GINKUKULBA hi Fernando. * Duha nga tigurang an karuyag makig-istorya ha iya ha pribado. Katapos han naglabay pa la nga mga pagbisita han paramangno han sirkito, iginsaysay ha iya han mga tigurang an kinahanglan niya buhaton basi magin kwalipikado para ha dugang nga mga pribilehiyo ha kongregasyon. Samtang nalabay an panahon, nagtikang hiya maghunahuna kon pipilion gud ba hiya nga tigurang. Yana, bag-o la nga binisita ha ira kongregasyon an paramangno han sirkito. Ano daw la an isisiring ha iya han mga tigurang?

Hi Fernando namamati samtang nag-iistorya ha iya an usa nga tigurang. Gin-unabi hito an 1 Timoteo 3:1 ngan ginsumatan hiya nga an mga tigurang may nakarawat nga surat nga ginpili hiya nga magin tigurang. Diri makatoo hi Fernando ngan nagpakiana, “Ano an imo siring, Kuya?” Gin-utro han tigurang an iya ginsiring, ngan humiyom hi Fernando. Katapos, han iginpahibaro ha kongregasyon nga tigurang na hiya, nalipay an ngatanan.

Sayop ba nga maghingyap hin mga pribilehiyo ha kongregasyon? Diri. Sumala ha 1 Timoteo 3:1, “kon an bisan hin-o nga lalaki nagtatalinguha pagkab-ot hin pribilehiyo sugad nga paramangno, maopay nga buhat an iya gintitinguha.” Igin-aaplikar han damu nga brother ito nga pagdasig ngan nangangalimbasog hira nga mag-uswag ha espirituwal basi magin kwalipikado para ha mga pribilehiyo ha kongregasyon. Salit an katawohan han Dios ginbibendisyonan hin yinukot nga tigurang ngan ministeryal nga surugoon. Kondi tungod han pag-uswag han mga kongregasyon, mas damu pa nga brother an ginkikinahanglan basi magin paramangno. Ano an husto nga paagi ha pagkab-ot hito? Ngan sadang ba paghinunahunaon hadton karuyag magin tigurang kon san-o nira ito makakab-ot, sugad han ginbuhat ni Fernando?

Ha Biblia, an mga pulong nga “nagtatalinguha pagkab-ot” usa nga hubad tikang ha Griego nga pulong nga mahimo magpasabot hin naghihingyap gud, o naniniguro pag-unat. May kalabotan hito, bangin mahunahuna mo an usa nga tawo nga nangangalimbasog nga maabot an makaruruyag nga prutas nga nabitay ha puno.  Kondi ha pagkab-ot ha pribilehiyo nga magin “paramangno,” diri kahakog an sadang magin motibo. Kay ano? Tungod kay an sadang magin motibo hadton sinsero mag-alagad sugad nga tigurang amo an pagbuhat hin “maopay nga buhat” imbes nga an pagkaada hin posisyon.

May kalabotan han maopay nga buhat nga ginkikinahanglan ha usa nga paramangno, damu hini an mababasa ha 1 Timoteo 3:2-7 ngan Tito 1:5-9. Mahitungod hiton hitaas nga mga suruklan, an maiha na nga tigurang nga hi Raymond nagsaysay: “Para ha akon, an pinakaimportante amo an kon ano kita. Importante an pagin maopay nga mamumulong ngan magturutdo, kondi diri sadang igbalewaray an pagkaimportante han pagin waray ikasaway, pagkaada kontrolado nga panggawi, maopay nga panhunahuna, pagin organisado, maabiabihon, ngan makatadunganon.”

Iginpapakita han usa nga brother nga sinsero nga nagtatalinguha pagkab-ot hin pribilehiyo nga waray ikasaway ha iya pinaagi ha paglikay ha ngatanan nga klase han pagkadiri-tangkod ngan kahugaw. Kontrolado niya an iya panggawi, maopay an iya panhunahuna, organisado hiya, ngan makatadunganon. Salit nasarig an iya mga igkasi-magsiringba nga pangungunahan niya hira ngan bubuligan ha ira mga problema. Tungod kay maabiabihon hiya, nadadasig niya an mga batan-on ngan adton bag-ohan. Naliliaw ngan nabubuligan niya adton may sakit ngan mga edaran na kay mahigugmaon hiya ha kaopayan. Iya ginkukultibar ini nga mga kalidad para magpahimulos an iba, diri basi pilion hiya nga magin tigurang. *

An lawas han mga tigurang nalilipay ha pagsagdon ngan pagdasig, kondi an usa nga nagtatalinguha pagkab-ot hin pribilehiyo amo an kinahanglan mangalimbasog nga maabot an Kasuratanhon nga mga kwalipikasyon. Hi Henry nga maiha na nga paramangno, nagsiring: “Kon nagkakab-ot ka hin pribilehiyo, pangalimbasog nga mapamatud-an mo nga kwalipikado ka.” May kalabotan ha Eklesiastes 9:10, hiya nagsaysay: “‘Bisan ano nga buhat nga hiagian han imo kamot, buhata ini ha imo [bug-os nga] kusog.’ Anoman an itoka ha imo han mga tigurang, buhata an ngatanan mo nga mahihimo. Higugmaa an ngatanan nga iginpapabuhat ha imo ha kongregasyon, pati na an pagsilhig. Maabot an panahon, makikita an imo ginbubuhat ngan an imo mga pangalimbasog.” Kon karuyag mo magin tigurang  pag-abot han panahon, magin maduruto ngan magin masasarigan ha ngatanan nga bahin han imo pag-alagad ha Dios. Sadang ka magin mapainubsanon, diri magin hambog ngan ambisyoso.—Mat. 23:8-12.

An pipira nga naghihingyap hin pribilehiyo bangin magpabati-bati mahitungod hito o impluwensyahan niya an lawas han mga tigurang. An iba diri nalilipay kon ginsasagdonan han mga tigurang. Sadang nira pakianhan an ira kalugaringon, ‘Interesado la ba ako ha akon kaopayan, o karuyag ko gud mangnoan an mga karnero ni Jehova?’

Diri sadang hingalimtan hadton nagtatalinguha pagkab-ot hin pribilehiyo an usa pa nga kwalipikasyon han pagin tigurang, an ‘pagin mga susbaranan ha panon.’ (1 Ped. 5:1-3) An usa nga susbaranan ha kongregasyon naglilikay ha malimbong nga panhunahuna ngan buhat. Ginkukultibar niya an hilawig nga pagpailob, tigurang man hiya o diri. An pagin tigurang diri milagroso nga nagwawara han mga kaluyahan. (Num. 12:3; Sal. 106:32, 33) Dugang pa, bangin abaton han usa nga brother nga ‘limpyo an iya konsensya’ o waray ikasaway ha iya, kondi an iba bangin may nakikita ha iya nga negatibo nga mga butang. (1 Cor. 4:4) Salit, kon an mga tigurang sinsero nga magsagdon ha imo hin basado ha Biblia, pamatii ito ngan ayaw kaaringit. Katapos, pangalimbasog nga maiaplikar ito.

Para ha pipira nga brother, maiha hira nga naghinulat antes hira magin tigurang. Kon maiha ka na nga ‘nagtatalinguha pagkab-ot nga [magin] paramangno,’ usahay nababaraka ka ba kon san-o ito mahitatabo? Kon amo, hinumdumi inin giniyahan nga mga pulong: “An paglaom nga ginlanganlangan nakakasakit han kasingkasing, kondi kon an hingyap naabot, ini amo an kahoy ha kinabuhi.”—Prob. 13:12.

Bangin masakitan an usa kon an iya ginhahandom gud nga tumong baga hin diri nakakab-ot. Ito an gin-abat ni Abraham. Nagsaad ha iya hi Jehova nga magkakaada hiya anak, kondi lumabay an mga tuig nga waray hira magkaanak ni Sarah. (Gen. 12:1-3,  7) Han lagas na hi Abraham, hiya nagsinggit: “O Ginoo nga Jehova, ano an imo ihahatag ha akon, kon ako waray anak . . . Ha akon ikaw waray maghatag hin katulinan.” Ginpasarig hiya ni Jehova nga matutuman an Iya saad mahitungod ha pagkaada hin anak. Kondi, mga 14 ka tuig pa an lumabay antes tumanon han Dios ito nga saad.—Gen. 15:2-4; 16:16; 21:5.

Samtang naghuhulat hi Abraham, nawara ba an iya kalipay ha pag-alagad kan Jehova? Waray. Waray gud niya pagruhaduhai an saad han Dios. Padayon niya nga ginpamulat an katumanan hini. Hi apostol Pablo nagsurat: “Katapos ni Abraham magpakita hin pagpailob, nakarawat niya ito nga saad.” (Heb. 6:15) Ha urhi, ginbendisyonan han Makagarahum-ha-ngatanan nga Dios inin matinumanon nga lalaki labaw pa han iya ginlalaoman. Ano an aton hibabaroan tikang kan Abraham?

Kon karuyag mo magin tigurang kondi diri mo pa ito nakakab-ot ha sulod hin maiha na nga katuigan, padayon nga sarig kan Jehova. Ayaw tuguti nga mawara an imo kalipay ha pag-alagad ha iya. Hi Warren nga nakabulig hin damu nga brother nga mag-uswag ha espirituwal, nagsaysay: ‘Ginkikinahanglan an panahon basi mapamatud-an nga kwalipikado na an usa nga brother para ha pribilehiyo. Paglabay han panahon, an iya mga abilidad ngan disposisyon hinay-hinay nga nakikita ha iya panggawi ngan pagtuman ha iya mga toka. May  pipira nga naghuhunahuna nga malampuson la hira kon magin tigurang na hira. Sayop gud ini ngan posible nga ini na la an ira paghinunahunaon. Kon matinumanon ka nga nag-aalagad kan Jehova, bisan hain ka man o anoman an imo toka, malampuson ka.’

Usa nga brother an naghinulat hin sobra 10 ka tuig antes magin tigurang. Ha pag-unabi ha pamilyar nga paghulagway ha libro han Esekiel kapitulo 1, iginsumat niya an leksyon nga iya hinbaroan: “Ginmamaniobra ni Jehova an iya karuwahe, an iya organisasyon, ha kalaksihon nga iya karuyag. An importante diri an aton panahon kondi an panahon ni Jehova. May kalabotan han akon hingyap nga magin tigurang, an importante diri an akon karuyag o an akon hingyap. An akon karuyag bangin diri amo an akon ginkikinahanglan sumala ha panhunahuna ni Jehova.”

Kon karuyag mo magin paramangno ha tidaraon, pagtalinguha pagkab-ot pinaagi ha pagbulig nga magin malipayon an kongregasyon. Kon baga hin maiha ka na nga naghihinulat, ayaw kabaraka, lugod pagpailob la. Hi Raymond nga gin-unabi na, nagsiring: “An pagin ambisyoso amo an kaaway han pagin kontento. Nawawara an daku nga kalipay ha pag-alagad kan Jehova hadton pirme nagkikinabaraka.” Bug-os nga kultibara an bunga han espiritu han Dios, labi na an hilawig nga pagpailob. Pangalimbasog nga mapauswag an imo espirituwalidad pinaagi ha pag-aram han Biblia. Dugangi an imo panahon ha pagsangyaw han maopay nga sumat ngan ha pagdumara hin mga pag-aram ha Biblia. Pangunahi an imo pamilya ha mga buruhaton ha pag-alagad ngan ha Pagsingba han Pamilya. Pahimulusi an tagsa nga higayon nga makaupod mo an kabugtoan. Samtang padayon mo nga ginkakab-ot an imo tumong, malilipay ka ha pag-alagad kan Jehova.

An pagtalinguha nga magin kwalipikado para ha mga pribilehiyo ha kongregasyon usa nga maopay nga oportunidad tikang kan Jehova; diri niya karuyag pati han iya organisasyon nga adton nagtatalinguha pagkab-ot umabat hin kapakyasan ngan kasubo ha pag-alagad. Ginbubuligan ngan ginbibendisyonan han Dios an ngatanan nga nag-aalagad ha iya nga may limpyo nga motibo. Tinuod gud nga an ngatanan nga bendisyon nga iya iginhahatag, ‘waray niya igindudugang hito nga kasubo.’—Prob. 10:22.

Bisan kon maiha ka na nga nagtatalinguha pagkab-ot hin pribilehiyo, may mahihimo ka pa gihapon basi mag-uswag an imo relasyon kan Jehova. Samtang ginpapangalimbasogan mo nga makultibar an ginkikinahanglan nga mga kalidad ngan maduruto nga ginbubuhat an mga toka ha kongregasyon nga diri ginpapasibay-an an imo pamilya, diri hingangalimtan ni Jehova an ngatanan mo nga ginbubuhat ha pag-alagad ha iya. Hinaot pirme magin makalilipay ha imo an pag-alagad kan Jehova, anoman an imo toka.