USA nga grupo hin batan-on nga mga Kristiano an nagdesisyon nga magkita hin sine. Damu han ira mga kaeskwela an nagsiring nga maopay gud an pelikula. Pag-abot nira ha sinehan, nakita nira ha mga poster an mga armas ngan kababayin-an nga malaw-ay an pamado. Ano an ira bubuhaton? Idadayon ba nira an pagkita han pelikula?

Ini nga sitwasyon nagpapakita nga kada adlaw naghihimo kita hin mga desisyon nga mahimo magparig-on o makadaot han aton relasyon kan Jehova. Usahay, bangin plano mo buhaton an usa nga butang, pero han ginturotimbang mo ito utro, nagbag-o an imo desisyon. Tungod ba ito kay paburobag-o an imo hunahuna, o tungod kay ito an angay buhaton?

An aton gugma kan Jehova nagpagios ha aton nga idedikar an aton kinabuhi ha iya ngan magpabawtismo. Hingyap gud naton nga magpabilin nga matinumanon ha Dios. Kondi an aton kaaway nga hi Satanas nga Yawa determinado nga dauton an aton integridad. (Pah. 12:17) Nagdesisyon kita nga mag-alagad kan Jehova ngan sugton an iya mga sugo. Kon babag-uhon naton an aton hunahuna may kalabotan han aton dedikasyon ha iya, mahimo mawara an aton kinabuhi!

Sobra 26 ka siglo na an naglabay, an hadi ha Babilonya nga hi Nabukodonosor naghimo hin daku nga bulawan nga imahen, ngan ginsugo niya an ngatanan nga singbahon ito. An bisan hin-o nga diri masunod, ilalabog ha naglalaga nga hudno. Tulo nga magsiringba ni Jehova—hira Sadrak, Mesak, ngan Abednego—an waray sumunod ha sugo. Tungod hito, iginlabog hira ha naglalaga nga hudno. Milagroso nga gintalwas hira ni Jehova, pero andam hira mamatay imbes nga ikompromiso an ira desisyon nga mag-alagad ha Dios.—Dan. 3:1-27.

 Ha urhi, hi propeta Daniel waray umundang ha iya nahiaraan nga pag-ampo bisan pa han tarhog nga ilalabog hiya ha lungib han mga leon. Padayon hiya nga nag-ampo hin tulo ka beses kada adlaw. Waray bag-oha ni Daniel an iya desisyon nga magsingba ha totoo nga Dios. Sugad nga resulta, gintalwas hiya tikang ha “gahum han mga leon.”—Dan. 6:1-27.

An mga surugoon han Dios yana nagkikinabuhi liwat uyon ha ira dedikasyon ha iya. Pananglitan ha Aprika, usa nga grupo hin mga estudyante nga Saksi ni Jehova an nagdumiri pagsaludo ha usa nga simbolo han nasud. Gintarhog hira nga papaiwason ha eskwelahan kon diri hira masaludo. Waray pag-iha katapos hito, an administrador han edukasyon bumisita ha ira lugar ngan ginkaistorya an pipira hini nga estudyante. Matinalahuron kondi waray kahadlok nga iginsaysay nira an ira gintotoohan. Tikang hadto, waray na bumangon ini nga problema. An batan-on nga mga estudyante nga Saksi diri na ginpipirit nga ikompromiso an ira relasyon kan Jehova.

Tagda liwat hi Joseph. Nagkasakit hin kanser an iya asawa ngan tigda la nga namatay. Nasabtan han iya mga kapamilya an iya desisyon may kalabotan ha mga seremonya ha paglubong ngan ginrespeto nira ito. Pero diri Saksi an pamilya han iya asawa, ngan may mga kustomre ha paglubong nga karuyag nira himoon, pati na an mga seremonya nga diri nakakapalipay ha Dios. Hi Joseph nagsiring: “Tungod kay waray ako sumugot ha ira karuyag, nangalimbasog hira nga kombinsihon an akon mga anak, pero nagpabilin nga marig-on an akon mga anak. Nangalimbasog liwat hira nga magkaada hin lamay ha amon balay sugad han ira kustomre, pero ginsidngan ko hira nga kon karuyag gud nira nga buhaton ito, himoon nira ito ha iba nga balay. Maaram hira nga an paglamay diri uyon ha akon gintotoohan o han gintotoohan han akon asawa, salit katapos hin hilaba nga pag-iristorya, nagdesisyon hira nga himoon ito ha iba nga lokasyon.

“Durante hinin makasurubo nga panahon, nanginyupo ako kan Jehova nga buligan an amon pamilya nga diri magtalapas han iya mga balaud. Ginbaton niya an akon mga pag-ampo ngan ginbuligan kami nga magpabilin nga marig-on bisan pa han mga pamirit.” Hi Joseph ngan an iya mga anak determinado nga diri bag-uhon an ira desisyon nga sugton hi Jehova.

Waray pag-iha katapos han Paskua han 32 C.E., usa nga diri Israelita nga babaye an dinaop kan Jesu-Kristo ha Sidon. Pauroutro niya nga ginhangyo hi Jesus nga pagawson an demonyo nga sinanib ha iya anak. Ha tinikangan, waray bumaton hi Jesus. Hiya nagsiring ha iya mga disipulo: “Ginpakanhi ako diri para ha bisan hin-o kondi para ha nagkawawara nga mga karnero ha panimalay han Israel.” Han padayon nga naghangyo ha iya an babaye, hiya nagsiring: “Diri angay kuhaon an tinapay han kabataan ngan ig-itsa ito ha gudtiay nga kaayaman.” Ha pagpakita hin daku nga pagtoo, an babaye nagsiring: “Oo, Ginoo. Pero an gudtiay nga kaayaman nakaon han nahuhulog nga mga pagkaon tikang ha lamesa han ira mga agaron.” Ginbag-o ni Jesus an iya hunahuna ngan ginpagawas an demonyo nga sinanib ha anak han babaye.—Mat. 15:21-28.

Ha pagbuhat hito, ginsubad ni Jesus hi Jehova nga andam maghimo hin pagbag-o kon kinahanglan. Pananglitan, han naghimo hin bulawan nga baka an mga Israelita, nagdesisyon hi Jehova nga poohon hira. Pero han nanginyupo ha Iya hi Moises, ginbag-o ni Jehova an Iya desisyon.—Eks. 32:7-14.

Ginsubad liwat ni apostol Pablo hi Jehova ngan hi Jesus. Ha pipira ka panahon, naghunahuna hi Pablo nga diri angayan iupod hi Juan Marcos ha pagbiyahe sugad nga misyonero tungod kay ginbayaan ni Marcos hira Pablo ngan Bernabe durante han ira siyahan nga pagbiyahe. Kondi ha urhi, nakita ni Pablo nga hi Marcos nagin hamtong na ngan makakabulig gud ha iya. Salit ginsidngan niya hi Timoteo:  “Iupod hi Marcos, kay daku hiya nga bulig ha akon ha sagrado nga buruhaton.”—2 Tim. 4:11.

Ano an aton hibabaroan tikang hini? Hi Jehova hingpit, pero andam niya bag-uhon an iya hunahuna tungod kay hiya maloloy-on, mapailubon, ngan mahigugmaon. Kita diri mga hingpit, ngan usahay sayop an aton panhunahuna ha mga butang. Salit may mas daku kita nga rason nga bag-uhon an aton hunahuna kon kinahanglan. Pananglitan, mahimo naton bag-uhon an aton panhunahuna ha iba kon mas nasasabtan naton an ira kahimtang.

Usahay, bangin kinahanglan naton bag-uhon an aton hunahuna may kalabotan ha pagkab-ot hin espirituwal nga mga tumong. An pipira nga nag-aaram han Biblia ngan natambong ha mga katirok bangin maglangan pagpabawtismo. An iba nga kabugtoan bangin nag-aalang pagpayunir bisan kon igintutugot han ira kahimtang. Ngan may mga bugto nga baga hin diri nangangalimbasog magin ministeryal o tigurang ha kongregasyon. (1 Tim. 3:1) Sugad ba hito an imo inaabat? Mahimo mo ba bag-uhon an imo hunahuna? Gin-aaghat ka ni Jehova nga kab-uton an sugad nga mga pribilehiyo ngan magin malipayon ha pag-alagad ha iya ngan ha pagserbi ha iba.

Hi Ella nga nag-aalagad ha sanga nga opisina han mga Saksi ni Jehova ha Aprika, nagsiring: “Pag-abot ko ha Bethel, diri ako maaram kon mag-iiha ako. Hingyap ko nga mag-alagad kan Jehova hin bug-os-kalag, pero duok gud ako ha akon pamilya. Ha tinikangan, namingaw gud ako ha ira! Kondi ginparig-on ako han akon roommate, salit nagdesisyon ako nga magpabilin. Paglabay hin napulo ka tuig nga pag-alagad ha Bethel, karuyag ko pa gihapon nga magpadayon ha pagserbi ha kabugtoan pinaagi ha pagpabilin ha akon toka ha Bethel tubtob nga posible.”

Nahinunumdoman mo ba an nahitabo kan Cain han nangabugho ngan nasina gud hiya ha iya bugto? An Dios nagsiring kan Cain nga kon bubuhaton niya an maopay, makakarawat niya an Iya pag-uyon. Ginsagdonan hiya han Dios nga kontrolon an sala nga “aada ha ganghaan.” Puydi unta niya bag-uhon an iya hunahuna ngan disposisyon, pero ginbalewaray niya an sagdon han Dios. Makasurubo, ginpatay ni Cain an iya bugto salit hiya an siyahan nga tawo nga nagin parapamatay!—Gen. 4:2-8.

Tagda liwat an nahitabo kan Hadi Usiya. Ha tinikangan, masinugtanon hiya kan Jehova ngan may maopay nga relasyon ha Iya. Pero makasurubo, nadaot an iya maopay nga rekord tungod kay nagin mapahitas-on hiya. Sumulod hiya ha templo basi maghalad hin insenso bisan kon diri hiya saserdote. Han ginpahamangnoan hiya han mga saserdote, ginbag-o ba niya an iya hunahuna? Waray. Hi Usiya “napungot,” ngan iya ginbalewaray an ira pahamangno. Salit ginsirotan hiya ni Jehova hin leprosi.—2 Kron. 26:3-5, 16-20.

Oo, usahay kinahanglan gud naton bag-uhon an aton hunahuna. Tagda hi Joachim. Nabawtismohan hiya han 1955, pero han 1978 ginpaiwas hiya ha kongregasyon. Paglabay hin 20 ka tuig, nagbasol hiya ngan bumalik ha kamatuoran. Han ginpakianhan hiya han usa nga tigurang kon kay ano nga waray hiya bumalik dayon, hiya binaton: “Nasina gud ako ngan nagin mapahitas-on. Nagbabasol ako nga waray ako bumalik dayon. Han disfellowshipped ako, maaram ako nga an mga Saksi ni Jehova an nagtututdo han kamatuoran.” Ginkinahanglan niya nga bag-uhon an iya disposisyon ngan magbasol.

Usahay bangin kinahanglan liwat naton bag-uhon an aton hunahuna ngan mga buhat. Hinaot magin andam kita ha paghimo hini basi mapalipay naton hi Jehova.—Sal. 34:8.