1. Ano an inabat ni Pablo hadton maduruto nga nag-aalagad kan Jehova?

WARAY hingalimti ni apostol Pablo adton maduruto ha pagsangyaw han maopay nga sumat. Hiya nagsurat: “Diri gud namon nangangalimtan an iyo buhat tungod han pagtoo ngan an iyo pangalimbasog tungod han gugma ngan an iyo pagpailob tungod han paglaom ha aton Ginoo nga hi Jesu-Kristo ha presensya han aton Dios ngan Amay.” (1 Tes. 1:3) Diri liwat nahingangalimtan ni Jehova an mga pangalimbasog han ngatanan nga matinumanon nga nag-aalagad ha iya, daku man o gutiay an ira nahihimo uyon ha ira kahimtang.—Heb. 6:10.

2. Ano an aton hihisgotan hini nga artikulo?

² Damu han aton igkasi-surugoon—hadto ngan yana—an naghimo hin damu nga sakripisyo basi makag-alagad kan Jehova ha bug-os-panahon. Usisahon naton kon paonan-o an pipira nag-alagad ha siyahan nga siglo. Hihisgotan liwat naton an pipira nga klase han bug-os-panahon nga pag-alagad ha moderno nga panahon ngan kon paonan-o naton diri hingangalimtan adton hinigugma nga kabugtoan nga nagsakripisyo ha pag-alagad ha espesyal nga paagi.

3, 4. (a) Paonan-o an pipira nag-alagad ha siyahan nga siglo? (b) Paonan-o nasuportaran an ira materyal nga panginahanglan?

³ Waray pag-iha katapos mabawtismohan hi Jesus, gintikangan niya an usa nga buruhaton nga paghihimoon ha bug-os nga kalibotan. (Luc. 3:21-23; 4:14, 15, 43) Kamatay niya, ginpangunahan han iya mga apostol an pagsangyaw nga buruhaton basi makaabot ito ha damu pa nga lugar. (Buh. 5:42; 6:7) An pipira nga Kristiano pariho kan Felipe, nag-alagad sugad nga mga ebanghelisador ngan misyonero ha Palestina. (Buh. 8:5, 40; 21:8) Hi Pablo ngan an iba pa nagsangyaw ha higrayo nga lugar. (Buh. 13:2-4; 14:26; 2 Cor. 1:19) An iba pariho kanda Silvano (Silas), Marcos, ngan Lucas nag-alagad liwat sugad nga mga parakopya o parasurat. (1 Ped. 5:12) Damu nga Kristiano nga kababayin-an an nag-alagad kaupod hinin magtinumanon nga kabugtoan. (Buh. 18:26; Roma 16:1, 2) Ha Kristiano Griego nga Kasuratan mababasa naton an ira makalilipay nga mga eksperyensya. Ini nga mga asoy nagpapahinumdom ha aton nga diri nahingangalimtan ni Jehova an iya mga surugoon ngan iya igintatagana an ira mga panginahanglan.

⁴ Paonan-o ginsuportaran an materyal nga panginahanglan han bug-os-panahon nga mga surugoon han siyahan nga siglo? Usahay gin-iimbitar hira pangaon, ginpapaukoy ha balay, o ginbubuligan ha iba pa nga paagi han ira mga igkasi-Kristiano, pero diri hira nag-oobligar nga buhaton ito. (1 Cor. 9:11-15) An pipira nga indibiduwal ngan mga kongregasyon kinaburut-on nga bumulig ha ira. (Basaha an Buhat 16:14, 15; Filipos 4:15-18.) Ha panapanahon, hi Pablo ngan an iya mga kaupod nagtrabaho liwat basi masuportaran an ira kagarastohan.

5. Ano an ginsiring han usa nga mag-asawa mahitungod han ira kinabuhi ha bug-os-panahon nga pag-alagad?

⁵ Damu liwat yana an maduruto nga nagbubuhat ha iba-iba nga klase han bug-os-panahon nga pag-alagad. (Kitaa an kahon nga “ Iba-iba nga Klase han Bug-os-Panahon nga Pag-alagad.”) Ano an ira masisiring ha ira ginpili nga karera? Mahimo mo ito ipakiana ha ira, ngan posible nga maparig-on ka han ira baton. Pananglitan, hunahunaa an ginsiring han usa nga brother nga nag-alagad sugad nga regular payunir, espesyal payunir, misyonero, ngan Bethelite ha iba nga nasud: “Para ha akon, an pagsulod ha bug-os-panahon nga pag-alagad usa han pinakamaopay nga desisyon nga akon ginhimo. Han 18 anyos ako, nakurian ako pagdesisyon kon maeskwela ba ako ha unibersidad, magtatrabaho hin bug-os-panahon, o magpapayunir. Napamatud-an ko nga diri nahingangalimtan ni Jehova an mga sakripisyo nga imo ginhihimo basi makag-alagad ha iya ha bug-os-panahon. Nagamit ko an mga talento o abilidad nga iginhatag ha akon ni Jehova nga diri ko gud unta mahihimo kon ginpili ko an usa nga kalibotanon nga karera.” An iya asawa nagsiring: “An tagsa nga toka nakabulig ha akon nga mag-uswag. Pauroutro nga inabat namon an panalipod ngan paggiya ni Jehova ngan diri gud unta namon ito maieksperyensyahan kon waray namon sarihi an iba-iba nga klase han bug-os-panahon nga pag-alagad. Adlaw-adlaw nga ginpapasalamatan ko hi Jehova tungod kay nagagamit namon an amon kinabuhi ha bug-os-panahon nga pag-alagad.” Karuyag mo ba nga magin sugad liwat hito an imo kinabuhi?

6. Ano an gin-aabat ni Jehova mahitungod han aton pag-alagad ha iya?

⁶ Syempre, may pipira nga diri makakag-alagad yana hin bug-os-panahon tungod han ira kahimtang. Makakasarig kita nga ginpapabilhan liwat ni Jehova an ira bug-os-kalag nga pag-alagad. Hunahunaa an kabugtoan nga gin-unabi ni Pablo ha Filemon 1-3, pati na an ngatanan nga membro han kongregasyon ha Colosas. (Basaha.) Gin-apresyar ni Pablo an ira ginbuhat, ngan sugad man ni Jehova. Gin-aapresyar liwat ni Jehova an imo pag-alagad. Kondi paonan-o mo mabubuligan an mga nag-aalagad yana ha bug-os-panahon?

7, 8. Ano an nahiuupod han pagin payunir, ngan paonan-o makakabulig ha ira an mga membro han kongregasyon?

⁷ Pariho han siyahan-siglo nga mga ebanghelisador, an madasigon nga mga payunir  nakakaparig-on gud ha kongregasyon. Damu ha ira an naggagahin hin 70 ka oras kada bulan ha ministeryo. Paonan-o mo hira mabubuligan?

⁸ Hi Shari nga usa nga sister nga payunir, nagsiring: “An mga payunir baga hin marig-on, kay adlaw-adlaw hira nagsasangyaw. Pero kinahanglan pa gihapon nira hin pagdasig.” (Roma 1:11, 12) Usa pa nga sister nga nagpayunir ha sulod hin pipira ka tuig an nagsiring mahitungod han mga payunir ha ira kongregasyon: “Maduruto hira ngan pirme okupado. Salit mapasalamaton gud hira kon may napasakay ha ira ngadto ha teritoryo, nag-iimbitar pangaon, nahatag hin pan-gasolina o iba pa nga pinansyal nga bulig. Nagpapakita ito nga ginpapabilhan mo gud hira.”

9, 10. Ano an ginbuhat han pipira basi buligan an mga payunir ha ira kongregasyon?

⁹ Karuyag mo ba buligan ha ministeryo an mga payunir? An payunir nga hi Bobbi nagsiring: “Durante han Lunes tubtob Biernes, mas nanginginahanglan gud kami hin bulig.” Usa pa nga payunir nga iya kakongregasyon an nagsiring: “Makuri gud an pamiling hin partner kon kulop.” Usa nga sister nga nag-aalagad na yana ha Brooklyn Bethel an malipayon nga nag-istorya mahitungod han iya pagpayunir: “May sister nga may-ada sarakyan nga nagsiring ha akon, ‘Kon waray ka partner, tawagi la ako, ngan uupdan ko ikaw.’ Daku gud an iya naibulig basi makapadayon ako pagpayunir.” An sister nga hi Shari nagsiring: “Katapos magministeryo, kasagaran nga nag-uusahan an solo nga mga payunir. Ha panapanahon, mahimo mo hira imbitaron ha iyo Pagsingba han Pamilya. Mapaparig-on liwat hira kon iaapi mo hira ha iba pa nga buruhaton.”

¹⁰ Usa nga sister nga haros 50 ka tuig na nga nag-aalagad ha bug-os-panahon an nag-istorya han iya eksperyensya han payunir pa hiya kaupod han iba pa nga solo nga sister: “Kada duha ka bulan, an mga payunir ginbibisita han amon mga tigurang. Nangungumusta hira mahitungod han amon kahimsog ngan sekular nga trabaho ngan kon may problema kami. Ginpapabilhan gud nira kami. Nabisita hira ha amon apartment basi hibaroan kon nanginginahanglan kami hin bulig.” Bangin mahinumdoman mo an apresasyon nga iginpakita ni Pablo tungod han iya nakarawat nga bulig tikang ha usa nga pamilyado nga tawo ha Efeso.—2 Tim. 1:18.

11. Ano an nahiuupod han pag-alagad sugad nga espesyal payunir?

¹¹ An pipira nga kongregasyon may-ada mga  espesyal payunir. Damu hini nga kabugtoan an nangangalimbasog nga maggahin hin 130 ka oras kada bulan ha ministeryo. Tungod han panahon nga ira ginagamit ha ministeryo ngan ha pagbulig ha iba, gutiay na la o bangin waray na ngani hira panahon para ha sekular nga trabaho. An sanga nga opisina nagtatagana ha ira hin igo nga allowance kada bulan basi makapokus hira ha ministeryo.

12. Paonan-o mabubuligan han mga tigurang ngan han iba pa nga kabugtoan an mga espesyal payunir?

¹² Paonan-o naton mabubuligan an mga espesyal payunir? Usa nga tigurang ha sanga nga opisina nga nanginginano ha ira an nagsiring: “An mga tigurang kinahanglan makiistorya ha ira, mahibaro han ira kahimtang, ngan mamiling hin paagi kon paonan-o hira mabubuligan. An pipira nga kabugtoan bangin maghunahuna nga an mga espesyal payunir diri na nagkikinahanglan hin bulig tungod kay may-ada hira allowance, kondi damu pa gihapon an maibubulig ha ira han kabugtoan.” Pariho han mga regular payunir, gin-aapresyar gud han mga espesyal payunir kon may-ada hira nakakaupod ha ministeryo. Puydi mo ba hira updan?

13, 14. (a) Ano an sadang naton hinumdoman mahitungod ha mga paramangno han sirkito? (b) Ano an puydi mo buhaton basi buligan an mga paramangno han sirkito?

¹³ An mga paramangno han sirkito ngan an ira asawa kasagaran nga ginhuhunahuna sugad nga marig-on ha espirituwal ngan pirme naghahatag hin pagdasig. Bisan kon tinuod ito, nanginginahanglan pa gihapon hira hin pagdasig, kaupod ha ministeryo, ngan igo nga pagpahalibway. Kumusta man kon magkasakit hira ngan maospital, bangin kinahanglan hira operahan o magpaterapi? Mapasalamaton gud hira kon an kabugtoan nabulig pag-asikaso han ira mga panginahanglan ngan nagpapakita hin personal nga interes ha ira. Mahinunumdoman naton an pagtagad nga iginpakita kan Pablo ngan ha iya mga kaupod han “hinigugma nga doktor” nga hi Lucas, an parasurat han libro han Buhat.—Col. 4:14; Buh. 20:5–21:18.

¹⁴ An mga paramangno han sirkito pati an ira asawa nanginginahanglan hin duok nga kasangkayan, ngan ginpapabilhan nira ito. Usa nga paramangno han sirkito an nagsurat: “An akon kasangkayan baga hin maaram kon nanginginahanglan ako hin pagparig-on. Mataktika nga nagpapakiana hira, salit naisusumat ko ha ira an akon mga problema. Bisan la an ira maopay nga pagpamati, daku na gud nga bulig.” Ginpapabilhan gud han mga paramangno han sirkito pati han ira asawa an personal nga interes nga iginpapakita han kabugtoan.

15, 16. Ano an ginbubuhat han mga Bethelite ngan han mga nagtatrabaho ha Assembly Hall, ngan paonan-o naton hira mabubuligan?

¹⁵ Ha bug-os nga kalibotan, an mga Bethelite ngan an mga nagtatrabaho ha Assembly Hall nasuporta ha mga buruhaton may kalabotan ha Ginhadian ha mga lugar nga ginpapanginano han ira sanga nga opisina. Kon may mga Bethelite ha iyo kongregasyon o sirkito, paonan-o mo maipapakita nga diri mo hira nahingangalimtan?

¹⁶ Kon bag-o la hira ha Bethel, bangin namimingaw hira ha ira kapamilya ngan kasangkayan. Mapasalamaton gud hira kon makisangkayon an ira igkasi-Bethelite ngan an ira bag-o nga mga kakongregasyon! (Mar. 10:29, 30) Kon tapos na an ira regular nga eskedyol ha trabaho, nakakatambong hira ha mga katirok ha kongregasyon ngan nakikigbahin ha ministeryo kada semana. Kondi ha panapanahon, may-ada hira dugang nga mga toka. Kon nasasabtan ini han mga kakongregasyon ngan gin-aapresyar an mga Bethelite pati an ira ginbubuhat, nagpapahimulos an ngatanan.—Basaha an 1 Tesalonica 2:9.

17, 18. Ano an mga toka han mga nag-aalagad ha bug-os-panahon ha iba nga nasud?

¹⁷ Adton bug-os-panahon nga nag-aalagad ha iba nga nasud posible mag-adjust ha pagkaon, yinaknan, kustomre, ngan mga kahimtang nga iba gud ha ira nahiaraan. Ano an ira mga toka?

 ¹⁸ An pipira ha ira mga misyonero nga an ira nangunguna nga buruhaton amo an pagministeryo. Nakakarawat hira hin espesyal nga pagbansay nga tungod hito damu an nagpapahimulos. An sanga nga opisina nagtatagana ha ira hin urukyan ngan hin igo nga allowance basi masuportaran an ira panginahanglan. An iba naman igintoka ha usa nga sanga nga opisina o basi bumulig ha pagtukod hin mga pasilidad ha sanga nga opisina, mga remote translation office, Assembly Hall, o Kingdom Hall. Gintataganahan hira hin pagkaon, akomodasyon, ngan iba pa nga panginahanglan. Pariho ha mga Bethelite, regular hira nga natambong ha mga katirok ngan nakikigbahin ha ministeryo salit napaparig-on nira an kongregasyon ha damu nga paagi.

19. Ano an sadang naton hinumdoman mahitungod ha kabugtoan nga nag-aalagad ha iba nga nasud?

¹⁹ Paonan-o mo mabubuligan ito nga kabugtoan? Hinumdumi nga kon bag-o la hira ha iyo nasud, bangin diri hira hiara ha pipira niyo nga pagkaon. Kon iimbitaron mo hira pangaon, mahimo mo hira pakianhan kon ano an karuyag nira kaunon o karuyag nira tilawan. Magin mapailubon samtang nangangalimbasog hira pag-aram han iyo yinaknan ngan kustomre. Bangin mauruiha antes nira masabtan an ngatanan nga imo ginsisiring, pero mahimo mo hira tutdoan han husto nga pagluwas. Karuyag nira mahibaro!

20. Paonan-o naton mabubuligan adton aada ha bug-os-panahon nga pag-alagad pati an ira mga kag-anak?

²⁰ Nagkakaedad an bug-os-panahon nga mga surugoon sugad man an ira mga kag-anak. Kon Saksi an mga kag-anak, posible nga karuyag gud nira nga an ira mga anak magpabilin ha ira mga toka. (3 Juan 4) Syempre, kon kinahanglan na atamanon an mga kag-anak han bug-os-panahon nga mga surugoon, bubuhaton nira an ngatanan nira nga mahihimo basi buligan ito ngan agsob nga mabisita ito kon posible. Kondi daku liwat an maibubulig ha ira han kabugtoan nga naukoy hirani ha ira nagtitikalagas na nga mga kag-anak. Ini nga kabugtoan mahimo magboluntaryo ha pag-ataman kon nanginginahanglan hin bulig an mga kag-anak. Hinumdumi nga adton aada ha bug-os-panahon nga pag-alagad okupado gud ha pagsuporta ha pagsangyaw, nga amo an pinakaimportante nga buruhaton yana ha bug-os nga kalibotan. (Mat. 28:19, 20) Mahimo mo ba buligan o han iyo kongregasyon an mga kag-anak han usa nga bug-os-panahon nga surugoon?

21. Ano an inaabat hadton mga bug-os-panahon nga nag-aalagad mahitungod han bulig ngan pagdasig nga ira nakakarawat?

²¹ Adton aada ha bug-os-panahon nga pag-alagad sumulod hito nga buruhaton, diri basi magriko, kondi basi maghatag kan Jehova ngan ha iba. Gin-aapresyar gud nira an anoman nga bulig nga imo maihahatag. Usa nga sister nga bug-os-panahon nga nag-aalagad ha iba nga nasud an nagsiring: “Bisan an halipot la nga surat han pagpasalamat nagpapakita nga an iba naghuhunahuna ha imo ngan nalilipay hira han imo ginbubuhat.”

22. Ano an imo inaabat mahitungod han bug-os-panahon nga pag-alagad?

²² An bug-os-panahon nga pag-alagad kan Jehova amo gud an pinakamakalilipay nga pagkinabuhi. Diri ito masayon pero mapulsanon ito ngan makapatagbaw. Ngan igin-aandam kita hito para ha waray kataposan ngan makalilipay nga pag-alagad nga ginpapamulat han ngatanan nga matinumanon nga surugoon ni Jehova ilarom ha pagmando han Ginhadian han Dios. Hinaot ‘diri gud naton hingalimtan an buhat tungod han pagtoo ngan an pangalimbasog tungod han gugma’ hadton aada ha bug-os-panahon nga pag-alagad.—1 Tes. 1:3.