1. Ano nga mga ulang ha pagsangyaw an gin-atubang han mga Kristiano ha moderno nga panahon?

HA IKATARAPOS han ika-19 ka siglo ngan temprano han ika-20 ka siglo, an mga Estudyante han Biblia * inatubang hin damu nga ulang. Pariho han mga Kristiano ha siyahan nga siglo, gutiay la hira ngan an mensahe nga ira iginsangyaw diri naruruyagan han damu nga tawo. Ginhunahuna liwat han kadam-an ha kalibotan nga diri hira edukado. Ha urhi, han iginlabog hi Satanas dinhi ha tuna, gintimaraot hira. (Pah. 12:12) Ngan tikang hito nga panahon, nagsasangyaw hira durante hinin “kataposan nga mga adlaw . . . nga makuri pakiangayan.”—2 Tim. 3:1.

2. Ano an ginhihimo ni Jehova basi mabuligan kita ha pagsangyaw nga buruhaton?

² Pero katuyoan ni Jehova nga ipasamwak han iya katawohan yana an maopay nga sumat ha bug-os nga kalibotan, ngan waray makakapugong  ha iya ha pagtuman hito nga katuyoan. Sugad la nga gintalwas niya an kadaan nga nasud han Israel tikang ha Babilonya, gintatalwas liwat niya an iya mga surugoon ha moderno nga panahon tikang ha “Babilonya nga Gamhanan,” an imperyo han buwa nga relihiyon ha kalibotan. (Pah. 18:1-4) Gintututdoan kita niya para ha aton kaopayan, ginbibendisyonan kita hin mamurayawon nga pagkinabuhi, ngan ginbubuligan kita nga tutdoan an iba mahitungod ha iya. (Basaha an Isaias 48:16-18.) Diri ini nagpapasabot nga gin-gagamit ni Jehova an iya abilidad ha paghibaro han tidaraon basi maniobrahon an mga panhitabo ha tuna para mag-uswag an pagsangyaw han Ginhadian nga buruhaton. Oo, may pipira nga kahimtang ha kalibotan nga nakakabulig basi magin mas masayon an aton pagsangyaw. Pero nakakaeksperyensya pa gihapon kita hin pagtimaraot ngan iba pa nga ulang tikang ha kalibotan ni Satanas. Naglalampos kita hini nga buruhaton pinaagi la han bulig ni Jehova.—Isa. 41:13; 1 Juan 5:19.

3. Paonan-o nagin hura an tinuod nga kahibaro?

³ Gin-giyahan ni Jehova hi propeta Daniel ha pagtagna nga magigin hura an tinuod nga kahibaro ha panahon han kataposan. (Basaha an Daniel 12:4.) Ginbuligan ni Jehova an mga Estudyante han Biblia nga masabtan an importante nga mga kamatuoran ha Biblia ngan isalikway an buwa nga katutdoan han Kakristianohan. Ginagamit niya yana an iya katawohan basi ipasamwak an tinuod nga kahibaro ha bug-os nga tuna. Yana, nakikita na naton an katumanan han tagna ni Daniel. Haros 8,000,000 na an kinarawat han kamatuoran ngan nagpapasamwak hito ha bug-os nga kalibotan. Ano an pipira nga butang nga nakakabulig ha katawohan ni Jehova ha pagsangyaw han kamatuoran?

4. Han ika-19 ka siglo, pira nga yinaknan an may-ada hubad han Biblia?

⁴ Yana, damu nga tawo an may Biblia, ngan nakakabulig ini ha aton ha pagsangyaw han maopay nga sumat. Pero iba an kahimtang hadto. Ha sulod hin mga siglo, igindiri han mga klero han Kakristianohan an pagbasa han Biblia, ngan iginpapatay pa ngani an pipira nga naghubad hito. Kondi han ika-19 ka siglo, may mga organisasyon nga naghubad o nag-imprinta han Biblia, ha bug-os o han mga bahin hito, ha mga 400 nga yinaknan. Ha ikatarapos hito nga siglo, damu an may-ada na Biblia pero diri hira maaram han igintututdo hito.

5. Ano an nahimo han mga Saksi ni Jehova may kalabotan ha paghubad han Biblia?

⁵ Maaram an katawohan ni Jehova nga kinahanglan nira isangyaw kon ano an igintututdo han Biblia, ngan ito gud an ira ginbuhat. Dugang pa, naggamit ngan nanaltag hira hin iba-iba nga bersyon han Biblia. Tikang han 1950, iginpublikar nira an New World Translation of the Holy Scriptures, ha bug-os o han mga bahin hito, ha sobra 120 nga yinaknan. Han 2013, iginpublikar nira an ginrebisa nga Ingles nga edisyon han New World Translation nga mas masayon ihubad. An paggamit hin matin-aw ngan masayon masabtan nga Biblia nabulig ha aton ha pagtuman han pagsangyaw nga buruhaton.

6, 7. (a) Mationan-o kakalyap an girra ha moderno nga panahon? (b) Paonan-o an pagkaada kamurayawan ha pipira nga nasud nakabulig ha aton nga makagsangyaw?

⁶ Bangin magpakiana ka, ‘Nagin mamurayawon na gud ba an kalibotan?’ Pananglitan, han ika-20 ka siglo, minilyon an namatay tungod han girra, labi na durante han duha nga girra ha kalibotan. Pero han 1942, durante han Girra ha Kalibotan II, hi Nathan Knorr, an nangunguna ha mga Saksi ni Jehova hito nga panahon, nagpahayag ha usa nga kombensyon han ulohan nga “Kamurayawan—Magpapadayon ba Ito?” Iya iginpresentar an mga ebidensya tikang  ha Pahayag kapitulo 17 nga an girra hito nga panahon magtutugway, diri ha Armagedon, kondi ha usa ka panahon hin kamurayawan.—Pah. 17:3, 11.

⁷ Han natapos an Girra ha Kalibotan II waray magkaada hin kamurayawan ha ngatanan nga nasud. Sumala ha usa nga reperensya, nagkaada hin 331 nga girra tikang han 1946 tubtob han 2013. Minilyon an namatay. Kondi durante hito nga katuigan, damu nga nasud an may kamurayawan, ngan ginsalingabot ito han katawohan ni Jehova basi ipasamwak an maopay nga sumat. Ano an resulta? Han 1944, waray pa mag-110,000 an magwarali ha bug-os nga kalibotan. Pero yana, haros 8,000,000 na! (Basaha an Isaias 60:22.) Diri ba kita mapasalamaton nga nakakagsangyaw kita ha mamurayawon nga kahimtang?

8, 9. Ano an mga pag-uswag ha transportasyon, ngan paonan-o ito nakakabulig ha aton buruhaton?

⁸ An pag-uswag han transportasyon nakakabulig gud ha aton buruhaton. Han 1900—mga 21 ka tuig tikang han naimprinta an siyahan nga gowa han Watch Tower—8,000 la nga awto an nakarehistro ha bug-os nga Estados Unidos, ngan pipira la an mag-opay nga kalsada. Pero yana, sobra usa ngan tunga ka bilyon na an nakarehistro nga awto ha bug-os nga kalibotan ngan damu na gud an mag-opay nga kalsada. An mga awto ngan kalsada nakakabulig ha aton nga maipasamwak an maopay nga sumat ha higrayo nga lugar. Pero bisan kon naukoy kita ha lugar nga diri masayon an pagbiyahe ngan kinahanglan naton magbaktas hin hirayo, ginbubuhat naton an ngatanan basi makagsangyaw ha mga tawo diin man hira naukoy.—Mat. 28:19, 20.

⁹ An iba nga klase hin transportasyon nakakabulig liwat ha aton buruhaton. Pinaagi hin mga trak, barko, ngan tren nakakagpadara kita hin basado ha Biblia nga mga literatura ha higrayo nga lugar ha sulod la hin pipira ka semana. Pinaagi hin eruplano, an mga paramangno han sirkito, membro han Komite han Sanga, misyonero, ngan an iba pa madagmit nga nakakabiyahe basi magpahayag ha mga kombensyon o magbuhat hin iba pa nga teokratiko nga toka. Dugang pa, an mga membro han Nagmamando nga Lawas ngan iba pa tikang ha headquarters nakakakadto ha damu nga nasud basi parig-unon ngan tutdoan an kabugtoan. Salit an pag-uswag ha transportasyon nabulig basi magkaurosa an katawohan ni Jehova.—Sal. 133:1-3.

10. Kay ano nga masisiring nga an Ingles usa nga internasyonal nga yinaknan?

¹⁰ Han siyahan nga siglo, Koine, o komon nga Griego nga yinaknan, an ginagamit han damu nga tawo ha Imperyo han Roma. Yana, damu an nagamit han Ingles ha bug-os nga kalibotan. Ngani, an libro nga English as a Global Language nagsiring: “Mga 25 porsyento han populasyon ha kalibotan an maaram o maopay magyakan hin Ingles.” Damu an nag-aaram han Ingles tungod kay ginagamit ito ha bug-os nga kalibotan ha pakigkomunikar may kalabotan ha negosyo, politika, syensya, ngan teknolohiya.

11. Paonan-o an Ingles nakakabulig ha buruhaton han katawohan ni Jehova?

¹¹ An kalyap nga paggamit han Ingles nabulig ha pagpauswag han putli nga pagsingba. Ha damu ka tuig, an Barantayan ngan an iba pa naton nga publikasyon, siyahan nga gin-iimprinta ha Ingles. Ito an opisyal nga yinaknan ha headquarters han mga Saksi ni Jehova. Ito liwat an ginagamit ha pagtutdo ha mga estudyante ha Watchtower Educational Center ha Patterson, New York, E.U.A.

12. Iginhuhubad an aton mga literatura ha pira nga yinaknan, ngan paonan-o nakakabulig an mga program ha kompyuter basi magin posible ini?

¹² Tungod kay pribilehiyo naton nga isangyaw an maopay nga sumat han Ginhadian ha ngatanan nga nasud, iginhuhubad naton an aton mga literatura ha mga 700 nga yinaknan. An mga kompyuter ngan mga program ha kompyuter, sugad han MEPS (Multilanguage Electronic Publishing System), nakakabulig ha aton hini nga buruhaton. Sugad nga resulta, naipapasarang naton an kamatuoran ngan nagkakaada kita pagkaurosa ha bug-os nga kalibotan. Pero labi nga nagkakaurosa kita tungod kay nagyayakan kita han mas importante nga “uray” o putli nga yinaknan han kamatuoran ha Biblia.—Basaha an Sepania 3:9.

13, 14. Paonan-o an moderno nga mga Kristiano nagpapahimulos han mga balaud ngan mga desisyon han korte?

¹³ Sugad han aton ginhisgotan ha nahiuna nga artikulo, an mga Kristiano han siyahan nga siglo nagpahimulos ha balaud han Roma nga iginpatuman ha bug-os nga imperyo. Yana, nagpapahimulos liwat an mga Kristiano han mga probisyon han balaud. Pananglitan ha Estados Unidos—an lokasyon han aton headquarters—an Konstitusyon naghahatag hin kagawasan ha relihiyon, pagpahayag, ngan pagkatirok. Nagpapasabot ini nga an aton kabugtoan didto may kagawasan ha pagkatirok  ngan pagsangyaw. Pero may mga panahon nga ginkinahanglan nira depensahan ha korte an pipira nira nga katungod. (Fil. 1:7) Han an katawohan ni Jehova ha Estados Unidos gindid-an nga gamiton an ira mga katungod, nag-apela hira ha higtaas nga korte diin kasagaran nga nadaog hira.

¹⁴ Ha iba liwat nga nasud, napakadto kita ha mga korte basi depensahan an aton kagawasan ha pagsingba ngan pagsangyaw. Kon napipirde kita, naapela kita ha internasyonal nga mga korte. Pananglitan, tubtob ha Hunyo 2014, nagdaog na kita hin 57 nga kaso ha European Court of Human Rights, ngan an desisyon hito sadang sundon han ngatanan nga nasud nga membro han Konseho han Europa. Bisan kon ‘napupungot ha aton an ngatanan nga nasud,’ an mga korte ha damu nga nasud naghahatag ha aton hin kagawasan ha pagsingba.—Mat. 24:9.

15. Paonan-o nag-uswag an pamaagi han pag-imprinta, ngan paonan-o ito nakakabulig ha aton?

¹⁵ An pag-uswag han industriya han pag-imprinta nakakabulig ha aton nga maisangyaw an maopay nga sumat ha bug-os nga kalibotan. Ha naglabay nga ginatos ka tuig, gin-gamit han mga tawo an paagi han pag-imprinta nga gin-imbento ni Johannes Gutenberg han mga 1450. Pero han naglabay nga duha ka siglo, nagkaada makatirigamnan nga pag-uswag ha industriya han pag-imprinta. An mga makina ha pag-imprinta nagin mas dagku, malaksi, ngan high-tech. Nagin barato liwat an papel ngan pag-bookbind. An letterpress ginsaliwnan hin offset printing, salit nagin malaksi an pag-imprinta ngan nag-uswag an kalidad han mga retrato. Paonan-o ini nga mga pag-uswag nakakabulig ha aton buruhaton? Tagda ini: An siyahan nga gowa han Watch Tower (Hulyo 1879) gin-imprinta ha Ingles la. Waray ito mga retrato ngan 6,000 la nga kopya an gin-imprinta. Yana, paglabay hin 136 ka tuig, gin-iimprinta na ito ha sobra 200 nga yinaknan. May-ada na ito mag-opay ngan de-kolor nga mga retrato, ngan sobra 50,000,000 nga kopya han tagsa nga gowa hito an gin-iimprinta.

16. Ano nga mga imbensyon an nakakabulig ha aton pagsangyaw ha bug-os nga kalibotan? (Kitaa an retrato ha tinikangan hini nga artikulo.)

¹⁶ Tagda an pipira nga imbensyon ha naglabay nga 200 ka tuig nga ginagamit han katawohan han Dios ha pagsangyaw han maopay nga sumat. Gin-unabi na naton an tren, awto, ngan eruplano, pero may-ada liwat bisikleta, makinilya, garamiton ha Braille, telegrapo, telepono, kamera, audio ngan video nga rekorder, radyo, TV, pelikula, kompyuter, ngan Internet. Ini nga mga imbensyon nakakabulig ha aton pagsangyaw nga buruhaton. Sugad nga katumanan han tagna nga an katawohan ni Jehova “magsusupsop han gatas han mga nasud,” maaramon nga ginagamit naton an mga imbensyon han mga nasud basi makagpublikar han Biblia ngan hin mga literatura nga basado ha Biblia ha damu nga yinaknan.—Basaha an Isaias 60:16.

17. (a) Ano an ginpapamatud-an han aton mga ginhisgotan? (b) Kay ano nga gintugotan kita ni Jehova nga magin iya “mga igkasi-magburuhat”?

¹⁷ Matin-aw nga ginigiyahan gud ni Jehova an aton pagsangyaw nga buruhaton. Syempre, diri hiya nadepende ha aton bulig basi matuman an iya katuyoan. Pero gintugotan kita han aton mahigugmaon nga Amay ha langit nga magin iya “mga igkasi-magburuhat.” Pinaagi hito, nagkakaada kita higayon nga maipakita an aton gugma ha iya ngan ha aton igkasi-tawo. (1 Cor. 3:9; Mar. 12:28-31) Pahimulosan unta naton an tagsa nga higayon nga maipasamwak an mensahe han Ginhadian, an pinakaimportante nga buruhaton ha tuna. Hinaot ipakita naton nga mapasalamaton gud kita ha giya ngan bendisyon ni Jehova ha aton pagtutdo nga buruhaton ha bug-os nga kalibotan!