GINPAPASIDUNGGAN kita han aton Maglalarang pinaagi ha paghatag ha aton hin presyoso nga regalo, an kagawasan ha pagbuot. Dugang pa, hura nga ginbibendisyonan niya adton diri makikalugaringon nga gin-gagamit an ira kagawasan ha pagbuot basi mapauswag an totoo nga pagsingba. Ginbibendisyonan liwat niya adton nagbubuhat han ira bahin basi madayaw an iya baraan nga ngaran ngan masuportaran an iya urusahon nga katuyoan. Diri karuyag ni Jehova nga masugot la kita tungod kay nahahadlok kita ngan napipiritan. Lugod, ginpapabilhan gud niya an kinaburut-on nga debosyon nga ginpapagios han sinsero nga gugma ngan hilarom nga apresasyon.

Pananglitan, han an mga Israelita nakadto ha kamingawan han Sinai, ginsugo hira ni Jehova nga magtukod hin lugar han pagsingba. Hiya nagsiring: “Magkuha kamo tikang ha iyo hin halad kan Jehova; bisan hin-o nga may talinguha ha iya kasingkasing magdara hiya kan Jehova.” (Eks. 35:5) An tagsa nga Israelita mahimo maghatag hin anoman nga iya maaakos, ngan an tagsa nga kinaburut-on nga hatag—anoman ito o anoman an kantidad hito—mahimo gamiton ha husto nga paagi basi matuman an katuyoan han Dios. Ano an ira ginbuhat?

“An tagsa-tagsa kan kanay kasingkasing nag-aghat ha iya” ngan ‘an tagsa nga gin-aghat han iya espiritu’ kinaburut-on nga naghatag, an ‘tagsa nga may talinguha nga kinasingkasing.’ An kalalakin-an ngan kababayin-an kinaburut-on nga nagdara hin kontribusyon para ha buruhaton ni Jehova: alpiler, ariyos, singsing, bulawan, silber, tumbaga, asul nga inulang, purpura nga de-lana nga tela, eskarlata nga inulang, maopay nga klase hin tela, barahibo hin kanding, anit hin mga karnero nga tinina hin pula, mga anit hin poka, kahoy nga akasya, birilhon nga mga bato, balsamo, ngan lana. Ha urhi, “an mga garamiton . . . igo na para ha ngatanan nga buruhaton nga paghihimoon hini, ngan kapin pa gud.”—Eks. 35:21-24, 27-29; Baraan nga Biblia; 36:7.

An nakapalipay kan Jehova diri an mga butang nga iginhatag, kondi an kinaburut-on nga disposisyon hadton sumuporta ha putli nga pagsingba. Napagios liwat an mga Israelita nga gamiton an ira panahon ngan kusog. “An ngatanan nga mga babaye nga makinaadmananon ha kasingkasing nagpapahabol pinaagi ha ira mga kamot,” siring han asoy. Oo, “an ngatanan nga mga babaye nga an kasingkasing nag-aghat ha ira ha kinaadman, nanug-ot han barahibo hin mga kanding.” Dugang pa, hi Jehova naghatag kan Besalel hin ‘kinaadman, sarabotan, hibaro, ngan han ngatanan nga paagi hin pagbuhat.’ Ha pagkamatuod, iya gintagan hira Besalel ngan Oholiab hin kaabtik nga ginkikinahanglan basi mahimo an ngatanan nga buruhaton nga iya iginsugo ha ira.—Eks. 35:25, 26, 30-35.

Han gin-aghat ni Jehova an mga Israelita nga maghatag hin donasyon, nasarig gud hiya nga ‘bisan hin-o nga may talinguha ha kasingkasing’ masuporta ha totoo nga pagsingba. Sugad nga resulta, adton may kinaburut-on nga disposisyon hura nga ginbendisyonan niya hin paggiya ngan duro nga kalipay. Iginpakita ni Jehova nga kon ginbibendisyonan niya an iya mga surugoon nga may kinaburut-on nga disposisyon, ginsisiguro niya nga diri hira makukulangan hin mga butang o kaabtik basi matuman an iya kaburut-on. (Sal. 34:9) Samtang kinaburut-on ka nga nag-aalagad kan Jehova, sigurado nga bibendisyonan ka niya.