1, 2. Paonan-o ginparig-on ni Jesus an iya mga disipulo ha adlaw nga ginbanhaw hiya?

DUHA nga disipulo ni Jesus an naglalakat tikadto ha usa nga baryo nga mga 11 ka kilometro tikang ha Jerusalem. Nasusubo gud hira tungod kay namatay hi Jesus, ngan diri hira maaram nga nabanhaw na hiya. Tigda nga nagpakita hi Jesus ngan umupod ha ira ha pagbaktas. Ginliaw niya ini nga mga disipulo. Paonan-o? “Iya iginsaysay ha ira an mga butang mahitungod ha iya ha bug-os nga Kasuratan, tikang ha mga sinurat ni Moises ngan han ngatanan nga Propeta.” (Luc. 24:13-15, 27) Salit nabantad gud an ira kasingkasing tungod kay iya ‘iginsaysay ha ira hin maopay’ an Kasuratan.—Luc. 24:32.

² Pagkagab-i, bumalik ha Jerusalem inin duha nga disipulo. Nakita nira an mga apostol, ngan iginsumat nira an nahitabo. Samtang nag-iiristorya hira, nagpakita hi Jesus ha ira ngatanan. Pero nahadlok an mga apostol ngan nagruhaduha kon hi Jesus gud ba ito. Paonan-o hira ginparig-on ni Jesus? An asoy nasiring: “Iya gin-abrihan hin bug-os an ira hunahuna basi masabtan nira an kahulogan han Kasuratan.”—Luc. 24:45.

3. Kay ano nga bangin manluya kita ha aton pag-alagad kan Jehova? Ano an mabulig ha aton basi magkaada timbang nga panhunahuna ha aton ministeryo?

³ Pariho hito nga mga disipulo, usahay bangin umabat liwat kita hin duro nga kasubo. Posible nga sagipo kita ha buruhaton para ha  Ginoo pero nanluluya kita tungod kay waray kita nakikita nga maopay nga resulta. (1 Cor. 15:58) O bangin adton gindudumarahan naton hin pag-aram baga hin diri nag-uuswag. An iba ha ira bangin bumaya pa ngani kan Jehova. Ano an aton bubuhaton basi magkaada kita timbang nga panhunahuna ha aton ministeryo? Makakabulig ha aton kon bug-os nga masasabtan naton an mga ilustrasyon ni Jesus nga mababasa ha Biblia. Hisgotan naton an tulo hito ngan kitaon an mga leksyon nga aton hibabaroan.

4. Ano an kahulogan han ilustrasyon ni Jesus mahitungod han magsarabwag nga kinaturog?

⁴ Basaha an Marcos 4:26-29. Ano an kahulogan han ilustrasyon ni Jesus mahitungod han magsarabwag nga kinaturog? An magsarabwag nagrirepresentar ha tagsa nga magwarali han Ginhadian. An binhi amo an mensahe han Ginhadian nga iginsasangyaw ha mga tangkod an kasingkasing. Sugad han normal nga ginbubuhat ha adlaw-adlaw, an magsarabwag ‘nakaturog kada gab-i ngan nabuhát kada aga.’ An pagtubo han binhi nagkikinahanglan hin panahon, tikang ha pagtanom tubtob ha pag-ani. Durante hito nga panahon, “an mga binhi nanunubo ngan nananagku.” ‘Naglulugaring’ ito pagtubo hin hinay-hinay. Ha pariho nga paagi, an espirituwal nga pagtubo hinay-hinay nga proseso. Kon an usa mag-uswag na ngan magdesisyon pag-alagad ha Dios, masisiring nga namumunga hiya kon idedikar niya an iya kinabuhi kan Jehova ngan magpabawtismo.

5. Kay ano nga gin-gamit ni Jesus an ilustrasyon mahitungod han magsarabwag nga kinaturog?

⁵ Kay ano nga gin-gamit ni Jesus ini nga ilustrasyon? Ginbubuligan kita ni Jesus nga masabtan nga hi Jehova an nagpapatubo han kamatuoran ha kasingkasing hadton may “husto nga disposisyon.” (Buh. 13:48; 1 Cor. 3:7) Kita an nagtatanom ngan nagsasaribo, pero diri naton kontrolado an pagtubo. Diri naton mapipirit o mapapadagmit an pagtubo. Pariho han magsarabwag ha ilustrasyon, diri kita maaram kon paonan-o nahitatabo an pagtubo. Kasagaran nga diri na naton ito napapanginano samtang sagipo kita ha adlaw-adlaw nga buruhaton. Pero ha urhi, an binhi han Ginhadian bangin mamunga. An bag-o nga disipulo makakaupod na naton ngan makakabulig ha aton ha pag-ani nga buruhaton.—Juan 4:36-38.

6. Ano an sadang naton karawaton may kalabotan ha espirituwal nga pag-uswag?

⁶ Ano an aton hibabaroan tikang hini nga ilustrasyon? Siyahan, kinahanglan karawaton naton nga diri naton kontrolado an espirituwal nga pag-uswag han aton estudyante ha Biblia. An pagin mapainubsanon mabulig ha aton nga diri hiya apurahon o piriton nga magpabawtismo. Ginbubuhat naton an ngatanan basi buligan hiya, pero mapainubsanon nga ginkakarawat naton nga hiya mismo an magdidesisyon kon magdidedikar ba hiya ha Dios. Kakarawaton la ni Jehova an dedikasyon han usa kon kinaburut-on ito ngan ginpagios han gugma ha Iya.—Sal. 51:12; 54:6; 110:3.

7, 8. (a) Ano an iba pa nga leksyon nga aton hibabaroan ha ilustrasyon ni Jesus mahitungod han magsarabwag nga kinaturog? Paghatag hin ehemplo. (b) Ano an igintututdo hini ha aton mahitungod kan Jehova ngan kan Jesus?

⁷ Ikaduha, kon masasabtan naton an leksyon hini nga ilustrasyon, mabulig ito ha aton nga diri manluya kon diri dayon naton makita an mga resulta han aton buruhaton. Kinahanglan kita magin mapailubon. (San. 5:7, 8) Kon an binhi diri mamunga bisan kon ginbuhat na naton an gimaopayi basi mabuligan an estudyante, diri ito nagpapasabot nga diri kita epektibo nga magturutdo. Ginpapatubo la ni Jehova an binhi han kamatuoran ha kasingkasing han mga mapainubsanon nga andam magbag-o. (Mat. 13:23) Salit diri naton sadang ibasar ha mga resulta an aton pagin epektibo ha ministeryo. Para kan Jehova, an kalamposan  han aton ministeryo diri nadepende ha pagin makinarawaton han aton mga gintututdoan. Lugod, iya ginpapabilhan an aton mga pangalimbasog anoman an resulta hito.—Basaha an Lucas 10:17-20; 1 Corinto 3:8.

⁸ Ikatulo, diri naton pirme nakikita an ngatanan nga pagbag-o nga nahitatabo ha usa nga tawo. Pananglitan, an mag-asawa nga gindudumarahan hin pag-aram han usa nga misyonero nagsiring ha iya nga karuyag na nira magin diri-bawtismado nga magwarali. Ginpahinumdoman niya hira nga basi magin kwalipikado, kinahanglan nira umundang pagsigarilyo. Ginkalasan hiya han nagsiring hira nga umundang na hira pagsigarilyo pipira ka bulan na an naglabay. Kay ano nga ginbuhat nira ito? Nasantop nira nga nakikita ni Jehova an ira pagsigarilyo ngan nangangalas Hiya ha pagkahipokrito. Salit napagios hira nga magdesisyon—magsisigarilyo hira ha atubangan han misyonero o babayaan ito nga bisyo. An ira nagtutubo nga gugma kan Jehova nakabulig ha ira nga makahimo hin husto nga desisyon. Nag-uswag hira ha espirituwal bisan kon diri maaram an misyonero han pagbag-o nga ira ginhimo.

9. Ano an kahulogan han ilustrasyon ni Jesus mahitungod han pukot?

⁹ Basaha an Mateo 13:47-50. Ano an kahulogan han ilustrasyon ni Jesus mahitungod han pukot? Iginpariho ni Jesus an pagsangyaw han mensahe han Ginhadian ha ngatanan nga tawo ha paghulog hin daku nga pukot ha dagat. Sugad la nga an usa nga pukot nakakadakop hin damu ngan han “ngatanan nga klase hin isda,” an aton pagsangyaw nakakadani ha minilyon nga katawohan nga iba-iba an gintikangan. (Isa. 60:5) Pamatuod hini an damu nga tawo nga natambong ha aton mga kombensyon ngan ha Memoryal kada tuig. An pipira hinin simboliko nga isda “mag-opay,” ngan gintitirok ngada ha Kristiano nga kongregasyon. Pero an iba “diri mag-opay,” ngan diri hira ginkakarawat ni Jehova.

10. Kay ano nga gin-gamit ni Jesus an ilustrasyon mahitungod han pukot?

¹⁰ Kay ano nga gin-gamit ni Jesus ini nga ilustrasyon? An simboliko nga pagbulag-bulag han mga isda diri nagtutudlok ha ultimo nga paghukom durante han daku nga kasakitan. Lugod, iginpapakita hito an mahitatabo durante han kataposan nga mga adlaw hinin maraot nga sistema. Iginpakita ni Jesus nga diri ngatanan nga nadadani ha kamatuoran magigin surugoon ni Jehova. Damu han natambong ha aton mga katirok o nag-aaram han Biblia an diri naruruyag magdedikar han ira kinabuhi kan Jehova. (1 Hadi 18:21) An iba umundang na ngani pagtambong ha mga katirok. May mga batan-on nga ginpadaku hin Saksi nga mga kag-anak, pero waray nira mapatubo an gugma ha mga suruklan ni Jehova. Anoman an kahimtang, ginpabug-atan ni Jesus nga an tagsa ha aton kinahanglan maghimo hin personal nga desisyon. Adton naghihimo hin husto nga desisyon gintatagad ni Jehova sugad nga “an birilhon,” o makaruruyag nga mga butang han “ngatanan nga nasud.”—Hag. 2:7.

11, 12. (a) Paonan-o kita magpapahimulos tikang ha ilustrasyon mahitungod han pukot? (b) Ano an igintututdo hini ha aton mahitungod kan Jehova ngan kan Jesus?

¹¹ Paonan-o kita magpapahimulos tikang ha ilustrasyon mahitungod han pukot? Kon masasabtan naton an leksyon hini nga ilustrasyon, mabulig ini ha aton nga diri sobra nga mabaraka o manluya kon an aton estudyante ha Biblia o usa han aton mga anak waray mag-alagad kan Jehova. Mahimo ini mahitabo bisan pa han aton duro nga pangalimbasog. An usa nga tawo diri awtomatiko nga nagkakaada marig-on nga relasyon kan Jehova tungod la kay nag-aaram hiya han Biblia o ginpadaku hiya ha kamatuoran. An diri nagpapasakop ha pagmando ni Jehova ibubulag ha iya katawohan.

¹² Nagpapasabot ba ito nga adton bumaya ha  kamatuoran diri na gud tutugotan nga makabalik ha kongregasyon? O waray na gud ba paglaom adton waray magdedikar han ira kinabuhi kan Jehova? Diri. May higayon pa hira nga magin sangkay ni Jehova antes magtikang an daku nga kasakitan. Gin-aaghat hira ni Jehova: “Balik ngadi ha akon, ngan ako mabalik ngada ha iyo.” (Mal. 3:7) Ini nga kamatuoran ginpapabug-atan han usa pa nga ilustrasyon ni Jesus, an mahitungod han makaragon nga anak.—Basaha an Lucas 15:11-32.

13. Ano an kahulogan han ilustrasyon ni Jesus mahitungod han makaragon nga anak?

¹³ Ano an kahulogan han ilustrasyon ni Jesus mahitungod han makaragon nga anak? An maloloy-on nga amay hini nga ilustrasyon nagrirepresentar han aton mahigugmaon ngan langitnon nga Amay, hi Jehova. An anak nga nag-aro han iya panurundon ngan nagwaldas hito nagrirepresentar hadton bumaya ha kongregasyon. Sugad hin nagbiyahe hira ha “hirayo nga nasud,” ha kalibotan ni Satanas, nga bulag kan Jehova. (Efe. 4:18; Col. 1:21) Pero ha urhi, an pipira nakasantop han ira sayop ngan nangalimbasog gud nga makabalik ha organisasyon ni Jehova. Inin mapainubsanon ngan mabinasulon nga katawohan malipayon nga ginkakarawat han aton mapinasayloon nga Amay.—Isa. 44:22; 1 Ped. 2:25.

14. Kay ano nga gin-gamit ni Jesus an ilustrasyon mahitungod han makaragon nga anak?

¹⁴ Kay ano nga gin-gamit ni Jesus ini nga ilustrasyon? Iginpakita ni Jesus nga karuyag gud ni Jehova nga bumalik adton bumaya ha Iya. An amay ha ilustrasyon waray gud mawad-i hin paglaom nga mabalik an iya anak. Han makita niya nga bumalik ito, bisan ha “hirayo pa,” iya dayon ito gintapo basi karawaton. Ini nga ilustrasyon sadang mag-aghat ha mga bumaya ha kamatuoran nga bumalik dayon kan Jehova. Posible nga maluya hira hinduro ha espirituwal, ngan bangin maawod hira o makuri para ha ira an pagbalik. Pero bawi gud an ira pangalimbasog. Malilipay hito hi Jehova, hi Jesus, ngan an mga anghel.—Luc.15:7.

15, 16. (a) Ano nga mga leksyon an aton hibabaroan ha ilustrasyon ni Jesus mahitungod han makaragon nga anak? Paghatag hin mga ehemplo. (b) Ano an igintututdo hini ha aton mahitungod kan Jehova ngan kan Jesus?

¹⁵ Paonan-o kita magpapahimulos tikang ha ilustrasyon mahitungod han makaragon nga anak? Sadang naton subaron hi Jehova. Diri gud naton karuyag nga ‘magpalabi hin pagkamatadong’ nga diri na naton ginkakarawat an mga mabinasulon. Magriresulta ito ha espirituwal  nga ‘pagkagunaw.’ (Ekles. 7:16) May hibabaroan pa kita nga leksyon tikang hini. An mga binaya ha kongregasyon sadang naton hunahunaon sugad nga ‘nawawara nga karnero’ nga puydi pa makabalik. (Sal. 119:176) Kon may nakilala kita nga binaya ha kongregasyon, mahigugmaon nga bubuligan ba naton hiya basi makabalik? Susumatan ba naton dayon an mga tigurang basi mabuligan hiya? Bubuhaton naton ito kon maaramon nga gin-aaplikar naton an leksyon nga aton hinbaroan ha ilustrasyon ni Jesus mahitungod han makaragon nga anak.

¹⁶ An pipira nga bumalik kan Jehova mapasalamaton gud han iya kalooy ngan han gugma ngan bulig han kongregasyon. Usa nga bugto nga ginpaiwas ha kongregasyon ngan binalik paglabay hin 25 ka tuig an nagsiring: “Tikang han nakabalik ako, padayon nga nagdudugang an akon kalipay tungod kay naieksperyensyahan ko an ‘panahon han pagrepresko’ tikang kan Jehova. (Buh. 3:19) An ngatanan mabinuligon gud ngan mahigugmaon! Yana may-ada na ako malipayon nga espirituwal nga pamilya.” Usa nga batan-on nga sister nga bumalik ha kongregasyon paglabay hin lima ka tuig an nagsiring: “Diri ko maisaysay an akon inabat han maeksperyensyahan ko mismo an gugma nga ginsiring ni Jesus. Birilhon gud an pagin bahin han organisasyon ni Jehova!”

17, 18. (a) Ano an praktikal nga mga leksyon nga aton hinbaroan tikang ha tulo nga ilustrasyon nga aton ginhisgotan? (b) Ano an sadang naton magin determinasyon?

¹⁷ Ano an praktikal nga mga leksyon nga aton hinbaroan tikang hinin tulo nga ilustrasyon? Siyahan, kinahanglan karawaton naton nga diri naton kontrolado an espirituwal nga pag-uswag han aton estudyante ha Biblia. Hi Jehova la an makakahimo hito. Ikaduha, diri kita makakalaom nga an ngatanan nga natambong ha aton mga katirok o nag-aaram han Biblia magigin surugoon ni Jehova. Ikatulo, bisan kon an pipira bumaya ha kamatuoran ngan kan Jehova, diri gud naton sadang hunahunaon nga diri na hira mabalik. Ngan kon bumalik hira, karawaton naton hira ha paagi nga nagpapakita han gugma ni Jehova.

¹⁸ Hinaot an tagsa ha aton padayon nga mamiling hin kahibaro, pagsabot, ngan kinaadman. Samtang ginbabasa an mga ilustrasyon ni Jesus, pakianhan naton an aton kalugaringon: ‘Ano an kahulogan hini? Kay ano nga iginrekord ini ha Biblia? Paonan-o ko iaaplikar an mga leksyon hini? Ano an igintututdo hini ha akon mahitungod kan Jehova ngan kan Jesus?’ Kon bubuhaton naton ito, masasabtan naton an kahulogan han mga ginsiring ni Jesus.