1, 2. Ano an kahimtang nira Adan ngan Eva ha tinikangan, ngan ano an mga pakiana nga nabangon?

HAN ginlarang hira Adan ngan Eva, waray hira kaaway. Hingpit hira ngan naukoy ha paraiso. May duok hira nga relasyon ha ira Maglalarang sugad nga mga anak. (Gen. 2:7-9; Luc. 3:38) Iginpakita han sugo mismo ha ira han Dios kon mationan-o kaiha hira nga mabubuhi. (Basaha an Genesis 1:28.) Nagkikinahanglan hin pipira ka panahon basi ‘mapuno nira an tuna ngan pagtag-iyahon ito.’ Kondi basi padayon nira nga ‘paghadian an ngatanan nga mananap ha bawbaw han tuna,’ kinahanglan nira mabuhi ha waray kataposan. Padayon nga bubuhaton ni Adan ini nga sugo tungod kay diri hiya mamamatay.

² Kondi kay ano nga kabaliktaran gud hito an kahimtang yana? Paonan-o nagkaada damu hinduro nga kaaway—nga an pinakamabangis hito amo an kamatayon—nga nagpupugong nga magin malipayon an tawo? Ano an bubuhaton han Dios basi mawara ini nga mga kaaway? Mababasa ha Biblia an mga baton hini ngan an iba pa nga pakiana nga may kalabotan hini. Usisahon naton an pipira hito.

3, 4. (a) Ano nga sugo an iginhatag han Dios kanda Adan ngan Eva? (b) Mationan-o kaimportante an pagsugot hito nga sugo?

³ Bisan kon hira Adan ngan Eva may paglaom nga mabuhi ha waray kataposan, diri hira imortal. Basi padayon nga mabuhi, kinahanglan nira guminhawa, uminom, kumaturog, ngan kumaon. Labaw ha ngatanan, an ira kinabuhi nadepende ha ira relasyon kan Jehova, an Surok han kinabuhi. (Deut. 8:3) Importante nga sundon nira an giya han Dios basi padayon hira nga mabuhi nga malipayon. Iginpatin-aw ini ni Jehova kan Adan antes pa larangon hi Eva. Paonan-o? “Hi Jehova nga Dios nagsugo han lalaki, nga nasiring: Ha tagsa nga kahoy han tanaman makakahimo ikaw pagkaon hin waray makauulang, kondi han kahoy han kinaadman han kaopayan ngan han karaotan, diri ka makakakaon: kay ha adlaw nga ikaw kumaon hito, ikaw gud mamamatay.”—Gen. 2:16, 17.

⁴ An “kahoy han kinaadman han kaopayan ngan han karaotan” nagrirepresentar han katungod han Dios ha pagdesisyon kon ano an maopay ngan kon ano an maraot. Syempre, may abilidad hi Adan ha paghibaro han maopay ngan han maraot; ginlarang hiya ha dagway han Dios ngan may-ada hiya konsensya. An kahoy magpapahinumdom kanda Adan ngan Eva nga kinahanglan nira pirme magpagiya kan Jehova. Kon ira kakaunon an bunga han kahoy, magpapakita ito nga karuyag nira magkinabuhi nga bulag ha Dios, nga magriresulta han ira kamatayon pati han ira magigin mga anak, sugad han iginpahamangno ha ira han Dios.

5. Kay ano nga hira Adan ngan Eva nagtalapas kan Jehova?

⁵ Katapos larangon hi Eva, ginsumatan hiya ni Adan mahitungod han sugo han Dios. Maaram gud hiya hito ngan gin-utro pa ngani niya ito pagyakan hin haros pulong-por-pulong. (Gen. 3:1-3) Gin-utro niya ito ha usa nga halas, nga maikmat nga hayop, nga nakig-istorya ha iya. An nagpaluyo hito nga halas amo hi Satanas nga Yawa, usa nga espiritu nga anak han Dios. Ginpasagdan niya nga magtubo an iya hingyap nga magin bulag ha Dios ngan magkaada awtoridad. (Itanding an Santiago 1:14, 15.) Basi matuman iton maraot nga mga hingyap, iya gin-akusaran nga buwaon an Dios. Ginsiguro ni Satanas kan Eva nga kon magkikinabuhi hi Eva nga bulag ha Dios, diri hiya mamamatay, lugod magigin pariho hiya ha Dios. (Gen. 3:4, 5) Tinoo hito hi Eva, iginpakita nga diri niya karuyag magpasakop ha Dios pinaagi ha pagkaon han bunga han kahoy, ngan iya gin-aghat hi Adan nga kumaon liwat hito. (Gen. 3:6, 17) Ginbuwaan han Yawa hi Eva. (Basaha an 1 Timoteo 2:14.) Bisan kon maaram hi Adan nga sayop ito, ‘namati hiya ha tingog han iya asawa.’ Bisan kon an halas baga hin usa nga sangkay, ha pagkamatuod hi Satanas nga Yawa usa nga waray kalooy nga kaaway nga maaram han maraot gud nga magigin resulta han iya ginsiring kan Eva.

6, 7. Paonan-o iginpadapat ni Jehova an sirot ha mga nakasala?

⁶ Tungod han hakugnon nga mga hinungdan, nagrebelde hira Adan ngan Eva ha Usa nga naghatag ha ira hin kinabuhi ngan ha mga butang nga may-ada hira. Syempre, maaram hi Jehova han ngatanan nga nahitabo. (1 Kron. 28:9; basaha an Proberbios 15:3.) Iya gintugotan an tulo nga indibiduwal nga ipakita kon ano an ira inabat mahitungod ha iya. Sugad nga Amay, sigurado nga nasakitan gud hi Jehova. (Itanding an Genesis 6:6.) Kondi sugad nga Hukom, iya iginpadapat an sirot hini nga magpakasasala.

⁷ An Dios nagsiring kan Adan: “Ha adlaw nga ikaw kumaon hito [bunga han kahoy han kinaadman han kaopayan ngan han karaotan], ikaw gud mamamatay.” Bangin ginhunahuna ni Adan nga ito nga “adlaw” literal nga 24 ka oras. Katapos talapason an sugo han Dios, bangin  naghunahuna hiya nga papatayon hiya ni Jehova antes pa matunod an adlaw. Kondi, “hito ngahaw nga kulopay,” ginkaistorya ni Jehova hira Adan ngan Eva. (Gen. 3:8, Maopay nga Sumat) Iya hira ginbista, siring pa, iya anay hira ginpamatian han ira isisiring. (Gen. 3:9-13) Katapos iya hira ginsirotan. (Gen. 3:14-19) Kon ginpatay dayon niya hira Adan ngan Eva, diri matutuman an iya katuyoan para ha ira pati ha ira mga anak. (Isa. 55:11) Bisan kon naeksperyensyahan dayon nira Adan ngan Eva an mga epekto han sala, gintugotan hira ni Jehova nga magkaada mga anak nga magpapahimulos han iba pa nga bendisyon nga Iya papahinaboon ha tidaraon. Para ha Dios, hira Adan ngan Eva namatay ha adlaw mismo nga hira nakasala. Ngan tungod kay ha panhunahuna han Dios an 1,000 ka tuig pariho la hin usa ka adlaw, namatay hira ha sulod han usa ka “adlaw.”—2 Ped. 3:8.

8, 9. Ano an nagin epekto ha mga tulin ni Adan han sala nga iya ginbuhat? (Kitaa an retrato ha tinikangan hini nga artikulo.)

⁸ An ginbuhat ba nga sala nira Adan ngan Eva makakaapekto ha ira mga anak? Oo. An Roma 5:12 nagsasaysay: “Pinaagi han usa nga tawo an sala sinulod ha kalibotan ngan an kamatayon pinaagi han sala, tungod hito an kamatayon inabot ha ngatanan nga tawo kay hira ngatanan nakasala.” An siyahan nga namatay amo an matinumanon nga hi Abel. (Gen. 4:8) Ha urhi, an iba pa nga tulin ni Adan nalagas ngan namatay. Napanunod ba nira an sala ngan kamatayon? Hi apostol Pablo nagsiring: “Pinaagi han pagkadiri-masinugtanon han usa nga tawo, damu an nagin makasasala.” (Roma 5:19) Napanunod han mga tawo an sala ngan kamatayon, an duha nga kaaway nga diri malilikyan han diri hingpit nga mga tawo. Bisan kon diri kita bug-os nga maaram kon paonan-o ito naipasa ha mga anak ngan tulin ni Adan, pero nakikita naton an mga resulta hito.

⁹ Angayan gud la nga iginhuhulagway han Biblia an napanunod nga sala ngan kamatayon sugad nga “tabon nga natabon han ngatanan nga katawohan, ngan an biray-biray nga ginbitad ha igbaw han ngatanan nga nasud.” (Isa. 25:7) Waray tawo nga nakakalikay hini nga biray, o tabon. Salit an Biblia nasiring: “Tungod kan Adan an ngatanan namamatay.” (1 Cor. 15:22) Salit natural la nga magpakiana, sugad han ginsiring ni Pablo: “Hin-o an magtatalwas ha akon tikang hini nga lawas nga nagdadara ha akon ha kamatayon?” May-ada ba makakatalwas ha iya? *—Roma 7:24.

10. (a) Ano nga mga teksto ha Biblia an nagpapakita nga wawad-on ni Jehova an kamatayon? (b) Ano an igintututdo ha aton hini nga mga teksto mahitungod kan Jehova ngan ha iya Anak?

¹⁰ Oo, kaya talwason ni Jehova hi Pablo. Katapos unabihon ni Isaias an mahitungod han “tabon,” hiya nagsurat: “Iya linamoy ha kadayonan an kamatayon; ngan an Ginoo nga hi Jehova magpapahid han mga luha tikang ha ngatanan nga nawong.” (Isa. 25:8) Sugad la nga ginwawara han usa nga amay an hinungdan han pag-antos han iya mga anak ngan ginpapahid an mga luha ha ira mga mata, nalilipay gud liwat hi Jehova nga wad-on an kamatayon! May kabulig hiya ha pagbuhat hini. Ha 1 Corinto 15:22 aton mababasa: “Sugad la nga tungod kan Adan an ngatanan namamatay, sugad man an ngatanan mabubuhi pinaagi han Kristo.” Ha pariho nga paagi, katapos ni Pablo magpakiana “Hin-o an magtatalwas ha akon?” hiya nagpadayon: “Nagpapasalamat ako ha Dios pinaagi kan Jesu-Kristo nga aton Ginoo!” (Roma 7:25) Matin-aw nga padayon nga ginhigugma ni Jehova an mga tawo bisan pa kon nagrebelde hira Adan ngan  Eva. Ngan hi Jesus nga binulig kan Jehova basi umiksister hira Adan ngan Eva, nahigugma pa gihapon ha mga tawo. (Prob. 8:30, 31) Kondi paonan-o matatalwas an mga tawo tikang ha sala ngan kamatayon?

11. Ano an ginbuhat ni Jehova basi buligan an mga tawo?

¹¹ Han nakasala hi Adan, ginsirotan hiya ni Jehova hin kamatayon. Tungod hito, an ngatanan nga tawo nakapanunod han pagkadiri-hingpit ngan kamatayon. (Roma 5:12, 16) Ha Roma 5:18 aton mababasa: “An usa nga pagtalapas nagresulta ha pagpahayag nga salaan an ngatanan nga klase hin tawo.” Ano an bubuhaton ni Jehova basi matalwas an mga tawo tikang hini nga sirot samtang diri iginbabalewaray an iya mismo mga suruklan? Hibabaroan naton an baton hini ha ginsiring ni Jesus: ‘An Anak han tawo kinanhi basi maghalad han iya kalag sugad nga lukat para ha damu nga tawo.’ (Mat. 20:28) Iginpatin-aw hinin siyahan nga espiritu nga anak ni Jehova, nga natawo nga hingpit dinhi ha tuna, nga maitatagana niya an lukat. Paonan-o maihahatag an hustisya pinaagi hini nga lukat?—1 Tim. 2:5, 6.

12. Ano an katugbang nga lukat nga nagpakita han hustisya?

¹² Sugad nga hingpit nga tawo, mabubuhi liwat hi Jesus ha kadayonan pariho kan Adan antes ito makasala. Katuyoan ni Jehova nga mapuno an tuna han hingpit nga tulin ni Adan. Salit tungod han daku nga gugma ni Jesus ha iya Amay ngan ha mga tulin ni Adan, iya iginhalad an iya tawhanon nga kinabuhi. Oo, iginhatag ni Jesus an iya hingpit nga kinabuhi sugad nga katugbang han nawara ni Adan. Ha urhi, ginbanhaw ni Jehova an iya Anak ngadto ha langit sugad nga espiritu. (1 Ped. 3:18) Tungod han hustisya, mahimo karawaton ni Jehova an halad hiton usa nga hingpit nga tawo nga hi Jesus, sugad nga lukat, o palit, basi maibalik ha tulin ni Adan an kinabuhi nga waray kataposan nga nawara ni Adan. Karuyag sidngon, hi Jesus an nagin kasaliwan ni Adan. Hi Pablo nagsaysay: “Ini an iginsurat: ‘An siyahan nga tawo nga hi Adan nagin buhi nga kalag.’ An kataposan nga Adan nagin espiritu nga naghahatag hin kinabuhi.”—1 Cor. 15:45.

13. Ano an bubuhaton han “kataposan nga Adan” para hadton mga namatay?

¹³ Maabot na gihapon an panahon nga ihahatag han “kataposan nga Adan” an “espiritu nga naghahatag hin kinabuhi” ngadto ha mga tulin ni Adan. Kaupod hini an kadam-an nga namatay ha naglabay. Babanhawon hira, o ibabalik an ira kinabuhi, dinhi ha tuna.—Juan 5:28, 29.

14. Ano an ginbuhat ni Jehova basi matalwas an mga tawo tikang ha ira napanunod nga pagkadiri-hingpit?

¹⁴ Paonan-o makakatalwas an mga tawo tikang ha ira napanunod nga pagkadiri-hingpit? Pinaagi ha pag-establisar ni Jehova hin usa nga Ginhadian nga an magmamando hito amo hi Jesus upod an 144,000 nga ginpili tikang ha katawohan. (Basaha an Pahayag 5:9, 10.) Tungod kay naeksperyensyahan hinin 144,000 an pagin diri hingpit nga tawo, masasabtan nira an ira mga sakop. Ha sulod han 1,000 ka tuig, bubuligan ni Jesus pati han iya mga igkasi-magmarando nga madaog han mga tawo an ira pagkadiri-hingpit nga diri nira mahihimo ha ira la pangalimbasog.—Pah. 20:6.

15, 16. (a) Ano an gin-uunabi ha Biblia nga “kataposan nga kaaway, an kamatayon”? San-o ito wawad-on? (b) Sumala ha 1 Corinto 15:28, ano an bubuhaton ni Jesus ha maabot nga panahon?

¹⁵ Ha kataposan han 1,000 ka tuig nga pagmando han Ginhadian, an masinugtanon nga katawohan matatalwas tikang ha ngatanan nga kaaway nga resulta han pagtalapas ni Adan. An Biblia nasiring: “Sugad la nga tungod kan Adan an ngatanan namamatay, sugad man an ngatanan mabubuhi pinaagi han Kristo. Pero an kada tagsa mabubuhi uyon ha husto nga pagkasunod-sunod: an Kristo amo an una nga bunga, katapos an mga kan Kristo [an iya mga igkasi-magmarando] ha panahon han iya presensya. Sunod, an kataposan, kon ihatag na niya an Ginhadian ha iya Dios ngan Amay katapos niya  wad-on an ngatanan nga gobyerno ngan an ngatanan nga awtoridad ngan gahum. Kay kinahanglan maghadi hiya tubtob nga ibutang han Dios an ngatanan nga kaaway ha ilarom han iya mga tiil. Sugad nga kataposan nga kaaway, an kamatayon wawad-on.” (1 Cor. 15:22-26) Oo, wawad-on na an kamatayon nga napanunod kan Adan. An “tabon” nga nakakatabon ha bug-os nga katawohan wawad-on na ha kadayonan.—Isa. 25:7, 8.

¹⁶ Gintapos ni apostol Pablo an iya giniyahan nga asoy pinaagi hini nga mga pulong: “Kon igpasakop na ha iya an ngatanan nga butang, an Anak mismo magpapasakop liwat ha Dios nga amo an nagpasakop han ngatanan nga butang ha iya, basi an Dios gud la an magmando han ngatanan.” (1 Cor. 15:28) Matutuman na an katuyoan han pagmando han Anak. Salit may kalipay nga iya ibabalik an iya awtoridad ngadto kan Jehova ngan ipipresentar an hingpit na nga tawhanon nga pamilya.

17. Ano an mahitatabo kan Satanas?

¹⁷ Ano an mahitatabo kan Satanas, an siyahan nga hinungdan han ngatanan nga kasakitan han katawohan? Ginbabaton ito han Pahayag 20:7-15. Ha ultimo nga pagsari para ha ngatanan nga hingpit nga katawohan, tutugotan hi Satanas nga sulayon hira. An Yawa ngan adton mga nagpasulay ha iya, mabubungkag ha kadayonan. Gintatawag ini nga “ikaduha nga kamatayon.” (Pah. 21:8) Ini nga kamatayon diri na “wawad-on” tungod kay an makakaeksperyensya hini diri na gud babanhawon. Kondi ini nga kamatayon diri tarhog para hadton nahigugma ngan nag-aalagad ha ira Maglalarang.

18. Paonan-o matutuman an sugo han Dios kan Adan?

¹⁸ Hito nga panahon, an hingpit na nga katawohan matindog ha atubangan ni Jehova sugad nga takos gud para ha kinabuhi nga waray kataposan. Mawawara na an ngatanan nga kaaway nga nagpupugong basi magin malipayon an katawohan. Bisan kon waray na hi Adan, matutuman an sugo nga iginhatag ha iya. An tuna mapupuno han iya mga tulin, nga malipayon nga mag-aataman hito pati ha mga hayop. Hinaot pirme gud naton apresyaron an mahigugmaon nga paagi ni Jehova ha pagwara han kataposan nga kaaway, an kamatayon!