1. Paonan-o mabulig ha aton an libro han Lebitiko?

AN PAGKABARAAN mas agsob unabihon ha libro han Lebitiko kay ha iba pa nga libro han Biblia. Tungod kay ini nga kalidad ginkikinahanglan para ha ngatanan nga totoo nga magsiringba ni Jehova, an pagkaada hin pagsabot ngan apresasyon ha libro han Lebitiko mabulig ha aton basi hibaroan kon paonan-o kita magigin baraan.

2. Ano an pipira nga impormasyon nga aada ha libro han Lebitiko?

² An libro han Lebitiko, nga iginsurat ni propeta Moises, bahin han “ngatanan nga Kasuratan” nga mapulsanon ha pagtutdo. (2 Tim. 3:16) An ngaran ni Jehova mababasa hin diri maminos napulo ka beses ha kada kapitulo han libro. Kon masasabtan naton an Lebitiko, mapaparig-on kita nga likyan an pagbuhat hin bisan ano nga magpapasipara ha ngaran han Dios. (Leb. 22:32) An agsob nga pag-unabi hito han mga pulong nga “ako hi Jehova” sadang magpahinumdom ha aton nga sugton an Dios. Hini ngan ha masunod nga artikulo, hibabaroan naton an importante nga mga leksyon ha libro han Lebitiko, usa nga regalo tikang ha Dios nga mabulig ha aton nga magin baraan ha aton pagsingba ha iya.

3, 4. Ano an ginrirepresentaran han paglimpyo kan Aaron ngan ha iya mga anak? (Kitaa an retrato hini nga pahina.)

³ Basaha an Lebitiko 8:5, 6. Ginpili ni Jehova hi Aaron nga mag-alagad  sugad nga hitaas nga saserdote ha Israel, ngan an iya anak nga kalalakin-an sugad nga mga saserdote para ha nasud. Hi Aaron nagrirepresentar kan Jesu-Kristo ngan an mga anak ni Aaron nagrirepresentar ha dinihogan nga mga sumurunod ni Jesus. Ano an iginpapasabot han paglimpyo kan Aaron? Nangangahulogan ba ito nga kinahanglan liwat limpyohan hi Jesus? Diri. Hi Jesus waray sala ngan “waray-hugaw,” salit diri hiya kinahanglan limpyohan. (Heb. 7:26; 9:14) Pero an pagin limpyo ni Aaron nagpapasabot nga hi Jesus limpyo ngan matadong. Kon sugad, ano an ginrirepresentaran han paglimpyo ha mga anak ni Aaron?

⁴ An paglimpyo ha mga anak ni Aaron nagrirepresentar ha paglimpyo ha ginpili nga magigin mga saserdote ha langit. An bawtismo ba han mga dinihogan konektado hini nga paglimpyo ha mga anak ni Aaron? Diri. An bawtismo diri nagwawara han mga sala, lugod nagsisimbolo ito han personal nga dedikasyon kan Jehova nga Dios. An paglimpyo ha mga dinihogan ginbubuhat ‘pinaagi han pulong han Dios,’ salit kinahanglan nga bug-os-kasingkasing nga iaplikar nira an mga katutdoan ni Kristo ha ira kinabuhi. (Efe. 5:25-27) Hini nga paagi, nagigin baraan hira ngan limpyo. Kumusta man an “iba nga mga karnero”?​—Juan 10:16.

5. Kay ano nga masisiring nga an iba nga mga karnero nalilimpyohan pinaagi han Pulong han Dios?

⁵ An mga anak ni Aaron diri nagrirepresentar ha “daku nga grupo” han iba nga mga karnero ni Jesus. (Pah. 7:9) Ini ba nga “daku nga grupo” nagigin baraan liwat ngan nalilimpyohan pinaagi han Pulong han Dios? Oo! Kon nababasa hinin may tunan-on nga paglaom an ginsisiring han Biblia mahitungod han pagkaimportante ngan han kapulsanan han iginpaagay nga dugo ni Jesus, natoo hira hini ngan nagbubuhat hin ‘sagrado nga pag-alagad ha adlaw ngan gab-i.’ (Pah. 7:13-15) Nakikita an epekto han padayon nga paglimpyo ha mga dinihogan ngan ha iba nga mga karnero samtang ‘padayon hira nga nagawi hin maopay.’ (1 Ped. 2:12) Sigurado nga nalilipay gud hi Jehova samtang nakikita niya an kalimpyo ngan pagkaurosa han mga dinihogan ngan han iba nga mga karnero, nga namamati ngan maunungon nga nasunod ha ira Paraataman nga hi Jesus!

6. Kay ano nga kinahanglan usisahon naton pirme an aton kalugaringon?

⁶ An panginahanglan nga magin limpyo ha pisikal an mga saserdote ha Israel may importante nga kahulogan para ha katawohan ni Jehova yana. Agsob maobserbaran han aton mga Bible study an pagin limpyo han aton mga lugar han pagsingba pati an aton limpyo ngan desente nga pamado. An kalimpyo han mga saserdote nabulig liwat ha aton nga masabtan nga bisan hin-o nga naruruyag magsingba kan Jehova kinahanglan magkaada “putli nga kasingkasing.” (Basaha an Salmo 24:3, 4; Isa. 2:2, 3.) Salit kinahanglan mag-alagad kita kan Jehova nga may limpyo nga kasingkasing, hunahuna, ngan lawas. Basi mahimo ini, kinahanglan usisahon naton pirme an aton kalugaringon. Usahay bangin kinahanglan naton maghimo hin dagku nga pagbag-o basi magin baraan. (2 Cor. 13:5) Pananglitan, an usa nga bawtismado nga tinuyo nga nagkikinita hin pornograpiya sadang magpakiana ha iya kalugaringon, ‘Ginpapamatud-an ko ba nga baraan ako?’ Katapos, kinahanglan hiya mangaro hin bulig basi maundang iton maraot nga buhat.​—San. 5:14.

7. Ano nga susbaranan an iginpakita ni Jesus nga kapariho han gin-unabi ha Lebitiko 8:22-24?

⁷ Han ginpili an mga saserdote ha Israel, ginbutangan hin dugo han usa nga karnero nga lalaki an too nga talinga, tamuragko han kamot, ngan tamuragko han tiil han Hitaas nga Saserdote nga hi Aaron ngan han iya mga anak. (Basaha an Lebitiko 8:22-24.) Ini nga paggamit hin dugo nagpapasabot nga masinugtanon nga hihimoon han mga saserdote an ngatanan basi mabuhat an ira mga toka. Ha pariho nga paagi, an Hitaas nga Saserdote nga hi Jesus nagpakita hin hingpit nga  susbaranan para ha mga dinihogan ngan ha iba nga mga karnero. An iya talinga namati ha giya han Dios. An iya mga kamot gin-gamit ha pagbuhat han kaburut-on ni Jehova, ngan an iya mga tiil waray gud bumaya ha baraan nga pagkinabuhi.​—Juan 4:31-34.

8. Ano an sadang buhaton han ngatanan nga magsiringba ni Jehova?

⁸ Sadang subaron han dinihogan nga mga Kristiano ngan han iba nga mga karnero ni Jesus an pagin matinumanon han ira Hitaas nga Saserdote. An ngatanan nga magsiringba ni Jehova sadang magin masinugtanon gud ha mga giya nga aada ha Biblia basi diri mapasubo an espiritu han Dios. (Efe. 4:30) Kinahanglan nira ‘tadungon an mga dalan para ha ira mga tiil.’​—Heb. 12:13.

9. Ano an ginsiring han tulo nga brother nga nakatrabaho han mga membro han Nagmamando nga Lawas, ngan paonan-o ini mabulig ha imo nga magpabilin nga baraan?

⁹ Kitaon naton an ginsiring han tulo nga brother nga may tunan-on nga paglaom. Ha sulod hin mga dekada, nakatrabaho nira an mga membro han Nagmamando nga Lawas. An siyahan nga brother nagsiring: “Talagsahon gud ini nga pribilehiyo han pag-alagad, kondi tungod kay pirme ko hira nakakaupod, ha panapanahon nakikita ko nga bisan kon ini nga kabugtoan mga dinihogan, diri pa gihapon hira hingpit. Bisan pa hito, usa han akon mga tumong ha sulod hin damu nga katuigan amo an pagin masinugtanon ha mga nangunguna.” An ikaduha nga brother nagsiring: “An mga teksto sugad han 2 Corinto 10:5, mahitungod ha ‘pagin masinugtanon ha Kristo’ nakabulig ha akon nga magin masinugtanon ngan magkooperar ha mga nangunguna. Kinasingkasing ito nga akon pagsugot.” An ikatulo nga brother nagsiring: “An paghigugma ha ginhihigugma ni Jehova ngan kangalas ha iya ginkakangalasan, sugad man an padayon nga pagpagiya ha iya ngan pagbuhat han iya nalilipayan, nangangahulogan nga kinahanglan naton magin masinugtanon ha iya organisasyon ngan hadton iya gin-gagamit basi matuman an iya katuyoan para ha tuna.” Nahinumdoman hini nga brother an susbaranan ni Nathan Knorr nga nagin membro han Nagmamando nga Lawas. Kinaburut-on nga ginkarawat ni Brother Knorr an ginsiring han artikulo nga “Birth of the Nation” nga iginpublikar han Watch Tower hadton 1925, bisan kon ginkwestyon ito han iba. Bumilib gud an brother hito nga pagkamasinugtanon. An pagpamalandong ha ginsiring hini nga tulo nga brother mabulig ha imo nga magpabilin nga baraan pinaagi ha pagin masinugtanon.

10. Mationan-o kaimportante an aton pagsunod ha balaud han Dios may kalabotan ha dugo?

¹⁰ Basaha an Lebitiko 17:10. Ginsugo ni Jehova an mga Israelita nga diri kumaon hin “bisan ano nga dugo.” An mga Kristiano kinahanglan liwat maglikay ha dugo han hayop o han tawo. (Buh. 15:28, 29) Nahahadlok gud kita bisan la ha paghunahuna nga ‘ibubutang han [Dios] an iya bayhon patok ha aton’ ngan paiwason kita ha iya kongregasyon. Hinigugma naton hiya ngan karuyag naton hiya sugton. Bisan kon mameligro an aton kinabuhi, determinado kita nga diri magpadara kon adton mga diri nakilala kan Jehova o diri nasugot ha iya magpirit ha aton nga supakon hiya. Oo, maaram kita nga tatamayon kita tungod han aton paglikay ha dugo, pero ginpipili naton nga sugton an Dios. (Jud. 17, 18) Ano an mabulig ha aton nga ‘maniguro,’ o magin determinado nga diri kumaon o magpaabuno hin dugo?​—Deut. 12:23.

11. Kay ano nga makakasiring kita nga an tinuig nga Adlaw han Pagbayad han Sala diri la kay waray pulos nga rituwal?

¹¹ Ha kadaan nga Israel, gin-gamit han hitaas nga saserdote an dugo han hayop durante han tinuig nga Adlaw han Pagbayad han Sala. Nabulig ini ha aton nga masabtan an panhunahuna han Dios may kalabotan ha dugo. Gin-gamit an dugo para ha espesyal nga katuyoan—basi mabaydan  an mga sala hadton nangangaro hin kapasayloan kan Jehova. An dugo han nati nga baka ngan han kanding iginwiwisik ha bawbaw ngan ha atubangan han arka han kauyonan. (Leb. 16:14, 15, 19) Pinaagi hini, ginpapasaylo ni Jehova an mga sala han mga Israelita. Iginsugo liwat ni Jehova nga kon an usa nga tawo magpatay hin hayop para kaunon, kinahanglan niya itakbo an dugo hito, ngan tabonan hin tapotapo, ‘kay an kinabuhi han ngatanan nga unod amo an dugo hito.’ (Leb. 17:11-14) Usa la ba ini nga waray pulos nga rituwal? Diri. An paggamit hin dugo ha Adlaw han Pagbayad han Sala pati an sugo nga itakbo an dugo ha tuna, uyon ha iginsugo ni Jehova kan Noe ngan ha mga tulin hito may kalabotan ha dugo. (Gen. 9:3-6) Igindiri ni Jehova an paggamit hin dugo ha pagsustinir ha kinabuhi. Ano an iginpapasabot hini para ha mga Kristiano?

12. Ha surat ni Pablo ha Hebreo nga mga Kristiano, paonan-o niya iginpakita an koneksyon han dugo ngan han kapasayloan?

¹² Han nagsurat hi apostol Pablo ha Hebreo nga mga Kristiano mahitungod han nahihimo han dugo para ha paglimpyo, hiya nagsiring: “Sumala ha Balaud haros ngatanan nga butang nalilimpyohan pinaagi han dugo, ngan kon waray dugo nga igpaagay, waray kapasayloan han mga sala.” (Heb. 9:22) Gin-unabi liwat ni Pablo nga bisan kon may bili an mga halad nga hayop, pahinumdom la ini ha mga Israelita nga makasasala hira ngan may ginkikinahanglan pa hira basi bug-os nga mapasaylo an ira mga sala. Oo, an Balaud “nagpapadagaw la han maopay nga mga butang nga maabot, pero diri amo an reyalidad hito nga mga butang.” (Heb. 10:1-4) Paonan-o magigin posible an kapasayloan han mga sala?

13. Ano an imo inaabat ha kamatuoran nga iginpresentar ni Jesus an bili han iya dugo ngadto kan Jehova?

¹³ Basaha an Efeso 1:7. An halad nga kamatayon ni Jesu-Kristo, nga kinaburut-on nga ‘naghatag han iya kalugaringon para ha aton,’ may daku nga kahulogan para ha ngatanan nga nahigugma ha iya ngan ha iya Amay. (Gal. 2:20) Kondi, an ginhimo ni Jesus katapos han iya kamatayon ngan pagkabanhaw amo an nagtalwas gud ha aton, nga tungod hito nagin posible an kapasayloan han aton mga sala. Gintuman ni Jesus an ginpadagawan han Mosaiko nga Balaud ha Adlaw han Pagbayad han Sala. Hito nga  adlaw, an hitaas nga saserdote nagdadara hin dugo han iginhalad nga mga hayop ngadto ha Pinakabaraan nga kwarto han tabernakulo, ngan ha urhi ngadto ha templo ni Solomon, ngan iginpipresentar ito ha Dios, nga sugad hin aada hiya mismo ha presensya han Dios. (Leb. 16:11-15) Ha pariho nga paagi, sumaka hi Jesus ha langit ngan iginpresentar kan Jehova an bili han iya dugo sugad nga tawo. (Heb. 9:6, 7, 11-14, 24-28) Mapasalamaton gud kita nga mahimo mapasaylo an aton mga sala ngan magkaada kita limpyo nga konsensya tungod han aton pagtoo ha dugo ni Jesus!

14, 15. Kay ano nga importante nga masabtan ngan sundon an balaud ni Jehova may kalabotan ha dugo?

¹⁴ Mas nasasabtan mo na ba yana kon kay ano nga igindidiri ni Jehova an pagkaon hin “bisan ano nga [klase hin] dugo”? (Leb. 17:10) Nasasabtan mo ba kon kay ano nga gintatagad han Dios nga sagrado an dugo? Para ha iya, an dugo katugbang han kinabuhi. (Gen. 9:4) Nauyon ka ba nga kinahanglan naton karawaton an panhunahuna han Dios ha dugo ngan sundon an iya sugo nga likyan ito? Magkakaada la kita mamurayawon nga relasyon ha Dios kon matoo kita ha halad lukat ni Jesus ngan kakarawaton naton nga an dugo presyoso gud ha aton Maglalarang.​—Col. 1:19, 20.

¹⁵ Bisan hin-o ha aton bangin tigda la nga umatubang hin sitwasyon nga nahidadabi an paggamit hin dugo. An aton kapamilya o hinigugma nga sangkay bangin kinahanglan magdesisyon kon magpapaabuno hiya hin dugo o diri. Hini nga mga kahimtang, bangin kinahanglan liwat magdesisyon may kalabotan ha paggamit hin gudtiay nga bahin han dugo ngan ha iba pa nga paagi han pagtambal. Salit importante gud nga mag-ampo kita kan Jehova, magsaliksik, ngan mangandam para ha posible nga mga emergency. Mabulig ini ha aton nga magin marig-on ngan diri magkompromiso. Syempre, diri naton karuyag nga mapasubo hi Jehova tungod kay ginkarawat naton an usa nga butang nga igindidiri han iya Pulong! Damu nga doktor ngan iba pa nga nasuporta ha pag-abuno hin dugo an nag-aaghat ha mga tawo nga magdonar hin dugo basi magtalwas hin mga kinabuhi. Pero maaram an baraan nga katawohan ni Jehova nga an Maglalarang la an may katungod nga magsiring kon paonan-o gagamiton an dugo. Para ha iya, sagrado an “bisan ano nga dugo.” Kinahanglan magin determinado kita nga sundon an iya balaud may kalabotan hito. Pinaagi han aton baraan nga panggawi, ginpapamatud-an naton ha iya nga ginpapabilhan gud naton an dugo ni Jesus nga nagtatalwas hin kinabuhi​—an amo la nga dugo nga nagpapahinabo nga magin posible an kapasayloan han mga sala ngan an kinabuhi nga waray kataposan.​—Juan 3:16.

16. Kay ano nga kinahanglan magin baraan an katawohan ni Jehova?

¹⁶ Han gintalwas han Dios an mga Israelita ha pagkauripon ha Ehipto, ginsidngan hira: “Ako hi Jehova nga nagdara ha iyo tikang ha tuna ha Ehipto, nga maiyo Dios; busa magpakabaraan kamo, sugad nga ako baraan.” (Leb. 11:45) An mga Israelita ginlalaoman nga magigin baraan tungod kay hi Jehova baraan. Sugad nga mga Saksi ni Jehova, kinahanglan liwat nga magin baraan kita. Ginpapabug-atan ito han libro han Lebitiko.

17. Ano an imo inaabat yana ha libro han Biblia nga Lebitiko?

¹⁷ Sigurado nga nagpahimulos ka hini nga paghisgot ha pipira nga bahin han Lebitiko. Posible gud nga nagpahilarom ini han imo apresasyon hini nga giniyahan nga libro han Biblia. An pagpamalandong ha pipira nga importante nga impormasyon ha Lebitiko sigurado nga nagdugang han imo pagsabot kon kay ano nga kinahanglan kita magin baraan. Kondi ano pa nga importante nga mga leksyon an aton hibabaroan ha libro han Lebitiko? Ano pa an aton hibabaroan dida hito may kalabotan ha pagbuhat hin baraan nga pag-alagad kan Jehova? Hihisgotan naton ini ha sunod nga artikulo.