1, 2. Ano an karuyag han Dios nga buhaton han iya mga magsiringba, batan-on man o lagas?

USA ka ba nga batan-on? Kon oo, sarig nga ginpapabilhan an imo pagin bahin han bug-os-kalibotan nga kongregasyon ni Jehova. Ha damu nga nasud, damu nga batan-on an nababawtismohan. Makapadasig gud nga makita an damu nga batan-on nga nagdidesisyon ha pag-alagad kan Jehova!

² Sugad nga batan-on, nalilipay ka ba makig-upod ha imo mga kaedad? Posible nga nalilipay ka. Naruruyag gud kita nga makaupod an aton kasangkayan. Pero batan-on man kita o lagas ngan anoman an aton gintikangan, karuyag ni Jehova nga magkaurosa kita ha pagsingba ha iya. Hi apostol Pablo nagsurat nga kaburut-on han Dios nga “matalwas an ngatanan nga klase hin tawo ngan magkaada husto nga kahibaro ha kamatuoran.” (1 Tim. 2:3, 4) Ha Pahayag 7:9, iginhuhulagway nga an mga magsiringba han Dios nagtitikang ha “ngatanan nga nasud, tribo, katawohan, ngan pinulongan.”

3, 4. (a) Ano an disposisyon han damu nga batan-on yana? (b) Ha Efeso 4:25, paonan-o iginhulagway ni Pablo an kongregasyon?

³ Daku gud an kaibahan han batan-on nga mga surugoon ni  Jehova ha mga batan-on hini nga kalibotan! Damu han diri nag-aalagad kan Jehova an interesado la ha ira kalugaringon ngan ha ira mga karuyag. Ngani, pipira nga parasaliksik an nagsiring nga an mga batan-on yana mas makikalugaringon na gud. An ira panyakan ngan pamado nagpapakita hin kawaray-pagtahod ha kalagasan, nga para ha ira diri nasunod ha uso.

⁴ Ito nga disposisyon kalyap ha bisan diin. Salit, kinahanglan gud mangalimbasog an batan-on nga mga surugoon ni Jehova nga atohan ito ngan sundon an panhunahuna han Dios. Bisan ha siyahan nga siglo, nakita ni Pablo nga kinahanglan pahamangnoan an iya mga igkasi-tumuroo nga likyan “an espiritu nga nag-iimpluwensya yana ha mga diri-masinugtanon” nga nagin ira ‘pagkinabuhi hadto.’ (Basaha an Efeso 2:1-3.) Takos gud kumendasyonan an mga batan-on nga naglilikay hito nga disposisyon ngan urosa nga nagbubuhat kaupod han kabugtoan. Nasasabtan nira nga an kongregasyon pariho hin lawas nga damu an bahin nga urosa nga nagbubuhat. Sugad han ginsiring ni Pablo, “mga bahin kita han usa nga lawas.” (Efe. 4:25) Samtang nagtitikahirani an kataposan hinin daan nga kalibotan, labi nga kinahanglan naton magkaurosa. Tagdon naton an pipira nga ehemplo ha Biblia nga mabulig ha aton nga masabtan kon kay ano nga importante an pagkaurosa.

5, 6. Ano nga leksyon an aton mahibabaroan tikang kan Lot ngan ha iya pamilya?

⁵ Ha naglabay, ginpuproteksyonan ni Jehova an iya katawohan kon nagkakaurosa ngan nagbuburublig hira durante hin magkuri nga sitwasyon. An mga surugoon han Dios yana, batan-on man o lagas, may mahibabaroan tikang ha mga ehemplo ha Biblia. Usa hini an nahitabo kan Lot.

⁶ Nameligro an kinabuhi ni Lot ngan han iya pamilya tungod kay an syudad nga ira gin-uukyan, an Sodoma, bubungkagon ni Jehova. Ginsagda han mga anghel hi Lot nga bumaya ngan pumalagiw ngadto ha kabukiran. Hira nagsiring: “Palagiw tungod han imo kinabuhi”! (Gen. 19:12-22) Sumugot hi Lot ngan an iya duha nga anak. Pero makasurubo nga an iba han ira kapamilya waray sumugot. Para ha mga maurumagad ni Lot, “nagtitiniaw la hiya.” Tungod hito, namatay hira han ginbungkag an syudad. (Gen. 19:14, Baraan nga Biblia) Hi Lot la ngan an iya mga anak nga waray bumulag ha iya an nakatalwas.

7. Paonan-o ginbuligan ni Jehova an nagkakaurosa nga katawohan nga binaya ha Ehipto?

⁷ Tagda an usa pa nga ehemplo. Han binaya an mga Israelita ha Ehipto, waray hira magburublag ha iba-iba nga grupo, nga an tagsa may kalugaringon nga ruta. Ngan han “inunat [ni Moises] an iya kamot ha igbaw han dagat” ngan gintunga ni Jehova an dagat, diri la hi Moises o pipira nga Israelita nga inupod ha iya an tinabok dida hito. Lugod, pinaagi han panalipod ni Jehova, an bug-os nga nasud an tinabok. (Eks. 14:21, 22, 29, 30) Nagpakita hira hin pagkaurosa upod an “nagkakasaralakot nga kadam-an,” mga diri Israelita nga dinapig ha ira. (Eks. 12:38) Diri gud maaramon kon an pipira nga indibiduwal, bangin usa nga grupo hin mga batan-on, an naglugaring pagbiyahe ha ira ginhuhunahuna nga pinakamaopay nga ruta. Kalurongan gud an pagbuhat hito tungod kay diri nira makakarawat an panalipod ni Jehova.—1 Cor. 10:1.

8. Paonan-o nagpakita hin pagkaurosa an katawohan han Dios ha panahon ni Jehosapat?

⁸ Ha panahon ni Hadi Jehosapat, an katawohan han Dios inatubang hin makusog nga kaaway, an “damo nga kasondalohan” tikang ha nakapalibot nga mga lugar. (2 Kron. 20:1, 2, Maopay nga Sumat) Maopay na la nga waray hira mangalimbasog pagpirde han mga kaaway ha ira kalugaringon nga kusog. Lugod, sinarig  hira kan Jehova. (Basaha an 2 Kronikas 20:3, 4.) Ngan an tagsa ha ira waray maghimo hin kalugaringon nga solusyon, lugod nagkaurosa hira. An Biblia nasiring: “An bug-os nga Juda nagtindog ha atubangan ni Jehova, upod an ira gudti nga kabataan, an ira mga asawa, ngan an ira mga anak.” (2 Kron. 20:13) Batan-on man o lagas, urosa hira nga sumunod ha instruksyon ni Jehova, ngan ginpanalipdan hira ni Jehova tikang ha ira mga kaaway. (2 Kron. 20:20-27) Maopay gud ini nga susbaranan para ha katawohan han Dios kon paonan-o aatubangon an magkuri nga sitwasyon sugad nga grupo.

9. Ano an aton mahibabaroan may kalabotan ha pagkaurosa ha buhat ngan disposisyon han siyahan-siglo nga mga Kristiano?

⁹ An siyahan-siglo nga mga Kristiano nagkakaurosa liwat. Pananglitan, katapos magin Kristiano an damu nga Judio ngan proselita, nagpadayon hira “ha pagpamati hin maopay ha igintututdo han mga apostol, ha paghinatagay, ha tarampo nga pangaon, ngan ha mga pag-ampo.” (Buh. 2:42) Ini nga pagkaurosa labi nga nakita han gintimaraot hira, an panahon nga kinahanglan gud nira an usa kag usa. (Buh. 4:23, 24) Diri ka ba mauyon nga durante hin makuri nga sitwasyon, kinahanglan gud naton magkaurosa?

10. San-o kinahanglan gud magkaurosa an katawohan han Dios?

¹⁰ Hirani na naton maeksperyensyahan an pinakamakuri nga panahon ha kasaysayan han tawo. Iginhulagway ito ni propeta Joel sugad nga “adlaw han kasirom ngan han kadulom.” (Joel 2:1, 2; Sep. 1:14) Hito nga panahon, kinahanglan gud magkaurosa an katawohan han Dios. Hinumdumi an ginsiring ni Jesus: “An tagsa nga ginhadian nga nagkakabahinbahin mabubungkag.”—Mat. 12:25.

11. Ano an mahibabaroan han katawohan han Dios ha Salmo 122:3, 4 mahitungod ha pagkaurosa? (Kitaa an retrato ha tinikangan hini nga artikulo.)

¹¹ Durante han tiarabot nga kataposan hini nga sistema, kinahanglan gud naton magkaurosa. Ito nga pagkaurosa maipapariho ha pagkahigrani han mga balay ha kadaan nga Jerusalem. An mga balay didto maghigrani gud, salit ginhulagway han salmista an Jerusalem sugad nga usa nga syudad nga “bug-os.” Nakabulig ito ha mga umurukoy nga maproteksyonan ngan mabuligan an usa kag usa. Dugang pa, an pagkahigrani han ira mga balay mahimo magrepresentar han espirituwal nga pagkaurosa han bug-os nga nasud kon an ngatanan nga “katulinan ni Jehova” nagkakatirok ha pagsingba ha iya. (Basaha an Salmo 122:3, 4.) Yana ngan ha tiarabot nga makuri nga panahon, kinahanglan liwat naton magpabilin nga “bug-os” o nagkakaurosa.

12. Ano an mabulig ha aton nga matalwas ha tiarabot nga pag-atake ha katawohan han Dios?

¹² Kay ano nga importante gud nga magkaurosa kita hito nga panahon? An Esekiel kapitulo 38 nagtagna nga aatakehon ni ‘Gog ha tuna ha Magog’ an katawohan han Dios. Ito an panahon nga diri gud kita angay magkabahinbahin. Kalurongan gud an pangaro hin bulig ha kalibotan ni Satanas. Lugod, karuyag naton magin duok ha kabugtoan. Syempre, diri kita matatalwas tungod la kay bahin kita hin usa nga grupo. Tatalwason ni Jehova ngan han iya Anak an mga natawag ha iya ngaran durante hiton makuri nga panahon. (Joel 2:32; Mat. 28:20) Kondi, makatadunganon ba an paghunahuna nga tatalwason ni Jehova adton binulag ha iya nagkakaurosa nga katawohan?—Mika 2:12.

13. Ano an mahibabaroan han mga batan-on tikang ha aton mga ginhisgotan?

¹³ Kon usa ka nga batan-on, nasasabtan mo na ba kon kay ano nga diri maaramon nga makig-upod ha imo mga kaedad la o ibulag an imo kalugaringon ha kabugtoan? Diri na mag-iiha,  pagkikinahanglanon gud naton an usa kag usa, batan-on man o lagas! Oo, yana na an panahon nga kultibaron naton an pagkaurosa. Kinahanglan ito basi kita matalwas.

14, 15. (a) Kay ano nga ginbabansay kita ni Jehova nga magkaurosa? (b) Ano nga mga sagdon an iginhatag ni Jehova basi kita magkaurosa?

¹⁴ Ginbubuligan kita ni Jehova nga ‘magsingba ha iya hin urosa.’ (Sep. 3:8, 9, Baraan nga Biblia) Ginbabansay kita niya para ha tidaraon, diin iya ‘titirukon utro ngadto ha Kristo an ngatanan nga butang.’ (Basaha an Efeso 1:9, 10.) Oo, katuyoan ni Jehova nga magkaurosa an ngatanan nga linarang ha uniberso ha pagsingba ha iya, ngan sigurado nga tutumanon niya ito. Sugad nga batan-on, nakabulig ba ini ha imo nga masabtan nga importante an pagin duok ha organisasyon ni Jehova?

¹⁵ Ginbabansay kita ni Jehova nga magkaurosa yana basi makagkinabuhi kita nga nagkakaurosa ha kadayonan. An Biblia pauroutro nga nag-aaghat ha aton nga “magminangnoay,” ‘palanggaon an usa kag usa,’ ‘padayon nga liawon an usa kag usa,’ ngan “magparig-onay.” (1 Cor. 12:25; Roma 12:10; 1 Tes. 4:18; 5:11) Maaram hi Jehova nga tungod kay diri kita hingpit, usahay makuri para ha aton nga magkaurosa. Salit kinahanglan padayon kita nga ‘magpinasayloay’ ha usa kag usa.—Efe. 4:32.

16, 17. (a) Ano an usa nga rason nga nagkakatirok kita? (b) Ano an mahibabaroan han mga batan-on ha susbaranan ni Jesus?

¹⁶ Igintagana liwat ni Jehova an mga katirok basi mabuligan kita nga magin duok ha kada tagsa. An Hebreo 10:24, 25 nagpapahinumdom ha aton nga usa nga rason nga nagkakatirok kita amo an ‘paghatag hin atensyon ha usa kag usa basi mag-inaghatay ha pagpakita hin gugma ngan mag-opay nga buhat.’ Ngan makapainteres nga igintagana ito basi kita ‘magparig-onay ha usa kag usa, labi na nga nakikita naton nga nagtitikahirani na an adlaw.’

¹⁷ Hi Jesus nagpakita hin maopay nga susbaranan ha pagpabili ha sugad nga mga katirok. Han 12 anyos hiya, inupod hiya ha iya mga kag-anak ha usa nga daku nga katirok ha templo. Usa ka higayon, nahibulag hiya ha iya mga kag-anak. Pero diri ito tungod kay inupod hiya ha iya mga igkasi-batan-on. Lugod, nabilngan hiya nira Jose ngan Maria nga nakikig-istorya ha mga magturutdo ha templo may kalabotan ha Kasuratan.—Luc. 2:45-47.

18. Paonan-o makakabulig an pag-ampo basi maparig-on an aton pagkaurosa?

¹⁸ Labot la han pagkultibar hin gugma ha usa kag usa ngan pagtambong ha mga katirok basi  maparig-on an aton pagkaurosa, mahimo liwat kita espisipiko nga mag-ampo para ha kabugtoan. Ha pagbuhat hini, iginpapakita naton nga hinigugma naton hira. Diri la mga adulto nga Kristiano an makakahimo ngan sadang maghimo hini. Mga batan-on, ginbubuhat ba niyo ito nga mga butang basi magin duok kamo ha iyo espirituwal nga pamilya? Ha pagbuhat hito, malilikyan niyo nga mahiapi ha kabungkagan hinin daan nga kalibotan.

19-21. (a) Paonan-o naton iginpapakita nga “mga bahin kita han uusa la nga lawas”? Paghatag hin mga ehemplo. (b) Ano an imo hibabaroan tikang ha pagbinuligay han kabugtoan ha panahon hin kalamidad?

¹⁹ An katawohan ni Jehova nagkikinabuhi na uyon ha prinsipyo ha Roma 12:5: “Mga bahin kita han uusa la nga lawas.” Nakikita ini kon may mga kalamidad nga nahitatabo. Pananglitan han Disyembre 2011, usa nga bagyo an nagin hinungdan han duro nga pagbaha ha Mindanao, ha Pilipinas. Ha usa la ka gab-i, sobra 40,000 nga balay an ginbaha, upod na an balay han damu nga kabugtoan. Pero an sanga nga opisina nagreport nga “antes pa makagtagana hin bulig an mga relief committee, an kabugtoan ha iba nga lugar nagpadara na hin bulig.”

²⁰ Han nagkaada makusog nga linog nga nagresulta hin tsunami ha este nga bahin han Japan, damu nga kabugtoan an nag-antos gud. An iba nawad-an pa ngani han ngatanan nira nga panag-iya. Pananglitan hi Yoshiko, nga nawad-an hin balay, nag-uukoy mga 40 ka kilometro tikang ha Kingdom Hall. Hiya nagsiring: “Diri kami makatoo han hinbaroan namon nga kinabuwasan katapos han linog, an paramangno han sirkito upod an usa pa nga bugto kinadto ha amon lugar basi pamilngon kami.” Hiniyom hi Yoshiko, ngan dugang nga nagsiring: “Daku an amon pagpasalamat nga gin-ataman gud an amon espirituwal nga panginahanglan pinaagi han kongregasyon. Dugang pa, nakakarawat kami hin mga panhagkot nga bado, mga sapatos, bag, ngan pajama.” Usa nga membro han relief committee an nagsiring: “An kabugtoan ha bug-os nga Japan nagkaurosa basi buligan an kada tagsa. May kabugtoan pa ngani tikang ha Estados Unidos nga kinanhi basi bumulig. Han ginpakianhan kon kay ano nga kinanhi hira, hira nagsiring, ‘Kaurosa namon an kabugtoan ha Japan, ngan kinahanglan nira hin bulig.’” Diri ka ba nalilipay nga bahin ka han usa nga organisasyon nga nagtatagad gud ha mga membro hito? Makakasiguro ka nga nalilipay gud hi Jehova nga makita an sugad nga pagkaurosa.

²¹ An pagkaada hin nagkakaurosa nga disposisyon yana mabulig ha aton nga urosa nga atubangon an magkuri nga sitwasyon ha tidaraon bisan pa kon mawarayan kita hin komunikasyon ha aton kabugtoan ha iba nga nasud. Ha pagkamatuod, ito nga disposisyon nagbabansay ha aton basi maatubang an mga kakurian nga posible gud naton maeksperyensyahan kon mabungkag na inin daan nga sistema. Hi Fumiko nga biktima hin bagyo ha Japan, nagsiring: “Hirani na gud an kataposan. Kinahanglan padayon naton nga buligan an aton mga igkasi-tumuroo samtang ginpapamulat naton an panahon diin waray na mga kalamidad.”

22. Paonan-o an aton pagkaurosa yana mabulig ha aton ha tidaraon?

²² An mga batan-on ngan lagas nga nangangalimbasog makig-urosa ha katawohan han Dios yana, ha pagkamatuod, nangangandam basi matalwas ha kataposan hinin maraot ngan nagkakabahinbahin nga kalibotan. Pariho ha naglabay, tatalwason han Dios an iya katawohan. (Isa. 52:9, 10) Hinumdumi nga matatalwas ka kon magpapabilin ka nga bahin han nagkakaurosa nga katawohan han Dios. Ha sunod nga artikulo, hihisgotan naton kon kay ano nga kinahanglan liwat naton apresyaron an aton mga nakarawat.