1, 2. Ano an magpaparig-on han aton pagtoo nga tutumanon han Ginhadian an katuyoan han Dios para ha katawohan, ngan kay ano? (Kitaa an retrato hini nga pahina.)

SUGAD nga mga Saksi ni Jehova, agsob kita sumiring nga an Ginhadian han Dios amo la an solusyon han ngatanan naton nga problema, ngan madasigon nga iginsusumat naton ha iba inin importante nga kamatuoran ha Biblia. Naliliaw gud liwat kita ha paglaom nga iginhahatag ha aton han Ginhadian. Kondi mationan-o kita kakombinsido nga tinuod an Ginhadian ngan tutumanon hito an katuyoan han Dios? Ano an aton basihan para magkaada marig-on nga pagtoo ha Ginhadian?—Heb. 11:1.

² An Mesianiko nga Ginhadian usa nga kahikayan nga gin-establisar mismo han Makagarahum-ha-ngatanan basi matuman an iya katuyoan may kalabotan ha iya mga linarang. Ito nga Ginhadian iginbasar ha usa nga marig-on nga pundasyon—an katungod ni Jehova ha pagmando. An importante nga mga bahin han Ginhadian—an hadi hito, an iya mga igkasi-magmarando, an mga sakop han ira pagmando—legal nga igin-establisar pinaagi han mga kasabotan, karuyag sidngon, pinaagi han legal nga mga kontrata o kahikayan diin an usa nga nakigsabot hito amo an Dios o an iya Anak nga hi Jesu-Kristo. An pag-usisa hini nga mga kasabotan magdudugang han aton pagsabot kon  paonan-o matutuman an katuyoan han Dios ngan mabulig ha aton nga makita kon mationan-o karig-on ini nga Ginhadian.—Basaha an Efeso 2:12.

3. Ano an aton uusisahon hini nga artikulo ngan ha sunod hini?

³ An Biblia nag-uunabi hin unom nga nangunguna nga mga kasabotan nga may koneksyon ha Mesianiko nga Ginhadian ilarom ha pagmando ni Kristo Jesus. Ito amo an (1) kasabotan kan Abraham, (2) Balaud nga kasabotan, (3) kasabotan kan David, (4) kasabotan para ha usa nga saserdote pariho kan Melkisedek, (5) bag-o nga kasabotan, ngan (6) kasabotan han Ginhadian. Aton usisahon kon paonan-o an tagsa nga kasabotan konektado ha Ginhadian ngan kon paonan-o ito nabulig ha pagtuman han katuyoan han Dios para ha tuna ngan ha katawohan.—Kitaa an tsart nga “ Kon Paonan-o Tutumanon han Dios an Iya Katuyoan.”

4. Sumala ha Genesis, ano an iginpahayag ni Jehova nga mga butang nga kinahanglan buhaton may kalabotan ha mga tawo?

⁴ Katapos iandam an aton makaruruyag nga planeta para ukyan han tawo, nagpahayag an Dios hin tulo nga butang nga kinahanglan buhaton may kalabotan ha mga tawo: (1) Lalarangon han aton Dios an mga tawo ha Iya dagway. (2) Hihimoon han mga tawo nga Paraiso an bug-os nga tuna ngan pupun-on ito hin magtadong nga mga anak. (3) An mga tawo diri sadang kumaon han bunga han kahoy ha paghibaro han kaopayan ngan han karaotan. (Gen. 1:26, 28; 2:16, 17) Labot hito, waray na iba pa nga ginkikinahanglan. Katapos larangon an tawo, duha na la an kinahanglan buhaton basi matuman an katuyoan han Dios. Kondi kay ano nga kinahanglan pa magkaada hin mga kasabotan?

5, 6. (a) Ano an ginbuhat ni Satanas basi diri matuman an katuyoan han Dios? (b) Paonan-o ginbaton ni Jehova an ayat ni Satanas ha Eden?

⁵ Tungod kay karuyag gud ni Satanas nga Yawa nga diri matuman an katuyoan han Dios, nagpatikang hiya hin pagrebelde. Iya ginpaluya an pagkamasinugtanon han tawo ha Dios pinaagi ha pagsulay kan Eva nga kumaon han bunga han kahoy han kinaadman han kaopayan ngan han karaotan. (Gen. 3:1-5; Pah. 12:9) Ha pagbuhat hini, gin-ayat ni Satanas an katungod han Dios ha pagmando ha Iya mga linarang. Ha urhi, gin-akusaran liwat ni Satanas an maunungon nga mga surugoon han Dios nga nag-aalagad la hira tungod ha hakugnon nga mga motibo.—Job 1:9-11; 2:4, 5.

⁶ Paonan-o babatunon ni Jehova an ayat ni Satanas ha Eden? Oo, puydi unta niya bungkagon an mga rebelde. Kondi kon bubuhaton niya ito, diri matutuman an iya katuyoan nga pun-on an tuna han masinugtanon nga katulinan nira Adan ngan Eva. Salit imbes nga patayon dayon an mga rebelde, ito nga ayat ginbaton han makinaadmananon nga Maglalarang pinaagi hin importante gud nga tagna—an saad ha Eden—basi masiguro nga matutuman an tagsa nga detalye han iya mga saad.—Basaha an Genesis 3:15.

7. Ano an iginpapasarig ha aton han saad ha Eden may kalabotan han mahitatabo ha halas ngan ha tulin hito?

⁷ Pinaagi han saad ha Eden, ginhukman ni Jehova hin kamatayon an halas ngan an tulin hito nga nagrirepresentar kan Satanas nga Yawa ngan ha ngatanan nga madapig ha iya mahitungod ha isyu han katungod han Dios ha pagmando. An tinuod nga Dios naghatag hin awtoridad ha tulin han babaye basi bungkagon hi Satanas. Salit iginpakita han saad ha Eden nga bubungkagon an nagpatikang han pagrebelde pati an ngatanan nga maraot nga epekto han iya ginbuhat ngan kon paonan-o ito mahitatabo.

8. Ano an aton masisiring mahitungod han pangirilal-an han babaye ngan han iya tulin?

⁸ Hin-o an magigin tulin han babaye? Tungod kay an tulin magtutultog ha ulo han halas, karuyag sidngon, ‘magbubungkag’ ha espiritu nga linarang nga hi Satanas nga Yawa, kinahanglan an  tulin usa nga espiritu nga persona. (Heb. 2:14) Salit an babaye nga manganganak han tulin usa liwat nga espiritu. Samtang nagdadamu an tulin han halas, an pangirilal-an han babaye pati an tulin hito nagpabilin nga misteryo ha sulod hin haros 4,000 ka tuig katapos unabihon ni Jehova an saad ha Eden. Durante hito nga mga panahon, hi Jehova naghimo hin pipira nga kasabotan nga nagpakilala ha tulin ngan nagsiguro ha Iya mga surugoon nga ini nga tulin an gagamiton han Dios basi wad-on an duro nga karaotan nga ginpahinabo ni Satanas ha katawohan.

9. Ano an kasabotan kan Abraham, ngan kakan-o ito naimplementar?

⁹ Mga 2,000 ka tuig katapos sentensyahan hi Satanas, ginsugo ni Jehova an patriarka nga hi Abraham nga bumaya ha Ur ha Mesopotamia ngan kumadto ha Canaan. (Buh. 7:2, 3) Hi Jehova nagsiring ha iya: “Gawas ha imo tuna, ngan ha imo mga kaurupdan, ngan ha balay han imo amay, ngan mapakadto ha tuna nga akon ha imo ipakikita. Ngan hihimoon ko ikaw nga daku nga nasud, ngan bibendisyonan ko ikaw ngan pagpapadakuon ko an imo ngaran; ngan ikaw mahihimo nga bendisyon: Ngan akon pagbibendisyonan adton magbibendisyon ha imo, ngan adton magtatampalas ha imo, akon pagdadauton: ngan ha imo an ngatanan nga mga panimalay ha tuna mabubulahan.” (Gen. 12:1-3) Ini an siyahan nga nakarekord nga asoy mahitungod han kasabotan kan Abraham—an kasabotan nga ginhimo ni Jehova nga Dios kan Abraham. Diri kita maaram kon kakan-o gud ito siyahan nga ginhimo. Kondi naimplementar ito han 1943 B.C.E., han an 75 anyos nga hi Abraham bumaya ha Haran ngan tumabok ha Salog Euprates.

10. (a) Paonan-o nagpakita hi Abraham hin marig-on nga pagtoo ha mga saad han Dios? (b) Ano nga mga detalye an hinay-hinay nga iginpahayag ni Jehova mahitungod ha tulin han babaye?

¹⁰ Damu ka beses nga gin-utro ni Jehova an iya saad kan Abraham, ngan ha kada higayon  nga ginbubuhat niya ito, naghahatag hiya hin dugang nga detalye. (Gen. 13:15-17; 17:1-8, 16) Ngan han iginpakita ni Abraham an iya marig-on nga pagtoo ha mga saad han Dios pinaagi ha pagin andam nga ihalad an iya bugtong nga anak, ginparig-on ni Jehova an kasabotan pinaagi ha paggarantiya nga matutuman an Iya saad. (Basaha an Genesis 22:15-18; Hebreo 11:17, 18.) Katapos ig-implementar an kasabotan kan Abraham, hinay-hinay nga iginpahayag ni Jehova an importante nga mga detalye mahitungod han tulin han babaye. An tulin magtitikang kan Abraham, magdadamu, magigin mga hadi, magbubungkag han ngatanan nga kaaway, ngan magigin bendisyon para ha damu nga tawo.

11, 12. Paonan-o iginpapakita han Kasuratan nga an kasabotan kan Abraham may-ada pa mas daku nga katumanan? Ano an kapulsanan hito ha aton?

¹¹ An kasabotan kan Abraham nagkaada siyahan nga katumanan ha mga tulin ni Abraham han nakasulod na hira ha Tuna nga Iginsaad. Kondi iginpapakita han Kasuratan nga may-ada pa ito mas daku nga katumanan. (Gal. 4:22-25) Pinaagi ha paggiya han Dios, iginsaysay ni apostol Pablo nga an siyahan nga bahin han tulin ni Abraham amo hi Kristo, ngan an ikaduha nga bahin amo an 144,000 nga dinihogan nga mga Kristiano. (Gal. 3:16, 29; Pah. 5:9, 10; 14:1, 4) An babaye nga nanganganak han tulin waray iba kondi “an langitnon nga Jerusalem”—an langitnon nga bahin han organisasyon han Dios nga ginkukompwesto han maunungon nga espiritu nga mga linarang. (Gal. 4:26, 31) Sugad han saad han kasabotan kan Abraham, an tulin han babaye magdadara hin mga bendisyon ha katawohan.

¹² An kasabotan kan Abraham naghahatag hin legal nga garantiya para ha Ginhadian han mga langit. Naggagarantiya liwat ito para ha Hadi ngan ha iya mga igkasi-magmarando nga makapanunod hira hito nga Ginhadian. (Heb. 6:13-18) Tubtob san-o ig-iimplementar ini nga kasabotan? ‘Waray kataposan ito nga kauyonan,’ o kasabotan, siring han Genesis 17:7. Padayon ito nga ig-iimplementar tubtob nga bungkagon han Mesianiko nga Ginhadian an mga kaaway han Dios ngan bendisyonan an ngatanan nga pamilya ha tuna. (1 Cor. 15:23-26) Ha pagkamatuod, adton mabubuhi ha tuna hito nga panahon makakakarawat han mga kapulsanan hito nga kasabotan ha waray kataposan. An kasabotan han Dios kan Abraham nagpapamatuod nga determinado hi Jehova ha pagtuman han iya katuyoan nga ‘pun-on an tuna’ hin matadong nga katawohan!—Gen. 1:28.

13, 14. Ano an igin-garantiya han kasabotan kan David may kalabotan ha pagmando han Mesias?

¹³ An saad ha Eden ngan an kasabotan kan Abraham nag-establisar han importante nga kamatuoran nga an katungod ni Jehova nga magmando nga iginpakita pinaagi han Mesianiko nga Ginhadian marig-on nga iginbasar ha matadong nga mga suruklan han Dios. (Sal. 89:14) Magigin maraot ba an Mesianiko nga Ginhadian salit kinahanglan ito wad-on? Usa pa nga legal nga kasabotan an naggarantiya nga diri gud ini mahitatabo.

¹⁴ Hunahunaa an iginsaad ni Jehova kan Hadi David han kadaan nga Israel. Ito nga saad gintatawag nga kasabotan kan David. (Basaha an 2 Samuel 7:12, 16.) Ginhimo ini ni Jehova durante han pagmando ni David ha Jerusalem. Nagsaad hiya nga an Mesias magtitikang ha tulin ni David. (Luc. 1:30-33) Hini nga paagi, naghatag hi Jehova hin mas espisipiko nga detalye mahitungod han pamilya nga pagtitikangan han Mesias ngan nagsiring hiya nga usa han manurunod ni David an magkakaada “katadongan,” o legal nga katungod, ha trono han Mesianiko nga Ginhadian. (Esek. 21:25-27) Pinaagi kan Jesus, an pagkahadi ni David ‘magpapadayon hin waray kataposan.’ Ha pagkamatuod, an tulin ni David “magdadayon hin waray kataposan, ngan an iya lingkuranan  nga hadianon sugad han adlaw.” (Sal. 89:34-37) Oo, an pagmando han Mesias diri gud magigin maraot, ngan an mga kapulsanan nga ihahatag hito magpapadayon ha waray kataposan!

15-17. Sumala han kasabotan para ha usa nga saserdote pariho kan Melkisedek, ano an magigin dugang nga katungdanan han tulin, ngan kay ano?

¹⁵ Bisan kon an kasabotan kan Abraham ngan an kasabotan kan David naggarantiya nga an tulin han babaye magigin hadi, ito nga pagkahadi diri igo basi makakarawat hin mga bendisyon an mga tawo ha ngatanan nga nasud. Basi mapahimulosan ini, kinahanglan matalwas an katawohan tikang ha pagkamakasasala ngan magin bahin han pamilya ni Jehova ha bug-os nga uniberso. Basi mahitabo ini, kinahanglan an tulin mag-alagad liwat sugad nga saserdote, salit an makinaadmananon nga Maglalarang nagtagana hin usa pa nga legal nga kahikayan, an kasabotan para ha usa nga saserdote pariho kan Melkisedek.

¹⁶ Iginpahayag ni Jehova pinaagi kan Hadi David nga Hiya mismo maghihimo hin kasabotan kan Jesus. Ini nga kasabotan may duha nga katuyoan: basi hi Jesus ‘lumingkod dida ha too nga kamot’ han Dios tubtob nga pirdihon niya an iya mga kaaway ngan basi magin usa nga “saserdote ha gihapon sumala ha katungdanan ni Melkisedek.” (Basaha an Salmo 110:1, 2, 4.) Kay ano nga “sumala ha katungdanan ni Melkisedek”? Tungod kay maiha pa antes makasulod ha Tuna nga Iginsaad an mga tulin ni Abraham, hi Melkisedek nga hadi han Salem, nag-alagad sugad nga “saserdote han Gihitaasi nga Dios.” (Heb. 7:1-3) Hi Jehova mismo an nagpili ha iya hini nga katungdanan. Hiya la an gin-unabi ha Hebreo nga Kasuratan nga nag-alagad sugad nga hadi ngan saserdote. Dugang pa, tungod kay waray rekord nga may ginsaliwnan hiya o sumaliwan ha iya hini nga katungdanan, matatawag hiya nga usa nga “saserdote ha waray kataposan,” o ha kadayonan.

¹⁷ Hi Jesus ginpili mismo ni Jehova nga magin saserdote pinaagi hini nga kasabotan nga ginhimo ni Jehova ha iya, ngan magpapabilin hiya nga ‘usa nga saserdote pariho kan Melkisedek ha waray kataposan.’ (Heb. 5:4-6) Matin-aw, iginpapakita hini nga hi Jehova mismo naggagarantiya nga iya gagamiton an Mesianiko nga Ginhadian basi matuman an iya orihinal nga katuyoan para ha katawohan ngan ha tuna.

18, 19. (a) May kalabotan ha mga kasabotan nga aton ginhisgotan, ano an iginpapakita hito mahitungod ha Ginhadian? (b) Ano an aton hihisgotan ha sunod nga artikulo?

¹⁸ Sumala ha mga kasabotan nga aton ginhisgotan, nakita naton kon ano an koneksyon hito ha Mesianiko nga Ginhadian ngan kon paonan-o an Ginhadian marig-on nga iginbasar ha legal nga mga kontrata. An saad ha Eden naggarantiya nga tutumanon ni Jehova an iya katuyoan ha tuna ngan ha katawohan pinaagi han tulin han babaye. Hin-o ito nga magigin tulin, ngan ano an magigin katungdanan hito? Ito ngatanan iginsasaysay pinaagi han kasabotan kan Abraham.

¹⁹ An kasabotan kan David naghatag hin mas detalyado nga impormasyon mahitungod han pamilya nga pagtitikangan han siyahan nga bahin han tulin, pati han katungod hito ha pagmando ha bug-os nga tuna basi an mga bendisyon nga papahinaboon han Ginhadian magpadayon ha waray kataposan. An kasabotan para ha usa nga saserdote pariho kan Melkisedek naggagarantiya nga an tulin mag-aalagad sugad nga saserdote. Kondi diri la hi Jesus an mabulig basi magin hingpit an katawohan. May-ada pa iba nga gindihogan nga mag-aalagad sugad nga mga hadi ngan mga saserdote. Diin hira magtitikang? Ini an hihisgotan ha sunod nga artikulo.