1. Kay ano nga diri nahipapausa an mga surugoon han Dios kon nakakaeksperyensya hira hin mga kasakitan?

NAHIPAPAUSA ka ba nga makakaeksperyensya ka hin “damu nga kasakitan” antes mo makarawat an regalo nga kinabuhi nga waray kataposan? Posible nga diri. Bag-ohan ka man ha kamatuoran o maiha na nga surugoon ni Jehova, maaram ka nga an kasakitan bahin han pagkinabuhi dinhi hinin kalibotan ni Satanas.—Pah. 12:12.

2. (a) Labot la ha mga problema nga nakakaapekto ha ngatanan nga diri hingpit nga tawo, ano pa nga kasakitan an naieksperyensyahan han mga Kristiano? (Kitaa an retrato hini nga pahina.) (b) Hin-o an gintitikangan han aton mga kasakitan, ngan kay ano nga maaram kita hito?

² Labot la han mga kasakitan nga naieksperyensyahan han mga tawo—mga problema nga nakakaapekto ha ngatanan nga diri hingpit nga tawo—may iba pa nga kasakitan nga naieksperyensyahan han mga Kristiano. (1 Cor. 10:13) Ano ito? An duro nga pagkontra tungod han ira marig-on nga pagsunod ha mga balaud han Dios. Hi Jesus nagsiring ha iya mga sumurunod: “An uripon diri labaw ha iya agaron. Kon gintimaraot ako nira, pagtitimarauton liwat kamo nira.” (Juan 15:20) Hin-o an gintitikangan hini nga pagkontra? Waray iba kondi hi Satanas, an ginhuhulagway han Biblia sugad nga “nagngungurob  nga leon, nga nagpipinamiling hin lalamyon” dida ha katawohan han Dios. (1 Ped. 5:8) Gagamiton ni Satanas an bisan ano basi mawara an ira bug-os-kasingkasing nga debosyon kan Jehova. Hunahunaa an nahitabo kan apostol Pablo.

3-5. (a) Ano nga kasakitan an naeksperyensyahan ni Pablo ha Listra? (b) Kay ano nga makaparig-on an mensahe ni Pablo mahitungod han mga kasakitan?

³ Damu ka beses nga gintimaraot hi Pablo tungod han iya pagtoo. (2 Cor. 11:23-27) An usa hito nahitabo ha Listra. Katapos magtambal hin piay tikang ha katawo, hira Pablo ngan Bernabe gindayaw sugad nga mga dios. Nakimalooy hira ha nagrarayhak nga mga tawo basi diri hira singbahon! Pero waray pag-iha, inabot an parakontra nga mga Judio ngan ginpakaraot hira Pablo ngan Bernabe, ngan tumoo hito an mga tawo. Salit tigda nga nabaliktad an sitwasyon! Ginbato han mga tawo hi Pablo ngan ginbayaan kay kahuna nira nga patay na hiya.—Buh. 14:8-19.

⁴ Katapos bumisita ha Derbe, hira Pablo ngan Bernabe ‘binalik ha Listra, ha Iconio, ngan ha Antiokia. Ginparig-on nira an mga disipulo didto, gindasig hira nga magpadayon ha pagtoo ngan ginsidngan: “Kinahanglan mag-agi kita hin damu nga kasakitan basi makasulod ha Ginhadian han Dios.”’ (Buh. 14:21, 22) Ha siyahan, baga hin makuri ito sabton. Kay kon huhunahunaon, an pakaeksperyensya hin “damu nga kasakitan” makapaluya ngan diri makaparig-on. Kon sugad, paonan-o nira Pablo ngan Bernabe ‘naparig-on an mga disipulo’ pinaagi ha pagsiring ha ira nga makakaeksperyensya hira hin mas damu nga kasakitan?

⁵ Hibabaroan naton an baton hito pinaagi ha pag-usisa hin maopay ha mga pulong ni Pablo. Waray hiya magsiring: “Kinahanglan naton ilubon an damu nga kasakitan.” Lugod nagsiring hiya: “Kinahanglan mag-agi kita hin damu nga kasakitan basi makasulod ha Ginhadian han Dios.” Salit ginparig-on ni Pablo an mga disipulo pinaagi ha pagpabug-at han positibo nga resulta han pagpabilin nga matinumanon. Ito nga balos diri kay inop la. Oo, hi Jesus nagsiring: “An magpailob tubtob ha kataposan amo an matatalwas.”—Mat. 10:22.

6. Ano nga balos an mapapahimulosan hadton nagpapailob?

⁶ Kon magpapailob kita, babalosan kita. Para ha dinihogan nga mga Kristiano, babalosan hira hin imortal nga kinabuhi ha langit sugad nga mga igkasi-magmarando ni Jesus. Para naman ha “iba nga mga karnero,” babalosan hira hin kinabuhi nga waray kataposan dinhi ha tuna diin “maukoy an katadongan.” (Juan 10:16; 2 Ped. 3:13) Pero sugad han ginsiring ni Pablo, makakaeksperyensya kita yana hin damu nga kasakitan. Hisgotan naton an duha nga klase hin pagsari nga bangin maeksperyensyahan naton.

7. Ano an nahiuupod ha direkta nga mga pag-atake?

⁷ Hi Jesus nagtagna: “Dadad-on kamo han mga tawo ha mga korte ngan kakastiguhon kamo ha mga sinagoga ngan dadad-on kamo ha mga gobernador ngan mga hadi.” (Mar. 13:9) Sugad han iginpapakita hito nga mga pulong, an pipira nga Kristiano makakaeksperyensya hin kasakitan pinaagi han pisikal nga pagtimaraot, nga mahimo magtikang ha mga lider han relihiyon ngan politika. (Buh. 5:27, 28) Hunahunaa utro an ehemplo ni Pablo. Nahadlok ba hiya nga bangin maeksperyensyahan niya an sugad nga pagtimaraot? Waray gud.—Basaha an Buhat 20:22, 23.

8, 9. Paonan-o iginpakita ni Pablo nga determinado hiya nga magpailob, ngan paonan-o iginpakita han pipira yana an pariho nga determinasyon?

⁸ Maisugon nga gin-atohan ni Pablo an direkta nga mga pag-atake ni Satanas ngan nagsiring: “Diri ko gintatagad nga importante an akon kalag, basta matapos ko la ini nga rumba ngan an sagrado nga buruhaton nga nakarawat ko tikang ha Ginoo nga hi Jesus, an bug-os nga pagtuman han pagsangyaw han maopay nga sumat mahitungod han diri-matupngan nga pagkabuotan han Dios.” (Buh. 20:24) Matin-aw, hi Pablo  waray mahadlok ha pagtimaraot nga posible niya maeksperyensyahan. Lugod, determinado hiya nga magpailob anoman an mahitabo. Tumong niya nga ‘bug-os nga tumanon an pagsangyaw’ bisan pa han kasakitan.

⁹ Yana, damu han aton kabugtoan an nagpakita hin pariho nga determinasyon. Pananglitan, ha usa nga nasud, an pipira nga Saksi ginpriso hin haros 20 ka tuig bisan kon waray hira bistaha tungod han ira pagpabilin nga neutral. Samtang priso hira, diri hira puydi bisitahon bisan han ira mga kapamilya, ngan an pipira nga priso ginkastigo ngan nakaeksperyensya hin iba-iba nga klase hin pagpasakit.

10. Kay ano nga diri kita sadang mahadlok ha diri ginlalaoman nga mga kasakitan?

¹⁰ Ha iba nga mga nasud, an aton kabugtoan nakakaeksperyensya hin diri ginlalaoman nga mga kasakitan. Kon mahitabo ito ha imo, ayaw kahadlok. Hunahunaa hi Jose. Iginbaligya hiya ha pagkauripon, kondi “gintalwas hiya [ni Jehova] ha ngatanan nga kasakitan.” (Buh. 7:9, 10) Tatalwason ka liwat ni Jehova. Ayaw gud hingalimti nga “maaram hi Jehova kon paonan-o tatalwason tikang ha kasakitan an katawohan nga may debosyon ha Dios.” (2 Ped. 2:9) Padayon ka ba nga masarig kan Jehova tungod kay maaram ka nga kaya ka niya talwason tikang hinin maraot nga sistema ngan tagan hin kinabuhi nga waray kataposan ilarom ha pagmando han iya Ginhadian? May-ada ka mag-opay nga hinungdan nga sumarig ha iya ngan maisugon nga atubangon an pagtimaraot.—1 Ped. 5:8, 9.

11. Ano an kaibahan han tuso nga pag-atake ni Satanas tikang ha iya direkta nga pag-atake?

¹¹ An usa pa nga klase han pag-atake nga bangin maeksperyensyahan naton amo an tuso nga mga pag-atake. Ano an kaibahan hito ha direkta nga pag-atake? An direkta nga pag-atake maipapariho ha buhawi nga tigda nga nahitatabo ngan nakakaguba dayon han imo balay. An tuso nga pag-atake maipapariho ha mga anay nga hinay-hinay nga nagdadaot han imo balay tubtob nga maguba ito. Bangin han hinbaroan mo nga gin-anay an imo balay, urhi na an ngatanan kay guba na ito.

12. (a) Ano an usa nga tuso nga taktika ni Satanas, ngan kay ano nga epektibo gud ito? (b) Paonan-o nakaapekto kan Pablo an iya panluya?

¹² Karuyag ni Satanas nga madaot an imo relasyon kan Jehova. Bangin gumamit hiya hin direkta nga pag-atake o hin tuso nga pag-atake sugad han panluya, nga usa han pinakaepektibo nga pamaagi nga iya ginagamit. Kay ano? Tungod kay mahimo nga hinay-hinay nga paluyahon hito an aton relasyon kan Jehova. Ginkarawat ni apostol Pablo nga may panahon nga nanluya hiya. (Basaha an Roma 7:21-24.) Kay ano nga an pariho kan apostol Pablo nga may maopay nga relasyon kan Jehova ngan posible nga membro han nagmamando nga lawas han siyahan nga siglo nakagsiring nga ‘kairo niya nga tawo’? Nakagsiring hiya hito tungod han iya pagkadiri-hingpit. Karuyag gud niya buhaton an husto, kondi baga hin may nagpupugong ha sulod niya ha pagbuhat hito. Kon may mga panahon nga sugad hito an imo inaabat, diri ba maliliaw ka ha paghibaro nga bisan hi apostol Pablo inabat liwat hin sugad hito?

13, 14. (a) Ano an hinungdan han panluya han pipira nga katawohan han Dios? (b) Hin-o an naruruyag nga umundang kita ha pag-alagad kan Jehova, ngan kay ano?

¹³ Damu nga kabugtoan an usahay naabat hin panluya, kabaraka, ngan bangin kawaray-pulos pa ngani. Pananglitan, usa nga madasigon nga payunir nga tatawagon naton nga Deborah an nagsiring: “Pauroutro nga nahuhunahuna ko an akon nabuhat nga sayop, ngan ha kada panahon nga nahitatabo ito, nagtitikaduro an akon negatibo nga pagbati. Kon nahuhunahuna ko an ngatanan nga nabuhat ko nga sayop, inaabat ko nga baga hin waray na gud mahigugma ha akon, bisan ngani hi Jehova.”

¹⁴ Kay ano nga nanluluya an pipira nga madasigon nga surugoon ni Jehova pariho kan Deborah? Posible nga damu an hinungdan hito. Bangin an pipira naghuhunahuna hin maraot mahitungod ha ira kalugaringon o ha ira kahimtang.  (Prob. 15:15) An iba naman nagkakaada negatibo nga pagbati tungod han sakit nga nakakaapekto ha emosyon. Anoman an hinungdan, sadang naton hinumdoman kon hin-o an naruruyag pagsalingabot hito nga pagbati. Hin-o ba an naruruyag nga manluya kita hinduro ngan umundang ha pag-alagad kan Jehova? Syempre, hi Satanas. Ginsentensyahan na hiya hin kamatayon ngan karuyag niya nga umabat ka liwat nga waray ka paglaom. (Pah. 20:10) Ha pagkamatuod, anoman an gamiton ni Satanas, direkta man ito nga pag-atake o tuso nga pag-atake, pariho la an iya tumong—mabaraka kita, mawara an aton kadasig, ngan umundang kita ha pag-alagad. Hinumdumi nga an katawohan han Dios may-ada espirituwal nga pakig-away!

15. Paonan-o naton maipapakita nga determinado kita nga diri magpadaog han panluya?

¹⁵ Magin determinado nga diri umundang ha espirituwal nga pakig-away. Hunahunaa pirme an balos. Hi Pablo nagsurat ha mga Kristiano ha Corinto: “Diri kita naundang, kay bisan kon an aton lawas nagtitikaluya, an aton personalidad nababag-o gud kada adlaw. Kay bisan kon an kasakitan temporaryo la ngan magaan, naghahatag ito ha aton hin nagtitikadaku ngan waray kataposan nga kadungganan.”—2 Cor. 4:16, 17.

16. Kay ano nga kinahanglan mangandam yana para ha kasakitan?

¹⁶ Sugad han aton hinbaroan, damu an “tuso nga mga buhat” nga ginagamit ni Satanas kontra ha aton. (Efe. 6:11) Kinahanglan sundon han tagsa ha aton an sagdon ha 1 Pedro 5:9: “Atohi niyo hiya, magmarig-on ha iyo pagtoo.” Para mabuhat ito, kinahanglan naton iandam an aton hunahuna ngan kasingkasing basi mabansay kita yana ha pagbuhat han husto. Ha pag-ilustrar: Maiha pa antes an girra, an mga sundalo ginbabansay hin maopay basi magin andam hira ha pakig-away. Ito liwat an kinahanglan buhaton han katawohan ni Jehova. Diri kita maaram kon ano an mahiuupod ha aton espirituwal nga pakig-away ha tidaraon. Salit, diri ba maaramon nga  magbansay gud samtang murayaw pa an kahimtang? Hi Pablo nagsurat ha mga taga-Corinto: “Padayon nga usisaha niyo an iyo kalugaringon kon marig-on an iyo pagtoo, padayon nga pamatud-i niyo kon ano gud kamo.”—2 Cor. 13:5.

17-19. (a) Paonan-o naton mauusisa an aton kalugaringon? (b) Paonan-o mahimo mangandam an mga batan-on ha pagdepensa han ira gintotoohan samtang naeskwela hira?

¹⁷ Usa nga paagi basi masunod naton an giniyahan nga sagdon ni Pablo amo an tangkod nga pag-usisa ha kalugaringon. Pakianhi an imo kalugaringon: ‘Regular ba ako nga nag-aampo? Kon ginsusulay han mga kaupod, ginsusugot ko ba an Dios sugad nga magmarando imbes nga an mga tawo? Regular ba nga natambong ako ha Kristiano nga mga katirok? Diri ba ako nahahadlok pagsumat han akon mga gintotoohan? Nangangalimbasog ba ako nga palabyon an mga kaluyahan han akon mga igkasi-tumuroo sugad han ira ginbubuhat ha akon? Mapinasakupon ba ako ha mga tigurang ha amon kongregasyon ngan ha nanginginano ha Kristiano nga kongregasyon ha bug-os nga kalibotan?’

¹⁸ Tigamni nga ha gin-unabi nga mga pakiana, duha hito an may kalabotan ha waray kahadlok nga pagdepensa han aton gintotoohan ngan ha pag-atubang ha mga pagsulay han mga kaupod. Ito an ginbubuhat han damu nga aton batan-on samtang naeskwela hira. Diri hira nahahadlok o naaawod ha pagsumat han ira mga gintotoohan. Lugod, maisugon hira nga nagyayakan. May kalabotan hini, may mapulsanon nga mga suhestyon nga iginpublikar ha aton mga magasin. Pananglitan, ini an suhestyon han Hulyo 2009 nga Awake! kon may nagpapakiana nga kaklase: “Kay ano nga diri ka natoo ha ebolusyon?” mahimo ka sumiring: “Kay ano nga matoo ako ha ebolusyon? Bisan ngani an mga syentista diri nagkakauruyon mahitungod hito nga hira man unta an mga eksperto hito!” Mga kag-anak, siguroha nga magkaada kamo hin practice session basi magin andam an iyo mga anak ha pag-atubang han sugad nga mga pagsulay han ira mga kaklase.

¹⁹ Tinuod, diri pirme masayon an pagdepensa han aton mga gintotoohan o an paghimo han iba pa nga ginpapabuhat ha aton ni Jehova. Katapos han magkulop nga pagtrinabaho, bangin kinahanglan naton mangalimbasog gud basi makatambong ha katirok. O bangin makuri an pagbuhát ha aga basi magsangyaw. Kondi hinumdumi: Kon may umabot nga mas magkuri nga pagsari ha tidaraon, magigin mas andam ka pag-atubang hito kon nabatasan mo na yana an maopay nga rutina ha espirituwal.

20, 21. (a) Paonan-o an pagpamalandong ha lukat mabulig ha aton nga malamposan an negatibo nga mga pagbati? (b) Ano an sadang naton magin determinasyon?

²⁰ Kumusta man an may kalabotan ha tuso nga pag-atake? Pananglitan, paonan-o naton malalamposan an panluya? Usa han pinakaepektibo nga paagi amo an pagpamalandong ha lukat. Ito an ginbuhat ni apostol Pablo. May panahon nga inabat niya nga makalolooy hiya nga tawo. Pero maaram hiya nga hi Kristo namatay diri para ha hingpit nga mga tawo kondi para ha mga makasasala. Ngan usa hi Pablo hito nga magpakasasala. Ngani, hiya nagsurat: “Nagkikinabuhi ako yana sugad nga tawo uyon ha pagtoo ha Anak han Dios, nga nahigugma ha akon ngan naghatag han iya kalugaringon para ha akon.” (Gal. 2:20) Oo, ginkarawat ni Pablo an lukat ngan natoo hiya nga igintagana ito para ha iya.

²¹ Daku gud liwat an imo mapapahimulsan kon imo kakarawaton an lukat sugad nga personal nga regalo tikang kan Jehova. Diri ito nagpapasabot nga awtomatiko nga mawawara an panluya. An pipira bangin makaeksperyensya hin panluya ha panapanahon tubtob nga umabot an bag-o nga kalibotan. Kondi hinumdumi: An premyo makakarawat hadton nagpapadayon ha pag-alagad. Kada adlaw, nagtitikahirani kita ha panahon han pag-abot han Ginhadian han Dios. Kon mahitabo na ito, an tuna magigin mamurayawon ngan an ngatanan nga tawo magigin hingpit. Salit magin determinado nga sumulod hito nga Ginhadian—bisan pa han damu nga kasakitan.