1. Paonan-o gintatagad han damu an ira mga gintatag-iya?

DAMU nga tawo an nakabati na hini nga puplunganon: ‘Naaapresyar mo la an usa nga butang kon waray na ito.’ Naeksperyensyahan mo na ba an sugad hito? Pananglitan, an usa nga nagdaku ha riko nga pamilya bangin diri magpabili ha mga butang nga may-ada hiya. Mahimo ini mahitabo ha mga batan-on. Tungod kay waray pa eksperyensya, bangin diri pa nira bug-os nga nasasabtan kon ano nga mga butang an importante gud ha kinabuhi.

2, 3. (a) Ano an sadang likyan han Kristiano nga mga batan-on? (b) Ano an mabulig ha aton nga pabilhan an iginhatag ha aton ni Jehova?

² Kon usa ka nga batan-on, ano an importante ha imo? Damu nga batan-on ha kalibotan an nakapokus ha materyal nga mga butang—daku nga sweldo, maopay nga balay, o pinakabag-o nga mga gadyet. Pero kon an aton kinabuhi nakasentro la hini, may importante nga butang nga kulang ha aton, an espirituwal nga karikohan. Makasurubo, minilyon yana an diri ngani namimiling hito. Kon usa ka nga batan-on nga ginpadaku hin Kristiano nga kag-anak, kinahanglan magbantay ka nga diri mawara an imo apresasyon ha imo espirituwal nga panurundon. (Mat. 5:3) An  kawaray apresasyon mahimo magkaada maraot nga epekto ha imo ha bug-os mo nga kinabuhi.

³ Pero puydi mo ito malikyan. Ano an mabulig ha imo nga pabilhan an imo espirituwal nga panurundon? Tagdon naton an pipira nga ehemplo ha Biblia nga mabulig ha aton nga hibaroan kon kay ano nga maaramon nga pabilhan ito. Ini nga mga ehemplo mabulig ha mga batan-on ngan ha aton ngatanan nga pabilhan an iginhatag ha aton ni Jehova.

4. Ano an ginsisiring han 1 Samuel 8:1-5 mahitungod ha mga anak ni Samuel?

⁴ May mga asoy ha Biblia mahitungod han pipira nga kinarawat hin hura nga espirituwal nga panurundon pero waray nira ito apresyara. Ito an nahitabo ha pamilya ni propeta Samuel, nga nag-alagad kan Jehova tikang han iya kabata ngan may maopay nga rekord ha Dios. (1 Sam. 12:1-5) Nagpakita hiya hin maopay nga susbaranan nga angay unta subaron han iya mga anak nga hira Joel ngan Abija. Pero waray nira ito apresyara, lugod nagin maraot hira. An Biblia nasiring nga diri pariho han ira amay, ira ‘ginlubag [o ginbaliko] an katadongan.’—Basaha an 1 Samuel 8:1-5.

5, 6. Ano an nahitabo ha mga anak ngan apo ni Josia?

⁵ Ito liwat an nahitabo ha mga anak ni Hadi Josia. Nagpakita hi Josia hin maopay gud nga susbaranan ha pagsingba kan Jehova. Han an libro han Balaud han Dios nabilngan ngan ginbasa ha iya, nangalimbasog gud hiya nga sundon an mga instruksyon ni Jehova. Ginlimpyohan niya an nasud tikang ha idolatriya ngan espiritismo, ngan gin-aghat an katawohan nga sugton hi Jehova. (2 Hadi 22:8; 23:2, 3, 12-15, 24, 25) Hura gud nga espirituwal nga panurundon an nakarawat han iya mga anak! Tulo han iya mga anak ngan usa nga apo an nagin hadi, pero waray usa man ha ira an nagpakita hin apresasyon ha ira espirituwal nga panurundon.

⁶ An anak ni Josia nga hi Jehoahas an sumaliwan ha iya sugad nga hadi, pero ginbuhat hito an “maraot ha paniplatan ni Jehova.” Hi Jehoahas nagmando ha sulod la hin tulo ka bulan antes hiya prisuhon han Paraon han Ehipto. Ha urhi, namatay hiya sugad nga bihag. (2 Hadi 23:31-34) Katapos, an iya bugto nga hi Jehoyakim naghadi ha sulod hin 11 ka tuig. Waray liwat apresyara ni Jehoyakim an iya nakarawat tikang ha iya amay. Tungod han iya magraot nga buhat, hi Jeremias nagtagna mahitungod ha iya: “Hiya iglulubong ha kalubong hin usa nga asno.” (Jer. 22:17-19) An iba pa nga manurunod ni Josia—an iya anak nga hi Sedekia ngan an iya apo nga hi Jehoyatsin—nagin maraot liwat ngan waray magsubad ha iya.—2 Hadi 24:8, 9, 18, 19.

7, 8. (a) Paonan-o ginkaragan ni Solomon an iya espirituwal nga panurundon? (b) Ano an aton hibabaroan tikang ha mga tawohan ha Biblia nga nagkarag han ira espirituwal nga panurundon?

⁷ Tagda liwat hi Solomon. Damu an iya hinbaroan ha iya amay nga hi David kon paonan-o mag-aalagad kan Jehova. Pero ha urhi, nawara an iya apresasyon ha iya espirituwal nga panurundon. “Kay nahanabo, han lagas na hi Salomon [o Solomon, NW], nga an iya mga asawa nagpasimang han iya kasingkasing ha pagsunod han lain nga mga dios; ngan an iya kasingkasing diri hingpit kan Jehova nga iya Dios, sugad han kasingkasing ni David nga iya amay.” (1 Hadi 11:4) Tungod hini, nawara an pag-uyon ha iya ni Jehova.

⁸ Makasurubo nga ginkaragan hini nga kalalakin-an an ira espirituwal nga panurundon ngan an higayon nga buhaton an husto! Pero diri sugad hito an ngatanan nga batan-on ha panahon han Biblia, o ha aton man panahon. Hisgotan naton an pipira nga mag-opay nga  ehemplo nga mahimo subaron han Kristiano nga mga batan-on.

9. Paonan-o nagpakita hin maopay gud nga susbaranan an mga anak ni Noe? (Kitaa an retrato ha tinikangan hini nga artikulo.)

⁹ An mga anak ni Noe nagpakita hin maopay gud nga susbaranan. An ira tatay ginsugo nga maghimo hin arka ngan pasakyon dida hito an ira pamilya. Nasabtan nira nga kinahanglan gud nira buhaton an kaburut-on ni Jehova, salit nagkooperar hira ha ira tatay. Binulig hira pagtukod han arka ngan sinakay dida hito. (Gen. 7:1, 7) Ano an ira katuyoan? An Genesis 7:3 nasiring nga nagdara hira hin mga hayop ha arka “basi makabuhi hin katulinan ha bawbaw han bug-os nga tuna.” Natalwas liwat an mga tawo. Tungod kay ginpabilhan han mga anak ni Noe an ira nakarawat tikang ha ira tatay, nakabulig hira basi diri mapoo an katulinan han katawohan ngan mapahiuli an totoo nga pagsingba ha tuna.—Gen. 8:20; 9:18, 19.

10. Paonan-o iginpakita han upat nga batan-on nga Hebreohanon ha Babilonya nga gin-apresyar nira an kamatuoran nga ira hinbaroan?

¹⁰ Paglabay hin mga siglo, iginpakita hin upat nga batan-on nga Hebreohanon nga nasabtan nira kon ano gud an importante. Hira Hanania, Misael, Asaria, ngan Daniel gindara ha Babilonya han 617 B.C.E. Gwapo ngan baltok hira, ngan masayon la unta para ha ira nga magpahiuyon ha paagi han pagkinabuhi han mga taga-Babilonya. Kondi waray nira ito buhata. Iginpakita nira nga waray nira hingalimti an igintutdo ha ira, an ira espirituwal nga panurundon. Salit hura nga ginbendisyonan hira ni Jehova.—Basaha an Daniel 1:8, 11-15, 20.

11. Paonan-o nagpahimulos an iba tikang ha espirituwal nga panurundon ni Jesus?

¹¹ Hi Jesus, an Anak han Dios, an pinakamaopay nga susbaranan ha pagpakita hin apresasyon ha iya espirituwal nga panurundon. Damu an iya hinbaroan tikang ha iya Amay, ngan ginpabilhan gud niya ito. Ini nga apresasyon makikita ha iya ginsiring: “An igintutdo ha akon han Amay amo an akon ginyayakan.” (Juan 8:28) Ngan karuyag gud niya nga isumat ha iba an iya hinbaroan basi magpahimulos liwat hira hito. Hiya nagsiring: “Kinahanglan ipasamwak ko liwat an maopay nga sumat han Ginhadian han Dios ha iba nga mga syudad, kay ginsugo ako tungod hini.” (Luc. 4:18, 43) Ginpahamangnoan niya an iya mga mamarati nga diri magin “kanan kalibotan,” nga ha kabug-osan diri nagpapabili han espirituwal nga mga butang.—Juan 15:19.

12. (a) Paonan-o naaplikar an 2 Timoteo 3:14-17 ha damu nga batan-on yana? (b) Ano nga mga pakiana an sadang tagdon han Kristiano nga mga batan-on?

¹² Pariho han mga batan-on nga aton ginhisgotan, bangin ginpadaku ka liwat hin mga kag-anak nga nahigugma kan Jehova. Kon amo, naaplikar ha imo an ginsiring han Biblia mahitungod kan Timoteo. (Basaha an 2 Timoteo 3:14-17.) An imo mga kag-anak an ‘nagtutdo ha imo’ mahitungod han totoo nga Dios ngan kon paonan-o hiya lilipayon. Bangin gintutdoan ka nira tikang pa han imo kabata. Nakabulig gud ito ha imo nga “magin maaramon para ha katalwasan pinaagi han pagtoo kan Kristo Jesus” ngan magin “andam gud” ha pag-alagad ha Dios. Pero nabangon an importante nga pakiana, Gin-aapresyar mo ba an imo nakarawat? Pakianhi an imo kalugaringon: ‘Paonan-o ko gintatagad an matinumanon nga mga saksi tikang pa ha kadaan nga panahon? Nalilipay ba ako ha pagin Saksi ni Jehova? Paonan-o ko gintatagad an pribilehiyo nga magin usa han pipira nga tawo nga kilala han Dios? Gintatagad ko ba nga talagsahon ngan daku nga pribilehiyo an paghibaro han kamatuoran?’

13, 14. Ano nga pagsulay an gin-aatubang yana han Kristiano nga mga batan-on, ngan kay ano nga diri maaramon nga magpadara hito? Paghatag hin ehemplo.

 ¹³ Bangin diri makita han pipira nga batan-on nga ginpadaku hin Kristiano nga mga kag-anak an daku nga kaibahan han aton napapahimulosan nga espirituwal nga paraiso ngan han masirom nga kalibotan ni Satanas. May pipira pa ngani nga nasulay nga sarihan an kalibotanon nga pagkinabuhi. Pero mapaligis ka ba basi la hibaroan kon mationan-o ito kasakit o kon makamaratay ba ito? Syempre diri! Sugad man, diri naton kinahanglan maeksperyensyahan an “pagpatakas ha maraot nga pagkinabuhi” dinhi hini nga kalibotan basi la hibaroan kon mationan-o kamakasurubo ito.—1 Ped. 4:4.

¹⁴ Hi Gener nga taga-Asia, nagdaku ha usa nga Kristiano nga pamilya. Nabawtismohan hiya han 12 anyos hiya. Pero han tin-edyer na hi Gener, nadani hiya ha kalibotanon nga pagkinabuhi. Hiya nagsiring: “Karuyag ko maeksperyensyahan an ‘kagawasan’ nga igintatanyag han kalibotan.” Nagkaada hiya doble nga pagkinabuhi. Han 15 anyos hiya, naimpluwensyahan hiya han maraot nga pagkinabuhi han iya mga barkada. Nahibaro hiya pag-inom hin de-alkohol nga irimnon ngan pagbuyayaw. Agsob hiya magab-ihan pag-uli tungod ha pag-inuyag hin bilyar ngan madarahog nga mga video game upod han iya barkada. Kondi ha urhi, nasantop niya nga an mga nakakadani nga butang hini nga kalibotan diri naghahatag hin tinuod nga kalipay. Waray ito pulos. Yana, nakabalik na hiya ha kongregasyon. Hiya nagsiring: “Damu pa gihapon nga pagsulay an akon gin-aatubang, pero mas damu nga bendisyon an akon nakakarawat tungod ha pagin naiiba tikang ha maraot nga kalibotan ni Satanas.”

15. Ano an sadang pamalandungon han mga batan-on nga waray magdaku ha Kristiano nga pamilya?

¹⁵ Syempre, may mga batan-on ha kongregasyon nga waray magdaku ha Kristiano nga pamilya. Kon usa ka ha ira, hunahunaa la an daku nga pribilehiyo nga imo napapahimulosan yana tungod kay nakilala mo an Maglalarang ngan nag-aalagad ka ha iya! Binilyon an tawo ha kalibotan. Salit, daku gud nga bendisyon nga magin usa hadton iginpahirani mismo ni Jehova ha iya ngan hadton iya gintutdoan han kamatuoran ha Biblia. (Juan 6:44, 45) Mga 1 la ha kada 1,000 ka tawo yana an may husto nga kahibaro ha kamatuoran, ngan usa ka ha ira. Diri ba ito sadang makapalipay ha aton ngatanan, ginpadaku man kita hin Kristiano  nga mga kag-anak o diri? (Basaha an 1 Corinto 2:12.) Hi Gener nagsiring: “Naninindog an akon barahibo kon nahuhunahuna ko ito. Hin-o ba ako basi kilalahon ni Jehova, an Tag-iya han uniberso?” (Sal. 8:4) Usa liwat nga sister an nagsiring: “Nalilipay gud an mga estudyante kon ginkikilala hira han ira titser. Pero mas labi nga makalilipay nga makilala ni Jehova, an Gihitaasi nga Instruktor!”

16. Ano an maaramon nga buhaton han Kristiano nga mga batan-on yana?

¹⁶ Daku gud an imo pribilehiyo, salit kay ano nga diri magin mas determinado nga gamiton an imo kinabuhi ha maaramon nga paagi? Ha pagbuhat hito, magigin usa ka han magtinumanon nga surugoon han Dios. Ayaw gud pagsubara an kadam-an nga batan-on yana nga ginkakaragan la an ira kinabuhi ngan waray maopay nga tidaraon.—2 Cor. 4:3, 4.

17-19. Kay ano nga maaramon an pagin naiiba ha kalibotan?

¹⁷ Syempre, diri pirme masayon an pagin naiiba ha kalibotan. Pero ito an maaramon nga buhaton. Ha pag-ilustrar: Tagda an usa nga atleta ha Olympic. Basi magin kwalipikado ha Olympic, kinahanglan maiba hiya ha iya kasangkayan. Ginlilikyan niya an damu nga butang nga puydi makakuha han iya panahon ngan atensyon. Andam hiya magin iba ha iya kasangkayan basi magkaada hiya daku nga panahon ha pagbansay ngan makab-ot an iya tumong.

¹⁸ Kadam-an ha kalibotan an diri naghuhunahuna han magigin resulta han ira binuhatan. Pero kon magigin iba ka ha ira ngan lilikyan mo an buruhaton han kalibotan nga nakakadaot ha moral ngan ha espirituwal, ‘makakaptan mo hin marig-on an totoo nga kinabuhi.’ (1 Tim. 6:19) An sister nga gin-unabi kanina nagsiring: “Kon magigin marig-on ka ha imo gintotoohan, magmamalipayon ka gud ha urhi. Mapapamatud-an mo nga mahimo mo madaog an impluwensya han kalibotan ni Satanas. Labaw ha ngatanan, baga hin nakikita mo hi Jehova nga Dios nga nalilipay ngan nahiyom ha imo! Ito an kaopayan han pagin naiiba!”

¹⁹ Waray pulos an kinabuhi han usa kon magpupokus la hiya ha iya makukuha yana. (Ekles. 9:2, 10) Kon usa ka nga batan-on ngan nasasabtan mo an katuyoan han kinabuhi ngan an imo oportunidad nga mabuhi ha kadayonan, diri ba maaramon nga likyan mo nga “magkinabuhi sugad han pagkinabuhi han mga nasud”? Kon bubuhaton mo ito, magkakaada ka hin may katuyoan nga kinabuhi.—Efe. 4:17; Mal. 3:18.

20, 21. Kon magigin maaramon kita ha pagdesisyon, ano an aton magigin tidaraon? Pero ano an ginlalaoman ni Jehova nga bubuhaton naton?

²⁰ Kon magigin maaramon kita ha pagdesisyon, mahimo magmalipayon an aton kinabuhi yana ngan ‘mapanunod naton an tuna’ ha waray kataposan. Labaw pa gud ha aton ginhuhunahuna an mga bendisyon nga ihahatag ni Jehova ha aton. (Mat. 5:5; 19:29; 25:34) Pero, diri niya ito basta la nga iginhahatag. Kinahanglan magin masinugtanon kita ha iya. (Basaha an 1 Juan 5:3, 4.) Kondi takos gud han aton mga pangalimbasog an matinumanon nga pag-alagad ha iya yana!

²¹ Damu hinduro an iginhatag ha aton ni Jehova! May-ada kita husto nga kahibaro ha iya Pulong ngan may matin-aw nga pagsabot ha kamatuoran mahitungod ha iya ngan han iya katuyoan. May pribilehiyo kita ha pagdara han iya ngaran ngan pagin iya Saksi. Nagsaad hiya nga pirme kita niya bubuligan. (Sal. 118:7) Hinaot kita ngatanan, batan-on man o lagas, magpakita hin apresasyon ha aton espirituwal nga panurundon ngan hin hingyap nga ihatag kan Jehova “an himaya ha waray kataposan.”—Roma 11:33-36; Sal. 33:12.