NATAPOS ni Guy Hollis Pierce, membro han Nagmamando nga Lawas han mga Saksi ni Jehova, an iya kinabuhi ha tuna han Martes, Marso 18, 2014. Setenta-y-noybe anyos hiya han natuman an iya paglaom nga mabanhaw sugad nga usa han kabugtoan han Kristo.—Heb. 2:10-12; 1 Ped. 3:18.

Hi Guy Pierce natawo ha Auburn, California, E.U.A., han Nobyembre 6, 1934, ngan nabawtismohan han 1955. Nagpakasal hira han iya hinigugma nga asawa nga hi Penny han 1977, ngan nagkaada hira mga anak. Tungod kay pamilyado hiya, sugad hin mga anak an iya pagtratar ha iba. Han 1982, nagpayunir hira ni Penny, ngan han 1986 nagtikang an iya 11 ka tuig nga pag-alagad sugad nga paramangno han sirkito ha Estados Unidos.

Han 1997, hira Guy ngan Penny Pierce nagin membro han pamilya han Bethel ha Estados Unidos. Nagtrabaho hi Bugto Pierce ha Service Department, ngan han 1998 ginpili hiya sugad nga kabulig han Personnel Committee han Nagmamando nga Lawas. Han Oktubre 2, 1999, ha tinuig nga katirok han Watch Tower Bible and Tract Society of Pennsylvania, iginpahibaro nga hi Bugto Pierce ginpili sugad nga membro han Nagmamando nga Lawas. Han naglabay nga mga tuig, nag-alagad hiya ha Personnel Committee, Writing Committee, Publishing Committee, ngan Coordinators’ Committee.

An mga tawo nga iba-iba an gintikangan ngan kultura komportable ha pakig-upod kan Bugto Pierce tungod kay mahiyom-hiyom hiya ngan mahilig magpatawa. Kondi labi nga naruyagan hiya han iba tungod han iya pagin mahigugmaon, pagin mapainubsanon, pagtahod ha matadong nga mga balaud ngan prinsipyo han Dios, ngan bug-os nga pagtoo kan Jehova. Para kan Guy Pierce, mas posible pa nga diri sumirang an adlaw kay ha diri matuman an mga saad ni Jehova, ngan karuyag niya nga ipasamwak ito nga kamatuoran ha bug-os nga kalibotan.

Hi Bugto Pierce maduruto ha pag-alagad kan Jehova. Nabangon hiya hin temprano ha aga ngan agsob nga nagtatrabaho tubtob ha hilarom nga kagab-ihon. Nagbiyahe hiya ha iba-iba nga nasud basi parig-unon an kabugtoan, ngan may panahon hiya pirme para ha tagsa nga Bethelite ngan ha iba pa nga karuyag makig-upod, mangaro hin sagdon, ngan magpabulig ha iya. Bisan kon mga tuig na an naglabay, nahinunumdoman pa han mga igkasi-tumuroo an iya pagin maabiabihon, pagin makisangkayon, ngan an iya Kasuratanhon nga pagdasig.

Mamimingaw gud ha aton bugto ngan hinigugma nga sangkay an iya asawa, unom nga anak, mga apo, apo ha tuhod, pati na an iya damu nga espirituwal nga anak. Hi Mark Sanderson, nga membro liwat han Nagmamando nga Lawas, an nagpresenta han pahayag para kan Bugto Pierce ha Brooklyn Bethel han Sabado, Marso 22, 2014. Ginhisgotan niya an mahitungod han langitnon nga paglaom ni Bugto Pierce ngan ginbasa an ginsiring ni Jesus: “Ha balay han akon Amay damu an urukyan. . . . Kon kumadto ako ngan mag-andam hin lugar para ha iyo, mabalik ako ngan ig-uupod ko kamo ha akon balay basi kon hain ako, aadto liwat kamo. Ngan ha akon kakadtoan maaram kamo han dalan.”—Juan 14:2-4.

Sigurado nga mamimingaw gud kita kan Bugto Pierce. Pero nalilipay kita nga ‘maaram hiya han dalan’ ngadto ha iya permanente nga “urukyan.”