1. Kay ano nga takos pasalamatan hi Jehova?

HI Jehova, an Humaratag han ‘tagsa nga maopay nga regalo ngan han tagsa nga perpekto nga hatag,’ takos gud han aton pagpasalamat. (San. 1:17) Sugad nga mahigugmaon nga Paraataman, igintatagana niya an ngatanan nga aton panginahanglan ha pisikal ngan ha espirituwal. (Sal. 23:1-3) Hiya an “aton arayopan ngan an aton kusog”—labi na ha panahon han kakurian! (Sal. 46:1) Damu gud an aton hinungdan nga umuyon ha salmista nga nagsurat: “Pasalamat ngadto kan Jehova; kay maopay hiya; kay an iya mahigugmaon nga kalooy nagpapadayon ha gihapon.”—Sal. 106:1.

2, 3. (a) Kay ano nga peligroso an pagin diri mapasalamaton? (b) Ano nga mga pakiana an aton paghihisgotan hini nga artikulo?

² Kay ano nga sadang kita magin mapasalamaton kan Jehova? Sugad han igintagna, an mga tawo hinin kataposan nga mga adlaw diri gud mapasalamaton. (2 Tim. 3:2) Diri gin-aapresyar han damu an mga bendisyon nga ira nakakarawat. Tungod han impluwensya han komersyo ngan han mga adbertisment, minilyon an nangangalimbasog magkaada hin dugang pa imbes nga makontento ha kon ano an  may-ada hira. Mahimo liwat kita maapektohan han sugad nga disposisyon. Pariho ha mga Israelita hadto, mahimo kita magin diri mapasalamaton ngan mawara an aton apresasyon ha aton presyoso nga relasyon kan Jehova ngan ha iya mga bendisyon ha aton.—Sal. 106:7, 11-13.

³ Hunahunaa liwat an mahimo mahitabo kon makaeksperyensya kita hin magkuri nga pagsari. Ha sugad nga mga panahon, bangin masayon kita madaog han mga problema ngan diri na naton makita an mga bendisyon nga aton nakakarawat. (Sal. 116:3) Salit, paonan-o kita makakapabilin nga mapasalamaton? Ngan paonan-o naton matitipigan an positibo nga disposisyon bisan pa han magkuri nga pagsari? Hisgotan naton ito.

4. Paonan-o kita makakapabilin nga mapasalamaton?

⁴ Basi magpabilin nga mapasalamaton, kinahanglan pamalandungon naton an mga bendisyon ni Jehova ha aton ngan an iya mga ginhimo nga nagpapakita han iya maunungon nga gugma. Han ginbuhat ito han salmista, nahipausa hiya ha damu nga urusahon nga butang nga ginhimo ni Jehova.—Basaha an Salmo 40:5; 107:43.

5. Ano an aton mahibabaroan kan apostol Pablo mahitungod ha pagin mapasalamaton?

⁵ Damu an aton mahibabaroan kan apostol Pablo mahitungod ha pagin mapasalamaton. Sigurado nga ginpamalandong niya an mga bendisyon nga iya nakarawat tungod kay pirme hiya nagpapasalamat kan Jehova. Maaram hi Pablo nga hadto, hiya ‘parapasipara, paratimaraot, ngan nanmamaltrato.’ Salit, nagpasalamat hiya nga bisan pa han iya mga sala ha naglabay, ginkalooyan hiya han Dios ngan han Kristo ngan gintaporan hin ministeryo. (Basaha an 1 Timoteo 1:12-14.) Gin-apresyar liwat ni Pablo an iya mga igkasi-Kristiano, ngan agsob hiya magpasalamat kan Jehova tungod han ira mag-opay nga kalidad ngan matinumanon nga pag-alagad. (Fil. 1:3-5, 7; 1 Tes. 1:2, 3) Ngan kon naatubang hiya hin magkuri nga sitwasyon, nagpapasalamat dayon hiya kan Jehova han napapanahon nga bulig nga iya nakakarawat tikang ha kabugtoan. (Buh. 28:15; 2 Cor. 7:5-7) Salit diri urusahon nga gin-aghat niya an mga Kristiano: “Ipakita an iyo pagkamapasalamaton . . . , magparig-onay kamo pinaagi hin mga salmo, pagdayaw ha Dios, pagkanta hin espirituwal nga mga kanta upod an pagpasalamat.”—Col. 3:15-17.

6. Ano nga mga bendisyon an ginpapasalamatan mo gud kan Jehova?

⁶ Paonan-o naton masusubad an pagin mapasalamaton ni Pablo? Pariho ha iya, kinahanglan pamalandungon naton an mga ginbuhat ni Jehova para ha aton mismo. (Sal. 116:12) Ano an imo ibabaton kon may magpakiana ha imo, ‘Ano nga mga bendisyon an ginpapasalamatan mo kan Jehova?’ Kaapi ba hito an imo presyoso nga relasyon ha iya? O an kapasayloan nga imo nakarawat tungod han imo pagtoo ha halad-lukat han Kristo? Ngangaranan mo ba an kabugtoan nga binulig ha imo durante han magkuri nga panahon? Syempre, uunabihon mo gihap an imo hinigugma nga padis ngan mga anak. An paggahin hin panahon ha pagpamalandong han mga bendisyon nga imo nakakarawat tikang ha imo mahigugmaon nga Amay, hi Jehova, magpapagios ha imo nga magpasalamat ha iya kada adlaw.—Basaha an Salmo 92:1, 2.

7. (a) Kay ano nga sadang kita magpasalamat kan Jehova ha pag-ampo? (b) Ano an kapulsanan han pagpasalamat kan Jehova ha pag-ampo?

⁷ Kon ginpapamalandong naton an ngatanan nga bendisyon nga aton nakakarawat, mapapagios kita nga pasalamatan hi Jehova ha pag-ampo. (Sal. 95:2; 100:4, 5) Damu nga tawo an nag-aampo la kon may gin-aaro hira ha Dios.  Pero nalilipay hi Jehova kon nag-aampo kita basi magpasalamat han mga butang nga may-ada na kita. Mababasa ha Biblia an damu nga makapabantad nga pag-ampo hin pagpasalamat, upod na an kan Hana ngan kan Hesekia. (1 Sam. 2:1-10; Isa. 38:9-20) Salit subara an magtinumanon nga surugoon ni Jehova nga nagpakita hin mapasalamaton nga disposisyon. Oo, pasalamati hi Jehova ha mga bendisyon nga imo nakakarawat. (1 Tes. 5:17, 18) Damu an kapulsanan han pagbuhat hito. Malilipay ka, maghihilarom an imo gugma kan Jehova, ngan magigin mas duok ka ha iya.—San. 4:8.

8. Kay ano nga mahimo mawara an aton apresasyon ha ngatanan nga ginbuhat ni Jehova para ha aton?

⁸ Kay ano nga sadang kita magbantay nga diri mawara an aton apresasyon ha pagkamaopay ni Jehova? Tungod kay napanunod naton an tendensya nga magin diri mapasalamaton. Tagda ini: An aton siyahan nga mga kag-anak nga hira Adan ngan Eva ginpaukoy ha paraiso nga hardin. May-ada hira han ngatanan nira nga panginahanglan ngan may paglaom nga mabuhi hin mamurayawon ha waray kataposan. (Gen. 1:28) Kondi waray nira apresyara ito nga mga bendisyon. Nagin hakog hira ngan naghingyap hin dugang pa. Tungod hito, nawara ha ira an ngatanan. (Gen. 3:6, 7, 17-19) Yana, napapalibotan kita hin mga tawo nga diri mapasalamaton, salit mahimo liwat mawara an aton apresasyon ha ngatanan nga ginbuhat ni Jehova para ha aton. Bangin diri na naton pabilhan an aton pakigsangkay kan Jehova o an aton pribilehiyo ha pagin bahin han bug-os-kalibotan nga pagminagburugto. Bangin magpokus kita ha mga butang hini nga kalibotan nga hirani na mawara. (1 Juan 2:15-17) Basi malikyan ito, kinahanglan pamalandungon naton an aton mga bendisyon ngan pasalamatan pirme hi Jehova han pribilehiyo nga magin iya katawohan.—Basaha an Salmo 27:4.

9. Kon naatubang hin magkuri nga pagsari, kay ano nga sadang naton pamalandungon an mga bendisyon nga aton nakakarawat?

⁹ An pagin mapasalamaton mabulig ha aton ha pag-atubang hin magkuri nga pagsari. Bangin mabug-atan gud kita kon umatubang kita hin mga sitwasyon nga tigda nga makakagbag-o han aton kinabuhi, sugad han pagin diri maunungon han asawa o bana, grabe nga sakit, kamatyi hin hinigugma, o makasurubo nga resulta hin kalamidad. Ha sugad nga mga panahon, maliliaw ngan mapaparig-on kita kon papamalandungon naton an mga bendisyon nga aton nakakarawat. Tagda an masunod nga mga eksperyensya.

10. Paonan-o nakabulig kan Irina an pagpamalandong han mga bendisyon nga iya nakakarawat?

 ¹⁰ Hi Irina *, nga regular payunir ha Estados Unidos, nag-asawa hin tigurang nga nagin diri maunungon ha iya, ngan gin-abandona hiya pati an iya mga anak. Ano an nakabulig kan Irina nga magpabilin nga matinumanon kan Jehova? Hiya nagsiring: “Mapasalamaton ako ha pagmangno ni Jehova ha akon sugad nga indibiduwal. Pinaagi ha pagpamalandong han mga bendisyon ni Jehova ha akon ha kada adlaw, nasasantop ko nga daku gud nga pribilehiyo nga kilala ngan hinigugma ako han aton nagpapanalipod nga langitnon nga Amay. Maaram ako nga diri gud niya ako babayaan.” Bisan kon damu nga magkuri nga sitwasyon an naeksperyensyahan ni Irina, an iya malipayon nga disposisyon nakabulig ha iya nga makailob ngan maparig-on an iba.

11. Ano an nakabulig kan Kyung-sook ha pag-atubang han iya grabe nga sakit?

¹¹ Hi Kyung-sook nga taga-Asia, nagpayunir upod han iya bana ha sobra 20 ka tuig. Tigda la nga hinbaroan nga may-ada hiya grabe nga kanser ha baga ngan ginsidngan nga tulo tubtob unom ka bulan na la an iya kinabuhi. Bisan kon damu nga pagsari an ira gin-atubang hadto, waray hira problema ha ira kahimsog. Hiya nagsiring: “Naapektohan gud ako hini nga problema. Inabat ko nga baga hin nawara ha akon an ngatanan, ngan nahadlok ako hinduro.” Ano an nakabulig kan Kyung-sook ha pag-atubang hito nga sitwasyon? Hiya nagsiring: “Kada gab-i antes kumaturog, napakadto ako ha atop han amon balay basi ig-ampo ha daku nga tingog an lima nga butang nga mapasalamaton ako hito nga adlaw. Katapos, naliliaw ako ngan napapagios nga ipahayag an akon gugma kan Jehova.” Paonan-o nagpahimulos hi Kyung-sook ha iya mga pag-ampo kada gab-i? Hiya nagsiring: “Nasantop ko nga ginbubuligan kita ni Jehova durante han magkuri nga panahon ngan mas damu an bendisyon nga aton nakakarawat kay ha mga pagsari nga aton naieksperyensyahan.”

12. Ano an nakaliaw kan Jason kamatay han iya asawa?

¹² Hi Jason, nga Bethelite ha usa nga sanga nga opisina ha Aprika, sobra 30 ka tuig na ha bug-os-panahon nga pag-alagad. Hiya nagsiring: “Pito ka tuig na an naglabay han mamatay an akon asawa, pero duro la gihap nga kasakit an akon inaabat. Ngan nanluluya gud ako kon nahuhunahuna ko an iya pag-antos tungod han kanser.” Ano an nakabulig kan Jason nga makailob? Hiya nagsiring: “Makausa, ginhinumdom ko an usa nga makalilipay nga panahon nga kaupod ko an akon asawa, ngan nag-ampo ako kan Jehova basi magpasalamat hito nga hinumdoman. Naggaan an akon pag-abat ngan tikang hadto, pirme ko na ginpapasalamatan hi Jehova ha sugad nga makalilipay nga mga hinumdoman. An pagin mapasalamaton nakagbag-o han akon disposisyon. Nasusubo pa gihapon ako ha kamatay han akon asawa, pero an pagpasalamat kan Jehova tungod ha pagkaada malipayon nga pag-asawa ngan han pribilehiyo nga mag-alagad ha iya upod han usa nga nahigugma gud ha iya nakabulig ha akon nga magin positibo.”

13. Ano an nakabulig kan Sheryl nga mailob an kasakit tungod ha kawara han haros ngatanan niya nga kapamilya?

¹³ Han naigo an sentral nga bahin han Pilipinas han Super Typhoon Yolanda (Haiyan) han 2013, hi Sheryl, nga 13 anyos hito nga panahon, nawad-an han haros ngatanan. Hiya nagsiring: “Nawad-an ako hin balay, ngan nawara an haros ngatanan ko nga kapamilya.” Namatay an iya tatay, nanay, ngan tulo nga kabugtoan tungod han makusog nga storm surge. Ano an nakabulig kan Sheryl nga maatubang ini nga trahedya ngan diri mawad-an hin gana nga mabuhi? Mapasalamaton la gihap hiya kan Jehova tungod kay ginpapamalandong niya an mga bendisyon nga iya napapahimulosan. Hiya nagsiring: “Nakita ko an ngatanan nga ginbuhat  han kabugtoan basi buligan ngan liawon an mga nanginginahanglan. Maaram ako nga an kabugtoan ha bug-os nga kalibotan nag-aampo para ha akon.” Hiya nagdugang: “Nagpapasalamat gud ako nga hi Jehova an akon Dios. Pirme niya ginhahatag an aton ginkikinahanglan.” Oo, kon mapasalamaton kita ha mga bendisyon nga aton nakakarawat, diri kita madadaog han duro nga kasubo. Mabulig ini ha aton nga mailob an anoman nga kakurian nga mahimo naton atubangon.—Efe. 5:20; basaha an Filipos 4:6, 7.

14. Ano an aton makalilipay nga paglaom? (Kitaa an retrato ha tinikangan hini nga artikulo.)

¹⁴ Ha bug-os nga kasaysayan, an katawohan ni Jehova mapasalamaton ha mga bendisyon nga ira nakakarawat. Pananglitan, katapos talwason tikang kan Paraon ngan ha kasundalohan hito ha Dagat nga Pula, iginpahayag han mga Israelita an ira kalipay pinaagi hin mga kanta han pagdayaw ngan pagpasalamat. (Eks. 15:1-21) Yana, usa han ginpapabilhan gud naton nga bendisyon amo an paglaom nga diri na mag-iiha mawawara na an kasakit ngan pag-antos. (Sal. 37:9-11; Isa. 25:8; 33:24) Handurawa la an aton aabaton kon poohon na ni Jehova an ngatanan niya nga kaaway ngan karawaton kita ha bag-o nga kalibotan diin may kamurayawan ngan katadongan. Damu gud an angay naton igpasalamat kan Jehova hito nga panahon!—Pah. 20:1-3; 21:3, 4.

15. Ano an imo determinado nga buhaton ha bug-os nga tuig han 2015?

¹⁵ Ginpapamulat naton an damu gud nga espirituwal nga bendisyon ni Jehova hini nga tuig han 2015. Oo, bangin makaeksperyensya kita hin mga pagsari. Pero anoman an mahitabo, maaram kita nga diri gud kita babayaan ni Jehova. (Deut. 31:8; Sal. 9:9, 10) Padayon niya nga itatagana an ngatanan nga aton ginkikinahanglan basi makag-alagad kita ha iya nga matinumanon. Salit, magin determinado unta kita nga tipigan an disposisyon nga pariho han kan propeta Habakuk, nga nagsiring: “Kay bisan kon an kahoy nga igera diri rumampag, diri man an mga balagon han ubas mamunga; an kabudlay han olibo makakawang; ngan an mga uma diri mahatag hin karaunon; an kapangon nga kakarnerohan kukuhaon tikang ha toril, ngan mawawaray kapangon nga kabakahan dida ha mga toril: Kondi ako magmamalipay dida kan Jehova, ako magmamahimongayaon dida han Dios han akon kaluwasan.” (Hab. 3:17, 18) Oo, hini nga bug-os nga tuig, hinaot malipayon nga pamalandungon naton an mga bendisyon ni Jehova ha aton ngan sundon an igin-aaghat han tinuig nga teksto para ha 2015: ‘Magpasalamat kan Jehova, kay maopay hiya.’—Sal. 106:1.