Nabasa mo ba hin maopay an bag-o nga mga gowa han An Barantayan ngan The Watchtower? Kitaa kon mababaton mo an masunod nga mga pakiana:

Puydi ba ha mga Kristiano an cremation o an pagsunog ha patay nga tawo?

Personal nga desisyon kon magpapa-cremate an usa o diri. Waray ginsisiring an Biblia mahitungod ha cremation, pero makapainteres nga an patay nga lawas ni Hadi Saul ngan han iya anak nga hi Jonatan ginsunog ngan katapos, iginlubong. (1 Sam. 31:2, 8-13)—6/15, pahina 7.

Paonan-o kita makakasiguro nga diri an Dios an nagpapahinabo han karaotan?

An Dios matadong ha ngatanan nga iya paagi. Hiya amo an katadongan; matinumanon ngan matadong hiya. Hi Jehova mapinalanggaon liwat ngan maloloy-on. (Deut. 32:4; Sal. 145:17; San. 5:11)—10/1, pahina 4.

Ano nga mga ayat an mahimo atubangon han usa kon nabalhin ha iba nga nasud basi mag-alagad ha lugar nga mas daku an panginahanglan?

An tulo nga ayat amo an (1) pagpahiuyon ha bag-o nga paagi han pagkinabuhi, (2) paglampos ha kamingaw, ngan (3) pagpahiuyon ha bag-o nga kasangkayan. Nalamposan han damu ini nga mga ayat ngan kinarawat hira hin hura nga bendisyon.—7/15, pahina 4-5.

Kay ano nga nangalas kan Jose an iya kabugtoan?

Usa nga hinungdan amo an pagpaura ni Jacob kan Jose. Gintagan pa ngani hiya hito hin maopay hinduro nga bado. Naawa kan Jose an iya kabugtoan ngan ginbaligya hiya ha pagkauripon.—8/1-E, pahina 11-13.

Kay ano nga epektibo gud ngan masayon gamiton an bag-o nga mga tract?

Papriho an pormat hito. An tagsa nga tract nag-aaghat ha aton nga magbasa hin teksto ngan magbangon hin pakiana ha tagbalay. Anoman an iya baton, mahimo naton abrihan an tract ngan ipakita ha iya an ginsisiring han Biblia. Mahimo liwat naton unabihon an pakiana para ha pagbalik-bisita.—8/15, pahina 13-14.

Ano an Syriac Peshitta?

An Syriac usa nga Aramaiko nga dialekto nga gin-gamit han damu nga tawo ha ikaduha o ikatulo ka siglo C.E. Baga hin ha Syriac siyahan nga iginhubad an mga bahin han Kristiano Griego nga Kasuratan. An Biblia nga iginhubad ha Syriac gintawag nga Peshitta.—9/1-E, pahina 13-14.

Ano an mahihimo han Kristiano nga mga kag-anak basi maataman an ira mga anak?

Importante an pagpamati ha imo mga anak basi makilala mo hira. Pangalimbasog nga mapakaon hira ha espirituwal. Mahigugmaon nga giyahi hira, pananglitan, kon may pagruhaduha hira mahitungod ha aton gintotoohan.—9/15, pahina 18-21 18-21.

Ano an mawawara kon magmando na an Ginhadian han Dios?

Mawawara na an sakit, kamatayon, kawaray-trabaho, girra, kakulang hin pagkaon, ngan kapobrehan.—10/1-E, pahina 6-7.

Ano nga kasabotan ha Biblia an naghahatag hin higayon ha iba nga magmando kaupod ni Kristo?

Katapos han ultimo nga Paskua ni Jesus kaupod han iya mga apostol, naghimo hiya hin kasabotan ha iya matinumanon nga mga disipulo nga agsob tawagon nga kasabotan han Ginhadian. (Luc. 22:28-30) Naggarantiya ini ha ira nga magmamando hira kaupod ni Jesus ha langit.—10/15, pahina 16-17.

Pag-unabi hin duha nga asoy ha Biblia nga nagpapamatuod nga tinuod nga persona hi Satanas.

An Biblia nasiring nga nakiistorya hi Satanas kan Jesus basi sulayon hiya. Dugang pa, ha panahon ni Job, nakiistorya hi Satanas ha Dios. Ini nga mga asoy nagpapamatuod nga tinuod nga persona hi Satanas.—11/1-E, pahina 4-5.

Hin-o an ‘katawohan nga nagdadara han iya ngaran’ nga gin-unabi ni Santiago ha Buhat 15:14?

Hira amo an mga tumuroo nga Judio ngan diri Judio nga ginpili han Dios basi magin ‘pinili nga lahi’ nga ‘magpapasamwak ha bisan diin han pagkaharangdon’ han Usa nga nagtawag ha ira. (1 Ped. 2:9, 10)—11/15, pahina 24-25.

Diin nahimumutang an Timgad, ngan ano an disposisyon han pipira nga umurukoy hito?

An Timgad usa nga daku nga Romano nga syudad ha Norte nga Aprika (Algeria na yana). Usa nga naukab nga inskripsyon an nagpapakita han disposisyon han pipira nga naukoy didto. Ito nasiring: “Pagpanganop, Pangarigo, Pag-uyag, Pagkaragtatawa—Ito an Kinabuhi!” Pariho ito ha disposisyon nga gin-unabi ha 1 Corinto 15:32.—12/1-E, pahina 8-10.