak nga lalaki, ngan an ira mga asawa. Natalwas hira tungod kay may kahadlok hira ha Dios ngan ira ginbuhat an iya kaburut-on. An binilyon nga katawohan yana nagtikang hinin walo nga tawo nga gin-uyonan ni Jehova.—Gen. 7:7; 1 Ped. 3:20.

10. Kay ano nga gin-uyonan ni Jehova an mahadlukon ha Dios nga mga asawa han matinumanon nga mga patriarka?

¹⁰ Paglabay hin katuigan, an mahadlukon ha Dios nga mga asawa han matinumanon nga mga patriarka gin-uyonan liwat han Dios. Diri gud ito mahitatabo kon nagin mga reklamador hira. (Jud. 16) Usa ha ira amo an matinalahuron nga asawa ni Abraham nga hi Sarah. Waray gud hiya magreklamo han ginbayaan nira an ira mahimyang nga kinabuhi ha Ur ngan nagin temporaryo nga mga umurukoy ha mga tolda ha iba nga nasud. Lugod hi ‘Sarah sinugot kan Abraham, nga gintawag niya nga “ginoo.”’ (1 Ped. 3:6) Hunahunaa liwat hi Rebeca, nga asawa ni Isaac. Usa hiya nga maopay gud nga regalo tikang kan Jehova. Tungod hito, diri urusahon nga ‘ginhigugma hiya’ ni Isaac. Ngan han namatay an nanay ni Isaac, “naliaw gud” hiya tungod kan Rebeca. (Gen. 24:67, Maopay nga Sumat) Yana, nalilipay gud kita nga kaupod naton an matinumanon nga kababayin-an nga pariho kanda Sarah ngan Rebeca!

11. Paonan-o nagpakita hin kaisog an duha nga Hebreohanon nga partera?

¹¹ Samtang uripon an mga Israelita ha Ehipto, nagtikadamu gud hira, salit nagsugo hi Paraon nga patayon an ngatanan nga Hebreohanon nga minasus-an nga kalalakin-an. Kondi hunahunaa an ginbuhat han duha nga Hebreohanon nga partera nga hira Sipra ngan Pua, nga posible nanguna ha mga partera. Tungod kay may kahadlok hira kan Jehova, maisugon nga ginsupak nira an sugo nga patayon an mga minasus-an. Salit ginbendisyonan hira ni Jehova hin ira kalugaringon nga mga pamilya.—Eks. 1:15-21.

12. Ano an makatirigamnan nga ginbuhat nira Debora ngan Jael?

¹² Ha panahon han mga hukom ha Israel, an usa nga babaye nga gin-uyonan han Dios amo hi propetisa Debora. Iya gindasig hi Hukom Barak ngan ginbuligan an mga Israelita nga makatalwas tikang ha pagtalumpigos, kondi iya igintagna nga diri maaangkon ni Barak an kadayawan han kadaogan kontra ha mga Canaanhon. Lugod, ihahatag han Dios an kumander han Canaanhon nga kasundalohan nga hi Sisera “ngadto ha kamot han usa nga babaye.” Ito an nahitabo han ginpatay hiya han usa nga diri-Israelita nga babaye nga hi Jael.—Huk. 4:4-9, 17-22.

13. Ano an iginsusumat ha aton han Biblia mahitungod kan Abigail?

¹³ Hi Abigail usa liwat nga matinumanon nga  babaye nga nabuhi han ika-11 ka siglo B.C.E. May-ada hiya sarabotan, kondi an iya bana nga hi Nabal, bastos, waray pulos, ngan lurong. (1 Sam. 25:2, 3, 25) Ha sulod hin pipira ka panahon, ginpanalipdan ni David ngan han iya mga kaupod an mga panag-iya ni Nabal, kondi han nangaro hira kan Nabal hin pagkaon ngan iba pa nga kinahanglanon, “ginpakaalohan hira” ngan waray tagi hin bisan ano. Tungod hito, nasina hinduro hi David salit nagplano hiya nga patayon hi Nabal ngan an mga surugoon hito. Han hinbaroan ito ni Abigail, gindad-an niya hin pagkaon ngan irimnon hi David pati an mga kaupod hito, salit napugngan an pagpaagay hin dugo. (1 Sam. 25:8-18) Ha urhi, hi David nagsiring ha iya: “Bulahan hi Jehova, an Dios han Israel, nga nagpadara ha imo hini nga adlaw pakigdait ha akon.” (1 Sam. 25:32) Kamatay ni Nabal, nagin asawa ni David hi Abigail.—1 Sam. 25:37-42.

14. Ha ano nga buruhaton nakigbahin an mga anak nga kababayin-an ni Salum, ngan paonan-o an Kristiano nga kababayin-an nagbubuhat yana hin pariho hito?

¹⁴ Han 607 B.C.E., damu nga kalalakin-an, kababayin-an, ngan kabataan an namatay han ginbungkag han Babilonya an Jerusalem ngan an templo hito. Han 455 B.C.E., gintindog utro an mga pader hito, ilarom han paggiya ni Nehemia. Upod hadton bumulig hito nga proyekto amo an anak nga kababayin-an ni Salum, usa nga prinsipe ha katunga han distrito han Jerusalem. (Neh. 3:12) Kinaburut-on nga nagbuhat hira hin ubos nga trabaho. Gin-aapresyar gud naton an damu nga Kristiano nga kababayin-an nga malipayon nga nasuporta ha proyekto han organisasyon nga pagpanukod nga ginbubuhat yana ha bug-os nga kalibotan!

15. Ano nga pribilehiyo an iginhatag han Dios kan Maria?

¹⁵ Antes ngan durante han mga siyahan nga siglo C.E., ginbendisyonan ni Jehova an damu nga kababayin-an hin espesyal nga mga pribilehiyo. Usa ha ira amo an birhen nga hi Maria. Han karaslon na hira ni Jose, milagroso nga nagburod hiya pinaagi han baraan nga espiritu. Kay ano nga ginpili hiya han Dios nga magin nanay ni Jesus? Sigurado nga tungod ito kay may-ada hiya mag-opay nga kalidad nga ginkikinahanglan basi mapatubo ha husto nga paagi an iya hingpit nga anak. Daku gud nga pribilehiyo an magin nanay han pinakabantogan nga tawo nga nabuhi ha tuna!—Mat. 1:18-25.

16. Paghatag hin ehemplo nga nagpapakita kon paonan-o gintratar ni Jesus an kababayin-an.

¹⁶ Buotan gud hi Jesus ha kababayin-an. Pananglitan, tagda an usa nga babaye nga 12 ka tuig na nga gindidinugoan. Ha butnga han damu nga tawo, humirani hiya ha luyo ni Jesus ngan ginkaptan an bado hito. Imbes nga sawayon hiya, hi Jesus may pagkabuotan nga nagsiring: “Anak, tungod han imo pagtoo nag-opay ka. Lakat nga mamurayawon, ngan mag-opay ka ha imo grabe nga sakit.”—Mar. 5:25-34.

17. Ano an milagroso nga nahitabo han Pentekostes 33 C.E.?

¹⁷ May pipira nga kababayin-an nga disipulo ni Jesus nga nag-asikaso ha iya ngan ha iya mga apostol. (Luc. 8:1-3) Ngan han Pentekostes 33 C.E., mga 120 nga kalalakin-an ngan kababayin-an an kumarawat han espiritu han Dios ha espesyal nga paagi. (Basaha an Buhat 2:1-4.) Damu pa ka tuig antes hito, hi Jehova nagsiring: ‘Akon iipison an akon espiritu ngada ha ngatanan nga unod; ngan an iyo mga anak nga kalalakin-an ngan an iyo mga anak nga kababayin-an mananagna, ngan akon liwat iipison an akon espiritu ngada ha mga surugoon nga kalalakin-an ngan ngada ha mga surugoon nga kababayin-an.’ (Joel 2:28, 29) Pinaagi hiton milagroso nga panhitabo han Pentekostes, iginpakita han Dios nga iya iginbalhin an iya pag-uyon tikang ha apostata nga Israel ngadto ha “Israel han Dios,” nga ginkukompwesto hin kalalakin-an ngan kababayin-an. (Gal. 3:28; 6:15, 16) Kaapi han Kristiano nga kababayin-an nga nakigbahin ha pagministeryo ha siyahan nga siglo an upat nga anak nga babaye han ebanghelisador nga hi Felipe.—Buh. 21:8, 9.

18, 19. (a) May kalabotan ha tinuod nga pagsingba, ano nga pribilehiyo an iginhahatag han Dios ha kalalakin-an ngan kababayin-an? (b) Ano an ginsiring han salmista may kalabotan ha kababayin-an nga nagsasangyaw han maopay nga sumat?

¹⁸ Tikang han mga 1875, may pipira nga kalalakin-an ngan kababayin-an nga nagpakita hin sinsero nga interes ha tinuod nga pagsingba. Hira an mga nahiuna hadton nakikigbahin yana ha katumanan han tagna ni Jesus: “Inin maopay nga sumat han Ginhadian isasangyaw ha bug-os nga inuukyan nga tuna sugad nga pamatuod ha ngatanan nga nasud, ngan sunod hito an kataposan maabot.”—Mat. 24:14.

¹⁹ An gutiay nga grupo han mga Estudyante han Biblia nagdamu ngan umabot na yana hin mga 8,000,000 nga mga Saksi ni Jehova. Ngan may-ada pa sobra 11,000,000 nga nagpapakita hin interes ha Biblia ngan ha aton buruhaton pinaagi han ira pag-atender han tinuig nga Memoryal han kamatayon ni Jesus. Ha damu nga nasud, kadam-an hito nga naatender mga kababayin-an. Dugang pa, ha sobra 1,000,000 nga bug-os-panahon nga magwarali han Ginhadian ha bug-os nga kalibotan, kadam-an ha ira an kababayin-an. Oo, gintatagan han Dios an matinumanon nga kababayin-an hin pribilehiyo nga makigbahin ha katumanan han ginsiring han salmista: “An Ginoo naghahatag hin pulong: Daku nga kadam-an an mga babaye nga nagpapahayag han [maopay nga] sumat.”—Sal. 68:11.

20. Ano nga mga topiko an mahimo naton pag-adman?

²⁰ Diri naton mahihisgotan dinhi an mahitungod han ngatanan nga matinumanon nga kababayin-an nga gin-unabi ha Biblia. Kondi mababasa naton ha Pulong han Dios ngan ha aton mga publikasyon an mahitungod ha ira. Pananglitan, mahimo naton pamalandungon an pagin maunungon ni Ruth. (Rut 1:16, 17) An pagbasa han asoy ha Biblia ngan mga artikulo mahitungod kan Rayna Ester magpaparig-on ha aton pagtoo. Magpapahimulos kita ha pag-aram mahitungod hini nga kababayin-an durante han aton Pagsingba han Pamilya. Kon nag-uusahan kita, mahimo naton pag-adman an sugad nga mga topiko ha aton personal nga pag-aram.

21. Paonan-o iginpakita han may kahadlok ha Dios nga kababayin-an an ira pagkamaunungon kan Jehova ha panahon han mga pagsari?

²¹ Matin-aw nga ginbibendisyonan ni Jehova an pagsangyaw nga buruhaton han Kristiano nga kababayin-an ngan ginbubuligan hira ha panahon han mga pagsari. Pananglitan, iya ginbuligan an kababayin-an nga may kahadlok ha iya nga magpabilin nga maunungon ha iya ha panahon han pagmando han Nazi ngan han Komunista. Damu ha ira an nag-antos, ngan an pipira namatay pa ngani, tungod han ira pagkamasinugtanon ha Dios. (Buh. 5:29) Pariho han matinumanon nga kababayin-an han naglabay, an Kristiano nga kababayin-an ngan an iba pa nga igkasi-magsiringba yana nasuporta ha pagkasoberano han Dios. Pariho han mga Israelita hadto, sugad hin ginkakaptan liwat ni Jehova an ira too nga kamot ngan nasiring: “Ayaw kahadlok; ako mabulig ha imo.”—Isa. 41:10-13.

22. Ano nga mga pribilehiyo an aton ginpapamulat?

²² Diri na mag-iiha, gagamiton han Dios an kalalakin-an ngan kababayin-an nga may kahadlok ha iya ha paghimo ha tuna nga paraiso ngan ha pagtutdo ha minilyon nga binanhaw nga mahibaro mahitungod han mga katuyoan ni Jehova. Samtang waray pa ito, hinaot pabilhan naton ngatanan an aton pribilehiyo nga mag-alagad kan Jehova nga nagbibinuligay.—Sep. 3:9.